Yohanes 16

Katuhuno lalo

16:1-4a

1“Kosasawiꞌae ini afohatoangkoeꞌomu keana nohungga kaparasaeamiu sampe humunsa kanauꞌomu. 2Hintimiu daꞌumeleꞌaangkoomu mesuaꞌomu lambu kasambaheaꞌa. Tadua nahumato tempono sasuka mie mongkokoomu kunaꞌendomo dofeompu ne Lahataꞌala. 3Kahabuꞌandomo peda naꞌa hampano miina damandeꞌao Amaku, miina dua damandeꞌao Idi. 4aKosasawiꞌae ini afohatoangkoeꞌomu neanomo nahumato tempono meꞌulaiꞌeomu ingka padamo afodhagakoomu.”

Kahadhaano Rohino Lahataꞌala

16:4b-15

4b“Aini miina amohatoangkoeꞌomu mpini kabhao-bhaono, hampano kaomponano ini nandoo sadhia apobhaiangkoomu. 5Tamaka aitu asumulimo te Tumudu kanau, gahaꞌa ne olotamiu itu miina bhe meena kanau bhahaꞌi akumala ne amai. 6Tamaka aitu afohatokomoomu, kaoguguhuꞌanomo lalomiu. 7Wambaku ini nokotuꞌu, so hintimiu nakofahalaa akumala bhe paisea. Kapaꞌamo ane pae akumala, Rohi Fotulumino pae namaiꞌikoomua, tamaka ane akumala, atumudue namai ne hintimiu. 8Nahumato kaowu Rohi maitu, miendo dhunia namoꞌinsafuanda dhosando, o kabanara bhe kabhotusino Lahataꞌala. 9Namoꞌinsafuda putae kakodhosaꞌando, hampano miina damarasaea ne Idi. 10Namoꞌinsafuanda kabanara, kapaꞌamo Idi asumulimo ne Amaku maka hintimiu paemo moha kanauꞌomu. 11Namoꞌinsafuanda dua kabhotusino Lahataꞌala, hampano Mowano Dhunia ⸤ maꞌanano Kafeompuꞌando seetani⸥ padamo nobhotusie.

12Nandoo nobhahi dua so nefohatoꞌaoku ne hintimiu, ampamo kaowu aitu paeꞌo sumodaiꞌeomua. 13Tamaka nahumato kaowu Rohino Lahataꞌala meowano kabanara, Anoamo so matokoomu mandeꞌaoꞌomu sabhaha kabanara. Anoa paise napugau namaiꞌao ne Wutono, tamaka o ae maka dua nefetingkeno namohatoangkoeꞌomu. Namebhihitaiꞌangkoomu dua so kumadhadhiaꞌano mada kaowu. 14Anoa namotiwoha kakalabhiaku, hampano namebhihitaiꞌangkoomu sabhaha netahimano ne Idi. 15Kosasawiꞌae ndumandooꞌano ne Amaku nandoo dua ne Idi, kapugauꞌakumo putae Rohi maitu namebhihitaiꞌangkoomu sabhaha netahimano ne Idi.”

Kaꞌia namaꞌindulukie kasabha

16:16-33

16“Tana sebantaha paemo moha kanauꞌomu, tamaka tana sebantaha toha moha kanaumoomu dua.” 17Seemie hodua anaguhuꞌino tadopofee-feenamo ambado, “O ae bhahaa maꞌanano pugauno naꞌa, ‘Tana sebantaha paemo moha kanauꞌomu, tana sebantaha toha moha kanaumoomu dua’? O ae dua maꞌanano pugauno, ‘Idi akumala ne Amaku’?” 18Dadiꞌanomo dopugaumo ambado, “O ae bhahaa maꞌanano, ‘Tana sebantaha’? Ingka miina dalumosangieꞌomu.”

19Gahaꞌa Yesus nopandeꞌaane patudhundo dameenae, dadiꞌanomo nopugaumo ambano, “Bhahaa pofee-feenaꞌao pugauku saꞌituini, ‘Tana sebantaha paemo moha kanauꞌomu, tana sebantaha toha moha kanaumoomu dua’? 20Amohatokoomu, kotu-kotuꞌu mada kaowu hintimiu moꞌaeꞌomu, mekaꞌuleiꞌomu tamaka dhunia naoꞌia. Daanumo mosabhaomu, tamaka kasabhamiu itu naembali kawulano lalo. 21Seemie hobhine nosabha wakutuuno nakoana, ingka nohatomo tempono nakumadee-dee. Tamaka salenteno anano, nolimpuꞌaanemo kakadee-deeno hampano nowulamo lalono seemie manusia notobusamo we dhunia. 22Pedamo dua anaꞌa hintimiu, aitu mosabhaomu tamaka mada kaowu apowoha toha bhe hintimiu bhe naowula lalomiu. Bhe naseemie pae bhe so magoino kawulano lalomiu naꞌa.

23Ne oleo anaꞌa paise sepaliꞌa meenaomu ne Idi. Amohatokoomu, kotu-kotuꞌu o ae maka dua nesalomiu ne Amaku weo neaku, tetewei namaꞌangkoeꞌomu. 24Ampa oleo itu miinaꞌo konimesaloomu weo neaku. Dadiꞌanomo tamesalomoomu, tetewei tumahimaeꞌomu neanomo nasumangkamo kawulano lalomiu. 25Kosasawiꞌae ini apale-palendaangkoeꞌomu kaowu. Gahaꞌa nahumatomo tempono paemo aepalendaangkoomu, amohatoangkoeꞌomu mentalea-mentalea laꞌae Amaku. 26Oleo anaꞌa hintimiu mesaloomu weo neaku. Naetaa mandeꞌaaneomu suano Idia so mesaloangkoomu ne Amaku. 27Kapaꞌamo wutono Amaku noasiangkoomu, hampano padamo moasi kanauꞌomu bhe parasaeaꞌomu putae Idi ini amaiꞌao ne Lahataꞌala. 28Idi ahato we dhunia amaiꞌao ne Amaku, aitu ahumunsamo dhunia asumuli te Amaku.”

29Dopugaumo anaguhuꞌino ambado, “Ingka aitu pugaumo mentalea-mentalea, miinamo mepake kapalendaa. 30Aitu tapandeꞌaanemo, Hintu pandeꞌaane bhahi-bhahiꞌae. Ingka miinamo namaraluua dameenako. Dadiꞌanomo taparasaeamo Hintu ini maiꞌao ne Lahataꞌala.” 31Notobhoosimo Yesus, “Parasaeamoomu gahaꞌa? 32Nahumato tempono, ingka aitu nohatomo, hintimiu dagumasakoomu. Seemie-seemie nasumuli we lambuno humunsa kanauꞌomu taꞌamoisa. Gahaꞌa Idi miina amoisaa, kapaꞌamo Amaku nopobhai kanau. 33Kosasawiꞌae ini afohatoangkoeꞌomu neanomo seꞌiseomu bhe Idi maka meꞌawaomu katohopono dadi. We dhunia ini meꞌawaomu kasabha, tamaka tafekatangkamo lalomiu, dhunia ataloemo.”

Currently Selected:

Yohanes 16: mnbSD

Highlight

Copy