Marko 11

1Ni pala wawandamila ku Yerusalem, ku Betfage ni Betania, papipi ni kidunda kya Miseituni, atuma wawili wa wanafunsi wake, 2ni awajowela, Mubitaye pa mhali wa mu kipula nu mwenga: ni hino apa pa kubita mwanja mumu, yamukolele mwana wa lipunda akungiki, pa uyu pa waka mundu mpaka hino atemi baha; mumbopole, muyiche nawo kuni. 3Ni wona mundu ajowa kwa mwenga, Kiki mukita iki? mujowaye, Bambo linsowiti; ni hino apa yangilawuse apa. 4Na wakabiti, na wakaweni mwana wa lipunda akungiki kunja pa ndyango pa malekano; na wambopola. 5Na wangi wa wala wakuyima baha wakawajowili, Mukita kiki kuwopola mwana wa lipunda? 6Leka wakajowiti kwa wombe umu Yesu akatawili: na wakawalekasili. 7Na wahicha nawo mwana wa lipunda kwa Yesu, na watumalila pa lyombe mingila yawe; ni akatemi panani pake. 8Na wingi wakayaliti nguo syawe pa ndila; leka wangi ndafi, sila wakasidumwili pa migunda. 9Na wakulongola, na wala wakukisa, wakakuwiti, Hosana; Wakuhikalika yombe yuahicha pa lihina lya Bambo: 10Wakuhikalika utwa wula uhicha, utwa wa dadi witu Daudi: Hosana kunani kwene.

11Na akayingili mu Yerusalem, mu hekalu; na apa akagelawini pa fyoha, pakuya kimihi hino, akapititi kunja mpaka pa Betania, pamonga na kumi na wawili wala.

12Na lukela lwake, pa kupita wombe kuhuma pa Betania, akaweni njala. 13Na pa kuwona nkuyu kutali uyii ni mahamba, akachiti, ngati kwali yakolele kindu pa uwu: ni pakachiti pa uwu, akakolili lepa kindu lema mahamba waka; pakuya lukayili lepa lukumbi lwa makuyu. 14Na pakahigiti akajowiti pa uwu, Kitumbulile hino mpaka miaka yoha mundu asilya kindu kawili pa wenga. Na wanafunsi wake wakayufwini.

15Ni wahicha ku Yerusalem: ni pakayingili mu hekalu, akatumbwili kutaga kunja wa kuhemesa na wa kutasa mu hekalu, na akang’anamwili mesa sya wa kuyandungana ndalama, ni fitihu fya wala wa kutasa njiwa; 16nakayitakili lepa kukita mundu atole misewenje mugati mwa hekalu. 17Na akayigalisi, nakajowiti kwa wombe, Si kulembiki, Nyumba yangu yayikemaleke nyumba ya kusali kwa mihuku yoha? leka mwenga muyikiti likolo lya walugu. 18Na wakayufwini wakulungu wa makasisi ni wakulembela, na wakalonditi umu ngawanjanangili: pakuya wakanjogwipi yombe, ndawa lipuga lyoha likakangichi pa mayigaliso gake.

19Ni kimihi kiyi kyoha akapititi kuwuka pa likaya.

20Ni pa kuluta bahalapala lukela lwake, wakaweni nkuyu wula uyumiti kitumbulile milela yake. 21Na Petro pa akakumbukili anjowela, Rabbi, lola, uyumiti nkuyu wula ukaulapalakisi. 22Nu Yesu pakahigiti awajowela wombe, Mutame ni kiyitakiso pa Mulungu. 23Chakaka niwajowela, Ayi yoha uyu yajowe kwa kidunda iki, Utoleke na ulekeleke mu nyanja; na apindikana lepa mu mwoyo wake, koma akela kukita kila alongela kipata kuya; yaaye nakyo. 24Kwa iki niwajowela, Findu fyoha fila mufisali ni mwiluwila, mukeleye kukita muyupiti, na yakuye kwinu. 25Na payi poha muyima kusali, mulekelekese, wona muyii ni kindu pa mundu; nausi Dadi winu uyu ayii kunani awalekelekese mwenga fyakuhoka finu. 26Koma wona mulekelekesa lepe, Dadi winu wa kunani yawalekelekese lepe fyakuhoka finu.

27Na wayicha kawili ku Yerusalem: na pa kugendagenda yombe mu hekalu, wamhichila wakulungu wa makasisi, ni wa kulembela, ni wakulu‐wakulu; 28na wakanjowili, Pa chengo wuli ukita ifi? pangi nani akupili chengo iki nausi ukite ifi? 29Leka Yesu akajowiti kwa wombe, Yaniwakote mwenga lilowe limonga, ni munihige nenga, ni nani yanitawile kwa mwenga pa chengo kiki nikita ifi. 30Ubatiso wa Yohana, ukahumili kunani ati, pangi pa wandu? munihige nenga. 31Na wakayili mu kujowana yungi ni njini, kujowa, Wona titawila, Upititi kunani; yatawile, Mumu kwa kiki mukankeliti lepa yombe? 32Leka wona titawila, Upititi pa wandu — wakayogwipi lipuga: pakuya chakaka woha wakambalingi Yohana kukita ayii wakulweta. 33Ni pa wakamhigiti Yesu, wajowa, Timanya lepa. Nu Yesu awajowela wombe, Haka nenga niwatawila lepa kwa chengo wuli nikita ifi.

Currently Selected:

Marko 11: MGS1937

Highlight

Copy