Mataayo 26

Abhakuru bha Abhayawudi abhakora ekiina kya okwita Yeesu

(Maariko 14:1-2; Ruuka 22:1-2; Yowana 11:45-53)

1Bhunu Yeesu ꞉aamarire okwaika amangʼana gayo goone kutyo, ˆnaabhwira abheeyigira bhaaye ati, 2“Rwa kutyo mumenyere, bhasiirya ni nsikukuru ya Ipaasaka.#26:2 Ipaasaka. Ringira riingʼana rinu mu-Mangʼana Amakomeeye. Na Omwana wa Adaamu, aririirwa injeejemo, insonga asungwe ku-musarabha.”

3Mmbe, akabhaga kayo, abhashengesi#26:3 Abhashengesi. Ringira riingʼana rinu mu-Mangʼana Amakomeeye. abhakuru na abhakaruka bha Abhayawudi mbasangira mw-ibhanja rya iinyumba ya omushengesi omukuru unu ꞉aatogwaga Kayafa. 4Kimwi mbeekirishaanya bhagwate Yeesu bhwiyibhise, insonga bhamwite. 5Nawe mbaaika ati, “Kisige okukora ganu, mu-nsikukuru ya Paasaka, kyasiga okureeta inkungu mu-bhaanu.”

Omugasi kaasukira Yeesu amafuta

(Maariko 14:3-9; Yowana 12:1-8)

6Niwe Yeesu ˆnaagenda mw-igunguri rya Bhetaaniya, ˆneekara mu-nyumba ya Simooni unu kara ꞉aariga ari mugenge. 7Bhunu Yeesu ꞉aariga eekaaye kw-igari, mugasi wumwi ˆnaaja ari na inchupa irimo amafuta amarange ga bhugusi bhunene muno. Omugasi uyo ˆnaasukira Yeesu ku-mutwe amafuta gayo okumukorera ekibharo.

8Bhunu abheeyigira bhaaye ꞉bhaarorere kutyo, mbabhiiyirwa. Mbaaika ati, “Bhamura! Kubhaki omugasi unu kaanyamura amafuta ganu kutyo? 9Amafuta ganu gakagusiibhwe yera nyafu muno, ngisakira abhatobhu!”

10Yeesu ˆnaamenya ganu ꞉bhaariga mbaaika, ˆnaabhabhwira ati, “Kubhaki omunyansha omugasi unu? Omwene aankorera engʼana ejomu. 11Abhatobhu muri nabho nsiku gyone kutyo, nawe anye, mutaribha na anye nsiku gyone kutyo. 12Bhunu omugasi unu aasukira omubhiri gwani amafuta, aakora kutyo insonga gwituure-wo okubhiikwa. 13Kimari enibhabhwira ati, woonewoone anu Amangʼana Amajomu ganu gariraasibhwa mu-kyaro kyone kutyo, riingʼana rinu aankorera ryone riritogorwaga, okuyiita omugasi unu.”

Yuuda Esikariyooti keekirisha okurya Yeesu injeejemo

(Maariko 14:10-11; Ruuka 22:3-6)

14Mmbe, owumwi wa abheeyigira ekumi na bhabhiri abha Yeesu, unu ꞉aatogwaga Yuuda Esikariyooti, ˆnaagenda ku-bhashengesi abhakuru, 15ˆnaabhabhuusha ati, “Omuuja okuunaanaki nikatuura Yeesu mu-mabhoko geemwe?” Mbamubharira giiyera, makumi gasatu. 16Okwambira ayo, Yuuda ˆnaamba okwagara omwanya omujomu ogwa okurya Yeesu injeejemo amugure.

