Ruuka 8

Abhagasi bhanu ꞉bhaasakiraga Yeesu

1Gayo ꞉geejire gaawa, Yeesu ꞉aariga ˆneeyindayinda mu-misi na mu-magunguri ˆnaaraashaga Amangʼana Amajomu aga obhukama bhwa Nyamuwanga. ꞉Eeyindaga ari amwi na abheeyigira bhaaye ekumi na bhabhiri. 2꞉Bhaariga bhariwo na abhagasi abhandi bhanu ꞉bhaamuseetaga. Abhagasi bhayo, abhandi ꞉bhaariga bhawungirwe ebhiwi, abhandi ꞉bhaariga bhari na amarwara. Yeesu ꞉aariga abhawosiishe amarwara geebhwe, abhasoosiishe-ko na ebhiwi. Owumwi weebhwe ꞉aariga ari Maryamu Magidarena. Maryamu uyo Yeesu ꞉aariga amusoosiishe-ko bhiwi mungati. 3꞉Aariga ariwo Jowana, omugasi wa Kuja. Kuja uyo, niwe ꞉aariga ayambaariiye ebhiinu bhya omukama Yerode Antipa. ꞉Aariga ariwo na Suujana, na abhagasi abhandi bhaafu. Abhagasi bhayo, ꞉bhaariga mbasoosha ebhiinu bhyebhwe, okusakira Yeesu na abheeyigira bhaaye.

Ekirengekanyo ekya omubhibhi wa gimbibho

(Mataayo 13:1-9; Maariko 4:1-9)

4Orusuku rumwi, abhaanu bha mu-misi myafu, ꞉bhaariga bheejire ku-Yeesu, mbamusangira bhaanu bhaafu muno. Yeesu ˆnaamba okubhabhwira ekirengekanyo kinu, ˆnaaika ati, 5“꞉Aariga ariwo omubhibhi wumwi, ˆnaagenda okubhibha gimbibho gyaye mw-isambu. Bhunu ꞉aariga ˆnaabhibha gimbibho giyo, egindi ꞉gyaguuye ku-njira, ngitajwa, giinyonyi ngiija ngigirya. 6Egindi, ꞉gyaguuye kw-itare anu atari na mayaru maafu. ꞉Gyeejire okumera, ngibhurwa amanji, ngyuma. 7Egindi, ꞉gyaguuye mu-mawa. Bhunu amawa ꞉gaamerere, ngagiyiganya. 8Egindi ꞉gyaguuye ku-mayaru amajomu, ngimera kujomu, masina goone kutyo ngatwasha matwasho eganaegana.” Bhunu Yeesu ꞉aamarire okwaika amangʼana gayo, ˆnaamura obhuraka ˆnaaika ati, “Omuunu unu ari na amatwi aga okuungwira, noongwe kujomu!”

Yeesu kaasomboora ekirengekanyo kya omubhibhi

(Mataayo 13:10-23; Maariko 4:10-20)

9Abheeyigira bha Yeesu mbamubhuusha ati, “Ekirengekanyo kinu ekyaikiraki?” 10ˆNaabhasubhya ati, “Nyamuwanga abhayaaye emwe okumenya gimbisike gya obhukama bhwaye, tari abhandi enibhabhwirira mu-bhirengekanyo insonga amangʼana gabhe rwa kutyo omuragi Isaaya ꞉aakaamire ati,

‘Raabhé bharaaringire bhaasiga okurora.

Raabhé bharoongwe, bhaasiga okusombookerwa.’#8:10 Ringira Isaaya 6:9.

11“Inu niyo insonga ya ekirengekanyo kinu, Riingʼana rya Nyamuwanga niryo imbibho. 12Gimbibho ginu ꞉gyaguuye ku-njira, egirengekanyibhwa na abhaanu bhanu abhoongwa Riingʼana rya Nyamuwanga. Bhakamara okuungwa, ayoayo, Sitaani ˆnaaja ˆnaarisoosha mu-mitima gyebhwe, bhaasiga okuriikirisha kimwi mbeerusibhwa. 13Na gimbibho ginu ꞉gyaguuye kw-itare anu atari na mayaru maafu, egirengekanyibhwa na abhaanu abhandi bhanu abhoongwa Riingʼana rya Nyamuwanga, mbariramira bhajomeeywe, nawe kwa okubha bhatari na misi, abhariikirisha kabhaga kafuyi. Na akabhaga ka Sitaani okubhasakya kakayika, mbaritaatira. 14Na gimbibho ginu ꞉gyaguuye mu-mawa, egirengekanyibhwa na abhaanu abhandi abhoongwa Riingʼana rya Nyamuwanga. Nawe mmara, mbayiganywa na obhuubha, iinambá ya obhuniibhi, na okurya obhurame, mu-bhurame bhwebhwe. Gayo agakora bhasige okukura. 15Na gimbibho ginu ꞉gyaguuye ku-mayaru amajomu, egirengekanyibhwa na abhaanu bhanu abhoongwa Riingʼana rya Nyamuwanga. Bhaakamara okuryungwa, abharigwatirira na mutima mujomu, mbagenderera okuriiganiirisha, na ku-kabhaga koone kutyo abhakora bhikorwa ebhijomu.”

