Ruuka 24

Okusuuka kwa Yeesu

(Mataayo 28:1-10; Maariko 16:1-8; Yowana 20:1-10)

1Ekya obhwoyo#24:1 Ekya obhwoyo. Abhayawudi bheeki abhooya ekya Akasansabha. Ekya obhwoyo ni rusuku rwebhwe orwa okwamba orwa obhwoyo. anu oruguru rwasambire, abhagasi bhayo mbagenda ku-mbiiyira. ꞉Bhaariga bhagegere ebhirange bhinu ꞉bhaariga bhaaroosiishe. 2Mbanyoora riigina rinu ꞉ryariga risibhire ku-mbiiyira, risiringisiibhwe riri ku-mbarika. 3Niwe, mbeengira munsi, nawe mbanyoora omufu Yeesu atarimo. 4Bhunu ꞉bhaariga bhakyatangʼariiye amangʼana gayo, ayoayo, mbayambaara abharume bhabhiri, bhafwayega ngibho nyeru pee. 5Abhagasi bhayo, ꞉bheejire bhaarora gayo, mbayaya mbeenama, mbeefumbika ansi. Nawe, abhaanu bhayo mbabhabhwira ati, “Kubhaki omwagara omuworu mu-bhafuuye? 6Atariwo anu! Aasuukire! Muyiite amangʼana ganu ꞉aabhabhwiriiye bhunu ꞉aariga akyari Gariraaya, 7ˆnaaikaga ati, ‘Omwana wa Adaamu eesire okutuurwa mu-mabhoko ga abhakayi, okusungwa ku-musarabha, na okusuuka ku-rusuku rwa akasatu!’ ”#24:7 Ringira Ruuka 9:22. 8Abhagasi bhayo mbayiita amangʼana gayo Yeesu ꞉aabhabhwiriiye.

9Kimwi mbasooka mu-mbiiyira ayo, mbagenda okwaika amangʼana goone kutyo ganu bhaarora na okuungwa ku-bhatumwa#24:9 Abhatumwa. Ringira riingʼana rinu mu-Mangʼana Amakomeeye. ekumi na wumwi abha Yeesu, na ku-bheejaabho bhoone kutyo. 10Abhagasi bhanu ꞉bhaaikire ni, Maryamu Magidarena, na Jowana, na Maryamu nyira Yakobho, amwi na abhagasi abhandi bhanu ꞉bhaariga bhari amwi nabho. 11Bhunu ꞉bhaabhwiriiye abhatumwa bha Yeesu amangʼana gayo, abhatumwa bhayo mbagarora muna gatari na bhwera, ꞉bhataageekirisiishe. 12Nawe, Peetero ˆnaayambaara kimwi ˆnaabhirima okuja mu-mbiiyira. Bhunu ꞉aasungurisiishe munsi, ˆnaarora insanda inu ꞉bhaamubhiikire bhamufwafiishe, ibheeye eyeene era. ˆNaasooka ayo, aruguurire muno ku-ganu gaabha-yo.

Yeesu mu-rugendo rwa Yemawu

(Maariko 16:12-13)

13Ku-rusuku ruyoruyo Ekya obhwoyo, bhaanu bhabhiri mu-bheeyigira bha Yeesu ꞉bhaariga bhari mu-rugendo rwa okuja mw-igunguri rimwi eribhirikirwa Yemawu. Riigunguri riyo, ꞉ryariga riri muna kiromiita ekumi na yimwi okusooka Yerusareemu. 14Abhaanu bhayo, ꞉bhaariga mbagenda mbaaikanaga iiguru ya amangʼana goone kutyo ganu gabheeye-yo. 15Bhunu ꞉bhaariga bhakyaaikana mbabhuushaanyaga, Yeesu omwene ˆnaaja, ˆnaaribhata amwi nabho. 16Okumurora ꞉bhaamuroraga nawe okumumenya uri.

