Parei 10

Enselan Atua iv'ana m'ei a Kunilias naran iklus m'aten kala sei

1Arna nut a Sisaria dui iamk ilak, nahan iv'i a Kunilias, iv'i mlin na m'rnur inelnal iv'amk (100), nahar iv'i ardu a Itali. 2Hin iv'i dui iv'ah Atua kadedrn ani, hin m'er m'ertu udlani avlak al nmahan. Ilev' sian nakl katutau a nelnal siar ihei. Iel itu tamat asn Atua. 3Arna napn iamk ihih m'etaneiel itl knarev', iklus m'aten kala enselan Atua ima asnn eim, kavr ani, kavr ti a, “!Kunilias!”

4Sarei, naran ilei, idedrn kavr ti a, “?V'ata, Mlin?”

Ensel ivr ani, kavr ti a, “Atua itrn sera tamatam katla sera pari p'asam, kav'ahuri. 5Hilaha, patep'a m'ertu kinkin apavrav'a a Supa, kavv'ara a dui iamk, nahan iv'i a Saimun kav'i a P'ita. 6Hin ilak asn dui iamk im'akar arna nila p'ak pluk nakl, nahan iv'i a Saimun. Nmahan iter a p'ak nata.” 7Naran ensel la iv'ana m'ei a Kunilias hara iruh ml, hin iv'ara anr m'ertu na m'akarienan arru, m'a m'rnur iamk iv'ah Atua ilak asnr m'ertu avp'auri nakl. 8Kavrp'ep'a si udlani lera anr, katap'er avv'el kavrav'a a Supa.

A P'ita ila sei Atua iv'iv'en ani

9M'ih nen lihalm'au, naran hir avsapa navanel kavihih nut a Supa, a P'ita iv'a arna m'lden arna nmah eia a ti ipatu tamat. 10Kadama karn nam'er istudau karn ti ipahatat. V'eti naran andedp' tim'ah nan, iklus m'aten. 11Kala ti nut eia itapar, kala si iamk inep'a kalik lil ahudei arna kkan iv'a, kulnrhrahei ima a nadep'. 12Si slm m'a si dm udlani arna nadep', sei iharev' arna nadep', m'a m'anh udlani avtetv arna p'knaran avlak a nln. 13Laha, karn nadl iamk ivr ani, kavr ti a, “P'ita, pap'tir karp si kinkin iamk kahani.”

14V'eti a P'ita ivr ti a, “U Mlin Eia, ikahei, sena ti ndamuhan la si kinkin iaviviln a ti apahani kastu arna nahm.”

15Nadl lahara ivr ani ml, iv'i v'aru nen, kavr ti a, “Sei Atua itaui kavr ti ip'as, nakm mavr ti istu.” 16Si lera itu hin iv'atl, sarei, alev' kalik lera im'alet ml eia.

M'ertuan a Kunilias avv'ara an a P'ita a ti ipav'a a Sisaria

17Naran a P'ita iv'ahur si lera karn ti iparndu sei Atua iv'iv'en ani, pavrni, ardu a Kunilias itap'er hara atvmiman sera nmahan a Saimun katvp'tir sarei asn pn liu. 18Laha, avv'ara kavvr ti a, “?A Saimun iv'i a P'ita ilak atlaha?”

19Naran a P'ita iv'ahur sei itla sarei, M'im'iln P'as ivr ani, kavr ti a, “Palei, ardu artl avtala anh. 20Sena si lera, pap'tir kadav'a auei kasapar uaki. Madedrn a si kinkin, sena ti Kana ntap'er.”

21Laha, a P'ita iv'a auei asnr ardu a Kunilias itap'er avrama asnn hara, kavr ti a, “?Kvtala a kana? Kana hilukih. ?Kvrama sena v'ata?”

22Avvr ani kavvr ti a, “Mlin na m'rnur iamk, iv'i a Kunilias, itep'a kam'em'. Hin iv'i dui p'as iamk, idedrn an Atua. Nelnal a Isrel avv'ah ti iv'i dui p'as iamk. Ensel p'asan Atua ivr ani kavr ti ipav'ara anh pama al nmahan a ti iparn v'nenam.” 23Sarei, a P'ita ivr ti apavrama eim kavm'atr a utan.

M'ih nen, a P'ita m'er m'ertu kinkin avv'ah a Iesu arna nut a Supa, avv'el kavsapar.

