Yowana 11

Orufu rwa Raajaaro

1꞉Aariga ariwo omuunu wumwi riisiina ryaye ˆnaatogwa Raajaaro, ari murwaye. Raajaaro uyo, ꞉aariga eekaaye mw-igunguri rya Bhetaaniya na abhasubhaati bhaaye, Maryamu na Marita. 2Maryamu uyo, ꞉aariga ari musubhaati wa Raajaaro omurwaye niwe ꞉aayakire Raatabhugenyi Yeesu amafuta amarange, ˆnaamufwafuuta amaguru na ginfwiri gyaye.#11:2 Ringira Yowana 12:1-8. 3Mmbe, abhasubhaati bha Raajaaro bhayo, mbasirira Yeesu amangʼana ati, “Raatabhugenyi, musaani waawo Raajaaro ni murwaye.” 4Bhunu Yeesu ꞉oonguuywe amangʼana gayo, ˆnaaika ati, “Obhurwaye bhuyo bhutari bhwa kumwita, tari ni bhwa okweresha obhugungyo bhwa Nyamuwanga. Arwaye insonga Omwana wa Nyamuwanga, agungibhwe okuturira ku-bhurwaye bhuyo.” 5Yeesu ꞉aariga eendere muno Raajaaro na abhasubhaati bhaaye, Marita na Maryamu. 6Mmbe, Yeesu ˆnaagenderera okwikara nsiku ebhiri anu ꞉aariga ari, enu oonguuywega ati Raajaaro ni murwaye.

7Mmbe, bhunu nsiku ebhiri ꞉gyaturire, Yeesu ˆnaabhwira abheeyigira bhaaye ati, “Kigende kweki Ebhuyawudi.” 8Abheeyigira bhaaye mbamusubhya ati, “Mwiyigisha, ni bhasiiryasiirya anu era, Abhayawudi ꞉bhaariga mbeenda okukubhuma na amagina bhakwite. Woori kubhaki oweenda okugenda eyo kweki?” 9Yeesu ˆnaabhasubhya ati, “Angu, omwisi gutari na nsa ekumi na ebhiri? Raabhe omuunu akaribhata mu-mwisi, atakutura okwikuujura, kwa okubha kaarora obhweru bhwa ekyaro kinu. 10Nawe unu kaaribhata mu-ngeta keekuujura, kwa okubha atari na bhweru bhwa okumusakira.”#11:9-10 Ringira Yowana 8:12.

11Bhunu Yeesu ꞉aamarire okwaika gayo, ˆnaagenderera okubhwira abheeyigira bhaaye ati, “Musaani weeswe Raajaaro awongeeye, nawe enigenda insonga nimuramushe.” 12Mmbe, abheeyigira bhaaye mbamusubhya ati, “Raatabhugenyi, raabhe awongeeye, kaaja okuwora.” 13Yeesu omwene ꞉aariga ˆnaaikira orufu rwa Raajaaro, nawe abheeyigira bhaaye mbatoga ati kaaika ati Raajaaro awongeeye ntiro. 14Mmbe, Yeesu ˆnaabhabhwirira abhweru ati, “Raajaaro afuuye. 15Nawe anye enijomerwa ati ꞉naariga nitari eyo, insonga emwe munyiikirishe. Mmbe, kimugende-ko.” 16Mmbe, omwiyigira owumwi riisiina ryaye Tomaaso unu ꞉aabhirikirwaga ati Masara, ˆnaabhwira abheeyigira bheejaabho ati, “Eswe kyone kigende, insonga kifwe amwi nawe.”

Yeesu ari na obhuturo bhwa okusuura abhafuuye

17Mmbe, bhunu Yeesu ꞉aayikire Ebhuyawudi, mw-igunguri rya Bhetaaniya, ˆnaanyoora Raajaaro aamarire nsiku ena mu-mbiiyira. 18Riigunguri rya Bhetaaniya, ꞉ryariga riri muna kiromiita esatu kutya okusooka Yerusareemu. 19Abhaanu bhaafu ꞉bhaariga bhasookere Ebhuyawudi, bheejire okuwooyeresha Marita na Maryamu, ku-nsonga ya okufwirwa omumura waabho.

