Mataayo 25
25
Ekirengekanyo kya abhayarajuma ekumi
1Niwe Yeesu ˆnaabhwira abheeyigira bhaaye ekirengekanyo ekindi ati, “Ku-kabhaga kayo, niwe obhukama bhwa mu-rwire bhurirengekanyibhwa na abhayarajuma ekumi bhanu ꞉bhaagegere gintara gyebhwe mbagenda okuramira omugabhusi. 2Mu-bhayarajuma bhayo, abhataanu ꞉bhaariga bhari bhatengʼo nawe abhataanu abhandi ꞉bhaariga bhari na obhwenge. 3Bhunu abhayarajuma abhatengʼo ꞉bhaagegere gintara gyebhwe, ꞉bhataagegere amafuta agandi aga okwongesha mu-ntara. 4Nawe bhunu abha obhwenge ꞉bhaagegere gintara gyebhwe, ꞉bhaagegere na amafuta ga okwongesha-mo, gari mu-bhigegero bhya amafuta.
5“Anu omugabhusi ꞉aakoorere okuuja, abhayara bhayo bhoone kutyo mbawuunirira, kimwi mbawongera ntiro. 6Nawe mu-bhwire agati, abhaanu mbamwaya ati, ‘Bhamura, omugabhusi aaja! Muuje, kigende okumuramira!’ 7Abhayara bhayo bhoone kutyo mbeemuka, mbaroosha gintara gyebhwe. 8Abhayara abhataanu abhatengʼo, mbabhwira abha obhwenge ati, ‘Ekibhasabha mukisukire-ko mafuta matooto, kwa okubha gintara gyeswe egyenda okusimá.’ 9Nawe abheene mbabhasubhya ati, ‘Wuri! Kikabhasukira, gatakuuja okukiisa bhoone kutyo. Nyakara mugende ku-bhanu abhagusha, mugure.’
10“Mmbe, abhayara abhatengʼo bhayo, mbagenda okugura amafuta. Bhunu ꞉bhaagendaga, omugabhusi ˆnaayika. Abhayara bhanu ꞉bhaariga bhaamarire okwituura-wo, mbeengira amwi nawe mu-nyumba munu obhwenga ꞉bhwariga bhuri, orwigi ndwigarwa. 11Kabhaga kafuyi era, abhayara abhatengʼo bharya bhoone mbasubha, mbanyoora orwigi rwigaaywe. Niwe mbayambaara ku-rwigi ayo mbabhirikira ati, ‘Raatabhugenyi! Raatabhugenyi! Kiigurireko orwigi!’ 12Nawe omugabhusi weeki ˆnaabhasubhya ati, ‘Enibhabhwira ekimari ati, nitakubhamenya!’”
13Mmbe, Yeesu ˆnaamariisha ˆnaabhabhwira ati, “Mwikare mwiyangariiye kwa okubha mutakumenya insa na orusuku.”
Abhagaya abheetongeeye na bhanu bhatari bheetongeeye
(Ruuka 19:11-27)
14Yeesu ˆnaagenderera okusoosha ekirengekanyo ekindi, ˆnaaika ati, “Kweki, obhukama bhwa mu-rwire bhurirengekanyibhwa na ekirengekanyo kinu ati, ꞉aariga ariwo omuunu unu ꞉aariga ˆneenda okukora orugendo. Akyari kwimuka, ˆnaabhirikira abhagaya bhaaye, ˆnaabhayaana ebhiinu bhyaye insonga bhabhiyambaarire. 15ˆNaayaana abhagaya bhoone kutyo okuriingʼaana na obhuturo bhwebhwe. ˆNaayaana owa okwamba taranta#25:15 Taranta. Taranta yimwi ꞉yaariga iriingʼeene na muyeero gwa okuriya omuunu myaka makumi gabhiri amwi ati kukira ayo. etaanu, owa akabhiri taranta ebhiri, owa akasatu taranta yimwi. Kimwi ˆneemuka ˆnaagenda.