A P'ita iv'a asn a Kunilias

24M'ih nen ml, avier a Sisaria, naran hir a Kunilias avlak kavtrahr. Hin itv'ara sarei a nl nam'elan udlani m'er tv'aln udlani avp'lt atlera. 25Naran a P'ita iv'a asn nmahan a Kunilias, hin ima a ti ipalei kasisihpu asn tln kapatei. 26V'eti a P'ita iuala lm'an, kavr ani, kavr ti a, “Pap'tir. Kana nv'i m'ertu uaki kanap'ah.” 27Naran a P'ita iv'ana m'ei kadav'a eim, ila ti m'ertu inelnal atvp'lt sarei kavr anr kavr ti a, 28“Kam'i ktvrndu sera ti iaviviln a ti m'ertu a Isrel ipap'lt m'er v'anudl kadav'a al nmahar. V'eti Atua itv'iv'en sarei a kana a ti nkavr ti m'ertu kinkin iaviviln kastu arna nahn. 29Sena si lera, naran kvv'ara a kana, nma ilahml, navr si kinkin. Hilaha nmiman a kam'i, ?Kvv'ara a kana sena v'ata?”

30A Kunilias ivr ti a, “Arna napn iv'a iv'siau, kana nln tim'ah katu tamat eimak. Dav'a, arna m'etaneiel itl knarev', inep'a hilaha, pavrni, dui iamk klusan ier istudau, ima kap'tir asnk kavr ti a, 31‘Kunilias, Atua itrn sera tamatam, katla sera pari p'asam kav'ahuri. 32Patep'a dui kinkin apavrav'a a Supa kavv'ara a dui iamk, nahan iv'i a Saimun kav'i a P'ita. Hin ilak asn dui iamk im'akar arna nila p'ak pluk nakl, nahan iv'i a Saimun. Nmahan iter a p'ak nata. Hin naran ipama ipavrp'ep'a si kinkin anh.’ 33Sena si lera, ntep'a v'nen iv'a asnm ilahml sarei. Nakm kan si p'as a ti kma asnm'em' atlaha. Hilaha kam'em' udlani nvlak atlaha arna nahn Atua a ti p'vv'rn a v'nen udlani Atua itaui ti pavrp'ep'ei a kam'em'.”

A P'ita ivrp'ep'a v'nen p'as al nmahan a Kunilias

34 # TVH 10:17. Laha, a P'ita ivrp'ep'a sei kavr ti a, “Nvrdaui, hilaha nrndu ti arna nahn Atua m'ertu udlani avnap'amk. 35Sena ti, arna nut udlani, Atua irn ip'as a m'ertu idedrn ani kan sei iviviln. 36Kam'i ktvrndu sera v'nen la Atua itap'ei iv'a asnr m'ertu a Isrel ha, kavrp'ep'a ti m'ertu ipalev' tamat aranan a Iesu Kristu iv'i Mlinar m'ertu udlani. 37Kam'i kvrndu sei ittu sera hin arna nut a Sutia udlani. Itudina hin arna nut a Kalili naran a Sun ivrp'ep'a v'nen na paptais. 38Kam'i ktvrndu sera nut Atua itu M'im'iln P'as m'a nut huan an a Iesu a Nasaret inap'ei. Hin iunanut kan pari p'as kan mamh m'ertu udlani avlak a nv' nut huan a Sitan, sena ti Atua ilak m'ei.

39Kam'em' nvla si udlani iani arna nut a Isrel m'ei a Serusalem. Hir avluei arna su lamu kavrpi im'a. 40V'eti arna nitla napn nen, Atua iani ithal ml arna m'ien kani ti m'ertu avlei arna nut m'auar. 41Iav'iv'ani a m'ertu udlani, v'eti a kam'em' uaki, nvv'i m'ertu itv'li sera kam'em' itauamu, a ti p'vv'i v'nenan. Kam'em' la nvhatatp'lt m'ei kavm'n nauei ha, naran itthal sarei arna m'ien. 42Laha, itu v'nen a kam'em' kavr ti p'vvrp'ep'a v'nenan asnr m'ertu udlani kavvrp'ep'a ti Atua itaui ti hin uaki ipav'ana hua m'a m'ertu isilv' m'a m'ertu im'a. 43Hin, pruvet udlani tituei avvruri kavvrp'ep'a nahan, a ti m'ertu udlani ipav'ahi, Atua ipalev'lei arna si stu.”

M'im'iln P'as iv'a arna v'anudl

44Naran a P'ita idvr v'nen lera uam, M'im'iln P'as iv'a aranar m'ertu udlani avrn v'nen. 45Laha, m'ertu a Isrel la avv'ah a Iesu ha, nki avsapei a P'ita arna navanel, avrdus nlr ani, sena ti Atua itu M'im'iln P'as anr v'anudl. 46Sena ti avrn ti hir avv'ana arna v'nen uraur kavani ti nahan Atua iv'a eia.

Sarei, a P'ita ivr anr kavr ti a, 47“M'ertu udlani laha atvlev' sera M'im'iln P'as inep'a sera nakd. ?Hin ak irndu ti ipavrkarr a ti amavpaptais al nauei?” 48Laha, itu v'nen anr kavr ti apavpaptais arna nahan a Mlin Lilad. Sarei, avmimani kavvr ti ipalak li uam asnr napn kinkin.

Currently Selected:

Parei 10: nmb

Highlight

Copy