Yeesu kaarya Ipaasaka na abheeyigira bhaaye

(Maariko 14:12-26; Ruuka 22:7-23; Yowana 13:21-30; 1 Abhakorinto 11:23-25)

17Orusuku rwa okwamba rwa insikukuru ya emikaate ginu gitatunduuye,#26:17 Insikukuru ya emikaate ginu gitatunduuye. Ringira riingʼana Ipaasaka mu-Mangʼana Amakomeeye. abheeyigira bha Yeesu mbamuuja-ko, mbamubhuusha ati, “Oweenda uriire aaki Ipaasaka, kigende kikukorere-yo ebhyokurya?” 18Yeesu ˆnaabhabhwira ati bhagende mu-musi gwa Yerusareemu ewa omuunu omurebhe, bhamubhwire ati, Omwiyigisha aabhatuma, bhamubhwire ati kaaika ati, “Akabhaga kaani kari ayeeyi, eneenda okuriira ebhyokurya bhya Ipaasaka mu-nyumba yaawo, anye na abheeyigira bhaani.” 19Abheeyigira bhaaye mbagenda mbakora rwa kutyo Yeesu ꞉aabharagiriiye, mbaroosha ebhyokurya bhya Ipaasaka.

20Bhunu ꞉yaayikire keegoro, Yeesu na abheeyigira bhaaye ekumi na bhabhiri mbeekara okurya. 21Bhunu ꞉bhaariga mbarya, Yeesu ˆnaabhabhwira ati, “Enibhabhwira ekimari ati, owumwi weemwe kaaja okundya injeejemo.”

22Abheeyigira bhaaye mbasurumbara muno, mbaamba okumubhuusha wumwiwumwi ati, “Mbwira Raatabhugenyi, toga nitari anye?” 23Yeesu ˆnaabhasubhya ati, “Ni unu kaakosha omukaate amwi na anye mu-rutubha, niwe kaaja okundya injeejemo angure. 24Omwana wa Adaamu, kaaja okwitwa rwa kutyo akaamiiywe mu-Makaamo Amataakatiifu. Nawe ariko ekiwi omuunu unu araamugure. Nyakara omuunu uyo atakeebhuuywe!”

25Mmbe, Yuuda omuri wa injeejemo wurya, woone ˆnaamubhuusha ati, “Mbwira Mwiyigisha, toga nitari anye?” Yeesu ˆnaamusubhya ati, “Ni awe waaika.”

26Mmbe, bhunu ꞉bhaariga mbarya, Yeesu ˆnaagega omukaate, ˆnaakumya Nyamuwanga, ˆnaagubhuturabhutura, ˆnaayaana abheeyigira bhaaye, ˆnaabhabhwira ati, “Mugege murye, omukaate gunu nigwo omubhiri gwani.” 27ˆNaagega ekikombe kya iidivaayi, ˆnaakumya Nyamuwanga, ˆnaabhayaana, ˆnaabhabhwira ati, “Mugege iidivaayi inu, mubhabhushaanye mwone kutyo. 28Iidivaayi iyo nigo amaanyinga gaani aga iimuuma.#26:28 Iimuuma. Ringira riingʼana rinu mu-Mangʼana Amakomeeye. Amaanyinga gaani agaaja okwitika ku-nsonga ya abhaanu bhaafu, insonga Nyamuwanga abhaabhire ebhikayo. 29Enibhabhwira ati, nitarinywa kweki iidivaayi, okuyikira ku-rusuku runu nirinywa iidivaayi iinyaaya amwi na emwe mu-bhukama bhwa Raata.”

30Mbamara mbeemba orwimbo rwa okukumangya Nyamuwanga.#26:30 Orwimbo rwa okukumangya Nyamuwanga. Abhayawudi ꞉bhaariga mbeemba Ijabhuri 113–118 mu-nsikukuru ya Ipaasaka. Bhunu ꞉bhaamarire okwimba, mbawuruka, mbagenda mu-kiima kya Emijeyituuni.

Yeesu kaaraga ati Peetero kaaja okumwigaana

(Maariko 14:27-31; Ruuka 22:31-34; Yowana 13:36-38)

31Mmbe, Yeesu ˆnaabhwira abheeyigira bhaaye ati, “Reero mu-ngeta, emwe mwone kutyo omuuja okunyiiruka. Rwa kutyo ikaamirwe mu-Makaamo Amataakatiifu ati, ‘Niribhuma omureefi, na giingʼondi eyijo girinyaragana.’#26:31 Ringira Jaakariya 13:7. 32Nawe, nikamara okusuuka, eniija okubhatangatira okuja Gariraaya.”