17Yeesu ˆnaabhabhuusha ati, “Omuribhata mwaikanaki?” Mbeetegera, enu bhasurumbaaye. 18Owumwi weebhwe, riisiina ryaye ni Kiriyopa, ˆnaamusubhya ati, “Angu ni awe era omugenyi mu-bheekasi bha Yerusareemu, usige okumenya amangʼana ganu gaguuye kunu ku-nsiku ginu?”

19Yeesu woone ˆnaabhabhuusha ati, “Mangʼanaki gayo?” Mbamusubhya ati, “Ekyaika amangʼana ga Yeesu Omunaajareeti. Yeesu aariga ari muragi wa obhuturo bhwa okukosha ebhikorwa na okwaika mu-meeso ga Nyamuwanga na ku-bhaanu bhoone kutyo. 20Na kutyo abhashengesi abhakuru na abhatungi bheeswe ꞉bhaamureetere ku-Piraato aramurirwe indamuro ya orufu, mbamusunga ku-musarabha. 21Nawe niwe kyariga nkiisiga ati, arikituurya eswe Abhaijirayeeri. Okukira gayo goone kutyo reero ni orusuku rwa akasatu amangʼana gayo gakorekere. 22Amwi na gayo, abhagasi abhandi agati weeswe bhaakitiinya, abhagasi bhayo bhaagenda mu-mbiiyira mu-ruguru, 23mbanyoora omufuuye atarimo, bhaaja okukibhwira ati bhaataka era maraayika mbabhaaja-ko, mbabhabhwira ati, ‘Yeesu ni muworu.’ 24Kimwi, abheejaasu abhandi mbagenda mu-mbiiyira, mbanyoora goone kutyo gabheeye rwa kutyo abhagasi bhayo bhaakibhwira, tari omufuuye bhataamurora.”

25Yeesu ˆnaabhabhwira ati, “Emwe ndora muri bhasiru kutyo! Kubhaki emitima gyemwe ni mikomeeye okwikirisha amangʼana goone kutyo ganu ꞉gaakaamirwe na abharagi? 26Toga ꞉gaakaamirwe ati Kiriisitu eesire okunyansibhwa kutyo, niwe eengire ku-bhugungyo bhwaye?” 27Niwe, Yeesu ˆnaabhasomboorera amangʼana goone kutyo ganu ꞉aakaamiiywe, okwambira ku-makaamo ga Musa, na amakaamo goone kutyo aga abharagi ku-bhuteero bhwago.

28Bhunu ꞉bhaariga bharebhereeye mw-igunguri rinu ꞉bhaariga mbagenda, Yeesu ˆneekora ati akyagenderera na orugendo. 29Nawe, mbamwisaasaama mbaaika ati, “Nuumaame ewaasu anu! Kwa okubha riisuubha ryaguuye, ingeta yeengiiye.” Niwe, Yeesu ˆneekirisha, mbeengira iika.

30Anu ꞉eejire okwikara okurya nabho, Yeesu ˆnaagega omukaate, ˆnaakumya Nyamuwanga, ˆnaagubhutura, ˆnaabhayaana. 31Ayoayo, mbeera ameeso geebhwe, mbamumenya ati ni Yeesu, kimwi ˆnaabhabhura-ko. 32Mbabhwirana ati, “Bhunu anaaika na eswe ku-njira, ˆnaakisombooreraga ganu gari mu-Makaamo Amataakatiifu, toga emyoyo gyeswe gyagisaasamukire?”

33Mbeemuka mu-kabhaga kayokayo, mbasubha Yerusareemu, mbanyookana na abheeyigira bha Yeesu ekumi na wumwi bheekumanyiishega amwi na abheejaabho abhandi, 34mbaaikaga ati, “Ni kimari, Raatabhugenyi weeswe aasuuka! Aasookera Simooni!” 35Niwe abhabhiri bhayo mbabhwira abheejaabho amangʼana goone kutyo ganu gaakoreka ku-njira, na kutyo ꞉bhaamenyere Yeesu bhunu ꞉aabhabhuturiiye omukaate.