20Mmbe, bhunu Marita ꞉oonguuywe ati Yeesu ꞉aariga ˆnaaja, ˆnaawuruka anja ˆnaagenda okumuramira, nawe Maryamu ˆnaasigara eekaaye mu-nyumba. 21Marita ˆnaabhwira Yeesu ati, “Raatabhugenyi, raabhe ukabheeye anu omumura waasu ataakafuuye. 22Nawe na woori nimenyere ati kyonekyone kinu uraasabhe Nyamuwanga, kaaja okukuyaana.” 23Mmbe, Yeesu ˆnaamusubhya ati, “Omumura waanyu kaaja okusuuka.” 24Marita ˆnaaika ati, “Raatabhugenyi, nimenyere ati arisuuka bhunu Nyamuwanga arisuura abhaanu ku-rusuku rwa obhuteero.” 25Yeesu ˆnaamusubhya ati, “Ni anye obhusuuki bhuyo, na obhurame. Omuunu woonewoone unu kaanyiikirisha, raabhé akafwa, aribha-wo ˆneesha omwoyo. 26Na woonewoone unu kaarama aanyiikirisiishe, atarifwa kajaanende. Angu, owiikirisha gayo?” 27Marita ˆnaamusubhya ati, “Kimari Raatabhugenyi, eniikirisha ati ni awe Kiriisitu, Omwana wa Nyamuwanga, unu ꞉yaariga iri ati aaje mu-kyaro.”

Yeesu kaaririra Raajaaro

28Bhunu Marita ꞉aamarire okwaika gayo, ˆnaagenda okubhirikira Maryamu omuyara waabho. ˆNaamubhwirira ku-mbarika ati, “Omwiyigisha ari anu, kaakubhirikira.” 29Bhunu Maryamu ꞉oonguuywe amangʼana gayo, ˆneemuka bhwangubhwangu, ˆnaagenda ku-Yeesu. 30Akabhaga kayo Yeesu ꞉aariga akyari okwingira mw-igunguri riyo, ꞉aariga ari anu Marita ꞉aagendere okumuramirira. 31Abhayawudi bhanu ꞉bhaariga bhagendere okuwooyeresha Maryamu, bhunu ꞉bhaamurorere ˆneemuka bhwangubhwangu, mbamuseeta. ꞉Bhaariga mbatoga ati amwi Maryamu kaagenda okurira ku-mbiiyira erya.

32Bhunu Maryamu ꞉aayikire anu Yeesu ꞉aariga ari, ˆnaamurora, ˆnaamwifukamira, ˆnaamubhwira ati, “Raatabhugenyi, ukabheeye anu, omumura waasu ataakafuuye.” 33Bhunu Yeesu ꞉aarorere Maryamu ˆnaarira na Abhayawudi bhanu ꞉eejire nabho bhoone mbarira, ˆnoongwa obhururu muno mu-mwoyo gwaye, ˆnaatitibhara muno mu-mwoyo gwaye. 34Mmbe, ˆnaabhabhuusha ati, “Mumutuuye aaki?” Abheene mbamusubhya ati, “Raatabhugenyi, kigende kikwereshe.” 35Yeesu ˆnaarira. 36Mmbe, Abhayawudi bhanu ꞉bhaariga bheejire mu-rufu ayo, mbaaika ati, “Murore kutyo ꞉aariga eendere Raajaaro!” 37Nawe abhandi mbaaika ati, “Angu, omuunu unu niwe unu ꞉eesiishe ameeso ga omuwofu wurya, ndora ataturire okukora Raajaaro asige okufwa?”

Yeesu kaasuura Raajaaro

38Bhunu Yeesu ꞉aariga akyari na obhururu mu-mwoyo gwaye, ˆnaayika ku-mbiiyira. Imbiiyira iyo ꞉yaariga iri nsenga, na ku-munwa gwayo ꞉bhaariga bhayisibhire na egina enene. 39Yeesu ˆnaabhwira abhaanu bhanu ꞉bhaariga bhari ayo ati, “Musooshe-wo riigina.” Nawe Marita omusubhaati wa omufu Raajaaro, ˆnaamusubhya ati, “Raatabhugenyi, woori anu aambire okuwunya, kwa okubha afwiriiye, gyaturire nsiku ena.” 40Mmbe, Yeesu ˆnaamubhuusha ati, “Angu, nitaakubhwira ati, ukeekirisha, owuuja okurora obhugungyo bhwa Nyamuwanga?”

