Yowana 13

Yeesu koosha abheeyigira bhaaye amaguru

1Mmbe bhunu Ipaasaka ꞉yaariga ikyari okuyika, Yeesu ˆnaamenya ati akabhaga kaaye aka okusooka mu-kyaro kinu okusubha kw-isemwene kaayikire. Yeesu ꞉aariga eendere muno abhaanu bhaaye bhanu ꞉bhaariga bhari mu-kyaro, ꞉aariga abheendere kutaamya.

2Yeesu na abheeyigira bhaaye mbeekara okurya ebhyokurya bhya keegoro. Akabhaga kayo, Sitaani ꞉aariga aakongiishe Yuuda, omumura wa Simooni Esikariyooti, insonga arye Yeesu injeejemo. 3Yeesu ꞉aariga amenyere ati Raata Nyamuwanga amuyaaye obhuturo ku-bhiinu bhyone kutyo. Na ꞉aariga amenyere ati ꞉aasookere ku-Nyamuwanga, na kaasubha ku-Nyamuwanga kweki. 4Mmbe, Yeesu ˆnaasiga okurya, ˆnaayambaara, ˆnaafuura inkanju yaaye, ˆnaagega ingibho ˆneebhoya mu-bhukende. 5Kimwi ˆnaasuka amanji mw-ibhakuri, ˆnaamba okwosha abheeyigira bhaaye amaguru, ˆnaabhafwafuutaga na ingibho inu ꞉aariga eebhoyere.

6Bhunu Yeesu ꞉aayikire ku-Simooni Peetero, omwene ˆnaamubhuusha ati, “Raatabhugenyi, owutura kutiki okunyosha amaguru gaani?” 7Yeesu ˆnaamusubhya ati, “Ganu enikora woori anu utakugasombookerwa, nawe owuuja okugasombookerwa mmara.” 8Peetero ˆnaamubhwira ati, “Awe utarinyosha amaguru kajaanende!” Yeesu ˆnaamusubhya ati, “Raabhe nitakutura okukwosha, utakubha na bhumwi na anye kweki.” 9Simooni Peetero ˆnaamusubhya ati, “Raatabhugenyi, raabhe ni kutyo, nuusige okunyosha amaguru era, nawe unyoshe na amabhoko gaani, na omutwe gwani.” 10Yeesu ˆnaamusubhya ati, “Bhutariwo obhukene bhwa omuunu unu aamarire okwoga, ati ooge kweki, tari koosha amaguru era. Uyo eerere kimwi. Na emwe mwerere, nawe muteerere mwone kutyo.” 11Yeesu ꞉aaikire kutyo kwa okubha ꞉aariga amenyere unu kaaja okumurya injeejemo, kyakora ꞉aaikire ati, “Nawe muteerere mwone kutyo.”

12Mmbe, bhunu Yeesu ꞉aamarire okwosha abheeyigira bhaaye amaguru, ˆnaafwara inkanju yaaye ˆneekara kweki, ˆnaabhabhuusha ati, “Angu, mwasombookerwa na ganu naabhakorera? 13Emwe omumbirikira ati, ‘Mwiyigisha,’ na omumbirikira ati, ‘Raatabhugenyi.’ Omwaika kujomu, kwa okubha nikwo kutyo niri. 14Ambe raabhe anye Omwiyigisha na Esobhugenyi naabhoosha amaguru geemwe, omwendwa emwe mwone mwoshaanye amaguru kutyokutyo. 15Naabheeresha ekirengekanyo insonga emwe mwone mukorere abheejaanyu rwa kutyo anye naabhakorera. 16Enibhabhwira ekimari ati, omugaya atakutura okubha mukuru okukira esebhugenyi. Na unu atumirwe, atakutura okubha mukuru okukira unu amutumire. 17Raabhe mwamenya ati amangʼana ganu naabhabhwira nikwo kutyo gari, mmbe, nyakara mukakora kutyo.

18“Nitakwaikira emwe mwone kutyo. Nimenyere bhanu ꞉naasorere okubha abheeyigira bhaani. Nawe enaaika ganu insonga ganu ꞉gaakaamirwe mu-Makaamo Amataakatiifu gakuumire ati, ‘Musaani waani unu ꞉aariga ˆnaarya ebhyokurya amwi na anye, ayindukire ˆnaabha musoko waani.’#13:18 Ringira Ijabhuri 41:9. 19Okwambira woori enibhabhwira amangʼana ganu, gakyari okubha, insonga gakabha-wo, mwikirishe ati Anye Niwe.#13:19 Anye Niwe. Anu Yeesu keeyaika rwa kutyo Nyamuwanga keeyaika mu-Muuma ya Kara. Ringira Obhungʼaanyi 3:14; Isaaya 43:10. 20Enibhabhwira ekimari ati, omuunu woonewoone unu kaaramira unu enibha nitumire, kaandamira anye. Na unu kaandamira anye, kaaramira Nyamuwanga, unu antumire.”

