Parei 12

A Erut irpep'n a Sim'is katau a P'ita al p'resin

1Arna naran lera, a mlin a Erut iutakmdina m'ertu kinkin avp'lt m'a sas. 2Katrp'n a Sim'is, iv'i tv'aln a Sun, a tali lil. 3Naran ila ti dui lilil a Isrel avrn ip'as ani, iani ml kauadei a P'ita. Naran lera iv'i naran na tim'ah ahan p'ret iis nen ihei. 4#Avruh 12:1-27.Naran iuadei a P'ita itaui al p'resin, kataui al lm'ar krup iv'a, (m'rnur arv'a arna krup iamk), a ti apavp'auri. A Erut irn ti ipalav'i kauirv'a av'aran asnr nelnal atah tim'ah na Pasuva.

Ensel iamk ilev'lei a P'ita arna p'resin

5Laha, avuadei a P'ita ilak al p'resin, v'eti sas avtu tamat sanan iel asn Atua. 6Arna lihat iamk, naran itv'i ti a Erut irn ti ipalav'i kauirv'a av'aran hara, a P'ita im'atr a p't nut nar m'rnur arru, atvhuda sarei a sen iru. M'ertu uraur avp'aus nut asn pn liu na p'resin. 7Laha, pavrni, enselan a Mlin Lilad ima asnn, laha nut ren ier al nmah. Laha, ensel iusei a P'ita arna tv'eliel nen, kasp'ei, kavr ti a, “Pathal ilahml.” Laha, sen arna lm'an irs a nadep'. 8Sarei, ensel ivr ani, kavr ti a, “Pav'uda klusam kahuda susam.” Laha, iani. Ensel ivr ani, kavr ti a, “Paua klus na m'lam kasapa kana.” 9Laha, iv'el kasapei kadav'a av'aran, v'eti iarndu ti sei ensel iani iv'i si dau v'aha ihei, v'eti iv'ah ti im'atr kala sei uaki. 10Arsiv' m'rnur itauamu m'a nki ml itauatah karier asn pn liu iv'i aian, iv'i nki apandan kadav'a arna v'anu lil. Pn liu nen iela hin, laha, arv'a aut karsapa navanel iamk, iv'amk m'a ti ensel lahara ilni.

11Naran a P'ita irndu ti sei itu hin iv'i si dau, ivr ti a, “Hilaha nrndu mamh ti a Mlin Lilak itep'a enselan kalev'la kana al lm'an a Erut m'a si udlani ardu a Isrel avv'ah ti apavani.”

12Naran iv'ahur sei itu hin, iv'a asn nmahan a Meri iv'i a unian a Sun, tv'el nahan iv'i a Mak. Nelnal avlakp'lt atlera kavtu tamat. 13Naran a P'ita ispspa pn liu na naml na nmah, vitar na m'akarien iamk, nahan iv'i a Ruta, ima a ti iparni. 14Naran irndu drln a P'ita, irn ip'as istudau, v'eti iaiela pn liu na naml, v'eti ivrvr kam'alet ml eim kavr ti a, “A P'ita ip'tir asn pn liu na naml.” 15Laha, avvr ani kavvr ti a, “Nakm kdilin.” V'eti ivr anr dav'a dav'a kavr ti a, “Ihei, nvrdaui.” Sarei, avvr ti a, “Iv'i enselan la ip'auri ha.”

16V'eti a P'ita ispspa liu uam. Laha, aviela pn liu kavlei kavrdus nlr ani. 17V'eti a P'ita iah lm'an katukarr a ti amavv'ana, kavrp'ep'ei anr nut a Mlin Lilad ilev'lei inap'ei al p'resin, kavr ti a, “Pavrav'a kavrp'ep'a si lera anr a Sim'is m'er tv'ald.” Sarei, ilnr kadav'a ml arna nut uraur.

18M'ih nen, m'etav'aran nrnren, arm'rnur avuaual istudau, kavmimiman a hir, kavvr ti a, “?A P'ita hini?” 19Hin a Erut itala an a P'ita v'eti iapaslei, kamimani ihua anr arm'rnur lahara, sarei katu v'nen a ti aparpep'nr.

Itauatah a si lera a Erut iln nut a Sutia kadav'a kalak a Sisaria.

M'ienen a Erut

20Dav'a, a Erut nln irer ihuadau anr m'ertu a Taia m'ei a Saitun. Sena si lera, avp'lt kavrav'a asnn. Itauamu avv'ana m'a dui iamk ip'aur nmahan a Erut, nahan iv'i a Plastas, kavani ti isapa v'nenar. Kavrav'a asn a Erut kavmimani ti apavan tamat m'ei, sena ti m'ertu arna v'anuar avul suadar arna v'anuan a mlin.

21Laha, arna napn iamk attu sarei, hin a Erut iua klus p'asan iv'i nka mlin lil, kalak arna napl p'asan kav'ana m'er. 22Laha, nelnal avv'ara eia kavvr ti a, “Hin iv'ana ianep'a m'ertu, v'eti inap'ei atua ki iamk.” 23Iv'amk m'a ti enselan a Mlin Eia irp a Erut, sena ti iahani nahan Atua ipav'a eia. Laha, ptpat avhani irhap'ni.

24V'eti v'nenan Atua ivrvr kaier nut istudau.

Sas itap'er a Panapas m'ei a Sul a ti aparan parian Atua

25Dav'a hir a Panapas m'ei a Sul arhiris a parei avtap'er sanan, karandan a Serusalem karlev' a Sun, tv'el nahan iv'i a Mak, isapar, kavrahum'alet ml.

Currently Selected:

Parei 12: nmb

Highlight

Copy