33Niwe Peetero ˆnaabhwira Yeesu ati, “Raabhe bhoone kutyo bhakakwiruka, anye nitakutura okukwiruka!” 34Yeesu ˆnaamusubhya ati, “Kimari enikubhwira ati, reero insarigooko ikyari okukookoroma, owubha waanyiigaanire kasatu.” 35Peetero ˆnaamusubhya ati, “Raabhe ni kufwa na awe niikirisiishe okufwa, anye nitakukwigaana wuri!” Abheeyigira abhandi bhoone, mbaaika kutyo.

Yeesu kaasaasaama Nyamuwanga mw-isambu rya Getisemane

(Maariko 14:32-42; Ruuka 22:39-46)

36Mmbe, Yeesu ˆnaagenda na abheeyigira bhaaye mw-isambu rinu ꞉ryatogwaga ati Getisemane, ˆnaabhabhwira ati, “Mwikare anu okwamba, anye enigenda erya okusaasaama Nyamuwanga.” 37Mbagenda na Peetero na bhamura bhabhiri abha Jebhedaayo. Yeesu ˆnaamba okusurumbara ˆnaatitibhara muno.

38ˆNaabhabhwira ati, “Omwoyo gwani gusurumbaaye muno eniiyungwa muna kufwa. Mwikare anu okwamba, mukyeshe obhwire amwi na anye.” 39Yeesu ˆnaafugera-wo imbere kutooto, ˆneefumbika ansi, ˆnaasaasaama Nyamuwanga ati, “Ee Raata, raabhe ni kujomu ku-awe, unsoosishe-ko ebhinyansho bhinu!#26:39 Ebhinyansho bhinu. Mu-Kiyunaani ikaamirwe ati, ekikombe kinu. Nawe itari kutyo anye eneenda, tari ukore kutyo awe omwene oweenda.”

40Mmbe, Yeesu ˆnaasubha anu ꞉aariga asigire abheeyigira bhaaye, ˆnaabhanyoora bhawongeeye ntiro. ˆNaabhuusha Peetero ati, “Nsa yimwi era, yoone yaabhatama okukyesha amwi na anye? 41Mukyeshe obhwire, musaasaame Nyamuwanga, mwasiga okwingira mu-masakyo. Omwoyo gwikirisiishe, nawe omubhiri gutakutura.”

42Yeesu ˆnaabhasiga ayo kweki, ˆnaagenda orwa akabhiri, ˆnaasaasaama Nyamuwanga ati, “Ee Raata, raabhe utakunsoosha ku-bhinyansho bhinu, mmbe kora kutyo awe oweenda.”

43Mmbe, bhunu ꞉aasubhire ku-bheeyigira bhaaye, ˆnaanyoora kweki bhawongeeye ntiro, kwa okubha ꞉bhaariga bhari na ntiro nyafu muno. 44Yeesu ˆnaabhasiga kweki, ˆnaagenda okusaasaama Nyamuwanga orwa akasatu, ˆnaasubhira okwaika amangʼana garyagarya kweki.

45Mmbe, bhunu ꞉aasubhire kweki ku-bheeyigira bhaaye, ˆnaabhabhwira ati, “Emwe mukyawongeeye, mukyamuunyire? Mwitegeereshe! Akabhaga ka okunyansibhwa kwani kari ayeeyi, na Omwana wa Adaamu kaatuurwa mu-mabhoko ga abhakosi bha ebhikayo. 46Mwimuke kigende, kwa okubha omuunu unu kaaja okundya injeejemo angure ari ayeeyi!”

