Ruuka 14

Yeesu kaawosha omurwaye ruri orusuku rwa Insabhaato

1Orusuku rumwi iri Insabhaato, Yeesu ꞉aagendere okurya ebhyokurya ewa omukuru wumwi wa Abhafarisaayo. Na bhunu ꞉aariga ari ayo, Abhafarisaayo na abhaanu abhandi ꞉bhaariga bhamwitegaaniiye okurora kinu kaakora.

2Ayo Yeesu ꞉aariga ari, omuunu wumwi arwaye obhurwaye bhwa okufwimba omubhiri, woone ꞉aariga ariwo. 3Yeesu ˆnaabhuusha Abhafarisaayo na abheeyigisha bha ebhiraagiro ati, “Angu, ebhiraagiro ebhiikirisha okuwosha abhaanu orusuku rwa Insabhaato?” 4Bheeki mbajibhira. Yeesu ˆnaakuunʼya-ko omurwaye uyo, ˆnaamuwosha, kimwi ˆnaamubhwira asubhe iika.

5Yeesu ˆnaabhabhuusha kweki ati, “Ni niga agati weemwe, raabhe insikiri yaaye,#14:5 Insikiri yaaye. Amakaamo agandi aga kara aga Ekiyunaani agaaika ati, omwana waaye. amwi ati intaangʼana yaaye, ikagwa mw-itoko atakuyisoosha-mo, raabhé kutyo ni rusuku rwa Insabhaato?” 6Abhaanu bhayo, mbabhurwa erya okwaika.

Musige okwiyagarira ekibharo

7Bhunu Yeesu ꞉aarorere abhaanu mu-bhugenyi ayo mbeesorera ebhitebhe bhya imbere, niwe ˆnaabhabhwira ekirengekanyo ati, 8“Ukaraarikwa mu-bhwenga, ukayika usige okwikara ku-kitebhe kya imbere. Usige okukora kutyo, kwa okubha kaatura okubha araarikire owundi owa ekibharo okukukira awe. 9Unu abharaarikire bhabhiri mwone kutyo, ˆnaaja okukubhwira ati, ‘Nuusigire unu ekitebhe kiyo.’ Ayo niwe uriiswara muno, kwa okubha abhaaja okukusiiga ugende okwikara ku-bhitebhe bhya iinyuma wa abhaanu abhandi. 10Nawe, awe ukaraarikwa mu-bhugenyi, genda wiikare ku-kitebhe kya iinyuma. Unu akuraarikire niwe aaje, akubhwire ati, ‘Musaani waani, nuuje wiikare imbere enu, niwe ajomu.’ Ayo niwe owubha uyaaywe ekibharo mu-bhagenyi bhoone kutyo. 11Kwa okubha, omuunu akeegega, Nyamuwanga kaamutuura emwaro. Na omuunu akeetuura emwaro, Nyamuwanga kaamutuura iiguru.”

12Kimwi, Yeesu ˆnaabhwira unu ꞉aamuraarikire ati, “Ukaroosisha abhaanu ebhyokurya, ibhe mu-mwisi, ibhe keegoro, siga okuraarika abhasaani bhaawo, bhayiiri bhaawo, abhaanu bha mu-ruganda rwawo, na abheekashaanya bhaawo abhaniibhi. Ukakora kutyo, abheene bhoone bharikuraarika eweebhwe, woone urye rwa bhinu ꞉bhaariiye ewaawo.

13“Nawe, ukaroosisha abhaanu ebhyokurya, nuuraarike abhatobhu, abharema, na abhawofu. 14Ayo niwe uriyaanwa giinonkwe, kwa okubha abhaanu rwa bhayo bheeki bhatari na kiinu kya okukusubhisha. Nyamuwanga niwe arikusubhisha, bhunu arisuura abhaanu abharengeresi.”

Ekirengekanyo kya obhugenyi bhwa mu-rwire

(Mataayo 22:1-14)

15꞉Aariga ariwo muunu wumwi, woone ꞉aariga ari mugenyi ˆnaaryaga na abhagenyi abhandi. Bhunu ꞉oonguuywe amangʼana gayo, ˆnaabhwira Yeesu ati, “Nyakara omuunu unu arinyoora riibhando rya okurya ebhyokurya ku-bhukama bhwa Nyamuwanga!” 16Yeesu ˆnaamusubhya mu-kirengekanyo ˆnaaika ati, “꞉Aariga ariwo omuunu wumwi unu ꞉aakorere obhugenyi bhunene, ˆnaaraarika bhaanu bhaafu. 17Bhunu akabhaga ka okurya ꞉kaayikire, ˆnaatuma omugaya waaye agende okubhwira abhagenyi ati, ‘Muuje! Ebhiinu bhyayiiye!’

