Mataayo 24

Yeesu kaaikira riiyekaru rya Nyamuwanga okukamburwa

(Maariko 13:1-2; Ruuka 21:5-6)

1Yeesu ˆnaasooka mw-ibhanja rya riiyekaru rya Nyamuwanga. Bhunu ꞉aariga ˆnaagenda, abheeyigira bhaaye mbamuseeta insonga bhamwereshe riiyekaru rya Nyamuwanga. 2Nawe Yeesu ˆnaabhabhwira ati, “Omurora riiyekaru rinu ryone kutyo? Enibhabhwira ekimari ati, ritariwo egina rinu ririsigara ku-rindi, goone kutyo garikamburwa!”

Yeesu kaaikira ekimenyegesho kya akabhaga ka obhuteero

(Maariko 13:3-13; Ruuka 21:7-19)

3Mmbe, Yeesu ˆnaagenda ku-kiima kya Emijeyituuni, ˆneekara eyo. Abheeyigira bhaaye mbamuseeta, bhariyo abheene era, mbamubhwira ati, “Nuukibhwire, amangʼana gayo garibha-wo rusukuki? Na ekimenyegesho kya okuuja kwawo na ekya obhuteero bhwa ekyaro ni kiiya?”

4Yeesu ˆnaabhasubhya ati, “Mwiyangarire, omuunu woonewoone aasiga okubhajimya! 5Abhaanu bhaafu bhariija kw-isiina ryani, wumwiwumwi ˆnaaikaga ati, ‘Ni anye Kiriisitu!’ Abhaanu bhayo bharijimya bhaanu bhaafu.

6“Mu-kabhaga kayo, muryungwaga amangʼana ga amaremo na aga amaremo agandi ganu ageenda okwamba. Mwasiga okuubhaya, kwa okubha gayo okubha-wo, garibha-wo, nawe obhuteero bhwa amangʼana goone kutyo, obhubha bhukyari. 7Ekyaro ekimwi, ekiija okurwana na ekindi, na obhukama obhumwi, obhuuja okurwana na obhundi. Injara, na gaanyamutikima garibha-wo mbaara nyafu egya ekyaro. 8Gayo goone kutyo agabha gari muna bhinyonyi era, ku-bhusungu bhwa omugasi unu keenda okwibhura. 9Mu-kabhaga kayo, abhaanu bharibharya injeejemo munyoore ebhinyansho, na okubheeta. Na abhaanu bha mu-bhyaro bhyone kutyo bharibhasoka ku-nsonga yaani. 10Ayo niwe abhaanu abhaafu bharisiga okunseeta. Bhaririiranaga injeejemo, mbasokanaga abheene na abheene.

11“Mu-kabhaga kayo, bharibha-wo abharagi bhaafu abhabheeyi, bhanu bharijimya abhaanu bhaafu. 12Na obhwendi bhwa abhaanu bhaafu bhurisuuwa, kwa okubha abhaanu bharikoraga amabhiibhi maafu muno. 13Nawe unu arisimbiira okuyikira ku-bhuteero, uyo niwe aryerusibhwa. 14Na ku-kabhaga kayo, Amangʼana Amajomu aga obhukama bhwa mu-rwire gariraasibhwa mu-kyaro kyone kutyo. Abhaanu bha mu-bhyaro bhyone kutyo bharyungwa Amangʼana gayo, ayo niwe obhuteero bhuriyika.”

Ginsiku gya ebhinyansho ebhinene Ebhuyawudi

(Maariko 13:14-23; Ruuka 21:20-24)

