Yowana 12

Maryamu kaayaka Yeesu amafuta

(Maariko 14:3-9; Mataayo 26:6-13; Ruuka 7:36-50)

1Bhunu ꞉gyariga gisigaaye nsiku sansabha okuyika mu-nsikukuru ya Ipaasaka, Yeesu ˆnaayika kweki Bhetaaniya, mw-igunguri rinu Yeesu ꞉aasuuriiye-mo Raajaaro okusooka mu-bhafuuye. 2Mmbe, abhaanu bheenda ayo mbamukorera obhugenyi. Marita ˆnaareeta ebhyokurya kw-igari. Raajaaro ꞉aariga ari wumwi wa abhaanu bhanu ꞉bhaariga bheekaaye kw-igari amwi na Yeesu. 3Mmbe, Maryamu ˆnaagega inchupa ya amafuta amarange ga obhugusi bhunene, ˆnaayaka Yeesu ku-maguru, ˆnaamufwafuuta na ginfwiri gyaye. Iinyumba yoone kutyo niiranga ebhirange bhiyo.

4Nawe owumwi wa abheeyigira bhaaye unu ꞉aabhirikirwaga ati Yuuda Esikariyooti, unu kaaja okurya Yeesu injeejemo, ˆnaaika ati, 5“Ndora amafuta gayo gataagusibhwa dinaari magana gasatu,#12:5 Dinaari magana gasatu. Ni ndiyo ya omukosi wa emirimu ya mwaka mugima. kigabhire abhatobhu?” 6Yuuda okwaika kutyo ꞉aariga atakufwira ekigongo abhatobhu, tari ni kwa okubha ꞉aariga ari mwifi. Omwene niwe ꞉aariga ˆnaagwatirira insawo ya giiyera, ˆneebhaga giiyera ginu ꞉gyatuurwaga mu-nsawo muyo. 7Mmbe, Yeesu ˆnaasubhya Yuuda ati, “Musige okunyansha omugasi unu, kwa okubha aanyaka amafuta ku-nsonga ya orusuku runu bharimbiika. 8Abhatobhu muri nabho nsiku gyone kutyo. Nawe mutakuuja okubha amwi na anye nsiku gyone kutyo.”

Abhatangasha bha Abhayawudi abhaaikana okwita Raajaaro

9Mmbe, abhaanu abhaafu mu-Bhayawudi mboongwa ati Yeesu ꞉aariga ari eyo, mbagenda-yo, itari okumurora omwene era, tari ꞉bhaariga mbeenda okurora na Raajaaro, unu Yeesu ꞉aasuurire okusooka mu-bhafuuye. 10Mmbe, abhashengesi abhakuru mbakora ekiina bheete na Raajaaro, 11kwa okubha ku-nsonga ya Raajaaro, Abhayawudi bhaafu ꞉bhaaremere amangʼana ga abhatangasha bheebhwe, mbeekirisha Yeesu.

Masiya Yeesu keengira Yerusareemu

(Mataayo 21:1-11; Maariko 11:1-11; Ruuka 19:28-40)

12Mwejo yeende-ko, abhaanu bhaafu bhanu ꞉bhaariga bheejire okurya insikukuru, ꞉bhoonguuywe ati Yeesu ari mu-njira kaaja Yerusareemu. 13Mmbe, mbagega amatabhi, mbasooka Yerusareemu mbagenda okumuramira. Mbaamura obhuraka mbaaika ati,

“Wosaana!#12:13a Wosaana. Insonga yeende-ko mu-Kiebhuraaniya, ꞉yaariga iri ati, “Yeerusha woori!” Nawe mu-kabhaga ka Yeesu ꞉bhaaikaga riingʼana riyo okukumangya Nyamuwanga amwi ati Masiya. Ringira Ijabhuri 118:25.

Ayaaywe giinonkwe unu kaaja kw-isiina rya Raatabhugenyi!

Ayaaywe giinonkwe Omukama wa Abhaijirayeeri.”#12:13b Ringira Ijabhuri 118:25-26.

14Mmbe, Yeesu ˆnaanyoora ekimoori kya insikiri, ˆnaariinya-ko rwa kutyo ikaamirwe mu-Makaamo Amataakatiifu ati,

15“Emwe abhaanu bha Sayuuni,#12:15a Sayuuni. Omusi gwa Yerusareemu nigwo ayandi ogubhirikirwa ati Sayuuni. musige okuubhaya!

