Ruuka 10

Yeesu kaatuma abheeyigira abhandi makumi mungati na bhabhiri

1Gayo ꞉geejire gaawa, Yeesu ꞉aariga akenere okuja mu-misi egindi. ˆNaasora abheeyigira abhandi makumi mungati,#10:1 Makumi mungati. Amakaamo agandi aga kara aga Ekiyunaani agaaika ati, makumi mungati na bhabhiri. ˆnaabhatuma bhabhiriibhiri, bhamutangatire okuja mu-misi giyo gyone kutyo. 2Yeesu ˆnaabhabhwira ati, “Ebhigeswa ni bhyafu, nawe abhagesi ni bhatooto. Woori, musabhe Raatabhugenyi Nyamuwanga, niwe omwene esambu, insonga atume abhagesi mw-isambu ryaye, bhagese. 3Mmbe, emwe mugende. Nawe, mumenye ati enibhatuma rwa giingʼondi ginu egiribhata agati wa ginsunji! 4Musige okugega ekikapo kya giiyera, ekisengo, ebhikwirya bhya okubharanya. Na musige okubhusha omwanya mukeeshaga abhaanu ku-njira.

5“Mukeengira nyumba yooneyoone, mukeeshe abhaanu bheende-mo ati, ‘Omurembe gubhe na emwe.’ 6Na akabha arimo omuunu wa omurembe mu-nyumba muyo, omurembe gunu mwamwendera ogusigara nawe. Nawe, omuunu wa omurembe akabha atarimo mu-nyumba muyo, omurembe gwemwe gusubhe kw-imwe. 7Mukeengira mu-musi mwikare musi gumwi era, bhaakabhayaana ebhyokurya murye, kwa okubha omukosi wa emirimu eesire okuyaanwa indiyo yaaye.

8“Mukeengira omusi gwonegwone, abheekasi bhaakabharamira, bhaakabhayaana ebhyokurya bhyonebhyone murye. 9Na muwoshe abharwaye mu-misi giyo. Mubhwire abheekasi bhayo ati, obhukama bhwa Nyamuwanga bhuri ayeeyi! 10Nawe, mukeengira mu-musi gwonegwone, na abheekasi bhaakarema okubharamira, muture mu-bhiseera bhyebhwe mwaikaga ati, 11‘Oruteeri rwa ku-maguru geeswe ni rwa mu-musi gwemwe. Ekirukuukumurira anu, kibhe kibharikisho kw-imwe#10:11 Ekirukuukumurira anu, kibhe kibharikisho kw-imwe. Ni kweresha ati Nyamuwanga aremere abhaanu wa omusi guyo, kwa okubha ꞉bhaaremere abhaanu bhaaye bhanu ꞉aatumire. mumenye kimari ati, obhukama bhwa Nyamuwanga bhuri ayeeyi!’ 12Enibhabhwira ati, orusuku runu Nyamuwanga ariramura abhaanu bha mu-musi guyo, aribharamurira makomeeye, okukira kutyo ariramurira abhakosi bha amabhiibhi abha Sodoma!”#10:12 Sodoma. Omusi gunu Nyamuwanga ꞉ookiishe na omuriro ˆnaagumara-wo, ku-nsonga ya ebhikayo bhya abhaanu bheende-mo. Ringira Obhwambiro 19:24-29.

Yeesu kaagonya abhaanu mu-misi ginu ꞉bhaamuremere

(Mataayo 11:20-24)

13“Garibhanyoora emwe, abhaanu bha Korajiini na abhaanu bha Bheetisayida! Kwa okubha, ebhigwa bhinu ꞉naakorere mu-meeso geemwe, nikabhikoreeye Tiiro na Sidooni,#10:13 Tiiro na Sidooni. Abhaanu bha emisi giyo ꞉bhaariga bhatari Abhayawudi, ꞉bhaariga bhari abhapagaani. Na Abhayawudi ꞉bhaariga bhamenyere abhaanu bhayo ati ni bhakosi bha amabhiibhi. Ringira Amoosi 1:9-10; Yoweeri 3:4. abhaanu mu-misi giyo bhatakakoorere okunuga ebhikayo bhyebhwe. Na bhakafwaye gingibho gya amagunira na okwiyaka riifu, okweresha obhunugi bhwebhwe obhwa ebhikayo. 14Nawe, orusuku runu Nyamuwanga ariramurira abhaanu mu-kyaro anu, aribharamurira emwe makomeeye okukira kutyo ariramurira abhaanu abhakosi bha amabhiibhi abha Tiiro na Sidooni! 15Emwe, abhaanu bha Kaperinawumu emwe, omutoga ati muririinywa muyike mu-rwire? Wuri, mutarikorerwa kutyo! Nawe, muriisibhwa emwaro mw-itoko rya nyombe!”