41Mmbe, mbasoosha-wo riigina riyo. Yeesu ˆnaaragamira ku-rwire, ˆnaaika ati, “Raata, enikukumya kwa okubha waanyungwa. 42Anye nimenyere ati owunyungwa ku-nsiku. Nawe enaaika ganu ku-nsonga ya riisangi rya abhaanu rinu riri anu, insonga bheekirishe ati ni awe ꞉waantumire.” 43Bhunu Yeesu ꞉aamarire okwaika amangʼana gayo, ˆnaamura obhuraka ˆnaabhirikira ati, “Raajaaro, nuuje anja enu!” 44Mmbe, omufuuye ˆnaasooka mu-mbiiyira, abhoyerwega mu-nsanda, na abhoyerwe ekitambaara mu-bhusu. Mmbe Yeesu ˆnaabhwira abhaanu bhayo ati, “Mumusurumure insanda iyo, mumusige aribhate.”

Abhatangasha abhaagara injira ya okwita Yeesu

(Mataayo 26:3-5; Maariko 14:1-2; Ruuka 22:1-2)

45Mmbe, Abhayawudi abhaafu bhanu ꞉bhaariga bheejire okuwooyeresha Maryamu, bhunu ꞉bhaarorere ganu Yeesu ꞉aakorere, mbamwikirisha. 46Nawe Abhayawudi abhandi mbagenda ku-Bhafarisaayo, mbabhatondera ganu Yeesu ꞉aariga akorere. 47Mmbe, abhashengesi abhakuru na Abhafarisaayo mbabhirikira abhaanu bha riibharaja riikuru erya Abhayawudi,#11:47 Riibharaja riikuru erya Abhayawudi. Ringira riingʼana Riibharaja rya Abhayawudi mu-Mangʼana Amakomeeye. mbabhuushaanya ati, “Kikore kutiki woori? Omuunu unu kaakora ebhimenyegesho bhyafu. 48Kikamusiga agenderere okukora kutyo, abhaanu bhoone kutyo abhaaja okumwikirisha, Abharuumi abhaaja okuuja mbanyamura riiyekaru ryeswe na ekyaro kyeswe.”

49Mmbe, Kayafa owumwi wa abhakuru bhayo, unu ꞉aariga ari omushengesi omukuru#11:49 Omushengesi omukuru. Ringira riingʼana Abhashengesi mu-Mangʼana Amakomeeye. ku-mwaka guyo, ˆnaabhabhwira ati, “Emwe mutakumenya engʼana ryoneryone!” 50Mutakumenya ati, nyakara omuunu owumwi afwe ku-nsonga ya abhaanu abhandi, ekyaro kisige okusika? 51Kayafa ꞉ateeyaaikiiye amangʼana gayo omwene era, tari kwa okubha ꞉aariga ari mushengesi omukuru ku-mwaka guyo, ꞉aariga ˆnaasoosha obhuragi ati Yeesu kaaja okufwa ku-nsonga ya Abhayawudi. 52Na Yeesu atakufwa ku-nsonga ya Abhayawudi era, tari akumanye na abhaana bha Nyamuwanga bhanu bhanyarageene, insonga bhabhe amwi.

53Mmbe okwambira orusuku ruyo, abhatangasha bha Abhayawudi mbaamba okwagara injira ya okwita Yeesu. 54Ku-nsonga iyo, Yeesu ˆnaasiga okuribhata kweki mu-Bhayawudi ari abhweru. Nawe ˆneemuka ˆnaagenda ayeeyi na ku-nsi ya orukungu, mu-musi gunu ogubhirikirwa Efurayimu, ˆneekara eyo ari amwi na abheeyigira bhaaye.

55Insikukuru ya Ipaasaka ya Abhayawudi ꞉yaariga irebhereeye okuyika. Mmbe, abhaanu bhaafu mbariinyagishaga okusooka mu-magunguri geebhwe, mbagenda Yerusareemu, insonga bheeyeshe.#11:55 Ringira 2 Amangʼana ga Nyakati 30:17-19; Obhubhasi 9:10. 56Mmbe, abhaanu mbaagara Yeesu, bhayambaayega mw-ibhanja rya riiyekaru mbabhuushaanyaga ati, “Emwe omurora kutiki? Omuunu unu atakuuja kimwi mu-nsikukuru inu?” 57Abhashengesi abhakuru na Abhafarisaayo ꞉bhaariga bharagiriiye abhaanu ati, omuunu woonewoone unu amenyere enu Yeesu ari, abhabhwire insonga bhamugwate.

Currently Selected:

Yowana 11: kya

Highlight

Copy