16“Omugaya unu ꞉aayaaywe taranta etaanu, ayoayo ˆnaagenda ku-bhusuruja ˆnaagiibhusha, ˆnaanyoora taranta egindi etaanu. 17Omugaya unu ꞉aayaaywe taranta ebhiri woone, ˆnaakora kutyo, ˆnaanyoora taranta egindi ebhiri. 18Nawe omugaya unu ꞉aayaaywe taranta yimwi, omwene ˆnaagenda ˆnaasimba ansi ˆnaasiikira iitaranta ya esebhugenyi.
19“Nsiku nyafu ngitura, esebhugenyi ˆnaasubha. ˆNaabhirikira abhagaya bhaaye, insonga abhare ebhiinu bhyaye ari amwi nabho. 20Omugaya unu ꞉aayaaywe taranta etaanu, ˆnaaja na taranta egindi etaanu, ˆnaabhwira esebhugenyi ati, ‘Ee raatabhugenyi, ꞉waanaaye taranta etaanu. Rora, niibhusiishe-ko taranta egindi etaanu.’
21“Esebhugenyi ˆnaamubhwira ati, ‘Ukorere kujomu muno. Uri mugaya mujomu, na uri mwitongeeye! Ubheeye mwitongeeye ku-bhitooto bhinu ꞉naakuyaaye, woori enikuyaana okuyambaarira ebhiinu ebhyafu. Nuuje kijomerwe amwi.’
22“Omugaya unu ꞉aayaaywe taranta ebhiri, woone ˆnaaja na taranta egindi ebhiri, ˆnaabhwira esebhugenyi ati, ‘Ee raatabhugenyi, ꞉waanaaye taranta ebhiri. Rora, niibhusiishe-ko taranta egindi ebhiri.’
23“Esebhugenyi ˆnaamubhwira ati, ‘Ukorere kujomu muno. Uri mugaya mujomu, na uri mwitongeeye! Ubheeye mwitongeeye ku-bhitooto bhinu ꞉naakuyaaye, woori enikuyaana okuyambaarira ebhiinu ebhyafu. Nuuje kijomerwe amwi.’
24“Nawe omugaya unu ꞉aayaaywe taranta yimwi, ˆnaaja ˆnaabhwira esebhugenyi ati, ‘Ee raatabhugenyi, ꞉naariga nimenyere ati awe uri muunu mururu muno. Awe owugesa anu utayambire, owukumanya anu utanyaraganyiishe. 25Mmbe nuubhaya okubhusha iitaranta yaawo, ningenda niyisiikira ansi. Woori, gega iitaranta yaawo nginu anu.’
26“Esebhugenyi ˆnaamusubhya ati, ‘Awe uri mugaya mubhiibhi, na uri murenga! Raabhe ꞉waariga umenyere ati anye enigesa anu nitayambire na enikumanya anu nitanyaraganyiishe, 27kubhaki ꞉utaantuuriiye iitaranta yaani ku-bhanu abheebhusha? Akabhaga ka okusubha kwani, nikanyoorere iitaranta yaani yeebhusiishe.’ 28Niwe esebhugenyi ˆnaaika ati, ‘Mumuteeshe iitaranta iyo, muyaane omugaya unu ari na taranta ekumi. 29Omuunu woonewoone unu ari na ekiinu, aryongesibhwa. Nawe omuunu woonewoone unu atari na kiinu, na ekitooto kinu ari nakyo ariteesibhwa. 30Omugaya unu atakunsakira kiinu kyonekyone, mumwese anja mu-kisuute eyo, enu abhaanu bharirira kutyo bhakumye.’”