Muringire, omukama weemwe kaaja,

ariinyire ku-kimoori kya insikiri!”#12:15b Ringira Jaakariya 9:9.

16Ku-kabhaga kayo, abheeyigira bha Yeesu ꞉bhataasombookeeywe amangʼana gayo. Nawe bhunu Yeesu asuukire, niwe mbayiita ati Yeesu ꞉aariga akaamiiywe amangʼana gayo, na nigo ꞉bhaamukoreeye.

17Abhaanu bhanu ꞉bhaariga bhari na Yeesu bhunu ꞉aabhirikiiye Raajaaro okusooka mu-mbiiyira, ˆnaamusuura, ꞉bhaabhwiriiye abhaanu amangʼana gayo. 18Na kwa okubha abhaanu ꞉bhaariga bhoonguuywe amangʼana ati Yeesu ꞉aariga asuurire omuunu, mbagenda bhaanu bhaafu okumuramira. 19Mmbe Abhafarisaayo mbaaikana abheene na abheene ati, “Omurora! Kitakutura okukora kyonekyone! Murore, abhaanu bhoone kutyo abhamuseeta.”

Yeesu kaaikira okufwa kwaye

20꞉Bhaariga bhariwo abhaanu bhanu bhatari Bhayawudi mu-bhaanu bhanu ꞉bhaariga bhariinyagisiishe okuja Yerusareemu okuramya Nyamuwanga mu-nsikukuru ya Ipaasaka. 21Mmbe, abhaanu bhayo mbagenda ku-Firipo omuunu wa Bheetisayida ya Gariraaya, mbamusabha ati, “Mura, ekyenda kirorane-ko na Yeesu.” 22Firipo ˆnaagenda okubhwira Ndereya amangʼana gayo, kimwi abhabhiri bhayo mbagenda ku-Yeesu okumubhwira. 23Yeesu ˆnaabhasubhya ati, “Akabhaga ka Omwana wa Adaamu aka okugungibhwa kaayikire. 24Enibhabhwira ekimari ati, imbibho ya ingano ikarema okugwa ansi, ifwe, eyisigara iri kutyokutyo. Tari ikafwa, eyimera niitwasha amatwasho maafu. 25Omuunu woonewoone akeenda okwiwonʼya, kaasikya obhurame bhwaye, nawe omuunu woonewoone unu atakwigana obhurame bhwaye mu-kyaro anu, uyo kaaja okubhuwonʼya, insonga bhubhe bhwa kajaanende. 26Omuunu woonewoone akaankorera emirimu, eyeendwa anseete. Na woonewoone anu enibha, ayo niwe omujuuma waani aribha. Na omuunu akaankorera emirimu, Raata arimuyaana ekibharo.

27“Woori omwoyo gwani gwatitibhara, naaikeki? Naaike ati ‘Raata, enikusabha unyeerushe mu-kabhaga ka iinyanko kanu?’ Wuri, nitakutura okusabha kutyo, kwa okubha niijire ku-kyaro anu, insonga ninyoore ebhinyansho bhiyo. 28Ee Raata Nyamuwanga, nuugungye riisiina ryawo.”

Mmbe, riisi ndyaika okusooka mu-rwire ati, “Ee Omwana waani, naarigungya, na eniija okugenderera okurigungya.” 29Riisangi rya abhaanu bhanu ꞉bhaariga bhayambaaye ayo, bhunu ꞉bhoonguuywe riisi okusooka mu-rwire, abhandi ꞉bhaaikire ati, gyabha-wo njumo, abhandi mbaaika ati, maraayika wa Nyamuwanga aaika nawe. 30Nawe Yeesu ˆnaabhwira abhaanu bhayo ati, “Riingʼana rinu mwoongwa ritari rya okunsakira anye, tari ryaikwa okubhasakira emwe. 31Woori indamuro ya ekyaro kinu ꞉yaayikire, Sitaani, na uyo niwe omutungi wa ekyaro kinu, kaaja okweswa asooke mu-kyaro. 32Bhunu niriimusibhwa iiguru, nirifuta abhaanu bhoone kutyo bhaaje ku-anye.” 33Yeesu ꞉aaikire kutyo, okweresha ati ni rufuki runu arifwa.

