Yowana Obhutangati
Obhutangati
Yowana ꞉aariga ari wumwi wa abheeyigira ekumi na bhabhiri bha Yeesu. Yowana ꞉aakaamire ekitabho kinu insonga asakire Abhakiriisitu bhoone kutyo, Abhayawudi na abhaanu abhandi bhanu bheekirisiishe Yeesu. ꞉Ataakaamire mangʼana ga obhurame bhwa Yeesu era, tari kaasimura na amangʼana ga ebhimenyegesho bhinu Yeesu ꞉aakoraga, na ameeyigisho ganu ꞉eeyigisiishe. Amangʼana gayo goone kutyo ageeresha ati, Yeesu ꞉aariga atari muunu era, nawe okubha Nyamuwanga kwone ꞉aariga ari.
Yowana ꞉aambire okukaama ekitabho kinu ˆnaakomeereshaga ati, Yeesu niwe Riingʼana rya Nyamuwanga. Kaakomeeresha kweki ati, Yeesu na Nyamuwanga ni kiinu kimwi. Yeesu atakukora ryoneryone atabhwiriiywe na Raata Nyamuwanga. Kweki ˆnaaikaga ati okufwa kwaye, ꞉aafuuye ari kimweso kinu ekyerusha abhaanu okusooka mu-bhikayo bhyebhwe. Kweki ati Yeesu niwe Masiya unu abharagi bha Iimuuma ya Kara ꞉bhaaragire ati aribha-wo. Ku-muryango gwa 13–17 kaaikira obhwendi bhwa Yeesu ku-bheeyigira bhaaye, na amangʼana ganu ꞉aabhabhwiriiye insonga abhasimbiishe, keegoro ya orusuku runu ꞉aagwatirwe. Kaamariisha okukaama ˆnaasimuraga kutyo Yeesu ꞉aaramuriiywe na okusungwa ku-musarabha, kutyo ꞉aasuukire okusooka mu-bhafuuye, na kutyo ꞉eeyeresiishe kaafu ku-bheeyigira bhaaye.
Currently Selected:
Yowana Obhutangati: kya
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved