Ruuka 16

Ekirengekanyo kya omuyambaasi omwenge

1Yeesu ˆnaabhwira abheeyigira bhaaye ati, “꞉Aariga ariwo omuniibhi wumwi, ari na omuyambaasi wa ebhiinu bhyaye. Omuyambaasi uyo, ˆnaasitaakibhwa ati, ꞉aariga ˆnaarya bhuyagayaga ebhiinu bhya esebhugenyi. 2Mmbe, omuniibhi uyo ˆnaamubhirikira, ˆnaamubhwira ati, ‘Ndora enuungwa owukora mangʼana mabhiibhi, ni mangʼanaki? Nuunyereshe ekitabho kya obhukumi bhwa ebhiinu bhyani bhyone kutyo. Kwa okubha utakutura okugenderera kweki okubha omuyambaasi wa ebhiinu bhyani!’

3“Omuyambaasi uyo ˆneebhuusha mu-mutima gwaye ati, ‘Woori nikore kutiki? Raatabhugenyi kaaja okunsoosha ku-mirimu. Nitari na amanaga ga okurima, na eniswara okusabhiirisha ku-bhaanu. 4Nawe eneenda abhaanu bhandamire eweebhwe, raatabhugenyi akansoosha ku-bhuyambaasi. Woori, naanyoora obhwenge.’

5“Niwe omuyambaasi uyo ˆnaabhirikira abhatongwa bhoone kutyo abha esebhugenyi, muunu wumwiwumwi. ˆNaabhuusha wa okwamba ati, ‘Awe, raatabhugenyi kaakutongaki?’ 6ˆNaamusubhya ati, ‘Kaantonga amafuta mapipa egana rimwi aga emijeyituuni.’#16:6 Emijeyituuni. Ni mati gari Ebhuyawudi eyo agasusana na amakuyu, nawe geeki agatwasha amatwasho. Omuyambaasi uyo weeki ˆnaamubhwira ati, ‘Gega bhwangu iitarataasi inu, ukaame-ko ati owutongwa mapipa makumi gataanu.’ 7Kimwi ˆnaabhuusha omutongwa owundi ati, ‘Awe, raatabhugenyi kaakutongaki?’ Woone ˆnaamusubhya ati, ‘Kaantonga magunira egana rimwi aga obhuro.’ Omuyambaasi uyo ˆnaamubhwira ati, ‘Gega iitarataasi ya riisiiri ryawo inu, kaama-ko magunira makumi munaana.’

8“Omuniibhi uyo ꞉eejire okuungwa amangʼana gayo, ˆnaakumangya omuyambaasi uyo kutyo ꞉aakorere obhwenge, raabhé kutyo ꞉aariga atari mwitongeeye. Kwa okubha, abhaanu bha ku-nsi kunu bhari na obhwenge. Abhasakirana na abheejaabho okukira abhaanu bha mu-bhukama bhwa Nyamuwanga. 9Noone enibhabhwira ati, mwikorere abhasaani ku-bhiinu bhyemwe ebhya ku-kyaro kunu. Anu ebhiinu bhiriwa muriramirwa mu-bhwikasi kajaanende.

10“Omuunu omwitongeeye ku-mangʼana amatooto, niwe kaabha mwitongeeye na ku-mangʼana amanene. Omuunu akabha atari mwitongeeye ku-mangʼana amatooto, atakutura okubha mwitongeeye ku-mangʼana amanene. 11Ikabha ati mutakutura okubha bheetongeeye ku-bhiinu bhya ku-kyaro kunu, omutoga ati niga kaaja okubhayaana ebhiinu ebhyenebhyene ebhya mu-rwire? 12Mukarema okwitongera ku-bhiinu bhya owundi, niga kaaja okubhayaana ebhiinu bhyemwe abheene? 13Atariwo mujuuma unu kaatura okukorera bheesebhugenyi bhabhiri emirimu kw-ibhaga rimwi. Akakora kutyo, kaatura okubhiiyirirwa owumwi ˆneenda owundi, amwi ati kaagwatana na owumwi ˆnaajeera owundi. Mutakutura okukorera Nyamuwanga emirimu, muringiiyega na ebhiinu bhyemwe kw-ibhaga rimwi riyoriyo!”

14Abhafarisaayo ꞉bheejire okuungwa amangʼana ga Yeesu gayo, mbaamba okumusangʼaya, kwa okubha ꞉bhaariga bheendere muno ebhiinu. 15Yeesu ˆnaabhabhwira ati, “Emwe, omwikora bharengeresi mu-meeso ga abhaanu. Nawe, Nyamuwanga amenyere amangʼana ga mu-mitima gyemwe. Kwa okubha, amangʼana ganu abhaanu abhayaana ekibharo muno, gayo nigo agabhiiyisha Nyamuwanga muno!”