16Kimwi, Yeesu ˆnaabhabhwira abheeyigira bhaaye ati, “Unu aribheetegeereesha emwe, kaabha anyiitegeeresiishe anye. Na unu aribharema emwe, noone kaabha andemere. Na omuunu akandema anye, kaabha aremere Nyamuwanga, unu antumire.”

Abheeyigira bhaasubha ku-Yeesu

17Okumara gayo, niwe abheeyigira bharya makumi mungati mbasubha bhajomeeywega. Mbabhwira Yeesu ati, “Ee Raatabhugenyi, kw-isiina ryawo kyone ekibhirimya ebhiwi mu-bhaanu, mbikyungwa!” 18Yeesu ˆnaabhasubhya ati, “Nirorere Sitaani ˆnaataatika muna rumesho okusooka mu-rwire. 19Emwe mumenye ati, naabhayaaye obhuturo bhwa okuyiga amanaga goone kutyo aga Sitaani. Ku-bhuturo bhuyo, muritaja ebhisoro na ebhitoromooni, mutariwutasibhwa na kiinu kyonekyone. 20Nawe, musige kujomererwa kutyo ebhiwi ebhibhoongwa. Tari, mujomererwe riingʼana rinu, ati amasiina geemwe gakaamirwe mu-rwire.”

Yeesu kaajomerwa

(Mataayo 11:25-27, 13:16-17)

21Mu-kabhaga kayokayo, Mwoyo Omutaakatiifu ˆnaakora Yeesu ˆnaajomerwa muno, Yeesu ˆnaaika ati, “Ee Raata, enikukumya, awe Raatabhugenyi wa mu-rwire na mu-kyaro! Kwa okubha amangʼana ganu, ꞉waabhisire abheenge na abhasomi, nuutuurira abhweru abhaana abhatooto.#10:21 Abhaana abhatooto. Ni bhaanu bhanu bheekirisiishe Nyamuwanga, raabhé bhakabha bhatasomere. Yee Raata, kwa okubha ni kutyo ꞉gaakujomeeye awe.” 22Kimwi Yeesu ˆnaabhwira abhaanu ati, “Raata anaaye ebhiinu bhyone kutyo. Ni esemwene mwana era, niwe amenyere Omwana. Na Omwana era, niwe amenyere esemwene, na Omwana akeenda okweresha esemwene ku-muunu, kaamweresha.”

23Kimwi, Yeesu ˆnaaringira abheeyigira bhaaye, ˆnaabhabhwirira ku-mbarika bhari abheene ati, “Nyakara emwe, kwa okubha omurora amangʼana ganu na ameeso geemwe! 24Kwa okubha enibhabhwira ati, abharagi bhaafu, na abhakama, ꞉bheegombere okurora amangʼana ganu emwe omurora, nawe ꞉bhataagarorere. Na ꞉bheegombere okuungwa ganu emwe omuungwa, nawe ꞉bhataagoonguuywe.”

Ekirengekanyo kya Omusamaariya owa omutima omujomu

25Orusuku rumwi, omwiyigisha wumwi owa ebhiraagiro bhya Musa ꞉aayambaaye, ˆnaabhuusha Yeesu riibhuusho okumusakya, ˆnaamubhwira ati, “Ee Omwiyigisha, nikore kutiki, niije ninyoore obhurame bhunu bhutakuweera?” 26Yeesu ˆnaamusubhya ati, “Ku-bhiraagiro gakaamirwe kutiki? Owubhisombookerwa kutiki?” 27ˆNaamusubhya ati, “Gakaamirwe kutya, ‘Yeenda Raatabhugenyi Nyamuwanga waawo ku-mutima gwawo gwone kutyo, ku-managa gaawo goone kutyo, na ku-bhwiganiirisha bhwawo bhwone kutyo.’#10:27a Ringira Ekiyiityo kya Ebhiraagiro 6:5. Na ‘Wende omwikashaanya waawo, rwa kutyo owiiyenda omwene.’ ”#10:27b Ringira Abharaawi 19:18. 28Yeesu ˆnaamubhwira ati, “Waasubhya kujomu! Ukakora kutyo gakaamirwe, urirama.”