Yeesu keeyeresha ku-bheeyigira bhaaye

(Mataayo 28:16-20; Maariko 16:14-18; Yowana 20:19-23; Ebhikorwa bhya Abhatumwa 1:6-8)

36Abheeyigira bhayo bhunu ꞉bhaariga bhakyaaika iingʼana iyo, mbataka era Yeesu omwene ˆnaayambaara agati weebhwe ˆnaabhabhwira ati, “Omurembe gubhe na emwe!”#24:36 Omurembe gubhe na emwe. Ni bhukeesha bhwa Ekiyawudi, nikwo kutyo bheeki abhakeeshaanya. 37Mbeetiinya, mboobhaya muno kwa okubha ꞉bhaatogaga ati bhaarora esambwa. 38Nawe, Yeesu ˆnaabhabhwira ati, “Ndora mwatitibhara? Kubhaki emitima gyemwe egiitimaata? 39Mundingire amabhoko gaani na amaguru gaani, niwe mumenye ati ni anye omwene! Munkuunʼye-ko! Mwirorere emwe abheene! Kwa okubha esambwa ritari na eminofu na amaguwa rwa kutyo omundora anye niri nago.”

40Bhunu Yeesu ꞉aamarire okubhabhwira gayo, ˆnaabheeresha amabhoko na amaguru gaaye. 41Abheeyigira bhaaye anu ꞉bhaariga bhakyeeganiirisha na okuruguura enu bhajomeeywe, Yeesu ˆnaabhabhuusha ati, “Angu anu muriwo na ekyokurya kyonekyone?” 42Mbamuyaana ekigiga kya inswi inkare. 43ˆNaakigega, ˆnaakirya bhoone kutyo mbarora. 44Kimwi ˆnaabhabhwira ati, “Ganu nigo amangʼana gaani ganu ꞉naariga nimbabhwira bhunu ꞉naariga nikyari amwi na emwe, ati goone kutyo ganu ꞉naakaamiiywe ku-bhiraagiro bhya Musa, ku-bharagi na ku-jabhuri, geesire okukuumira.”

45Niwe ˆnaabheesha ameeso bhamenyegeshe Riingʼana rya Nyamuwanga. 46ˆNaagenderera okubhabhwira ati, “Nikwo kutyo ꞉yaakaamirwe ati Kiriisitu arinyansibhwa okwamba, na orusuku rwa akasatu, arisuuka okusooka mu-bhafuuye. 47Na abhaanu bha ebhyaro bhyone kutyo okwambira Yerusareemu, bhariraasibhwa ati bhanuge ebhikayo bhyebhwe insonga bhaabhirwe kw-isiina ryaye. 48Emwe ni emwe abharori bha amangʼana gayo ꞉gaakorekere, ni emwe murigaaika ku-bhandi.

49“Mwitegeereshe! Raata ꞉aabharagire Mwoyo Omutaakatiifu. Woori anye noone enibhareetera rwa kutyo ꞉aariga abharagire. Nawe mwikare mu-musi agati, okuyikira anu muriyaanwa obhuturo okusooka mu-rwire.”

Yeesu keemusibhwa okugenda mu-rwire

(Maariko 16:19-20; Ebhikorwa bhya Abhatumwa 1:9-11)

50Yeesu ˆnaatangasha abheeyigira bhaaye, ˆnaabhasira Bhetaaniya, ˆneemusha amabhoko gaaye iiguru, ˆnaabhayaana giinonkwe. 51Bhunu ꞉aabheenderaga giinonkwe, ˆneemusibhwa okugenda mu-rwire. 52Kimwi abheeyigira bhaaye mbamuramya, mbasubha Yerusareemu, bhajomeeywega muno. 53Mbeekara nsiku gyone kutyo mw-ibhanja rya riiyekaru rya Nyamuwanga, mbakumangyaga Nyamuwanga.

Currently Selected:

Ruuka 24: kya

Highlight

Copy