Yeesu kaaikira unu kaaja okumurya injeejemo

(Mataayo 26:20-25; Maariko 14:17-21; Ruuka 22:21-23)

21Bhunu Yeesu ꞉aamarire okwaika gayo, ˆnaatitibhara muno mu-mwoyo gwaye, ˆnaaika ati, “Enibhabhwira ekimari ati, owumwi weemwe kaaja okundya injeejemo.” 22Mmbe, abheeyigira bhaaye mbaamba okuringirana, kwa okubha ꞉bhaariga bhatakumenya ati kaaikira niga. 23꞉Aariga ariwo omwiyigira owumwi, unu Yeesu ꞉aariga eendere muno. Omwiyigira uyo ꞉aariga eekaaye ayeeyi na Yeesu. 24Mmbe, Simooni Peetero ˆnaatijisha omwiyigira uyo, ˆnaamubhwira ati, “Bhuusha Yeesu ati ni niga unu kaaikira?” 25Mmbe, omwiyigira uyo ˆneeyekeka ku-kifubha kya Yeesu, ˆnaamubhuusha ati, “Raatabhugenyi, owaaika niga?” 26Yeesu ˆnaamusubhya ati, “Ni unu niraakosishe omukaate niimuyaana.” Mmbe, ˆnaagega omukaate ˆnaagukosha, ˆnaayaana Yuuda, omumura wa Simooni Esikariyooti. 27Bhunu Yuuda ꞉aaramiiye era omukaate guyo, Sitaani ˆnaamwingira. Mmbe, Yeesu ˆnaamubhwira ati, “Amangʼana ganu oweenda okukora, nuugakore bhwangu!” 28Na atariwo omuunu ku-bhanu ꞉bhaariga bheekaaye mbarya, unu ꞉aasombookeeywe insonga, ati kubhaki Yeesu kaabhwira Yuuda kutyo. 29Abhandi ꞉bhaariga mbatoga ati Yeesu ꞉aamubhwiriiye kutyo, kwa okubha Yuuda niwe ꞉aariga ari omugwatirisi wa insawo ya giiyera. Mbatogaga ati Yeesu aamubhwira ati, agende agure ebhiinu bhinu ꞉bhyeendwaga mu-nsikukuru, amwi ati ayaane-ko abhatobhu giiyera. 30Mmbe, bhunu Yuuda ꞉aaramiiye omukaate guyo era, ˆnaawuruka anja. Na ꞉yaariga iri ngeta.

Yeesu kaayaana abheeyigira bhaaye ekiraagiro ekiyaaya

31Mmbe Yuuda ꞉eejire aawuruka, Yeesu ˆnaabhwira abheeyigira bhaaye ati, “Woori obhugungyo bhwa Omwana wa Adaamu bhuri ayeeyi okubha abhweru. Na obhugungyo bhwa Nyamuwanga obhuuja okubha abhweru okuturira ku-anye. 32Raabhe obhugungyo bhwa Nyamuwanga obhubha-wo okuturira ku-anye, mmbe Nyamuwanga woone kaaja okweresha abhaanu obhugungyo bhwa Omwana wa Adaamu wooriwoori.

33“Emwe abhaana bhaani, nikyari na kabhaga kafuyi era aka okwikara na emwe. Omuuja okunyaagara, na rwa kutyo ꞉naabhwiriiye abhatangasha bha Abhayawudi ati, ‘Enu enigenda mutakutura kuuja-yo,’ nikwo kutyokutyo enibhabhwira emwe mwone. 34Nawe woori enibhayaana ekiraagiro ekiyaaya, enibharagirira ati, ‘Mwendane. Rwa kutyo anye nibheendere, emwe mwone mwendane kutyokutyo.’ 35Raabhe mukeendana emwe abheene na abheene, abhaanu bhoone kutyo abhaaja okumenya ati muri bheeyigira bhaani.”

Yeesu kaaika ati Peetero kaaja okumwigaana

(Mataayo 26:31-35; Maariko 14:27-31; Ruuka 22:31-34)

36Mmbe, Simooni Peetero ˆnaabhuusha Yeesu ati, “Raatabhugenyi, owugenda aaki?” Yeesu ˆnaamusubhya ati, “Enu enigenda, woori awe utakutura okunseeta, nawe owuuja okunseeta mmara.” 37Simooni Peetero ˆnaamubhuusha ati, “Raatabhugenyi, ni kubhaki nitakutura okukuseeta woori? Anye raabhe ni kufwa ku-nsonga yaawo, neetuuye-wo!” 38Yeesu ˆnaamusubhya ati, “Peetero, ni kimari wiituuye-wo okufwa ku-nsonga yaani? Enikubhwira ekimari ati, insarigooko itakukookoroma, ukyari okunyiigaana kasatu.”

Currently Selected:

Yowana 13: kya

Highlight

Copy