15“Riribha-wo riibhaga rinu murirora ‘Amangʼana amabhiibhi aga obhunyamusi,’ #24:15 Amangʼana amabhiibhi aga obhunyamusi. Insonga eyindi eyitura okubha ati, obhunyamusi bhunu obhukora obhunaabhi. Ringira Daniyeri 9:27, 11:31, 12:11. ganu ꞉gaaikirwe na omuragi Daniyeri gayambaaye ku-rubhaara orutaakatiifu rwa riiyekaru rya Nyamuwanga. Woonewoone unu kaasoma amangʼana ganu, agasombookerwe kujomu. 16Ayo niwe bhanu bhari Ebhuyawudi, bhabhirimire mu-bhiima. 17Omuunu unu ari kw-idaari eeke abhirime, aasiga okwingira mu-nyumba okugega ebhiinu bhyaye. 18Omuunu unu ari mw-isambu abhirime era, aasiga okufutata okugega ingibho yaaye. 19Garibhanyoora, abhagasi bha ginda na bhanu bharineenʼyaga mu-nsiku giyo! 20Mmbe, musabhe Nyamuwanga ati okubhirima kwemwe kwasiga okubha mu-kabhaga ka imbewo iinyafu amwi ati orusuku rwa Insabhaato. 21Mu-kabhaga kayo iribha-wo nyanko nene muno, inu ikyariga okubha-wo okwambira okubhumbwa kwa ekyaro na reero, na itaribha-wo kweki. 22Raabhe Nyamuwanga atakafuyayiishe ginsiku giyo, ataakabheeye-wo wa kwerusibhwa. Nawe Nyamuwanga kaaja okufuyaya ginsiku giyo, ku-nsonga ya abhasorwa bhaaye.

23“Mmbe, mu-kabhaga kayo, raabhe omuunu aribhabhwira ati, ‘Mwitegeereshe, Kiriisitu ari anu!’ amwi ati ‘Ari erya!’ mwasiga okumwikirisha. 24Bhariija abharagi abhabheeyi na abhaanu bhanu bhariiyaaikaga ati nibho Kiriisitu. Bharikora bhimenyegesho bhinene na ebhiruguusho bhyafu insonga bhajimye abhaanu, na bhaakatura bhajimye na abhasorwa bha Nyamuwanga. 25Mwangarire! Naabhabhwira amangʼana ganu, gakyari okubha. 26Mmbe abhaanu bhakabhabhwira ati, ‘Mwitegeereshe, Kiriisitu ari mw-ibhara erya!’ mwasiga okugenda-yo, bhakabhabhwira ati, ‘Eeyibhisire mu-nyumba muyo!’ mwasiga okwikirisha. 27Okusubha kwa Omwana wa Adaamu, kuritakya era. Kuribha rwa kutyo orumesho orumesha ebhuwuruka esuubha, ayoayo era rwayikire ebhugwa esuubha. 28Anu intyanyi infuuye iri, niwe ebhikoona ebhisangira.”

Yeesu kaaikira okusubha kwaye

(Maariko 13:24-37; Ruuka 21:25-33)

29“Mmbe, bhunu ginsiku gya iinyanko giyo giriwa era, riisuubha ririsibhiirishwa nkibha kisuute, okwesi kutaribhara, ginjota gyone girigwa ansi okusooka ku-rwire. Nyamuwanga arisingisha amanaga ga ku-rwire.#24:29 Ringira Isaaya 13:10, 34:4; Yoweeri 2:10.

30“Niwe abhaanu bharirora ekimenyegesho kya Omwana wa Adaamu ku-rwire, abhaanu bha mu-bhyaro bhyone kutyo bharyamba okurira mbatogoonya. Bharirora Omwana wa Adaamu ˆnaajaga ari ku-meere, ari na amanaga na bhugungyo bhwafu. 31Na arituma bhaamaraayika bhaaye, mbabhumaga muno amakombi, insonga bhakumanye abhasorwa bha Nyamuwanga bhoone kutyo, okusooka mbaara gyone kutyo ena egya ekyaro. Bhariija okusooka ku-bhuteero bhwa orubhaara orumwi rwa orwire okuyikira ku-bhuteero bhwa orubhaara orundi.”

