Yowana 16

1“Naabhabhwira amangʼana gayo, insonga mwasiga okusiga obhwikirisha bhwemwe. 2Abhaanu bharibhabhirimya mu-masunagoogi. Kariyika akabhaga kanu abhaanu bharibheetaga, mbatoga ati abhakorera Nyamuwanga emirimu. 3Bharibhakorera kutyo, kwa okubha bhatakumenya Raata, na bhatakummenya anye. 4Naabhabhwira gayo, insonga akabhaga kayo kariyika, muyiite ati ꞉naabhabhwiriiye.”

Emirimu gya Mwoyo Omutaakatiifu

“꞉Nitaabhabhwiriiye amangʼana gayo goone kutyo ku-bhwambiro, kwa okubha ꞉naariga niri amwi na emwe. 5Nawe woori enigenda ku-Raata unu ꞉aantumire kw-imwe. Atariwo omuunu woonewoone agati weemwe unu kaambuusha ati, ‘Owugenda aaki?’ 6Tari woori kwa okubha naabhabhwira gayo, emitima gyemwe gyasurumbara muno.

7“Nawe enibhabhwira ekimari ati, eyibha kujomu kw-imwe ati, anye enigenda ku-Raata. Kwa okubha anye nikasiga okugenda, Omusakisi uyo atakutura okuuja kw-imwe. Nawe nikagenda, eniija okumutuma kw-imwe. 8Bhunu ariija, aryeresha abhaanu bhoone kutyo ati ni bhakayi, aribheeresha obhurengeresi bhwa Nyamuwanga, na kutyo Nyamuwanga ariramurira abhaanu. 9Ku-rubhaara rwa ebhikayo, aribheeresha ati ni bhakayi, kwa okubha bhatakunyiikirisha. 10Ku-rubhaara rwa obhurengeresi, kwa okubha anye enigenda ku-Raata, na mutakuuja okundora kweki. 11Ku-rubhaara rwa indamuro, kwa okubha aaramuriiye Sitaani, omutungi wa ku-kyaro kinu.

12“Nikyari na amangʼana maafu aga okubhabhwira, nawe woori mutakutura okusombookerwa. 13Nawe bhunu Mwoyo wa ekimari uyo ariija, aribhatangasha mumenye ekimari kyone kutyo. Ataryaika amangʼana gaaye omwene era, tari aryaika ganu aryungwaga, naabhabhwira na amangʼana ganu gariija. 14Mwoyo uyo aringungya, kwa okubha ganu aribhabhwira, garibha ganu asoosiishe ku-anye. 15Ebhiinu bhyone kutyo bhinu Raata ari nabhyo ni bhyani. Kyakora enaaika ati, ganu Mwoyo uyo aribhabhwira, garibha ganu asoosiishe ku-anye.”

Insurumbaro iriyinduka okubha rugirigiri

16“Kakyari kabhaga katooto mutakuuja okundora, kweki kakyari kabhaga katooto omuuja okundora.” 17Mmbe, niwe abheeyigira bhaaye abhandi mbabhuushaanya ati, “Kaaika kiinuki kiyo? Ati, ‘Kakyari kabhaga katooto mutakuuja okundora, kweki kakyari kabhaga katooto omuuja okundora,’ na erindi ati, ‘Kwa okubha anye enigenda ku-Raata?’” 18Mmbe, mbagenderera okubhuushaanya ati, “Ni engʼanaki riyo kaaika, ‘Kakyari kabhaga katooto?’ Eswe kitakumenya ganu kaaika.” 19Yeesu ˆnaamenya ati ꞉bhaariga mbeenda okumubhuusha ganu ꞉aaikire, niwe ˆnaabhabhuusha ati, “Ganu naaika ati, ‘Kakyari kabhaga katooto mutakuuja okundora, kweki kakyari kabhaga katooto omuuja okundora’ nigo omubhuushaanya? 20Enibhabhwira ekimari ati, muririra na okusurumbara muno, nawe abhaanu bha ekyaro kinu bheeki bharijomerwa. Murisurumbara, nawe ekisurumbaro kyemwe kiriyinduka nkibha rugirigiri. 21Rwa kutyo omugasi kaarumwa obhusungu bhwa okwibhura, kaasurumbara kwa okubha kaabha ari mu-kabhaga kaaye aka iinyanko. Nawe akamara okwibhura, atakuyiita kweki iinyanko iyo, ku-nsonga ya obhujomerwa bhwa omwana okwibhurwa mu-kyaro. 22Emwe mwone woori anu musurumbaaye. Nawe eniija okubhasubha-ko kweki, na emitima gyemwe egiija okujomerwa, obhujomerwa bhunu atariwo omuunu unu kaatura okubhusoosha mu-mitima gyemwe. 23Na mu-kabhaga kayo, mutarimbuusha engʼana ryoneryone.

“Enibhabhwira ekimari ati, mukasabha Raata ryoneryone kw-isiina ryani, aribhayaana. 24Na woori mukyari okusabha kyonekyone ku-Nyamuwanga, okuturira kw-isiina ryani. Musabhe Nyamuwanga, kaaja okubhayaana, insonga okujomerwa kwemwe kukuumire.”

Omurembe ku-bheeyigira

25“Naabhabhwirira amangʼana gayo mu-bhirengekanyo. Nawe akabhaga akaaja kanu nitakuuja okuroma na emwe naaikiraga mu-bhirengekanyo kweki, nawe niribhabhwirira abhweru amangʼana ganu agaaikira Raata. 26Mu-kabhaga kayo, murisabha Raata kw-isiina ryani. Nitakwaika ati anye niribhasabhira ku-Raata. 27Raata omwene abheendere, kwa okubha emwe munyendere, na mwikirisiishe ati ꞉naasookere ku-mwene. 28꞉Naasookere ku-Raata niija mu-kyaro anu, nawe woori eniimuka mu-kyaro anu, nisubhe ku-Raata.” 29Mmbe, abheeyigira bhaaye mbamubhwira ati, “Woori waamba okwaika na eswe abhweru utaaikiiye mu-bhirengekanyo! 30Woori kyamenya ati umenyere amangʼana goone kutyo, na utakwenda muunu akubhuushe engʼana ryoneryone. Gayo nigo gaakora kiikirishe ati ꞉waasookere ku-Nyamuwanga.” 31Yeesu ˆnaabhabhuusha ati, “Woori mweekirisha? 32Mwitegeereshe, akabhaga akaaja, yee, akabhaga kayo kaabheeye-wo, emwe mwone kutyo omuuja okunyaragana munsige anye omwene, mwone kutyo wumwiwumwi ˆnaagenda ewaabho. Nawe anye nitakusigara omwene, kwa okubha Raata ari amwi na anye. 33Naabhabhwira gayo insonga mubhe na omurembe mu-mitima gyemwe, kwa okubha muri mu-mutima gwani. Mu-kyaro anu, muri na nyanko nene, nawe mwasiga okufwa emitima kwa okubha anye niyigire ekyaro.”

Currently Selected:

Yowana 16: kya

Highlight

Copy