Marko 12

1Na akatumbwili kulongela nawo pa ngongo. Mundu akapanditi ngunda wa mbelesa, nakawigiti luwigo, nakahimbiti liwumba lya kupondela mbelesa, nakajengiti kilindo, nakaupingisi kwa wa kulima, nakabiti mwanja ku ndima wungi. 2Nakatumiti mbanda kwa wa kulima wala pa lukumbi lwake, nausi ayupe fipambiko fya mbelesa kwa wakulima wala. 3Na wakantoliti, wakantowiti, wakankilawisi wa waka. 4Na akatumiti kawili kwawe mbanda njini; na yula wakantemiti liwamba pa mutu, wakankitili fya lihamu. 5Na akantumiti yungi; na yula wakankomiti: na wangi wingi; wangi kuwatowa, wangi kuwakoma. 6Akona akayili nu yumonga, mwana mundu wakuganika: akantumiti yombe kwawe pa kumalakisa, kujowa, Yawanginike mwanangu. 7Leka wakulima wala wakajowiti yungi nu njini, Uyu yuyu wa kuyingila lipwela; tiwuke, tinkome, na lipwela yaliye litu. 8Na wakantoliti, wakankomiti, na wakantagiti kunja kwa ngunda wa mbelesa. 9Yakite wuli mwene bambo wa ngunda wa mbelesa? yayiche na yawayanange wakulima wala, na yawapele wayawe ngunda wa mbelesa. 10Haka lilembo ili mukasomiti lepe, ati;

Liganga lila wakalikaniti wakujenga nyumba,

Lyombe likapatiti kuya mutu wa kindusula:

11Iki kihumila pa Bambo,

Na kiyii kyakuganaganisa pa miho gitu?

12Na wakalonditi kunkamula; na wakayogwipi lipuga; pakuya wakawalalili kukita kwapindika wombe akalongili ngongo iyi: na wakandekiti, wakabiti mwanja wawe.

13Na watuma kwake wa nunuyu wa waFarisayo na waHerode, nausi wantege pa lilowe. 14Na pala wakachiti, wanjowela yombe, Mwalimu, timanya kukita uyii wa chakaka, na kwa wenga mundu nukuya kindu: pakuya ulola lepa kiwungi kya wandu, koma pa fya chakaka uwula ndila ya Mulungu: Yiyitikalika ati kumpela Kaisar nsongo, pangi nakuya wila? 15Timpele, pangi tikotoke? Leka yombe, pakumanya kwikangalakisa kwawe, akajowiti kwa wombe, Munigesela kiki? munitolele denario nausi niyiwone. 16Leka wakatoliti. Na awajowela, Kya nani kifwili iki, na malembo gake? Leka wakajowiti kwa yombe, Kya Kaisar. 17Nu Yesu akajowiti kwa wombe, Fya Kaisar mundipise Kaisar, na fya Mulungu Mulungu. Na wakaganaganiti pa yombe.

18Na wayicha waSadukayo kwa yombe, wala nawombe wajowa kusyuka kuyilepe; na wakankotiti, kujowa, 19Mwalimu, Musa akatilembili kukita, Wona afwili ndongo mundu, na wona andekiti ndala, nukuleka mwana lepa, ndongo mundu antole ndala yula, na anjimakile mamaye mbeyu. 20Wakayili walongo saba: na wakutumbula akantuwili ndala, na pakafwili nukuleka mbeyu lepa: 21na wa kawili akantoliti yombe, na pakafwili nukuleka mbeyu lepa; na wakadatu wiwila: 22na saba wala nukuleka mbeyu lepa. Pa kumalakisa woha ndala nu mwene akafwili. 23Pa kusyuka yaaye mhanu wa yuliku wa wombe? pakuya saba wala wakayili nako kuya mhanu wawe. 24Yesu akajowiti kwa wombe, Si kwa iki musowa, kukita muyii wangakumanya malembo, haka mbafu ya Mulungu? 25Pakuya apa yawasyuke pa wakufwa, watuwula lepa, haka kutuwulika; koma wayii ngati wakamalaika kunani. 26Leka ya wala wakufwa, kukita wasyukika; mukasomiti lepa, ati, pa kitabu kya Musa, pa Matutu, umu Mulungu akanjowili, kujowa, Nenga na Mulungu wa Ibrahim, ni Mulungu wa Isaak, ni Mulungu wa Yakobo? 27Ayilepe Mulungu wa wakufwa, koma wa wakulama; mwisowesa nyamhope.

28Na akachiti yumonga wa wakulembela, ni akayufwini wala wawakotana pamonga, ni pa kumanya kukita yombe akawahigiti wicho, akankotiti, Luwimbi luki luyii lwa kutumbula lwa syoha? 29Yesu akahigiti, Lwa kutumbula luyii, Yufwana, Israel; Bambo Mulungu witu Bambo yumonga ayii: 30na unganaye Bambo Mulungu wako nu mwoyo wako woha, ni wumi wako woha, nu luhala lwako lwoha, ni mbafu syako syoha. 31Na lwa kawili lulu ulu, Unganaye mwenesi wako ngati wamwene. Lukumbi lukulungu kulutila isi pa waka. 32Na wakulembela yula akajowiti kwa yombe, Chakaka, Mwalimu, utawili wicho kukita yumonga ayii; na payilepe yungi lema yombe: 33ni kungana yombe ni mwoyo woha, ni kuwalalila kwoha, ni mbafu syoha, nu kungana mwenesi wake ngati mwene, kulutila nyambiko syoha sya kukwelesa ni sya kudumula. 34Nu Yesu pakaweni kukita akahigiti nu luhala, akanjowili, Nukuya wenga patali ni utwa wa Mulungu. Na nukuya mundu awiniwe mu kunkota kindu kitumbulile hino.

35Nu Yesu akahigiti nakajowiti, pa kuyigalisa mu hekalu, Wakulembela wajowa wuli kukita Kristo mwana wa Daudi ayii? 36Daudi mwene akajowiti pa Roho Mbalafu,

Bambo akajowiti kwa Bambo wangu,

Tama pasi pa kiwoko kyangu kya ndilo,

Mpaka apa yaniwawike wa mitumba wako pasi pa njayo syako.

37Daudi mwene anjowa Bambo; kuhumila kuliku ayii mwana mundu? Na lipuga likulungu likanjufwini yombe kisangalukile.

38Ni pa mayigaliso gake akajowiti, Mulolaye kwa wakulembela wala nawombe walonda kugendagenda pa mingila mitali, ni kulamusana pa machengo, 39ni fitihu fya kutumbula pa masunagoge, ni fitihu fya kutumbula pa fyakulya: 40awa wakuyananga nyumba sya wafwili, na kwa kwikwilika wasali malowe matali; awa yawapisike mhalo wa kulutila.

41Na akatemi pasi pa kipula ni kikokoli kya kyuma, na akalolisi umu lipuga wataga ngenge pa kikokoli: na wingi wakafi wakatagiti mugati fingi. 42Nakachiti yumonga mfwili mugaju, nakatagiti mugati senti siwili, isi siyii hela yimonga. 43Na akayikemili wanafunsi wake, nakajowiti kwa wombe, Chakaka niwajowela, Mfwili uyu mugaju akatagiti mumu kulutila woha wala watagaye pa kikokoli: 44pakuya woha wakatagiti mumu fya kufuluka fyawe; koma yombe kuhapula pa ifi fya kunsowa akatagiti mumu fyoha akayili nafyo, kya kulamila kyake kya mfilimila.

Currently Selected:

Marko 12: MGS1937

Highlight

Copy