32Yeesu ˆnaagenderera okwaika ati, “Mwiyigire okusooka kw-iti rya riitiini. Amasagi gaaryo gakaamba okufuuka amasha nganyirira, niwe omumenya ati akabhaga ka okugesa kari ayeeyi. 33Nikwo kutyo emwe mwone mukarora amangʼana gayo goone kutyo, mumenye ati aayikire ku-rwigi. 34Enibhabhwira ekimari ati, orwibhuro runu rutakuyitiingʼana amangʼana gayo goone kutyo gakyari kukuumira. 35Orwire na ekyaro bhiriyitiingʼana, nawe amangʼana gaani garirama kajaanende.”

Atariwo unu amenyere orusuku amwi ati nsa

(Maariko 13:32-37; Ruuka 12:35-40, 17:26-36)

36“Nawe atariwo omuunu unu amenyere orusuku amwi insa inu Omwana wa Nyamuwanga arisubha, bhatari bhaamaraayika bha mu-rwire, amwi ati Omwana wa Nyamuwanga, bhoone kutyo bhatakumenya, Raata omwene era, niwe amenyere. 37Mmbe, okuuja kwa Omwana wa Adaamu, kuribha rwa kutyo ꞉gaabheeye mu-nsiku gya Noowa. 38Mu-nsiku giyo bhunu ingubha iinyafu ꞉yaariga ikyari okwamba okugwa, abhaanu ꞉bhaariga mbarya, mbanywa, mbagabhuraga na okugabhurwa, okuyikira anu Noowa ꞉eengiriiye mu-meeri. 39Abhaanu bhayo, ꞉bhaariga bhatakumenya kinu ekiija okubha-wo, okuyikira anu ingubha iinyafu ꞉yaaguuye, niibheeta bhoone kutyo. Nikwo kutyo iribha mu-kuuja kwa Omwana wa Adaamu. 40Ku-kabhaga kayo, abhaanu bhabhiri bharibha mw-isambu, owumwi arigegwa, owundi arisigara. 41Na abhagasi bhabhiri bharishaga amwi ku-rubhuyi, arigegwa owumwi, owundi arisigara. 42Mmbe, mwikare mwiyangariiye, kwa okubha mutakumenya ni rusukuki runu Esobhugenyi ariija.

43“Nawe mumenye kujomu riingʼana rinu. Omwene nyumba, akamenyere akabhaga ka omwifi okwingira, atakawongeeye, na atakasigire omwifi amwibhire mu-nyumba yaaye. 44Mmbe ku-nsonga iyo, emwe mwone mwituurega-wo akabhaga koone kutyo, kwa okubha anu muryaikaga ati akabhaga kakyari, ku-kabhaga kayo niko Omwana wa Adaamu ariijira-ko.”

Ekirengekanyo kwa omujuuma omwitongeeye

(Ruuka 12:41-48)

45Yeesu ˆnaabhuusha abheeyigira bhaaye ati, “Angu, omujuuma omwitongeeye unu ari na obhwenge, ni wuuya? Ni unu esebhugenyi ꞉aamubhwiriiye ayambaarire abhajuuma abhandi iika ewaaye, insonga abhayaanega ebhyokurya ku-kabhaga kanu keesire. 46Nyakara omujuuma unu esebhugenyi kaaja ˆnaamunyoora ˆnaakoraga kutyo. 47Enibhabhwira ekimari ati, esebhugenyi kaamutuura iiguru ayambaarire ebhiinu bhyaye bhyone kutyo.

48“Nawe, raabhe omujuuma uyo akabha mubhiibhi, akeeganiirisha mu-mutima gwaye ati, ‘Raatabhugenyi aakoora okusubha,’ 49kaamba okubhuma abhajuuma bheejaabho, ˆnaamba okurya na okunywa obhwarwa, amwi na abhakorwa. 50Mmbe, esebhugenyi arisubha okusooka mu-rugendo rwaye ku-rusuku na ebhaga rinu omujuuma uyo atakumenya. 51Esebhugenyi arimubhutura masinja gabhiri, ˆnaamutuura amwi na abhaanu bhanu abhaaika ganu bhatakukora. Eyo niyo abhaanu bharirira kutyo bhakumye.”

Currently Selected:

Mataayo 24: kya

Highlight

Copy