Indamuro ya abhaanu ku-rusuku rwa obhuteero
31Yeesu ˆnaagenderera okuroma na bheeyigira bhaaye, ˆnaabhabhwira ati, “Bhunu Omwana wa Adaamu ariija mu-bhugungyo bhwaye, ari na bhaamaraayika abhataakatiifu bhoone kutyo, niwe ariikara ku-kitebhe kyaye kinu kiri na obhugungyo. 32Na abhaanu bha mu-bhyaro bhyone kutyo bharimusangira.#25:32 Ringira Isaaya 66:18; Yoweeri 3:2. Omwene woone aribhaawura rwa kutyo omureefi kaawura giingʼondi mu-mbusi. 33Arituura giingʼondi ebhuryo bhwaye, na gimbusi ebhumosi bhwaye.
34“Niwe Omukama, aribhwira abhaanu bhanu bhari ebhuryo bhwaye ati, ‘Muuje, emwe bhanu muyaaywe giinonkwe na Raata. Mwingire mu-bhukama bhunu Nyamuwanga ꞉aabhatuuriiye-wo okwambira ekyaro nkibhumbwa. 35Mwingire kwa okubha, bhunu ꞉naariga niri na omweko, muunaana ebhyokurya. Bhunu ꞉naariga niri na obhwiro, muunaana amanji ga okunywa. Bhunu ꞉naariga niri mugenyi, mundamira. 36Bhunu ꞉naariga niri kinaabhi, ꞉mwanfwafiishe gingibho. Bhunu ꞉naariga niri murwaye, ꞉mweejire okunkeesha. Na bhunu ꞉naariga niri mu-jeera, ꞉mweejire okundora.’
37“Niwe abharengeresi bhayo bharimubhuusha ati, ‘Ee Raatabhugenyi, rusukuki runu ꞉kyakurorere uri na omweko nkikuyaana ebhyokurya? Amwi ati uri na obhwiro nkikuyaana amanji? 38Na ni rusukuki runu ꞉kyakurorere uri mugenyi nkikuramira? Amwi ati uri kinaabhi nkikufwafya gingibho? 39Kweki, ni rusukuki runu ꞉kyakurorere uri murwaye nkikukeesha, amwi ati uri mu-jeera nkiija okukurora?’ 40Niwe Omukama aribhasubhya ati, ‘Kimari enibhabhwira ati, okuriingʼaana na kutyo ꞉mwakoreeye owumwi mu-bheeyigira bhaani bhanu bhatari na kibharo, ꞉mwankoreraga anye.’
41“Kimwi ˆnaabhwira bhanu bhari ebhumosi bhwaye ati, ‘Musooke anu, emwe bhanu mwiyiimirwe! Mugende mu-muriro gunu gutakusimá gunu Nyamuwanga atuuriiye-wo Sitaani na bhaamaraayika bhaaye. 42Bhunu ꞉naariga niri na omweko, mutanaaye ebhyokurya. Bhunu ꞉naariga niri na obhwiro, mutanaaye amanji ga okunywa. 43Bhunu ꞉naariga niri mugenyi, mutandamiiye. Bhunu ꞉naariga niri kinaabhi, mutanfwafiishe ngibho. Bhunu ꞉naariga niri murwaye, muteejire okunkeesha. Na bhunu ꞉naariga niri mu-jeera, muteejire okundora.’
44“Niwe bhayo bhoone bharimubhuusha ati, ‘Ee Raatabhugenyi, rusukuki ꞉kyakurorere uri na omweko, amwi ati uri na obhwiro, uri mugenyi, uri kinaabhi, amwi ati urwaye, uri mu-jeera, eswe nkirema okukusakira?’ 45Omwene aribhasubhya ati, ‘Enibhabhwira ekimari ati, okuriingʼaana na kutyo mutakukorera owumwi mu-bhanu bhatari na kibharo bhanu, omubha mutaankoreeye anye.’
46“Mmbe, abhakayi bhayo, bhariingira mu-bhirusho bhinu bhitakuweera. Nawe abharengeresi bhariingira mu-bhurame bhunu bhutakuweera.”
Currently Selected:
Mataayo 25: kya
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved
