Ruuka 13

Munuge ebhikayo mutaaja kuweerera

1Mu-kabhaga kayokayo, abhaanu ꞉bheejire mbabhwira Yeesu ati, abhasirikare bha Piraato ꞉bheetire Abhagariraaya abhandi, bhunu ꞉bhaariga mbasoosisha Nyamuwanga ebhimweso.

2Yeesu ˆnaabhwira abhaanu bhayo ati, “Angu, omutoga ati Abhagariraaya bhayo ꞉bhaafuuye kutyo, kwa okubha ꞉bhaariga bhari na ebhikayo okukira Abhagariraaya abhandi bhoone kutyo? 3Enibhabhwira ati, itari kutyo! Emwe mwone mukarema okunuga ebhikayo bhyemwe, omuuja okuweerera!” 4ˆNaabhabhwira kweki ati, “Mwoonguuywe ati abhaanu ekumi na munaana ꞉bhaagwiriiywe na ekiisonge Sirowamu eyo, angu woori, omutoga ati bheeki nibho ꞉bhaariga bhari na ebhikayo okukira abheekasi abhandi bhoone kutyo abha Yerusareemu? 5Enibhabhwira ati, itari kutyo! Mukarema okunuga ebhikayo bhyemwe, emwe mwone omuuja okuweerera!”

Ekirengekanyo kya riiti rikabha ritakutwasha

6Niwe, Yeesu ˆnaabhwira abhaanu bhayo ekirengekanyo, ˆnaaika ati, “꞉Aariga ariwo omuunu wumwi ꞉aayambire riiti rya riitiini mw-isambu ryaye. Kimwi ˆnaaja mmara, okwagara-ko amatwasho, nawe ataaganyoorere-ko. 7Mmbe, omuunu uyo ˆnaabhwira omukosi waaye owa emirimu mw-isambu riyo ati, ‘Ringira! Gyaturire myaka esatu niijaga okwagara amatwasho kw-iti kunu. Nawe nikyari kunyoora-ko kyonekyone! Nuuriteme era, ndora erinyamura insi!’ 8Nawe, omukosi wa emirimu uyo ˆnaamusubhya ati, ‘Ee raatabhugenyi, riiti rinu nuurisige era omwaka gunu, niriseejere, nirituurire-ko na obhusa. 9Mwaka, eritura okutwasha! Nawe rikarema okutwasha, uuje uriteme.’ ”

Yeesu kaawosha omuunu ruri rusuku rwa Insabhaato

10Orusuku rumwi iri Nsabhaato, Yeesu ꞉aariga ari mw-isunagoogi, ˆneeyigishaga abhaanu. 11Mw-isunagoogi muyo, ꞉aariga arimo omugasi wumwi, awungirwe ebhiwi emyaka gyaturire ekumi na munaana. Ebhiwi bhiyo ꞉bhyariga bhimukorere abheeye na ekikuku. Mu-kabhaga kayo ꞉ataaturaga okuyambaara eemire. 12Bhunu Yeesu ꞉aamurorere, ˆnaamubhirikira, ˆnaamubhwira ati, “Maayi, obhurwaye bhwawo bhwawora, woori uri muworu!” 13Yeesu ˆnaatuura amabhoko gaaye ku-mugasi uyo, kimwi omugasi uyo ˆnaayambaara eemire, ˆnaamba okukumangya Nyamuwanga.

14꞉Aariga ariwo omutangasha omukuru wa riisunagoogi, omutangasha uyo ˆnaabhiiyirwa muno okurora Yeesu ˆnaawosha omuunu orusuku rwa Insabhaato. ˆNaabhwira abhaanu ati, “Ku-bhwoyo, giriko nsiku sansabha era egya okukora emirimu. Mmbe! Muujega muwosibhwa ku-nsiku giyo, nawe musige okuwosibhwa orusuku rwa Insabhaato!”

15Yeesu ˆnaasubhya omukuru uyo ati, “Abhabheeyi emwe! Ndora mwone omukora emirimu orusuku rwa Insabhaato! Woori emwe mutakutura okusibhura iingʼombe okusooka mw-ibhago igende okunywa amanji, rukabha ruri orusuku rwa Insabhaato? 16Omugasi unu woone ni wa mu-ruganda rwa Bhurayimu. Nawe myaka ekumi rimwi na munaana, Sitaani aariga amubhoyere. Mmbe! Woori omugasi unu ateesire okusurumurwa ku-rusuku rwa Insabhaato?”

17Bhunu Yeesu ꞉aaikire gayo, bhanu ꞉bhaayajanaga nawe bhoone kutyo, mbeeswara. Nawe abhaanu abhandi bhoone kutyo, mbajomerwa muno. ꞉Bhaajomeewe okurora kutyo Yeesu ꞉aakoraga amangʼana ga okuruguusha.

Ekirengekanyo kya akabhibho akatooto

(Mataayo 13:31-33; Maariko 4:30-32)

18Kimwi Yeesu ˆnaabhuusha abhaanu ati, “Obhukama bhwa Nyamuwanga obhususana naki? Nibhuriingʼaanye na kiinuki? 19Obhususana na akabhibho ka iiyaradaari.#13:19 Akabhibho ka iiyaradaari. Ni kabhibho katooto muno, obhutooto bhwako ewaasu enu, ekitura okukariingʼaanya na akabhibho ka omuchicha. Omuunu ꞉aayambire imbibho iyo mw-isambu ryaye. Imbibho niimera, ndibha eti, giinyonyi ngiija ngyumbaka amoosu geebhwe ku-masagi gaaryo.”

20Yeesu ˆnaabhuusha kweki ati, “Sii, obhukama bhwa Nyamuwanga nibhususanye na kiinuki? 21Obhususana na omugasi unu ꞉aasaasiishe ekimera mu-madebhe gasatu aga ginfu, kimwi ginfu gyone kutyo egya mu-madebhe muyo ngitundura.”

Mwikomeeshe okutura mu-muryango omutooto

(Mataayo 7:13-23)

22Yeesu ꞉aariga ari mu-rugendo ˆnaagendaga Yerusareemu. Mu-njira muyo, ꞉aariga ˆneeyigishaga abhaanu bha emisi eminene na mu-magunguri enu ꞉aaturaga. 23Orusuku rumwi omuunu wumwi ˆnaabhuusha Yeesu ati, “Angu Raatabhugenyi, ni bhaanu bhatooto era nibho bharyerusibhwa?”

Yeesu ˆnaaika ati, 24“Emwe, mwikomeeshe okwingirira mu-muryango omutooto. Enibhabhwira ati, abhaanu abhaafu bharisaka okwingira, nawe bharitaamibhwa. 25Bhunu omwene nyumba ariigara orwigi rwaye, niwe muriyambaara anja, mwamba okumwisaasaama mukongʼoonaga orwigi mwaikaga ati, ‘Ee raatabhugenyi, nuukiigurire!’ Nawe omwene aribhasubhya ati, ‘Nitakubhamenya! Nitakumenya ati omusooka aaki!’ 26Emwe mwone murimubhwira ati, ‘Toga ꞉kyaryaga na okunywa amwi na awe! Na mu-magunguri geeswe, ni awe ꞉waakiiyigishaga!’ 27Nawe omwene aribhabhwira ati, ‘Naabhabhwiriiye! Emwe nitakubhamenya na nitakumenya enu omusooka! Musooke kw-anye anu, abhakosi bha amabhiibhi emwe!’

28“Woori eyo niwe muririra kutyo mukumye. Kwa okubha murirora Bhurayimu, Isaaka, na Yakobho, na abharagi abhandi bhoone kutyo bhabheeye ku-bhukama bhwa Nyamuwanga, nawe emwe Nyamuwanga aribharawurira anja! 29Abhaanu bhariija okusooka ebhuwuruka esuubha na ebhugwa esuubha. Abhandi bharisooka ebhurungu na ebhurimbe, abhaanu bhayo bhariikara okurya ebhyokurya ebhijomu ku-bhukama bhwa Nyamuwanga.

30“Mwitegeereshe! Bhariwo abhaanu bhari ku-bhuteero woori anu, bharibha abha okwamba, na abhandi ni bha okwamba woori anu, nawe bharibha bha ku-bhuteero.”

Yeesu kaasurumbarira Yerusareemu

(Mataayo 23:37-39)

31Mu-kabhaga kayokayo, Abhafarisaayo abhandi ꞉bheejire ku-Yeesu mbamubhwira ati, “Sooka anu, ugende ayandi, kwa okubha Yerode Antipa kaagara okukwita.” 32Yeesu ˆnaabhasubhya ati, “Yerode ni kibhwe era!#13:32 Yerode ni kibhwe era! Yeesu ꞉aariga ˆnaasusanya Yerode na omuunu atari na bhuturo bhwa okumukorera kiinu kyonekyone. Mugende mumubhwire ati, ‘Iitegeeresha! Reero na katondo anye enibhirimya ebhiwi mu-bhaanu, eniwosha na abharwaye. Orusuku rwa akasatu, enimara emirimu gyani.’ 33Amwi na gayo yeenderwe nigenderere na orugendo rwani, mutondo na bhasiirya, niyike Yerusareemu, kwa okubha abharagi bhatakufwira ayandi tari abhafwira Yerusareemu era!

34“Awe Yerusareemu, Yerusareemu! Awe owiita abharagi, na abhaanu abhandi bhaakatumwa ku-awe, owubhabhuma na amagina. Neendere kaafu okukumanya amwi abhaana bhaawo, rwa iingʼoko kutyo eyikumanya ebhijuuju bhyayo mu-mabhabha, nawe emwe mutakwenda. 35Muringire! Woori, omusi gwemwe oguuja okusigara etongo! Mmbe, enibhabhwira ekimari ati mutakyandora kweki, okuyikira anu muryaika ati, ‘Ayaaywe giinonkwe unu kaaja kw-isiina rya Raatabhugenyi.’ ”#13:35 Ringira Ijabhuri 118:26.

Currently Selected:

Ruuka 13: kya

Highlight

Copy