18“Nawe, abhagenyi bhayo, wumwiwumwi ˆnaabha na gimbari. Owa okwamba ˆnaamubhwira ati, ‘Enisabha unyaabhire! Nigurire riisambu, ni kujomu nigende okuriringira.’ 19Owundi ˆnaaika ati, ‘Nigurire ngʼombe ekumi egya okurimira, na woori, enigenda okugisakya. Enikusabha unyaabhire.’ 20Owundi woone ˆnaaika ati, ‘Naamara okugabhura omugasi bhasiiryasiirya anu, woori nitakutura okuuja.’

21“Omugaya uyo ˆnaasubha, ˆnaabhwira esebhugenyi amangʼana gayo goone kutyo. Niwe esebhugenyi ˆnaabhiiyirwa, ˆnaabhwira omujuuma waaye ati, ‘Genda bhwangu kw-iparapara na ku-bhijira ebhitooto ebhya mu-musi munu, ureete anu abhatobhu, abhawofu, na abharema.’

22“Kimwi, omugaya uyo ˆnaasubha, ˆnaabhwira esebhugenyi ati, ‘Raatabhugenyi, gayo wandagirira naagakora. Nawe, abhaanu bhakyari kubha bhaafu.’

23“Esebhugenyi ˆnaamubhwira kweki ati, ‘Mmbe! Woori nuugende anja ku-maparapara na ku-bhijira ebhitooto bhya areera na omusi, usiige abhaanu bhaaje bheengire, iinyumba yaani iijure. 24꞉Naariga niraarikire bhaanu bhaafu ku-bhwambiro, nawe enibhabhwira emwe ati, atariwo na wumwi weebhwe unu arirya obhugenyi bhwani!’ ”

Omuunu akeenda okubha omwiyigira wa Yeesu

(Mataayo 10:37-38)

25Bhunu Yeesu ꞉aariga ˆnaaribhata na riisangi enene rya abhaanu, ˆnaafutata, ˆnaabhabhwira ati, 26“Omuunu akeenda okubha omwiyigira waani, yeenderwe asige okwenda omuunu woonewoone okukira anye, abhe esemwene, abhe nyiramwene, abhe mukaaye, bhabhe bhaana bhaaye, bhabhe bhayiiri bhaaye, na abhasubhaati bhaaye, na asige okwiyenda omwene. 27Na omuunu woonewoone akabha akyari okugega omusarabha#14:27 Okugega omusarabha. Insonga ya riingʼana riyo ni ati, okwikirisha iinyanko raabhe ni kufwa ufwe, nawe usige okwigaana obhwikirisha bhwawo ku-Yeesu. gwaye aanseete, atakutura okubha omwiyigira waani.

28“Niga agati weemwe unu akeenda okuumbaka iinyumba, atakwikara okwamba, ˆneeganiirisha raabhe ari na ebhiinu bhya okwisa okuumbakira iinyumba iyo? Amenye raabhe ari na obhuturo bhwa okuyumbaka ayimare? 29Kwa okubha akateera ku-musingi era ˆnaataamibhwa okuyimariisha, abhaanu bhariirora kimwi mbamusangʼaya, 30mbaaikaga ati, ‘Omuunu unu ꞉aambire okuumbaka iinyumba, nawe ataamiibhwe okuyimariisha!’

31“Mmbe, kyaike ati ni mukamaki akeenda okurwana na omukama weejaabho, atakutura okwiganiirisha okwamba raabhe abhasirikare bhaaye bhiwumbi ekumi era, abhatura okurwana na abhasirikare bhiwumbi makumi gabhiri bha omukama owundi? 32Omukama uyo akarora ati atakutura, kaatuma abhaanu bhaaye bhwangu, bhagende okuungwana na omukama weejaabho akyari areera.

33“Nikwo kutyo gari na kw-imwe, omuunu akeenda okubha mwiyigira waani, asige ebhiinu bhyaye bhyone kutyo.”

Ekirengekanyo kya omuunyu na obhweru

(Mataayo 5:13; Maariko 9:50)

34“Omuunyu ni kiinu kijomu. Nawe omuunyu gukabhusha omuta gwago, kitariwo kiinu kya kugusambaarusha kweki. 35Omuunyu gukamara okubhusha omuta, gutakujomera kiinu kyonekyone ku-nsi kunu, abhaanu abhagwesaga iibhara. Omuunu unu ari na amatwi aga okuungwira, noongwe kujomu!”

Currently Selected:

Ruuka 14: kya

Highlight

Copy