Yohanes 18

Yesus dohakoe

18:1-11

Mat 26:47-56; Mrk 14:43-50; Luk 22:47-53

1Pada nosambahea peda naꞌa, Yesus bhe anaguhuꞌino dolimbamo maka dokala te sewetano umeleno Kidron. Ne itu nandoo sehaꞌa kaendea. Yesus nopesuamo ne kaendea naꞌa bhe anaguhuꞌino. 2Yudas so mowano Yesus ne limando kaewa, nopandeꞌaane dua kaendea anaꞌa, kapaꞌamo Yesus bhe anaguhuꞌino nentuhu dopohompu-hompu ne naꞌa. 3Dadiꞌanomo Yudas nokalamo dua te naꞌa, newowoꞌo setagua tantara bhe dhagaꞌino Lambuno Lahataꞌala katudundo neangkaꞌindo imamu bhe miendo Farisi. Andoa ini detagu bhe kantalea, kaꞌula bhe ewangando.

4Yesus nopandeꞌaanemo kosasawiꞌae so kumadhadhiaꞌano ne Wutono, dadiꞌanomo nodhulu te wise maka nopugau ambano, “Ondofiomu laꞌae bhahaa?” 5Dotobhoosimo ambado, “Yesus miendo Nasaret.” Ambano Yesus, “Ingka Idimo ini.” Yudas, mie modai naꞌa, neehe-ehe dua ne itu bhe andoa. 6Sanopugau Yesus “Ingka Idimo ini”, andoa dosowo bhe dotihambitao ne wite.

7Yesus nofeenadamo toha ambano, “Ondofiomu laꞌae bhahaa?” Ambado, “Yesus miendo Nasaret.” 8Ambano Yesus, “Ingka padamo afohatokoomu Idimo ini. Ane ondofiomu Idi, hunsaꞌanomo andoa ini dokalaꞌao.” 9Kanandooꞌano peda aini somo nokoꞌulaꞌao wambano, “Ama, kosasawindo mie kawaꞌaomu ne Idi, bhe naseemie miina bhe binasano.”

10Gahaꞌa Simon Petrus bhe kampueno, lasao nobunae maka notowe bhatuano Imamu Bhalano, sampe tingalano suanano nondawu. Neano bhatua anaꞌa Malkus. 11Nopugaumo Yesus ne Petrus ambano, “Pusoloe kampuemu itu! Ingka tetewei Idi aohoꞌu ne kampohoꞌuꞌa kawaꞌaono Amaku.” #18:11 Kampohoꞌuꞌa, maꞌanano sabhaha kakadee-dee so nenamisino.

Yesus ne wiseno Hanas - Petrus nogaga miina namandeꞌao Yesus

18:12-27

Mat 26:57-75; Mrk 14:53-72; Luk 22:54-71

12Pada anaꞌa taguando tantara bhe neangkando dopoowa bhe dhagaꞌi katuduno miendo Yahudi dohakomo Yesus maka dokatapue. 13Kabhao-bhaono Yesus doowae ne Hanas, kamungkula poniano Kayafas. Kayafas naꞌa membalino Imamu Bhalano taꞌu aitu. 14Kayafasmo dua ini tumangahino miendo Yahudi ambano, “Ingka nokofahalaa namate seemie so kosasawindo raꞌeati.” 15Simon Petrus bhe seemie anaguhu sigaoꞌano doangkafi Yesus. Anaguhu seemieno naꞌa dopopandeꞌao bhe Imamu Bhalano sampe nopesua nopoowa-owa bhe Yesus weo kadeteno kamalino Imamu Bhalano. 16Tamaka Petrus taneehe-ehe we simbali ne owano fointo bhalano. Anaguhu popandeꞌaono bhe Imamu Bhalano naꞌa nosuli we simbali, nopotula-tula bhe hobhine dhagano fointo maka nowowoꞌo Petrus dopesua. 17Nopugaumo hobhine dhagano fointo naꞌa ne Petrus ambano, “Ingka hintu ini anaguhuno dua mie atatu.” Ambano Petrus, “Suano!” 18Wakutuu anaꞌa bhatua bhe dhagaꞌino Lambuno Lahataꞌala padamo detampo wea maka dehana hampano dohindi. Petrus neehe-ehe dua nehana bhe andoa.

