Ruuka 15

Ekirengekanyo kya iingʼondi inu ꞉yaabhurire

(Mataayo 18:12-14)

1Orusuku rumwi, abhatobhesha bha riigooti na abhaanu abhandi abha ebhikayo, ꞉bheejire ku-Yeesu, okumwitegeeresha. 2Abhaanu bha ebhikayo okuuja ku-Yeesu, niikora Abhafarisaayo na abheeyigisha bha ebhiraagiro bhya Musa bheesigiinyire. Mbaaika ati, “Ndora omuunu unu kaaramira abha ebhikayo! Na abheekara amwi, ˆnaarya nabho!”

3Yeesu ˆnaabhabhwira ekirengekanyo, ˆnaaika ati, 4“Kyaike ati owumwi weemwe ari na ngʼondi egana. Aakamenya ati eyimwi ibhurire-ko, kaakora kutiki? Toga kaasiga giingʼondi makumi kenda na kenda (99) girya mu-bhureebhero, ˆnaagenda okwagara iingʼondi iyo, okuyikira anu araayinyoorere? 5Akayinyoora, kaayitwika ku-mabhega enu ajomeeywe, 6na akayika ewaaye, kaabhirikira abhasaani na abheekashaanya bhaaye. Bhakaaja ˆnaabhabhwira ati, ‘Kijomerwe kiri amwi, kwa okubha iingʼondi yaani inu yayibhurire, naayinyoora!’

7“Enibhabhwira ati, omuunu owumwi akanuga ebhikayo bhyaye mu-kyaro anu, bhaamaraayika mu-rwire abhajomerwa muno. Okujomerwa kuyo okukira kutyo abhajomererwa abharengeresi makumi kenda na kenda, kwa okubha abharengeresi bhayo bheeki bhatari na bhukene bhwa kunuga bhikayo.”

Ekirengekanyo kya iiyera inu ꞉yaabhurire

8“Mwitegeereshe ekirengekanyo ekindi! Kyaike ati omugasi wumwi akabha ari na giiyera gyaye ekumi,#15:8 Giiyera gyaye ekumi. Mu-Kiyunaani ikaamirwe ati, Darakima ekumi. Darakima yimwi ꞉yaariga iri indii ya omukosi wa emirimu ku-rusuku rumwi. kimwi ˆnaabhusha-ko eyimwi. Toga kaakongeesha intara, ˆneeyerera iinyumba yoone kutyo, ˆnaayaagarira kituunyo okuyikira anu ꞉aarayinyoore? 9Aakayinyoora, kaabhirikira abhasaani na abheekashaanya bhaaye ˆnaabhabhwira ati, ‘Kijomerwe kiri amwi kwa okubha iiyera yaani yayibhurire, woori naayinyoora!’

10“Enibhabhwira ati, nikwo kutyokutyo Nyamuwanga na bhaamaraayika bhaaye abhajomerwa, omuunu wumwi owa ebhikayo akanuga ebhikayo bhyaye ˆnaabhisiga.”

Ekirengekanyo kya omwana omutereeganu

11Yeesu ˆnaagenderera okwaika ati, “꞉Aariga ariwo omuunu wumwi, ari na abhaana bhabhiri, bhamura. 12Omutooto, ˆnaagenda kw-isemwene ˆnaamubhwira ati, ‘Raata, anye ngabhira-ko omugabho gwani.’ Esemwene ˆnaabhagabhira ebhiinu. ꞉Aabhagabhiiye bhoone kutyo ku-bhubhiri bhwebhwe.

13“Ginsiku ngitura-wo gitari nyafu, omumura omutooto uyo ˆnaakumanya ebhiinu bhyaye bhyone kutyo. ˆNaakora orugendo, ˆnaagenda ekyaro kya areera. Bhunu ꞉aayikire eyo, ˆnaamba okurya ebhiinu bhyaye bhuyagayaga na abhasimbe. 14Bhunu ꞉aamarire ebhiinu bhyone kutyo, kimwi injara niingira mu-kyaro kiyo, na mu-kabhaga kayo omumura uyo woone ꞉aariga atari na kiinu kyonekyone. 15Kimwi, ˆnaagenda ku-muunu wumwi mu-kyaro kiyo, ˆnaamusabha ˆnaamubhwira ati, ‘Enikusabha anye nibhe omukosi waawo owa emirimu.’ Omuunu uyo ˆneekirisha, ˆnaamusira mw-isambu ryaye okugabhisha gingurubhe.#15:15 Abhayawudi ꞉bhaajeeraga muno gingurubhe. 16Na bhunu gingurubhe ꞉gyariga ngirya amakanda, omwene woone egombaga okugarya! Nawe ꞉ataanyoorere muunu wa okumuyaana ekiinu kyonekyone kya okurya.