Yeesu kaagwatwa

(Maariko 14:43-50; Ruuka 22:47-53; Yowana 18:3-12)

47Bhunu Yeesu ꞉aariga akyaroma, niwe Yuuda owumwi wa abheeyigira bhaaye ekumi na bhabhiri, ˆnaaja na esangi enene erya abhaanu bhari na ebhiraawa na gindungu. Riisangi riyo ꞉ryariga ritumirwe na bhashengesi abhakuru na abhakaruka bha Abhayawudi. 48Yuuda omuri wa injeejemo wurya, ꞉aariga abhayaaye ekimenyegesho, abhabhwiriiye ati, “Omuunu unu niraabhuusu,#26:48 Niraabhuusu. Okuriingʼaana na gintungwa gyebhwe egya okukeeshaanya. uyo niwe Yeesu, mumugwate.”

49Bhunu ꞉bhaayikire, Yuuda ˆnaagenda ku-Yeesu, ˆnaamukeesha ati, “Ryagwa Omwiyigisha!” Kimwi ˆnaamufumbeera ˆnaamubhuusu. 50Yeesu ˆnaamusubhya ati, “Musaani, kora kinu waaja okukora.”

Mmbe abhaanu bhayo mbafugera, mbagwata Yeesu. 51Niwe omuunu wumwi mu-bhanu ꞉bhaariga bhari amwi na Yeesu, ˆnaasoosha ekiraawa kyaye mu-ruubhu, ˆnaabhuma omugaya wa omushengesi omukuru, ˆnaamusaawura-ko okutwi. 52Nawe Yeesu ˆnaamubhwira ati, “Subhya ekiraawa kyawo mu-ruubhu, kwa okubha unu kaagwata ekiraawa okwita abhaanu, woone ariitwa na ekiraawa! 53Owutoga ati nitakutura okwisaasaama Raata, aandeetere woori anu bhaamaraayika bhaafu okukira makemba#26:53 Makemba. Riikemba erimwi ꞉ryariga riri na bhasirikare bhiwumbi bhisansabha. ekumi na gabhiri? 54Angu raabhe nikakora kutyo, agaaja okukuumira kutiki, ganu gakaamirwe mu-Makaamo Amataakatiifu ati nikwo kutyo Raata keenda gabhe?”

55Niwe Yeesu ˆnaabhwira abhaanu bhayo ati, “Kubhaki omuuja okungwata muri na ebhiraawa na gindungu muna omuuja okugwata mwifi? Ndora nsiku gyone kutyo ꞉naariga niiyigisha mw-ibhanja rya riiyekaru rya Nyamuwanga, nawe ꞉mutaangwatire! 56Nawe ganu goone kutyo agabha kutyo, insonga ganu abharagi ꞉bhaakaamire mu-Makaamo Amataakatiifu gakuumire.” Niwe abheeyigira bhaaye bhoone kutyo mbamusiga ayo, mbabhirima.

Yeesu ari na abhakuru bha Bhayawudi

(Maariko 14:53-65; Ruuka 22:54-71; Yowana 18:13-24)

57Mmbe, abhaanu bhanu ꞉bhaagwatire Yeesu, mbagenda nawe, mbamusira ewa omushengesi omukuru, Kayafa. Ayo niwe abheeyigisha bha ebhiraagiro bhya Musa na abhakaruka bha Abhayawudi ꞉bhaariga bhasangiiye. 58Peetero ꞉aariga ˆnaabhaseeta ariwo areera kutooto, ˆnaayika mw-ibhanja rya iinyumba ya omushengesi omukuru. ˆNeengira, ˆneekara na abhariisi insonga arore obhuteero bhwa amangʼana gayo.

59Abhashengesi abhakuru na riibharaja rya Abhayawudi#26:59 Riibharaja rya Abhayawudi. Ringira riingʼana rinu mu-Mangʼana Amakomeeye. ryone kutyo, ꞉bhaariga mbaagara amangʼana ga okubheeyeresha Yeesu, insonga bhanyoore ekya okumwitira. 60Nawe ꞉bhataanyoorere engʼana, raabhé kutyo bhaanu bhaafu ꞉bheejire okumubheeyeresha. Niwe mbaaja bhaanu bhabhiri, 61mbaaika ati, “Omuunu unu ꞉aaikire ati, ‘Enitura okukambura riiyekaru rya Nyamuwanga, nindyumbaka kweki ebhaga rya nsiku esatu nirimarire.’”

