HEBRU 12

Topa’ Hong Thuhilhna

1Tua hi a, eite in i kiim i pamah hih zahin a tam teci nei ihih ciangin eite a hong dongtangsak thei nate khempeuh le eite a hong gakcip mawhna le khialhnate khempeuh paikhia-in, i mai-ah a om tai nading lampi a mong dongin lungsim kiptakin tai ni. 2Eite hong makai-in i upna a hong cingtaaksak Jesuh mitsuanin nei ni. Mailamah a ngah ding lungdamna hangin maizumna kihta loin singlamteh tungah sihna hong thuak a, tu-in Pasian tokhom taklamah a tu hi.

3Tua zahta-in mawhnei mite’ langbawlna a thuaknate ngaihsun unla, note lungkia loin khauhtakin om un. 4Tu ciang dong mawhna tawh na kidona uhah sihna zah ciang dongin na dona uh om nai lo hi. 5Pasian in note, tate, hong ci-in hong hanthotna thu mangngilh khinta na hi uh hiam? Pasian in note kiangah,

“Ka ta aw, Topa’ hong thuhilhna

zangkhai ngaihsut kei inla,

gim a hong piak ciangin

lungkia kei in.

6Bang hang hiam cih leh

Topa in a it mite thuhilh a,

ta taktakin a ngaihsut mite

a taii hi,”

hong ci hi.#Job 5:17; Pau 3:11-12. 7Pasian’ hong thuhilhna na thuak ding mah uh ahi hi. Pasian in note ta-in hong ngaihsun ahih manin a thuak na hi uh hi. Pate’ thuhilhna le taiina a thuak lo ta kuamah om lo hi. 8Tate’ thuak bangin thuhilhna le taiina thuak loin hong kikoih mawk leh ta taktak hi loin zawlta na hi lel ding uh hi. 9Tua banah, i leitung pate in gim hong pia a, zong i zahtak lai hi. Tua ahihleh kha thu tawh kisai-ah i Pa’ thu mang phazaw-in i nuntak ding kisam hi. 10I leitung pate in amau’ hoihsak bangin nuntak tomno sung ngaihsutna-in hong thuhilhin gim hong pia a, ahi zongin Pasian in amah tawh kibangin siangtho-in i omtheih nadingin eite hong khualna-in hong thuhilhin gim hong pia hi. 11Thuhilhna tawh gim hong kipiak ciangin nuam kisa hetloin na kisa mahmah sam a, ahi zongin tua thuhilhna a mangzote in thuman nuntakna hangin nopsakna thaman a nung ngah uh hi.

Pasian’ Hehpihna Nial loh Ding Hilhkholhna

12Tua ahih ciangin a zaw nuangnuang na khutte uh le a no dakdak na khukte uh khauhsak un.#Isa 35:3. 13Bai luangluangin a paite, na guh na taang uh a kipelh loh nadingin lampi tang zui-in na pai un.#Pau 4:26. 14Mi khempeuh tawh na kilem theih nading uh hanciam un. Nuntak siangtho lo tawh kuamah in Topa mu zo lo ding ahih manin nuntak siangtho na nungta un. 15Pasian’ hehpihna a ngahlah na hihkhak loh nadingun na kidawm un. Zungkha a nei singkung hong khangin mi tampi gimsakin a siatsak bangin mite a siasak na hihkhak loh nadingun na kidawm un.#Thkna 29:18. 16Numei tawh a mawh mite suakkha kei unla, Esau bangin annek khat tawh innluah za a zuak mi na suahkhak loh nadingun kidawm un.#Pian 25:29-34. 17Bang hang hiam cih leh Esau in a pa kiang panin thupha ngahkik nuamin khitui naptui tawh a nget hangin a gamtatnasa a bawlkik theih nading lampi om nawn lo ahih manin bangmah ngahthei tuan nawn lo hi.#Pian 27:30-40.

18Israel mite in a tuahsa bangin note in Sinai Mual tunga meikuang, khuamial le lungzinna, huihpi, 19peengkul tumna awging le a kihtakhuai awgingte na za nai kei uh hi. Israel mite in awging a zak uh ciangin kihta lua uh ahih manin a zakkik nawn loh nadingun a thum uh hi.#Pai 19:16-22; 20:18-21; Thkna 4:11-12; 5:22-27. 20“Ganhing nangawn in tua mual a sukkhak le kidenglum ding hi,” ci ahih manin thuakngap lo uh hi.#Pai 19:12-13. 21Tua pen naklauhuai mahmah ahih manin Moses in zong, “Lau-in ka ling hi,” a na ci hi.#Thkna 9:19. 22Ahi zongin note pen Zion Mual, a nungta Pasian’ khuapi, vantung Jerusalem, simzawh loh vantung mite a omna, 23vantungah a min a kikhum Pasian’ ta upate a kikhopna, mi khempeuhte’ thu a khen Pasian’ kiang, a cingtaakin a kibawl midikte’ kha a omna, 24thuciamna thak a hong vaihawm Jesuh kiang, Abel’ sisan sangin thu hoihzaw a gen sisan a kithehna mun na tungzo uh hi.#Pian 4:10.

25Tua ahih manin note tungah thu a hong gen pa’ thugen na ngaih loh khak ding uh kidawm un. Hih leitungah thu a gen pa’ thu a ngai lote suakta lo ahih manin vantung panin thu a hong gen pa’ thugen ngai kei lehang i suakta kei zaw kan lai ding hi.#Pai 20:22. 26Tuahun lai-in thu a gen ciangin leitung kiling a, ahi zongin tu-in amah in thu hong ciam a, “Leitung bek lingsak loin vantung tawh zong khatvei ka lingsak lai ding hi,” hong ci hi.#Hag 2:6. 27“Khat vei lingsakkik lai ding,” a cih ciangin a kipiangsak nate kilingsakin kipaikhia ding a, a kilingsak lo nate kip lai ding ahihna thu hong kilangsak hi. 28Tua ahih manin a kilingsak zo lo Pasian’ gam i ngah manin lungdamin, zahtakna le lamdangsakna tawh Pasian’ lungkimna bangin amah bia ni. 29Bang hang hiam cih leh eite’ Pasian pen a kangtum thei meikuang tawh a kibang ahi hi.#Thkna 4:24.

Currently Selected:

HEBRU 12: TDB

Highlight

Copy