29Nawe, omwiyigisha uyo, ˆneenda okweresha ati ni murengeresi ku-Nyamuwanga, ˆnaabhuusha Yeesu ati, “Woori omwikashaanya waani, ni wuuya?”

30Yeesu ˆnaamusubhya ati, “꞉Aariga ariwo omuunu wumwi, ˆnaasookaga Yerusareemu, ari maguru ˆnaagenda Yeriko. Ku-njiragati, ˆnaanyookana na abheefi mbamubhuma muno. Mbamufuura gingibho, mbamusiga asingire arebhereeye okufwa. 31Ebhando ejomu ku-njira ayo, ˆnaatura omushengesi wumwi. Nawe omushengesi uyo ꞉eejire aamurora, ꞉aaturire ku-mbarika. 32Omuraawi#10:32 Omuraawi. Abharaawi ꞉bhaariga mbakorera Nyamuwanga emirimu mw-iyekaru ryaye, mbasakiraga abhashengesi. Ringira Obhubhasi 3:1-13. woone, ˆnaatura ku-njira kuyo, ꞉eejire aarora omuunu uyo, ˆnaatura ku-mbarika. 33Nawe ˆnaaja Omusamaariya#10:33 Omusamaariya. Abhayawudi ꞉bhaariga mbajeera Abhasamaariya, ku-nsonga ati Abhasamaariya abharamya Nyamuwanga ku-njira inu iteemire. Kutyo, abhaanu bha ebhyaro ebhibhiri bhinu, ꞉bhaariga bhasokeene. wumwi, ˆnaagendaga rugendo rwaye. Bhunu ꞉aarorere omuunu uyo, ˆnaamufwira ekigongo. 34ˆNaamuuja-ko, ˆnaamuragura amawuta gaaye ˆnaagayaka iidivaayi na amafuta, ˆnaamubhoya amawuta gayo kujomu. Kimwi ˆnaamuriinya ku-nsikiri yaaye, ˆnaamugega ˆnaamusira mu-nyumba ya abhagenyi, ˆnaamusiga muyo amuunye. 35Mwejo, ˆnaasoosha mu-mufuko dinaari#10:35 Dinaari. Dinaari yimwi ꞉yaariga iriingʼeene na muyeero gwa rusuku rumwi ku-muunu wumwi. ebhiri, ˆnaayaana omwene nyumba ˆnaamubhwira ati, ‘Ringirira omuunu unu. Ukamusoosisha giiyera egindi okukira ginu, nirisubha nirikuriya.’ ”

36Niwe, Yeesu ˆnaabhuusha omwiyigisha uyo ati, “Mmbe! Ku-kurora kwawo, ku-bhaanu abhasatu bhayo ni wuuya ꞉aariga ari mwikashaanya owa omuunu uyo?” 37Omwiyigisha uyo ˆnaamusubhya ati, “Ni muunu wa akasatu urya niwe ꞉aamufwiriiye ekigongo. Uyo niwe ꞉aariga ari omwikashaanya waaye.” Yeesu ˆnaamubhwira ati, “Genda, woone ukore kutyokutyo!”

Yeesu ari ewa Marita na Maryamu

38Yeesu na abheeyigira bhaaye mbagenda, mbayika kw-igunguri rimwi. Na omugasi wumwi, riisiina ryaye ˆnaatogwa Marita, ˆnaabharamira ˆnaabhasira ewaaye. 39Marita uyo, ꞉aariga ari na omuyara waabho, riisiina ryaye ˆnaatogwa Maryamu. Mu-kabhaga kayo, Maryamu ꞉aariga eekaaye ansi asijeene na Yeesu, ˆnaamwitegeereshaga. 40Marita, ꞉aariga ˆnaafurufuutira abhagenyi ebhyokurya ari omwene era. Kimwi Marita ˆnaaja ku-Yeesu, ˆnaamubhwira ati, “Ee Raatabhugenyi, awe utakurora ati omuyara waasu unu aansigira emirimu gyone kutyo? Mmbe, nuumubhwire aansakire emirimu!”

41Nawe Yeesu ˆnaamusubhya ati, “Awe Marita, Marita! Owunyakirira mangʼana maafu. 42Nawe, ririwo engʼana rimwi era ejomu okukira goone kutyo ku-bhaanu. Maryamu niwe asorere riingʼana riijomu okukira goone kutyo. Riingʼana riyo omuunu atakutura kumusoosisha-ko.”

Currently Selected:

Ruuka 10: kya

Highlight

Copy