Yohana 20

1Leka pa ligono lya kutumbula lya juma ayicha Maria Magdalene lukelakela, lukona luyii lwisi, pa manyinja, na alola liganga liwusiki pa manyinja. 2Mumu akimbila, na awachila Simon Petro, na mwanafunsi yungi yula Yesu akanganiti, ni awajowela, Wambusiti Bambo pa manyinja ni timanya lepa uku wambikiti. 3Mumu Petro akapititi, na mwanafunsi yungi yula, na wakabiti ku manyinja. 4Na wakakimbili woha wawili pamonga: na mwanafunsi yungi yula akayumbatiki kulutila Petro, na akatumbwili kuhicha pa manyinja; 5na apa akayinimi ni kulingulila, awona nguo sila sigonakiki; koma akayingili mumu lepa. 6Mumu Simon Petro kawili ahicha, kunkisa yombe, na akayingili mu manyinja; 7na alolela nguo sila sigonakiki, na kitambaa kila kikayili pa mutu wake nakugonakeka baho ni nguo sya litonji, koma kipetakiwi kene pandu pakape. 8Mumu akayingili kawili mwanafunsi yungi yula, uyu akatumbwili kuhicha ku manyinja, na akaweni, na akayitakili. 9Pakuya wakona nakumanya lepa lilembo, kukita yombe alinganila kusyuka pa wakufwa. 10Mumu wanafunsi wakawukiti kawil: mwanja kwawe wene.

11Leka Maria akayili mu kuyima kunja kwa manyinja kililile: mumu pa kulila akayinimi ni kulingulila mu manyinja: 12na alolalela wamalaika wawili wakutama pasi wakufwata mawalafu, yumonga pa mutu, nu yumonga pa njayo, pala ukagoniti mbili wa Yesu. 13Na wanjowela yombe, Ndala, kiki ulilalila? Awajowela, Ndawa wambusiti Bambo wangu, ni nimanya lepa uku wambikiti. 14Pakajowiti aga, akang’anamukili munyuma, na andolalela Yesu ayimi, na amanyiti lepa kukita ayii Yesu. 15Yesu anjowela, Ndala, kiki ulila? undondandonda nani? Yombe, pakuhola kukita wakugoha ngunda ayii, anjowela, Bambo, wona untoliti wenga, utawile kwa nenga kuku umbikiti, na nenga yanimbuse. 16Yesu anjowela, Maria. Yombe aying’anamusa, ni anjowela pa kiHebrayo, Rabboni; lili lijoweka, Mwalimu. 17Yesu anjowela, Ukotokunifwafya; pakuya nakona kukwela kwa Dadi: leka ubite kwa walongo wangu, na uwajowele wombe, Nikwela kwa Dadi wangu ni Dadi winu, ni Mulungu wangu ni Mulungu winu. 18Maria Magdalene ahicha na awakokosela wanafunsi, Nimbweni Bambo; ni kukita akajowiti aga kwa yombe.

19Mumu pakuya kimihi, pa ligono lililalila, ligono lya kutumbula lya juma, na matanga gadindiki baho wanafunsi wakayili, ndawa ya kuwayogopa waYehudi, akachiti Yesu ni kuyima pagati, ni awajowela, Kindamba kwinu. 20Na pakajowiti ili, akawalasiti mawoko gake nu luwafu lwake kawili. Mumu wanafunsi wakahekalili, pa wakambweni Bambo. 21Mumu Yesu akajowiti kawili kwa wombe, Kindamba kwinu: umu Dadi anitumiti nenga, na nenga niwatuma mwenga wiwi. 22Na pakajowiti ili, akawapulili, na awajowela, Munjupaye Roho Mbalafu: 23wayi woha wona muwalekelekesa sambi, silekelasiki kwawe; wayi woha wona muwakungila sambi, sikungiki.

24Leka Tomaso, yumonga wa kumi na wawili wala, wa kukemeleka wa mapasa, akayili lepa pamonga nawo pala akachiti Yesu. 25Mumu wanafunsi wayini wakantawili, Timbweni Bambo. Leka akajowiti kwa wombe, Wona nilema kuliwona mu mawoko gake litata lya misomali, ni kuyingisa lukonji lwangu mu litata lya misomali, ni kuyingisa mu luwafu lwake kiwoko kyangu, yanikele lepa.

26Na panyuma pa magono mhano na gadatu wanafunsi wake wakayili kawili mugati, nu Tomaso pamonga nawo. Yesu ahicha, na matanga gadindiki, na akayimiti pagati, nakajowiti, Kindamba kwinu. 27Pala anjowela Tomaso, Yicha nakyo kikonji kyako kuni, na ulole mawoko gangu; na yicha nakyo kiwoko kyako, na uyingise pa luwafu lwangu: na usiya wangali kukela, koma wa kukela. 28Tomaso akahigiti, nakajowiti kwa yombe, Bambo wangu nu Mulungu wangu. 29Yesu anjowela, Ndawa uniweni, ukeliti; wa kusengwa wala haka wakaniweni lepa, wakeliti.

30Mumu fiwalalilo fingi fya mahele Yesu akakiti pa miho ga wanafunsi, ifi filembiki lepa mu kitabu iki: 31leka ifi filembiki, nausi mukele kukita Yesu ayii Kristo, Mwana wa Mulungu; ni nausi pa kukela muye nu kulama pa lihina lya yombe.

Currently Selected:

Yohana 20: MGS1937

Highlight

Copy