Parei 9

A Sul iv'ah a Iesu

(Parei 22:6-16; 26:12-18)

1V'eti hin a Sul iv'ana hua uam, kavrp'ep'ei a ti iparpep'nr arm'ertuan a Mlin Lilad, kav'el kadav'a asn pris lil. 2Kamiman ani kavr ti ipatu lita kinkin ani a ti apavrp'ep'ei al nmah tamat udlani a Tamaskas, a ti ipavr ti ipapasla dui v'aha tav'et kinkin avsapa navanelan a Iesu, hin ipauadar udlanr kahaur kauirmar a Serusalem.

3Naran iv'el arna navanel imima asn nut a Tamaskas, iv'amk m'a ti nut ren lil iamk ima aranan dan eia, ker istudau. 4Laha, irs a nadep' karn nadl iamk ivr ani, kavr ti a, “?Sul, Sul, ktp'ev' Kana sena v'ata?”

5Ivr ti a, “?Mlin, Nakm kv'i ak?”

Laha, a Mlin Lilad ivr ti a, “Kana nv'i a Iesu, la nakm ktp'av'i ha.

6V'eti nakm pap'tir kav'el kadav'a arna v'anu lil lahatu, laha, apavr anh sei pani.”

7V'eti ardu avv'el m'ei avp'tir kavklu mau, sena ti avrn v'nen v'eti ahavla m'ertu nen. 8Laha, a Sul ithal arna nadep' kadala, v'eti iala m'ertu kinkin. V'eti avua lm'an kavuirv'a a Tamaskas. 9M'aten iprs napn itl, iahan sei, iam'n sei.

Ananaias ien paptais an a Sul

10M'ertuan a Iesu iamk ilak a Tamaskas, nahan iv'i Ananaias. Naran im'atr kala sei, a Mlin Lilad ivr ani, kavr ti a, “Ananaias.” Ivrprani, kavr ti a, “Mlin Lilak, kana hilaha”.

11A Mlin Lilad ivr ani, kavr ti a, “Pap'tir kadav'a a navanel la avr ti iv'i Navanel Viviln ha, kadav'a al nmahan a Sutas kamiman dui iamk nahan iv'i a Sul, iv'i dui a Tasis. Parn, hilaha itu tamat. 12Naran im'atr, ila dui iamk, nahan iv'i Ananaias, ima eim asnn, katu lm'an aranan a ti ipaledu sei ml.”

13V'eti Ananaias ivrprani, kavr ti a, “Mlin Lilak, nrn v'nenar nelnal avvrur aulera kavvr ti ien si stu istudau kutakm a m'ertu p'asam a Serusalem. 14Arpris lil avtap'ei ima atlaha a ti ipauadar m'ertu udlani avv'ara arna naham.”

15V'eti a Mlin Lilad ivr ani, kavr ti a, “Pav'el, sena ti Kana ntv'li sarei a ti ipavrp'ep'a nahak asnr v'anudl m'er armlin m'er arm'ertu a Isrel. 16Kana p'ev'iv'en ani der lilil udlani ipaiari sena nahak.”

17Laha, Ananaias iv'el kadav'a eim al nmah lahara katu lm'an arna ptn a Sul kavr ti a, “Tv'alk, Sul. A Mlin Lilad, iv'i a Iesu, la iv'iv'en Hin anh naran ksapa navanel ha, Hin itep'a kana a ti paledu sei ml kalini a M'im'iln P'as.” 18Iv'amk m'a ti si kinkin inep'a ninar tilau irs dan al m'aten, laha, iledu sei ml. Ip'tir, kapaptais.

19Sarei, kahatat kadama kahua ml. Laha, a Sul ilak m'er m'ertuan a Iesu a Tamaskas napn kinkin.

A Sul ivrp'ep'a ti a Iesu iv'i a Kristu

20Ilahml sarei, hin iv'a al nmah tamatar m'ertu a Isrel kavrp'ep'ei a Kristu kavr ti Hin iv'i a Natn Atua.

21Laha, m'ertu udlani avrn v'nenan avrdus nlr ani, kavvr ti a, “?Inap'i? Aulera tituei iutakm a m'ertu avv'ara arna naha lera arna nut a Serusalem. Ima atlaha sena si laha uaki, a ti ipauadar kahudar kauirv'ar asnr arpris lil.”

22V'eti v'nenan a Sul ima kahua mau kav'iv'en mamh a ti a Iesu iv'i Kristu dau, kani ti m'ertu a Isrel avlak a Serusalem ahavrndu ti apavvrprani ml.