Goone kutyo garibha ku-bhweru

(Maariko 4:21-25)

16“Omuunu atakukongeesha intara, ˆnaayifundikira mw-idebhe, na atakutura okuyituura mw-ifuufu. Nawe, kaayituura iiguru ku-kisiri, insonga abhaanu bhaakeengira, bharore obhweru. 17Nikwo kutyo na ameeyibhise goone kutyo garituurwa ku-bhweru, gimbisike gyone kutyo giribha ku-bhweru.

18“Mmbe, mwitegeereshe mwikomeeresiishe kujomu ganu omuungwa! Kwa okubha, omuunu akabha ari na ekiinu, niwe aryongesibhwa. Nawe, omuunu akabha atari na kiinu, na ekitooto kinu ekitogwa ati ari nakyo, ariteesibhwa.”

Nyiramwene Yeesu na bhaawaamuwaabho

(Mataayo 12:46-50; Maariko 3:31-35)

19Niwe, bhaawaamuwaabho Yeesu na nyiramwene mbayika ayo mbaagaraga Yeesu. Nawe ꞉bhataaturire kumufugera-ko, kwa okubha abhaanu ꞉bhaariga bhayigeene. 20Abhaanu abhandi mbabhwira Yeesu ati, “Nyakumwana na bhaawaamuwaanyu bhayambaaye anja, abheenda okurorana na awe.” 21Yeesu ˆnaabhasubhya ati, “Abhaanu bhanu abheetegeeresha Riingʼana rya Nyamuwanga na okuryungwa, bhayo nibho bhaamaayi na abhamura bhaasu.”

Yeesu kaasiiga omuyaga na amabhooka bhitemekere

(Mataayo 8:23-27; Maariko 4:35-41)

22Orusuku rumwi, Yeesu ˆnaariinya mu-bhwato, ari amwi na abheeyigira bhaaye. ˆNaabhabhwira ati, “Kyambuke kije ngʼambu.” Mmbe, mbeemuka. 23Bhunu ꞉bhaariga mbagenda, Yeesu ˆnaawongera ntiro. Bhakyari ebhusibha, omuyaga ngutiimuka mwafu muno. Obhwato mbwamba okwijura amanji, kimwi mbabha mu-ngʼanga agati.

24Abheeyigira mbamuuja-ko, mbamuramusha, mbamubhwiraga ati, “Raatabhugenyi! Raatabhugenyi! Kyaweerera!” Yeesu ˆnaaramuka. ˆNaasiiga omuyaga guyo na amabhooka ati bhitemekere. Kimwi omuyaga ngutemekera, ndibha etore. 25Yeesu ˆnaabhuusha abheeyigira bhaaye ati, “Obhwikirisha bhwemwe bhuri aaki?” Abheeyigira bhayo mboobhaya muno. Mbaruguura, mbabhuushaanyaga ati, “Kana unu nniga! Ndora kaasiiga omuyaga na amabhooka mbimuungwa?”

Yeesu kaawosha Omugeraasi wa ebhiwi

(Mataayo 8:28-34; Maariko 5:1-20)

26Yeesu na abheeyigira bhaaye, mbayika ngʼambu ya mwaro gwa Gariraaya. Ekyaro kya ngʼambu iyo ꞉kyariga kiri kyaro kya Abhageraasi. 27Bhunu Yeesu ꞉eekire okusooka mu-bhwato ꞉aanyookeene na muunu wumwi owa mu-musi guyo. Omuunu uyo ꞉aariga awungirwe ebhiwi. Kabhaga kareera ꞉aayengaga kinaabhi na ꞉ateekaraga iika, tari weeki ꞉aariga eekaaye mu-nsenga#8:27 Abhayawudi ꞉bhaariga mbabhiika abhafuuye mu-nsenga, egindi ꞉gyariga gibhaajirwe mu-matare ga mu-bhiima. ginu ꞉bhaabhiikaga-mo abhafuuye.