17“Ku-bhuteero, omumura uyo ˆneeganiirisha mu-mutima gwaye ˆnaaika ati, ‘Ndora abhajuuma bha raata, abharya mbeeguta, mbasaagya ebhyokurya! Nawe anye anu, enifwa na omweko. 18Nyakara woori nisubhe ku-raata, nimubhwire era ati, “Raata, anye nikayire ku-Nyamuwanga, awe woone nikukayiiye. 19Niteesire okubhirikirwa mwana waawo kweki. Woori, nunkore era rwa owumwi wa abhajuuma bhaawo.” ’

20“Mmbe, omumura uyo ˆneemuka, ˆnaasubha kw-isemwene. Anu ꞉aarebhereeye okuyika ewaabho, esemwene ꞉aamurorere. Esemwene ˆnaamufwira ekigongo, kimwi ˆnaamubhirimira, ˆnaamufumbeera na okumubhuusu.#15:20 Okubhuusu ni ntungwa gya Abhayawudi ku-bhukeeshaanya bhwebhwe. Ringira Ruuka 7:45. 21Omumura uyo, ˆnaabhwira esemwene ati, ‘Raata, nikayire ku-Nyamuwanga, awe woone nikukayiiye. Niteesire okubhirikirwa omwana waawo kweki.’

22“Nawe, esemwene ˆnaabhwira abhajuuma bhaaye ati, ‘Mureete anu ingibho injomu bhwangu, mumufwafye! Mumufwafye impete ku-kyara, na ebhikwirya ku-maguru. 23Mureete iimoori injomu irya, muyibhaage. Reero kirye kijomerwe, 24kwa okubha omwana waani unu, ꞉aariga abhurire, nawe woori kyarorana, ꞉aariga ari rwa omufuuye, nawe woori ni muworu!’ Niwe mbakora obhugenyi mbajomerwa muno.

25“Mu-kabhaga kayo, omumura waaye omukuru ꞉aariga ari mw-isambu. Bhunu ꞉aariga ˆnaasubha iika, arebhereeye okuyika, ˆnoongwa abhaanu mbeemba na okubhina. 26ˆNaabhirikira omujuuma wumwi owa esemwene, ˆnaamubhuusha ati, ‘Kyabha-yoki?’ 27Omujuuma uyo ˆnaamubhwira ati, ‘Omumura waanyu aaja, esomwana aamwitira iimoori injomu irya, kwa okubha aamunyoora ari omuworu.’ 28Omumura omukuru uyo ˆnaabhiiyirwa, ˆnaarema okwingira iika. Esemwene ˆnaawuruka anja, ˆnaamba okumwisaasaama eengire. 29Nawe omwene ˆnaasubhya esemwene ati, ‘Iitegeeresha raata! Anye ˆnaakukoreeye emirimu myaka myafu, nikyariga okusiga okuungwa ebhiraagiro bhyawo rusuku na rumwi! Nawe ukyariga kunyiitira kiinu kyonekyone, kabhe kamaanwa ka mbusi, noone nikore-ko obhugenyi amwi na abhasaani bhaani. 30Nawe omwana waawo unu, ꞉aariiye bhuyagayaga ebhiinu bhyawo na abhasimbe, woori aaja era, wamwitira iimoori yaawo injomu!’

31“Esemwene ˆnaamubhwira ati, ‘Omwana waani unu! Awe wiikaaye amwi na anye nsiku gyone kutyo, na ebhiinu bhyani bhyone kutyo ni bhyawo. 32Nawe omumura waanyu unu, eyeendwa kimukorere obhugenyi kijomerwe amwi, kwa okubha ꞉aariga abhurire, nawe woori kyarorana, ꞉aariga ari rwa omufuuye, nawe woori ni muworu!’ ”

Currently Selected:

Ruuka 15: kya

Highlight

Copy