Ruuka 17

Yeesu kaagonya bhanu abhayabhya abheejaabho

(Mataayo 18:6-7, 18:21-22; Maariko 9:42)

1Yeesu ˆnaabhwira abheeyigira bhaaye ati, “Amangʼana ga okuyabhya abhaanu gariija. Nawe garimunyoora omuunu unu arigareeta! 2Omuunu akayabhya owumwi mu-bhatooto bhanu, ˆnaamukora akore ebhikayo, eesire bhamubhoyere orubhuyi mu-bhikya, bhagende bhamusikye ebhusibha! 3Mmbe, mwiyangarire. Omuyiiri waawo akakukayira, nuumugonye, akakuungwa ˆnaanuga ebhikayo bhyaye, umwabhire. 4Na aakakukayira manga mungati ku-rusuku rumwi, nawe ˆnaasubha ku-awe ˆnaaika ati, ‘Nuunyaabhire nitakyasubhira kweki,’ woone nuumwabhire!”

Okwongesibhwa obhwikirisha

5Niwe abheeyigira bhayo mbabhwira Yeesu ati, “Ee Raatabhugenyi! Obhwikirisha bhweswe bhusuuyire, ekisabha ukyongesishe!” 6Yeesu ˆnaabhasubhya ati, “Raabhe mukabheeye na obhwikirisha bhutooto rwa akabhibho ka iiyaradaari,#17:6 Iiyaradaari. Ni kabhibho katooto muno, obhutooto bhwako ewaasu enu, ekitura okukariingʼaanya na akabhibho ka omuchicha. mukaturire okubhwira riikuyu rinu ati, ‘Iiyika anu uyambwe mu-nyanja!’ Riikuyu rikabhoonguuywe.”

Emirimu gya abhajuuma bha Yeesu

7“Kyaike owumwi weemwe ari na omugaya. Omugaya uyo kaamurimira, ebhaga rindi ˆnaamureebhera giingʼondi. Angu omugaya uyo akasubha iika, esebhugenyi kaatura okumubhwira ati, ‘Nuuje kirye?’ 8Uri! Tari kaaika era ati, ‘Nundosishe ebhyokurya, untuurire kw-igari. Undinde okuyikira anu niraamarire okurya na okunywa. Niwe woone uraarye na okunywa.’ 9Mmbe! Omugaya uyo akamara okukuumisha kutyo aaragirirwa, esebhugenyi kaatura okumukumya? Uri! 10Nikwo kutyokutyo emwe mwone, mukamara okukora goone kutyo ganu muragiriiywe, mwaike era ati, ‘Eswe kitari na bhwera, kiri bhagaya era. Ganu raatabhugenyi keenda nigo kyakora.’ ”

Yeesu kaawosha abhagenge ekumi

11Bhunu Yeesu ꞉aariga ˆnaagenda Yerusareemu, ꞉aaturire ku-rubhibhi rwa ekyaro kya Samaariya, na ekya Gariraaya. 12Bhunu ꞉eengiiye mw-igunguri rimwi, ˆnaanyookana na abhaanu ekumi bharwaye ebhigenge. Abhaanu bhayo, mbayambaara bhari areera okusooka ku-Yeesu. 13Kimwi mbaamura obhuraka, mbaaikaga ati, “Yeesu, Raatabhugenyi, nuukifwire kigongo!” 14Yeesu ˆnaabharora, ˆnaabhabhwira ati, “Mugende mwiyereshe kutyo muri mw-iyekaru ku-bhashengesi.”#17:14 Ringira Abharaawi 14:1-32. Mmbe, mbagenda. Bhunu ꞉bhaariga mbagenda, bhakyari ku-njira, mbawora.

15Owumwi weebhwe, bhunu ꞉aarorere ati aamarire okuwosibhwa, kimwi ˆnaasubha ku-Yeesu, enu ˆnaagungyaga Nyamuwanga aamuuye obhuraka. 16Bhunu ꞉aayikire ku-Yeesu, ˆnaagwa bhwifumbike imbere ku-maguru ga Yeesu, enu ˆnaamukumyaga. Omuunu uyo, ꞉aariga ari Musamaariya. 17Yeesu ˆnaaika ati, “Ndora abhaanu ekumi bhaawosibhwa bhoone kutyo! Woori, abhandi kenda bhari aaki? 18Bhatariwo abhandi tari ni mugenyi unu era, niwe aarora obhukene obhwa okugungya Nyamuwanga?” 19Kimwi Yeesu ˆnaabhwira omuunu uyo ati, “Yambaara, ugende ewaawo, obhwikirisha bhwawo nibhwo bhwakwerusha.”