28Bhunu omuunu uyo ꞉aarorere Yeesu ˆnaamwaya, ˆnaagwa bhwifumbike bhumbere bhwa Yeesu, ˆnaamura obhuraka ˆnaaika ati, “Awe Yeesu, Omwana wa Nyamuwanga Unu ari iiguru wa bhyone kutyo, owukyagara-koki? Ndora waaja okuunyansha! Enikwisaasaama unsige!” 29Ekiwi kiyo ꞉kyaaikire kutyo kwa okubha Yeesu ꞉aariga akisiigire ati kisooke mu-muunu uyo. Na ekiwi kiyo ꞉kyariga nkimuwunga kiyana. Abhaanu ꞉bhaasakyaga okumwangarira, mbamubhoyaga na eminyororo na gimpingu. Nawe, ꞉aariga ˆnaabhibhutura. Ekiwi kiyo ꞉kyariga nkimukora ˆnaaremera iibhara.

30Yeesu ˆnaabhuusha ati, “Riisiina ryawo nniga?” Woone ˆnaamusubhya ati, “Riisiina ryani, ni Ruyijo.” ꞉Aaikire kutyo, kwa okubha ꞉aariga awungirwe na bhiwi bhyafu. 31Ebhiwi bhiyo mbiisaasaama Yeesu ati aasiga okubhisiiga okugenda mw-itoko rinu riri nyombe.#8:31 Nyombe. Ringira riingʼana rinu mu-Mangʼana Amakomeeye.

32Ayeeyi na ayo, ꞉kyariga kiriwo ekisuumwa, na ku-mbarika ya ekisuumwa kiyo, ꞉ryariga ririwo eyijo enene erya gingurubhe ngireebhaga. Mmbe, ebhiwi bhiyo mbiisaasaama Yeesu ati, abhibhwire bhigende bhiingire mu-ngurubhe giyo. Yeesu ˆnaabhiikirisisha. 33Ebhiwi mbisooka mu-muunu uyo, mbigenda mbiingira mu-ngurubhe giyo. Gingurubhe gyone kutyo ngyoromoka okusooka ayo gibhirimire ngigwirira mu-manji, ngifwira muyo.

34Abhareefi bha gingurubhe giyo, ꞉bheejire bhaarora iingʼana iyo ꞉bhaabhirimire mbasweranya amangʼana gayo ku-bhaanu, mu-musi agati na mu-magunguri. 35Kimwi abhaanu mbeemuka mbagenda okurora amangʼana gayo kutyo gari, mbayika ku-Yeesu. Anu ꞉bhaamuyikire-ko, mbarora omuunu unu ꞉aariga asoosiibhwe-ko ebhiwi eekaaye asijeene na Yeesu, afwaye gingibho, ari muworu aswereene obhwenge. Abhaanu bhayo mboobhaya. 36Abhaanu bhanu ꞉bhaarorere ˆnaawosibhwa, mbatondera abhandi kutyo ebhiwi ꞉bhyamusookere-ko ˆnaawora. 37Abhaanu bhoone kutyo abha ku-kyaro kya Abhageraasi bhanu ꞉bhaariga bhari ayeeyi, mboobhaya. Mbasabha Yeesu ati asooke mu-kyaro kyebhwe. Yeesu woone ˆnaariinya mu-bhwato mbeemuka.

38Omuunu unu ꞉aariga asoosiibhwe-ko ebhiwi ˆneesaasaama Yeesu ati agende nawe. Nawe Yeesu ˆnaarema, ˆnaamubhwira ati, 39“Nuugende ewaanyu, ubhwire abhaanu ganu Nyamuwanga aakukorera.” Niwe, omuunu uyo ˆnaasooka ayo, ˆnaagenda ˆnaaraasisha abhaanu bha mbaara gyone kutyo mu-musi muyo, ganu Yeesu ꞉aariga amukoreeye.

Yeesu kaawosha omugasi, na okusuura omuyara

(Mataayo 9:18-26; Maariko 5:21-43)

40Bhunu Yeesu ꞉aasubhire Gariraaya ꞉aaramiiywe na bhaanu bhaafu, kwa okubha abhaanu bhayo ꞉bhaariga bhamurindiriiye. 41Bhakyari ayo, ˆnaaja omuunu wumwi, riisiina ryaye ˆnaatogwa Yayiro, ꞉aariga ari mutangasha wa riisunagoogi. Yayiro, ˆneefukama bhumbere bhwa Yeesu, ˆnaamwisaasaama agende nawe iika waaye, 42kwa okubha omuyara waaye wumwi era wa myaka ekumi na ebhiri, ꞉aariga ari murwaye asingire.