62Kimwi omushengesi omukuru ˆnaayambaara, ˆnaabhuusha Yeesu ati, “Ndora utakusubhya engʼana ryoneryone ku-ganu abhaanu bhanu abhakusitaakya?” 63Nawe Yeesu ꞉ataasubhiishe ryoneryone.

Mmbe, omushengesi omukuru uyo ˆnaamubhwira kweki ati, “Rayira kw-isiina rya Nyamuwanga unu keesha omwoyo, ukibhwire raabhe awe ni awe Kiriisitu, Omwana wa Nyamuwanga.” 64Yeesu ˆnaamusubhya ati, “Ni awe waaika. Nawe enibhabhwira ati, okwambira woori, omuuja okurora Omwana wa Adaamu eekaaye orubhaara rwa ebhuryo orwa Nyamuwanga,#26:64a Ringira Ijabhuri 110:1. owa amanaga goone kutyo, ˆnaaja ari ku-meere.”#26:64b Ringira Daniyeri 7:13.

65Mmbe, bhunu omushengesi omukuru ꞉oonguuywe amangʼana gayo, ˆnaakarura gingibho gyaye, ˆnaaika ati, “Eerengekanya na Nyamuwanga! Mwoongwa emwe abheene kutyo aaika, angu mukyagara-yo kweki abharori abhandi? 66Omwaika kutiki woori?” Mbamusubhya ati, “Unu eesire okwitwa!”

67Niwe mbaamba okufubhurira Yeesu mu-bhusu, mbamubhuma ebhikundi, abhandi mbamubhuma ebhisaanyi, 68mbamubhwiraga ati, “Ee Kiriisitu, ambe bharikisha, niga unu aakubhuma?”

Peetero keegaana Yeesu

(Maariko 14:66-72; Ruuka 22:56-62; Yowana 18:15-18, 18:25-27)

69Ku-kabhaga kayo koone kutyo, Peetero ꞉aariga eekaaye anja, mw-ibhanja. Niwe omukosi wa emirimu wumwi owa ekigasi ˆnaamufugerera, ˆnaamubhwira ati, “Awe woone waawuri amwi na Yeesu wa Gariraaya.” 70Peetero ˆneegaana mu-meeso ga abhaanu bhoone kutyo, ˆnaaika ati, “Nitakumenya kinu owaaika!”

71Bhunu ꞉aasookere ayo ˆnaagenda ku-muryango, omugaya owundi owa ekiyara ˆnaamurora, ˆnaabhwira abhaanu bhanu ꞉bhaariga bhari ayo ati, “Omuunu unu woone aanaabheeye amwi na Yeesu Omunaajareeti.” 72Peetero ˆneegaana kweki, ˆnaarayira, ˆnaaika ati, “Nitakumumenya omuunu uyo!”

73Kabhaga kafuyi era nkatura-wo, abhaanu bhanu ꞉bhaariga bhayambaaye ayo, mbafugerera Peetero, mbamubhwira ati, “Kimari awe woone uri amwi na abhaanu bhayo, kwa okubha na okuroma kwawo, okweresha ati usookereeye Gariraaya!”

74Peetero ˆnaamba okwifuma na okurayira, ˆnaaika ati, “Nitakumumenya omuunu uyo bha!” Ayoayo, insarigooko niikookoroma. 75Niwe Peetero ˆnaayiita amangʼana ganu Yeesu ꞉aamubhwiriiye ati, “Insarigooko ikyari okukookoroma, owubha waanyiigaanire kasatu.” Niwe ˆnaawuruka anja, ˆnaarira muno.

Currently Selected:

Mataayo 26: kya

Highlight

Copy