Yowana 15

Yeesu niwe omujabhiibhu ogwenegwene

1Yeesu ˆnaagenderera okubheeyigisha ati, “Ni anye omujabhiibhu ogwenegwene, na Raata niwe omurimi. 2Amasagi goone kutyo ganu gandiko ganu gatakutwasha, Raata kaagatema-ko. Nawe amasagi goone kutyo ganu agatwasha, Raata kaagakongorera insonga gatwashe muno. 3Emwe okuriingʼaana na riingʼana rinu naabhabhwiriiye mwamarire okukongorwa na muri bheeru mu-mitima. 4Mwikare mu-mutima gwani, anye noone niikare mu-mitima gyemwe. Rwa kutyo riisagi ritakutura okutwasha amatwasho riri eryene era, ritari kw-isina rya omujabhiibhu, nikwo kutyokutyo mwone, muteekaaye mu-mutima gwani, mutakutura okutwasha amatwasho.

5“Ni anye omujabhiibhu, emwe muri masagi. Omuunu unu kaabha mu-mutima gwani, anye noone nimba mu-mutima gwaye, uyo kaatwasha amatwasho maafu, kwa okubha nikasiga okubhasakira, emwe mutakutura okukora engʼana ryoneryone. 6Omuunu woonewoone akarema okumba-ko, keeswa rwa riisagi ˆnaawotoka. Abhaanu abhaaja mbaribhooja, mbaryesa mu-muriro, ndiruungura. 7Emwe mukeekara mu-mutima gwani, na amangʼana gaani ngeekara mu-mitima gyemwe, musabhe engʼana ryoneryone rinu omwenda, omuyaanwa. 8Raabhe mukatwasha amatwasho maafu, omubha muri bheeyigira bhaani abheenebheene, na mukabha kutyo Raata kaagungibhwa. 9Rwa kutyo Raata anyendere anye, nikwo kutyo anye noone nibheendere emwe. Mmbe mwikare mu-bhwendi bhwani. 10Mukagwatira ebhiraagiro bhyani, omuuja okugenderera okwikara mu-bhwendi bhwani, rwa kutyo anye ꞉naagwatiiye ebhiraagiro bhya Raata niikara mu-bhwendi bhwaye.

11“Naabhabhwira gayo insonga obhujomerwa bhwani bhubhe mw-imwe, na obhujomerwa bhwemwe bhukuumire. 12Ekiraagiro kyani ni kinu, mwendane, rwa kutyo anye nibheendere. 13Atariwo omuunu unu ari na obhwendi bhunene okukira bhunu, obhwa omuunu okusoosha obhurame bhwaye ku-nsonga ya abhasaani bhaaye. 14Omuuja okubha bhasaani bhaani, mukakora ganu enibharagirira. 15Nitakubhabhirikira kweki ati bhagaya, kwa okubha omugaya atakumenya kinu esebhugenyi kaakora. Nawe emwe enibhabhirikira bhasaani bhaani, kwa okubha goone kutyo ganu ꞉noonguuywe ku-Raata nibhabhwiriiye. 16Emwe ꞉mutaansorere, nawe ni anye ꞉naabhasorere. ꞉Naabhasorere insonga mutwashe amatwasho, na amatwasho gayo gasige okuweesha, insonga mukasabha Raata ryoneryone kw-isiina ryani abhayaane. 17Mmbe, enibharagirira emwe ati mwendane.”

Abhaanu bha mu-kyaro kinu abhabhiiyirirwa bhanu bheekirisiishe Yeesu

18Yeesu ˆnaagenderera okubheeyigisha ati, “Raabhe abhaanu bha ekyaro kinu bhakabhabhiiyirirwa, mumenye ati bhaambire okumbiiyirirwa bhakyari okubhabhiiyirirwa. 19Raabhe mukabheeye bhaanu bha mu-kyaro kinu, bhakabheendere rwa kutyo bheendere abhaanu bheebhwe. Nawe emwe mutari bha mu-kyaro kinu, tari ꞉naabhasorere okusooka mu-kyaro kinu, ku-nsonga iyo, abhaanu bha mu-kyaro kinu abhabhabhiiyirirwa. 20Muyiite riingʼana rinu ꞉naabhabhwiriiye ati, ‘Omugaya atakutura okubha mukuru okukira esebhugenyi.’ Mmbe, raabhe ꞉bhaanyansiishe, bharibhanyansha emwe mwone. Nawe raabhe ꞉bheekirisiishe ameeyigisho gaani, bhariikirisha na ageemwe. 21Nawe abhaaja okubhakorera amangʼana gayo goone kutyo ku-nsonga ya riisiina ryani, kwa okubha bhatakumenya unu ꞉aantumire. 22Raabhe nikaremere okuuja okwaika nabho, bhataakabheeye na ebhikayo, nawe woori, bhatakutura okwibhagira ati bhatari na bhikayo. 23Omuunu woonewoone unu kaambiiyirirwa anye, okubhiiyirirwa kwaye kuri na ku-Raata. 24Nikabheeye nitakorere ebhiruguusho bhinene bhinu omuunu owundi akyariga okukora, bhataakabheeye na bhikayo. Nawe woori bhaarorere goone kutyo ganu naakorere, nawe abhambiiyirirwa, na Raata woone abhamubhiiyirirwa. 25Ganu gabheeye-wo insonga amangʼana ganu gakaamirwe mu-Makaamo Amataakatiifu gakuumire ati, ‘꞉Bhaambiiyiriiywe bhusa.’#15:25 Ringira Ijabhuri 35:19, 69:4.

26“Nawe bhunu Omusakisi unu niribhareetera okusooka ku-Raata, Mwoyo Omutaakatiifu owa ekimari, unu kaasooka ku-Raata, omwene aribhabhwira ekimari kyani. 27Emwe mwone omuuja okubhwira abhaanu amangʼana gaani, kwa okubha muri amwi na anye okusookerera ku-bhwambiro.

Currently Selected:

Yowana 15: kya

Highlight

Copy