Yohanes 17

Yesus nosambaheaꞌao anaguhuꞌino

17:1-26

1Pada nopugau peda naꞌa Yesus nototohanamo te lani maka nopugau ambano, “Ama, nohatomo tempono, fotiwoha kakalabhiano Anamu ⸤ Idimo ini⸥ , neanomo Anamu namotiwoha dua kakalabhiamu. 2Kapaꞌamo ingka Anamu padamo waꞌane kuasa ne kosasawindo manusia, neanomo Anamu namaꞌanda dadi suhue dhamani ne kosasawindo manusia toka newaꞌaomu ne Anoa. 3Dadi suhue dhamani maitu, maꞌanano manusia dopandeꞌaane Hintumo Kaseemie-mieꞌano, Lahataꞌala banarano, bhe dopandeꞌaane dua Yesus Kristus netudumu. 4Idi padamo afotiwoha kakalabhiamu we dhunia, hampano padamo adhalangi kahadhaa netuduꞌaomu ne Idi. 5Dadiꞌanomo Ama, waꞌa kanau toha kakalabhiaku ne sohihimu, napototo bhe kakalabhiaku ne sohihimu endefiꞌini, miinaꞌo natifokonandoo dhunia.

6Hintu padamo afotipandeꞌaangko ne kosasawindo mie kawaꞌaomu ne Idi maiꞌao ne dhunia ini. Andoa maitu fehebuaꞌamu, padamo waꞌa kanauda maka doangkafi wambamu. 7Aitu andoa dopandeꞌaanemo kosasawiꞌae kawaꞌaomu ne Idi, nomaiꞌao ne Hintu. 8Kapaꞌamo sabhaha wamba kawaꞌaomu ne Idi padamo afosampeandae bhe dotahimae. Aitu kotu-kotuꞌu dopandeꞌaanemo Idi ini amaiꞌao ne Hintu, doparasaeamo dua Hintumo tumudu kanau.

9Idi asambahea so andoa. Miina asumambahea so dhunia, tamaka so andoa newaꞌaomu ne Idi, kapaꞌamo andoa maitu fehebuaꞌamu. 10Sabhaha fehebuaꞌaku ingka fehebuaꞌamu dua. Sabhaha fehebuaꞌamu ingka fehebuaꞌakumo dua. Kakalabhiaku natiwohamo weo dadindo andoa maitu. 11Idi paemo aeate we dhunia ini, asumulimo te Hintu, tamaka andoa sadaa-daa we dhunia. O Hintu Amaku mongkilono, dambaꞌaanda weo kuasano neamu, kuasa kawaꞌaomu ne Idi, neanomo andoa daseꞌise nada Intaodi doseꞌise. 12Tangasano apobhaianda, adambaꞌaanda weo kuasano neamu kawaꞌaomu ne Idi. Idi adhaganida, sampe bhe naseemie miina bhe binasano, mpahinomo anoa toka nefotantu so binasano, somo nokoꞌulaꞌao tibuhino weo Kitabino anabii. #Mzm 41:9

13Aitu asumulimo te Hintu. Aekapunaꞌao kosasawiꞌae ini tinangke nandoo kanau we dhunia ini, neanomo andoa dakumabhintida mpuu kawulano laloku. 14Idi padamo awaꞌanda bhoasaomu, tamaka dhunia dobansida hampano andoa suano fehebuaꞌano dhunia, pedamo dua Idi ini suano fehebuaꞌano dhunia. 15Idi miina aesalo malada maiꞌao ne dhunia ini, tamaka dhumaganida ne kuasa modai. 16Andoa suano fehebuaꞌano dhunia, pedamo dua Idi ini suano fehebuaꞌano dhunia. 17Gaatidamo dembaliꞌao fehebuaꞌamu mongkilono. Fofekangkilono naꞌa ⸤ kafoinaꞌuno⸥ kabanara. Ingka bhoasaomu itu o kabanara. 18Pedamo Hintu tudu kanau we dhunia, Idi atududamo dua ne dhunia. 19Somo andoa afotawakala Wutoku ne Hintu, neanomo andoa daeꞌawa kabanara, maka damotawakala dua wutondo ne Hintu, daembali fehebuaꞌamu mongkilono.

20Idi miina kaowu asumambahea so andoa ini, tamaka asambahea dua so kosasawindo mie marasaeano ne Idi mada kaowu hampano bhihita nefolelendo. 21Aesalo sio-siomo kosasawindo daseꞌise, peda Hintu Ama seꞌise bhe Idi, Idi aseꞌise bhe Hintu. Sio-siomo dua daseꞌise bhe Intaodi, neanomo dhunia damarasaea Hintumo tumudu kanau. 22Padamo awaꞌanda kakalabhia kawaꞌaomu ne Idi, neanomo andoa daseꞌise, pedamo Intaodi doseꞌise dua. 23Idi aseꞌise bhe andoa, Hintu seꞌise bhe Idi, neanomo nasumangka mpuu kaseꞌisendo. Ane nada naꞌa dhunia damandeꞌaane Hintumo tumudu kanau, Hintumo moasianda peda kaasimu ne Idi. 24Ama, gaoku mpuu ne amai kaeateꞌaku, somo dua kaeateꞌando mie kawaꞌaomu ne Idi, dapobhai kanau. Ane nada anaꞌa damoha kakalabhiaku. Kakalabhia anaꞌa waꞌa kanauꞌe kapaꞌamo moasi kanau mpini miinaꞌo natifokonandoo dhunia. 25Hintu Amaku umadhilino, daanumo dhunia miina damandeꞌaangko, tamaka o Idi apandeꞌaangko bhe andoa ini dopandeꞌaane Hintumo tumudu kanau. 26Idi padamo afohatoandae laꞌae Hintu itu, maka amohatoda kansuhu, neanomo kaasimu ne Idi sadaa-daa weo totono lalondo bhe aseꞌise bhe andoa.”

Currently Selected:

Yohanes 17: mnbSD

Highlight

Copy