Ebhiraagiro na obhukama bhwa Nyamuwanga

(Mataayo 11:12-13, 5:31-32; Maariko 10:11-12)

16“Ebhiraagiro bhya Musa, na amakaamo ga abharagi, ꞉geeyigisiibhwe okuyikira ku-kabhaga ka Yowana.#16:16 Yowana. Unu niwe Yowana Omubhatiisha. Kwambira akabhaga ka Yowana, Amangʼana Amajomu aga obhukama bhwa Nyamuwanga agaraasibhwa ku-bhaanu bhoone kutyo. Na woori abhaanu bhoone kutyo abheeyingisha-mo managa. 17Nawe, iwuuyire muno orwire na ekyaro okuwa-wo, okukira iinyuguta eyimwi eya ebhiraagiro okubhurwa obhwera.

18“Omurume akataana na omugasi waaye, ˆnaagabhura omugasi owundi, kaataara ameega. Na omugasi woone akataama, kimwi omuunu ˆnaamugabhura, omuunu uyo kaataara ameega.”

Omuniibhi na Raajaaro

19Yeesu ˆnaagenderera okubhabhwira ati, “꞉Aariga ariwo omuniibhi wumwi, omuniibhi uyo nsiku gyone kutyo ꞉aariga ˆnaarya obhurame, na okufwara ngibho njomu egya ekiniibhi. 20Na ku-muryango gwa omuniibhi uyo, abhaanu ꞉bhaariga mbareeta-wo omutobhu wumwi riisiina ryaye ˆnaatogwa Raajaaro, mbamumaamyaga ayo. Raajaaro uyo, ꞉aariga awooye ebhironda omubhiri gwone kutyo, 21gimbwa ngiijaga ngiramba ebhironda bhyaye. Bhunu omuniibhi uyo ꞉aaryaga ebhyokurya, ebhindi ꞉bhyaragaraga. Raajaaro ꞉aariga ˆnaaranga okurya ebhyokurya bhya ansi bhinu ꞉bhyariga mbiragara, kwa okubha ꞉aariga ˆnoongwa omweko.

22“Ku-bhuteero bhwa amangʼana gayo, Raajaaro ˆnaafwa. Bhaamaraayika mbamugega mbamusira ˆneekara amwi na Bhurayimu mu-rwire. Omuniibhi uyo woone ˆnaafwa, mbamubhiika. 23Mmbe, bhunu omuniibhi uyo ꞉aariga ˆnaanyanka muno ari nyombe#16:23 Nyombe. Ringira riingʼana rinu mu-Mangʼana Amakomeeye. eyo, ˆnaaragamira iiguru, ˆnaarora Bhurayimu na Raajaaro bhari amwi. 24Kimwi ˆnaaragirisha, ˆnaaikaga ati, ‘Raata Bhurayimu, ˆnuunfwire ekigongo! ˆNuutume Raajaaro eene ekyara kyaye mu-manji, aaje kw-anye antoonyishe ku-rurimi rwani, kwa okubha eninyanka muno mu-muriro munu.’

25“Nawe, Bhurayimu ˆnaamusubhya ati, ‘Omwana waani, nuuyiite kutyo ꞉waanyoorere amangʼana amajomu mu-bhurame bhwawo. Nawe Raajaaro weeki, ꞉aanyooraga amabhiibhi. Nawe woori, omwene woone ari anu enimweya amasiga. Awe woone woori owunyanka muno. 26Amwi na gayo, agati weeswe na emwe, ririwo etoko enene muno. Abhaanu bhakeenda okusooka enu bhaaje kw-imwe bhataamibhwe, bhayo bhari eyo bhoone bhakeenda okuuja enu bhataamibhwe.’

27“Omuniibhi uyo ˆnaaika ati, ‘Mmbe woori raata, enikusabha utume Raajaaro agende iika ewaasu, 28awonʼye abhamura bhaasu bhataanu, bhakafwa bhaasiga okureetwa enu ku-bhinyansho ebhikomeeye rwa bhinu.’ 29Nawe Bhurayimu weeki ˆnaamusubhya ati, ‘Abhamura bhaanyu, bhari na amangʼana ga Nyamuwanga. Amangʼana gayo ꞉gaakaamirwe na Musa na abharagi. Bheetegeereshe gayo!’

30“Omuniibhi uyo ˆnaamusubhya ati, ‘Uri, raata Bhurayimu! Nawe, omuunu akasooka mu-bhafuuye ˆnaabhaja-ko, niwe abhaaja okunuga ebhikayo bhyebhwe mbabhisiga.’ 31Bhurayimu ˆnaamusubhya ati, ‘Abhamura bhaanyu bhakarema okuungwa amangʼana gayo ꞉gaakaamirwe na Musa na abharagi abhandi, omuunu atakutura okubhakongya raabhé muunu uyo arasooke mu-bhafuuye!’ ”

Currently Selected:

Ruuka 16: kya

Highlight

Copy