Kutyo obhukama bhwa Nyamuwanga bhuriija

(Mataayo 24:23-28, 24:37-41)

20Orusuku rumwi, Abhafarisaayo ꞉bhaabhuusiishe Yeesu ati, “Obhukama bhwa Nyamuwanga, bhuriija rusukuki?” Yeesu ˆnaabhasubhya ati, “Obhukama bhwa Nyamuwanga bhutakuuja abhaanu mbabhurora na ameeso. 21Abhaanu bhataritura kwaika ati, ‘Muringire! Obhukama bhuri enu!’ Bhataryaika ati, ‘Murore! Obhukama mburya arya!’ Mwitegeereshe, obhukama bhwa Nyamuwanga bhuri mw-imwe.”

22Kimwi, Yeesu ˆnaabhwira abheeyigira bhaaye ati, “Ginsiku egiija, muriigomba muno okurora orusuku rumwi rwa ginsiku gya obhutungi bhwa Omwana wa Adaamu ku-kyaro kunu, nawe mutarirurora. 23Abhaanu bharibhabhwira ati, ‘Muringire! Ngurya arya!’ Abhandi ati, ‘Muringire! Ngunu anu!’ Nawe abhaanu bhayo, musige okubhaseeta. 24Kwa okubha, bhunu Omwana wa Adaamu arisubha, ariija rwa orumesho kutyo orumirika mbaara gyone kutyo ku-rwire. 25Nawe okwamba, Omwana wa Adaamu eesire anyoore ebhinyansho bhyafu na okuremwa na abhaanu bha orwibhuro runu.

26“Rwa kutyo amangʼana ꞉gaabheeye ku-nsiku gya Noowa, nikwo kutyo garibha ku-nsiku gya okusubha kwa Omwana wa Adaamu. 27Ku-nsiku gya Noowa, abhaanu ꞉bhaariga mbarya na okunywa, mbagabhura na okugabhurwa, okuyikira anu Noowa ꞉eengiriiye mu-meeri. Kimwi, ingubha niigwa nyafu muno, niita abhaanu bhayo bhoone kutyo.

28“Na ku-nsiku gya Ruutu gyone amangʼana ꞉gaariga gari kutyokutyo. Abhaanu ꞉bhaariga mbarya na okunywa, mbaguraga ebhiinu na okugusha, mbarima na okuyamba gimbibho, na okuumbaka kwone ꞉bhaariga mboombaka. 29Nawe, bhunu Ruutu ꞉aasookere Sodoma, omuriro na ekibhiriiti ngugwa rwa ingubha okusooka mu-rwire nguseekaana, nguweeresha abhaanu bhayo bhoone kutyo.

30“Bhunu Omwana wa Adaamu arituurwa abhweru, amangʼana garibha kutya. 31Orusuku ruyo, unu ari kw-idaari rya mu-nyumba yaaye, na ebhiinu bhyaye bhyone bhikabha bhiri mu-nyumba muyo, aasiga okwika okubhigega. Abhirime era. Na omuunu unu ari mw-isambu abhirime era, aasiga okufutata okugega kyonekyone, nawe abhirime era. 32Muyiite kutyo omugasi wa Ruutu ꞉aabheeye!#17:32 Nyamuwanga ꞉eerusiishe Ruutu, omugasi waaye na abhaana. Nyamuwanga ꞉aariga abhabhwiriiye ati bharibhate era okusooka mu-musi gwa Sodoma, bhaasiga okuringira iinyuma. Nawe, omugasi wa Ruutu weeki ˆnaaringira iinyuma kimwi ˆnaabha egina rya omuunyu. Ringira Obhwambiro 19:26. 33Omuunu akeenda okuwonʼya obhurame bhwaye omwene, aribhubhusha. Nawe, omuunu akabhusha obhurame bhwaye, uyo niwe aribhuwonʼya.

34“Enibhabhwira ati, mu-ngeta ya orusuku ruyo, abhaanu bhabhiri bharibha bhawongeeye ku-bhuriri bhumwi, owumwi arigegwa na Nyamuwanga, owundi arisigara. 35Orusuku ruyo, abhagasi bhabhiri bharishaga amwi ku-rubhuyi, nawe owumwi arigegwa na Nyamuwanga, owundi arisigara. [36Abharume bhabhiri, bhakabha mbakora emirimu mw-isambu, owumwi arigegwa, owundi arisigara.]”

37Abheeyigira mbabhuusha Yeesu ati, “Raatabhugenyi, amangʼana gayo garikoreka aaki?” Weeki ˆnaabhasubhya ati, “Anu intyanyi infuuye iri, niwe ebhikoona ebhisangira.”

Currently Selected:

Ruuka 17: kya

Highlight

Copy