A Sul iruh arna lm'ar ardu a Isrel

23 # 2 Kurin 11:32,33. Napn inelnal itv'siau sarei, ardu a Isrel avp'lt kavtala a navanel a ti apavrpep'ni. 24V'eti a Sul irn v'nen ivrur sei avrn ti apavani. Iel ren m'a lihat avlak kavp'aus pn liu na naml imlden v'anu kavtrahi a ti apavrpep'ni. 25V'eti arm'ertuan a Iesu avlav'i lihat kavtaui al naten kavani ielahp'ra uidua na naml na v'anu kavulnrhrahei iv'a a nadep'.

A Sul ilak arna nut a Serusalem

26Naran a Sul ier a Serusalem, irn ti ipap'lt m'er m'ertuan a Iesu, v'eti hir udlani avdedrn ani, sena ti ahavv'ah ti iv'i m'ertu duan a Iesu. 27V'eti a Panapas ilav'i kauirma asnr apusel kavrp'ep'ei anr nut ilei a Mlinad arna navanel inap'ei, kavr ti a Mlinad iv'ana m'ei, kavrur nut iadedrn a ti ipavrp'ep'a mamh nahan a Iesu arna nut a Tamaskas inap'ei. 28Laha, ilak m'er kunanut m'er a Serusalem kavrp'ep'a nahan a Mlin Lilad a Iesu ihua. 29Kav'ana m'er m'ertu a Isrel avv'ana arna v'nenar ardu a Kris, laha, avv'lv'al m'ei, kavrn ti apavrpep'ni. 30Naran tv'aln avrndu si lera, avlav'i kavuirv'a auei a Sisaria, kavtap'ei iv'a au arna nut a Tasis.

Sas ima kahua

31Dav'a, sas udlani arna nut a Sutia, a Kalili m'ei a Sameria avlak arna tamat kavrama kavhua kavsapa mamh p'kln a Mlin Lilad. M'im'iln P'as isr lm'ar kani ti avhua kavrama kavnelnal.

A P'ita ien mamh p'akn Ainias

32Dav'a naran a P'ita iunanut arna nut udlani, iv'a asnr m'ertuan Atua arna v'anu a Lita. 33Arna nut lera, ila dui iamk, nahan iv'i Ainias, im'atr uaki arna pasan pai isatl, p'akn im'em'a. 34A P'ita ivr ani, kavr ti a, “Ainias, a Iesu Kristu ianh kp'as ml. Pathal kalelha pasam.” Iv'amk m'a ti ithal. 35Sarei, m'ertu udlani avlak a Lita m'ei a Serun avlei kavvav nlr kavsapei a Mlin Lilad.

A Tukas ithal ml arna m'ienen

36Arna nut a Supa, tav'et iamk, nahan iv'i a Tapita, iv'i m'ertuan a Iesu. Arna v'nen a Kris, nahan avr ti iv'i a Tukas. Tav'et lera, hin iel ien pari p'as kamhmah a m'ertu nakl siar ihei. 37Arna naran lera im'at kadam'a. Laha, avsila p'akn kavtaui al rum iamk iter eia al nmah. 38A Supa iter mima asn nut a Lita uaki. Naran arm'ertuan a Iesu avrn ti a P'ita ilak arna nut a Lita, avtep'a dui arru arv'a asnn karvr ti iparakn dama asnr. 39Laha, a P'ita ip'tir kasapar. Naran ier nut, avv'av'ei iv'a al rum eia. Tvtanu udlani avp'tirtalu ani kavtakal, kavv'iv'en an a P'ita sat m'a klus udlani a Tukas ililai naran hin idsilv' uam. 40V'eti a P'ita itap'er udlani avrav'a av'aran. Laha, hin isisihpu katu tamat, kavav hin kala p'ak tav'et lahara kavr ti a, “Tapita, pathal.” Laha, ilena m'aten kalei a P'ita kathal kalak. 41Laha, a P'ita iuada lm'an kani ti ip'tir, kav'ara anr m'ertuan Atua m'er tvtanu udlani kav'iv'en anr ti tav'et lahara isilv' ml. 42Avvrp'ep'a si lera iunanut arna nut udlani a Supa, laha nelnal avrama kavv'ah a Mlin Lilad. 43Itauatah a si lera, a P'ita ilak ip'arei arna nut a Supa asn dui iamk nahan iv'i a Saimun, iv'i dui im'akar arna nila p'ak pluk nakl.

Currently Selected:

Parei 9: nmb

Highlight

Copy