19Imamu Bhalano nofee-feenamo Yesus, nofeenaꞌao anaguhuꞌino bhe kafoinaꞌuno. 20Yesus notobhoosimo ambano, “Idi sadhia apugau mentalea-mentalea ne dhunia, afofoinaꞌu ne lambu-lambu kasambaheaꞌa bhe ne Lambuno Lahataꞌala kapofoꞌo-foꞌonuꞌando kosasawindo miendo Yahudi. Miina sepaliꞌa apugau mpebuni. 21Noafa gahaꞌa feenaꞌao Idi? Feena mie metingke kanau peda amai pugauku ne andoa. Andoa dopandeꞌaane mpuu pugauku.” 22Pada nopugau peda naꞌa seemie dhagano kamali meehe-eheno ne itu lasao nobhantofa Yesus bhe nopugau ambano, “Gahaꞌa peda itu pugau bhe Imamu Bhalano?” 23Ambano Yesus, “Ane naꞌumala pugauku naꞌa, fotiwohae kaꞌalano; tamaka ane nakumantibha, noafa bhantofa kanau?” 24Pada anaꞌa Hanas nofotudumo damowa Yesus ne Imamu Bhalano Kayafas, daa-daaꞌe bhe katapuno.

25Gahaꞌa Simon Petrus nandoo neehe-ehe nehana. Ambado mie ne itu, “Ingka hintu ini seemie dua anaguhuno.” 26Tamaka Petrus nogaga ambano, “Suano!” Ne itu nandoo dua seemie bhatuano Imamu Bhalano, anoa ini bhahitieno bhatua mondawuꞌano tingala netoweno Petrus. Ambano mie anaꞌa “Ingka awohako saꞌituini te kaendea pobhai bhe Anoa.” 27Petrus fendua toha nogaga, gahaꞌa nopobutu nokakuhuamo manu.

Yesus ne wiseno Pilatus

18:28-38a

Mat 27:1-2, 11-14; Mrk 15:1-5; Luk 23:1-5

28Nandoo same-samentaeno dowowoꞌomo Yesus maiꞌao we lambuno Kayafas we kamalino gubernur. Miendo Yahudi dokiido damesua weo kamali naꞌa, keana dokodengo weo tubhono agamando. Kapaꞌamo gaondo daomaa haroano Paska. #18:28 Gubernur anaꞌa miendo Roma. Weo tubhono agama ane miendo Yahudi dopesua weo lambuno mie suano Yahudi dokodengomo. Dadiꞌanomo pae naembali damangkafi hohaeaꞌano Paska. 29Dadiꞌanomo Pilatus nolimba nopoꞌawaanda maka nopugau ambano, “O ae gahaꞌa nesangkatiꞌaomiu ne mie aini?” 30Tadotobhoosimo ambado, “Ane mie aini suano mie modai, ingka pae taowae ne wisemu!” 31Ambano Pilatus, “Wowoꞌoeꞌomu maka bhotusiꞌao wutomiu angkafi tubhono agamamiu.” Ambado miendo Yahudi, “Insaodi miina damolalesa kainsami taepongko mie.” 32Kanandooꞌano peda ini somo nokoꞌulaꞌao pugauno Yesus wakutuuno nopulaoꞌao nada amai so kamateꞌano.

33Pilatus nosulimo weo kamali, nobhasimo Yesus maka nofeenae ambano, “Nokotuꞌu bhahaa hintumo ini Omputo miendo Yahudi?” 34Ambano Yesus, “Kafeenamu naꞌa nomaiꞌao ne wutomu, kaa dofohatoko dua bhaindo?” 35Ambano Pilatus, “O miendo Yahudi gahaꞌa idi ini? Ingka saliwumu bhe neangkaꞌindo imamu mowako se idi. Mehabu ae gahaꞌa?” 36Ambano Yesus, “Kafopahintaꞌaku suano ne dhunia ini. Ane kafopahintaꞌaku ne dhunia ini, teteweimo mieku dapoewangimo keana doowa kanau ne limando miendo Yahudi. Tamaka daanumo kafopahintaꞌaku suano ne dhunia inia.” 37Ambano dua Pilatus, “Gahaꞌa nokotuꞌu hintu ini omputo?” Ambano Yesus, “Ingka ambamu hintu Idi ini omputo. Patudhuno kalenteꞌaku bhe kahatoꞌaku ne dhunia ini, asumakusiiꞌao kabanara. Sasuka mie tumaino ne kabanara, nametingke suahaku.” 38aAmbano Pilatus, “O ae bhahaa kabanara naꞌa?”

Yesus dobhotusiane mate

18:38b-19:16

Mat 27:15-31; Mrk 15:6-20; Luk 23:13-25

38bPada nopugau peda naꞌa, Pilatus nolimbamo toha nopoꞌawaꞌao miendo Yahudi. Ambano, “Miina sepaliꞌa aepoꞌawaꞌao kaꞌalano mie aini. 39Tamaka ingka nandoo kaneamiu ne hohaeaꞌano Paska aefolimbaangkoomu seemie katohongku. Dadiꞌanomo poindaloomu bhahaa amolimbaangkoomu Omputo miendo Yahudi ini?” 40Andoa tadokei ambado, “Koise anoa, tabeano Barabas.” Gahaꞌa Barabas naꞌa mie modai.

Currently Selected:

Yohanes 18: mnbSD

Highlight

Copy