Yohanes 15

Puꞌuno angguru sakotuꞌuno

15:1-8

1⸤ Ambano toha Yesus⸥ “Idimo ini puꞌuno angguru sakotuꞌuno, Amaku kopuuane. 2Sasuka haꞌaku tapa kobhakeno nolakoe, tamaka sasuka haꞌaku kobhakeno nofekanggelaꞌie so nodhuluꞌao kabhahino bhakeno. 3Daanumo monggelamoomu hampano wamba nefosampeku ne hintimiu. 4Seꞌiseomu bhe Idi, o Idi aseꞌise bhe hintimiu. Haꞌano angguru miina nakobhake maiꞌao ne wutono, simbali notai ne puꞌuno angguru. Pedamo dua hintimiu paise kobhakeomu, ane paise seꞌiseomu bhe Idi.

5Idimo ini puꞌuno angguru, hintimiu haꞌaꞌino. Sasuka seꞌiseno bhe Idi, Idi aseꞌise bhe anoa, anoa maitu nabhahi bhakeno; kapaꞌamo we simbaliku paise meafa-afaomua. 6Sasuka tapa seꞌiseno bhe Idi daꞌumohoe we simbali nada haꞌano sau maka nakekele. Mada anaꞌa damoꞌonue maka daꞌumohoe weo efi sampe notitawu. 7Ane hintimiu seꞌiseomu bhe Idi bhe kafoinaꞌuku naeate we totono lalomiu, maka tamesalomoomu ampa kapoindalomiu maka tetewei umawaeꞌomu. 8Ane nabhahi bhakemiu, natiwohamo kakalabhiano Amaku. Nadamo anaꞌa hintimiu kotu-kotuꞌumo anaguhuꞌiku.”

Pahinta so dapomoa-moasiꞌao

15:9-17

9“Amaku noasi kanau, Idi aoasiangkoomu dua. Meateomu weo kanini kaasiku ini. 10Ane mangkafiomu pahintaku, maka meateomu weo kanini kaasiku. Pedamo dua anaꞌa Idi aeate weo kanini kaasino Amaku kapaꞌamo aangkafi pahintano. 11Kosasawiꞌae ini afohatoangkoeꞌomu neanomo kawulano laloku naeate we lalomiu bhe kawulano lalomiu nasumungku.

12Ainiꞌaemo pahintaku, pomoa-moasiꞌaoꞌomu peda kaasiku ne hintimiu. 13Miina nandumandoo kanini kaasi moliuno kanini kaasino seemie potahoꞌaono inawano so sabhangkaꞌino. 14Hintimiumo sabhangkaꞌiku, sumanomo mangkafiomu pahintaku. 15Miinamo akumonakoomu bhatua, kapaꞌamo seemie bhatua miina namandeꞌaane nehabuno kafeompuꞌano. Tamaka akonakoomu sabhangka, hampano padamo afohatoangkoeꞌomu sabhaha nefetingkeku ne Amaku. 16Suano hintimiu mili kanau, tamaka o Idi milikoomu. Idimo tumudukoomu kumalaomu so nobhahiꞌao bhakemiu bhe sadaa-daa kantarano, neanomo o ae maka dua so nesalomiu ne Amaku weo neaku namaꞌangkoeꞌomu. 17Pedamo aini pahintaku ne hintimiu: pomoa-moasiꞌaoꞌomu.”

Dhunia dabansi Yesus bhe anaguhuꞌino

15:18-27

18“Ane dhunia dabansikoomu, tafeꞌulaimoomu ingka paꞌindulu dobansi Idi bhe hintimiu. 19Ane hintimiu maiꞌaoꞌomu ne dhunia, tetewei dhunia damasiangkoomu peda fehebuaꞌando. Tamaka padamo apilikoomu, dadiꞌanomo hintimiu suanomo fehebuaꞌano dhunia, katibansiꞌamiumo ne dhunia. 20Feꞌulaiꞌeomu pugauku ne hintimiu, ‘Seemie bhatua paise namoliu kafeompuꞌano.’ Ane damodee-dee kanau, tetewei dua damodee-deekoomu; ane damangkafi kafoinaꞌuku, tetewei dua damangkafi kafoinaꞌumiu. 21Kosasawiꞌae naꞌa dahumabue ne hintimiu hampano hintimiu anaguhuꞌiku, kapaꞌamo miina damandeꞌaanea Tumudu kanau. 22Ane pae ahumato bhe apugau bhe andoa, teteweimo pae dakodhosaa. Tamaka aitu miinamo dakotingkua dabheleꞌao dhosando. 23Sasuka bansino Idi nobansi dua Amaku. 24Ane pae aehabuanda tanda tapa nehabu-habundo bhaindo, teteweimo pae dakodhosaa. Tamaka aitu dowohamo kosasawiꞌae tanda naꞌa, gahaꞌa sadaa-daa dobansi Idi bhe dobansi dua Amaku. 25Ampamo kaowu tetewei peda anaꞌa, nokoꞌulaꞌao bhoasao tibuhino weo Kitabino Musa, ‘Andoa dobansi kanau miina bhe tingkunoa.’ #Mzm 35:19, 69:4 26Mada kaowu atumuduangkoomu Fotulumino maiꞌaono ne Amaku, Rohino Lahataꞌala meowano kabanara. Anoamo itu sumakusii kanau. 27Pedamo dua hintimiu, tetewei dua sumakusii kanauꞌomu, kapaꞌamo pobhai kanauꞌomu mpini kabhao-bhaono.”

Currently Selected:

Yohanes 15: mnbSD

Highlight

Copy