34Mmbe, riisangi rya abhaanu ndimusubhya ati, “Ekisoma mu-Makaamo Amataakatiifu ati, Kiriisitu arirama kajaanende.#12:34 Ringira Ijabhuri 110:4. Mmbe, kubhaki owaaika ati Omwana wa Adaamu ariimusibhwa iiguru? Angu, Omwana wa Adaamu unu, ni niga?” 35Yeesu ˆnaabhabhwira ati, “Obhweru bhukyari amwi na emwe kabhaga kafuyi era. Mugenderere okuribhata mu-kabhaga kanu muri mu-bhweru bhuyo, ekisuute kyasiga okubhayiga. Omuunu unu kaaribhata mu-kisuute, atakumenya enu kaagenda. 36Woori emwe mu-kabhaga kanu muri mu-bhweru, mutuure obhwikirisha bhwemwe ku-bhweru bhuyo, insonga mubhe bhaana bha obhweru.” Bhunu Yeesu ꞉aamarire okwaika amangʼana gayo, ˆneemuka ayo, ˆnaagenda okwiyibhisa areera-wo.

Abhayawudi abhaafu abharema okwikirisha Yeesu

37Raabhé kutyo Yeesu ꞉aakorere ebhiruguusho bhyafu mbamuroraga, ꞉bhataamwikirisiishe. 38꞉Gaabheeye kutyo, insonga amangʼana ga omuragi Isaaya gakuumire ati,

“Raatabhugenyi Nyamuwanga,

ni niga unu ꞉eekirisiishe amangʼana geeswe?

Na Raatabhugenyi ꞉eeresiishe niga amanaga gaaye?”#12:38 Ringira Isaaya 53:1.

39꞉Bhataamwikirisiishe kwa okubha Nyamuwanga ꞉aaikire okuturira ku-muragi Isaaya ati,

40“Awofusiishe ameeso geebhwe,

ˆnaakora emitima gyebhwe gibhe mikomeeye,

bhaasiga kurora na ameeso geebhwe,

bhaasiga okusombookerwa mu-mitima gyebhwe,

insonga bhaasiga okuuyindukira

nibhawonʼye.”#12:40 Ringira Isaaya 6:10.

41Isaaya okwaika amangʼana gayo, ni kwa okubha ꞉aariga arorere obhugungyo bhwa Yeesu, ku-nsonga iyo ˆnaaikira amangʼana ga Yeesu.

42Nawe mu-bhatangasha bha Abhayawudi, ꞉bhaariga bharimo bhaafu bhanu ꞉bheekirishaga Yeesu, nawe ku-nsonga ya okuubhaya Abhafarisaayo ati abhaaja okubhabhirimya mw-isunagoogi, ꞉bhaariga bhatakwaikira abhweru. 43Abhatangasha bhayo ꞉bhaariga bheendere muno okugungibhwa na abhaanu, okukira okugungibhwa na Nyamuwanga.

Abhaanu bhariramurirwa okuriingʼaana na amangʼana ga Yeesu

44Mmbe, Yeesu ˆnaamura obhuraka ˆnaaika ati, “Omuunu unu kaanyiikirisha anye, atakwikirisha anye era, tari keekirisha unu ꞉aantumire. 45Unu kaandingira anye, kaaringira unu ꞉aantumire. 46Anye niijire mu-kyaro anu, nibhe obhweru bhwa ekyaro, insonga abhaanu bhoone kutyo bhanu abhanyiikirisha bhasige okubha mu-kisuute.

47“Na omuunu woonewoone akoongwa amangʼana gaani, ˆnaarema okugagwatira, anye nitakumuramurira, kwa okubha niteejire mu-kyaro anu okuramurira abhaanu, tari niijire okubheerusha. 48Omuunu woonewoone unu kaandema, unu atakwikirisha amangʼana gaani, ari na unu arimuramurira. Riingʼana rinu enaaika niryo ririmuramurira ku-rusuku rwa obhuteero. 49Enaaika kutyo, kwa okubha anye nitakwiyaaikira anye omwene era, tari Raata unu ꞉aantumire, niwe andagiriiye aga okwaika na injira ya okugaaika. 50Na nimenyere ati kinu kaaragirira, ekiyaana abhaanu obhurame bhunu bhutakuweera. Mmbe ganu enaaika, enaaika rwa kutyo Raata andagiriiye okwaika.”

Currently Selected:

Yowana 12: kya

Highlight

Copy