Bhunu Yeesu ꞉aariga ˆnaagenda ewa Yayiro, riisangi rya abhaanu, ꞉ryamuseetaga rimuyiganyiishe muno. 43Agati wa abhaanu bhayo, ꞉aariga ariwo omugasi wumwi. Omugasi uyo ꞉aariga arwaye obhureegu gyaturire myaka ekumi na ebhiri. [꞉Aariga aamarire ebhiinu bhyaye bhyone kutyo ˆnaagaraga obhuragusi,] nawe ꞉ataanyoorere muunu woonewoone wa okumuwosha.

44Mmbe, omugasi uyo ˆnaagenda iinyuma wa Yeesu, ˆnaakuunʼya ku-bhisumi bhya emwaro ebhya ingibho ya Yeesu. Ayoayo obhureegu bhwaye mbutemekera, ˆnaawora. 45Yeesu ˆnaabhuusha ati, “Niga unu aankuunʼya-ko?” Abhaanu bhoone kutyo, mbaaika ati bhatamukuunʼya-ko. Peetero woone ˆnaabhwira Yeesu ati, “Ee Raatabhugenyi, abhaanu ni bhaafu bhakusingiiye abhakuyiganya!” 46Nawe, Yeesu ˆnaaika ati, “Nimenyere ati ariwo omuunu unu aankuunʼya-ko, kwa okubha neeyungwa obhuturo bhwani obhwa okuwosha bhwakora emirimu.” 47Omugasi uyo, bhunu ꞉aarorere ati atakutura okwiyibhisa kweki, ˆnaaja ku-Yeesu enu ˆnaayararaga.#8:47 ˆNaayararaga. Omugasi unu ari na obhureegu, ku-Bhayawudi ni munaabhi. Omugasi rwa uyo ꞉ateekirisibhwaga na ebhiraagiro bhya Musa, okusangira amwi na abhandi. Kwa okubha omuunu aakamukuunʼya-ko, woone kaabha munaabhi. Ringira Abharaawi 15:25-33. ˆNeefukamira Yeesu, ˆnaamubhwirira mu-meeso ga abhaanu bhoone kutyo, insonga inu yaakora ˆnaamukuunʼya-ko, na kutyo aawosibhwa ayoayo. 48Yeesu ˆnaamubhwira ati, “Muyara waani, obhwikirisha bhwawo bhwakuwosha, nuugende na omurembe!”

49Bhunu Yeesu ꞉aariga akyaika gayo, omuunu okusooka ewa omutangasha wa riisunagoogi ˆnaaja. Omuunu uyo, ˆnaabhwira omutangasha uyo ati, “Omuyara waawo, aafuuye, siga era okunyansha Omwiyigisha.” 50Bhunu Yeesu ꞉oonguuywe amangʼana gayo, ˆnaabhwira Yayiro ati, “Siga okuubhaya! Nuubhe na obhwikirisha era, omuyara waawo kaawora.”

51Bhunu Yeesu ꞉aayikire ewa Yayiro, ˆnaagaanya abhaanu abhandi okwingira nawe mu-nyumba, tari ˆnaabhwira Peetero, Yowana, Yakobho, esemwene omuyara uyo, na nyiramwene bheengire nawe.

52꞉Bhaariga bhariwo bhaanu bhaafu mbariraga na okutogoonya ku-nsonga ya omuyara uyo. Yeesu ˆnaabhabhwira ati, “Musige okurira! Akyari kufwa unu, tari awongeeye era!” 53Abhaanu bhayo mbaamba okumuseka, kwa okubha ꞉bhaariga bhamenyere ati aafuuye.

54Yeesu ˆnaagwata okubhoko kwa omuyara uyo, ˆnaamura obhuraka ˆnaamubhwira ati, “Omwana waani awe, ramuka!” 55Kimwi, omuyara uyo, omwoyo ngusubha-mo, ˆnaayambaara. Yeesu ˆnaabhabhwira ati, bhamuyaane ebhyokurya. 56Bhunu abheebhusi bhaaye ꞉bhaarorere gayo, mbaruguura muno. Nawe Yeesu ˆnaabhagaanya ati, bhaasiga okubhwira omuunu woonewoone kutyo aasuura omuyara weebhwe.

Currently Selected:

Ruuka 8: kya

Highlight

Copy