HEBRU 11
11
Upna
1Upna nei i cih ciangin i muhtheih nai loh i lamette ngah takpi ding, ci-in muanna lungsim neihna ahi hi. 2Tanglai mite in upna a na neih manun Pasian in a na pakta hi. 3Pasian’ kampauna tawh leitung le vantung piang a, tu-a i muhtheih nate a om nai lopi panin hong piang hi, ci-in i upna bek mah tawh a thei ihi hi.#Pian 1:1; La 33:6,9; Joh 1:3.
4A upna hang mah tawh Abel in Kain’ piakna sangin a santheih huaizaw biakpiakna Pasian’ tungah a na pia hi. Pasian in ama biakna na sang ahih manin a upna hangin mihoih hi, ci-in Pasian’ pahtakna a na ngah hi. Abel a sihzawh a sawtpi hikhin napi-in tu dong mahin upna thu a hong gengen lai a suak hi.#Pian 4:3-10.
5A upna hang mahin Enok zong sihna tawh kipelh hi. Pasian in ama kiangah lato ahih manin kuamah in Enok mu nawn lo hi. Amah a kilaktoh ma-in Enok in Pasian’ lungkimna ngah hi, ci-in Lai Siangtho in a na gen hi.#Pian 5:21-24. 6Upna lo tawh kuamah in Pasian lungkimsak zo lo hi. Pasian kiang a zuan mi peuhmah in Pasian a om takpi ahihna thu le amah a zongte Pasian in thaman pia hi, ci-in a up ding kisam hi.
7Noah in zong a upna hang mah tawh mailam a thupiang ding a muh theih lohpi mahin Pasian’ thugenna na mang a, teembaw khat bawlin a innkuanpihte tawh na suakta hi. Hih bangin a gamtatna tawh leitung midangte a mawh ahihna kilangsak a, a upna hangin mihoih hihna thu Pasian kiang panin a ngah hi.#Pian 6:13-22.
8Pasian in ama tungah piak dingin a ciam leitangah Abraham a pai dingin a sap lai-in Abraham in Pasian’ sapna a manna pen a upna hang mah ahi hi. A pai nading mun nangawn thei lopi-in a gam le a lei nusia-in a ding khia hi.#Pian 12:1-5. 9Pasian in piak dingin a ciam gamah a upna hang mah tawh gamdangpi hinapi-in peemta-in va om phot a, ama ngah bangin thuciamna a ngah a ta Isaac le a tu Jakob tawh puanbuk peuhah a om phot uh hi.#Pian 35:27. 10Pasian in geelin a lam, bulkip a nei khuapi, Abraham in a ngakna-in tua bangin a om ahi hi.
11Sarah a ta neihtheih ding hun beikhin napi-in ama tungah thuciam pa zuau lo ding, ci-in Abraham in upna a neihna hang mahin Sarah gai-in ta a nei ahi hi.#Pian 18:11-14; 21:2. 12A cimang khinin a kingaihsun hih mi khat’ suanlekhakte pen vana aksi zah leh tuipi gei-a sehnel zahin a tam hi.#Pian 15:5; 22:17; 32:12.
13Hih mite khempeuh in amaute tungah piak dingin Pasian’ ciam thute ngah nai lo uh a, gamlapi-ah a omlai galmuhin hopih thei bek uh a, hih leitungah khualmi peemta hi lel hang, ci-in kitheihna tawh omin a upna mah uh tawh a si uh hi.#Pian 23:4; 1Khang 29:15; La 39:12. 14Tua bang mite in amau a dingin a gam a lei ding uh a zong ahihna uh hong kilang hi. 15Amaute in a nusiat uh leitung ngaihsutpi penin a nei uh hileh hong ciahkik theih nading uh hun ngah ding uh hi. 16Ahi zongin amaute’ lunggulh pen leitung sangin a hoihzaw vantung gam ahi hi. Pasian in amaute a dingin khuapi khat na vaihawmsak ahih manin, tua bang mite in amah pen ka Pasian uh hi, ci-in a gen ding uh Pasian in maizumna in na ngaihsun lo hi.
17Pasian in Abraham a ze-et laitakin Abraham in a upna hang mah tawh Pasian biak nadingin a tapa Isaac na pia ngam hi. Pasian mah in Abraham tungah tapa ka hong pia ding ci-in a ciam hinapi-in, Pasian’ ciamna bangin a neih tua a tapa neihsun mah, Pasian biak nadingin Abraham in pia dingin na kithawi hi.#Pian 22:1-14. 18Tua a piak ding tapa pen Pasian in, “Na tapa Isaac tungtawnin suanlekhak na nei ding hi,” a cih pa ahi hi.#Pian 21:12. 19Pasian in a sisa nangawn hingkiksak thei ding hi, ci-in Abraham in a up mah bangin Abraham in a sisa a tapa Isaac a limin a ngahkik ahi hi.
20A tapa Jakob le Esau in mai lamah thupha ngah ding hi, ci-in Isaac in a na gen ngamna pen a upna hang mah ahi hi.#Pian 27:27-29,39-40.
21Jakob a sihkuan ciangin a ciangkhut dawnah kingamin Pasian bia a, Josef’ tapa tegel thupha a piakna pen Pasian in na pia takpi ding hi, ci-in a upna hang mah ahi hi.#Pian 47:31-48:20.
22Josef a sih ding ciangin Egypt gam panin Israel mite a paikhiat nading thu le ama luanghawm a bawl nading zia a vaikhaknate zong a upna hang mah ahi hi.#Pian 50:24-25; Pai 13:19.
23Moses a suah ciangin a nu le a pa in hoihsa mahmahin, kumpipa’ thupiakna kihta tuan loin kha thum sung a seelcip ngamna uh zong a upna hang mah uh ahi hi.#Pai 2:2; 1:22.
24Moses a gol ciangin Faro’ tanu’ tapa kicih ding a ut nawn loh ngamna zong a upna hang mah ahi hi.#Pai 2:10-12. 25Tomno sung mawhna sungah nuamtakin om ding sangin Pasian’ mite tawh gimna thuakkhawm ding a utzaw hi. 26Mailamah a thaman ding mukhol thei ahih manin Egypt gam sunga hauhna le nopsaknate khempeuh sangin Khrih hangin simmawhna thuak taakzaw tham hi, ci-in a ngaihsun hi. 27Moses pen kumpipa’ heh ding lau hetloin Egypt gam panin paikhia a, a kimu thei lo Pasian a mu bang keekin a nungkik hetlohna zong a upna hang mah ahi hi.#Pai 2:15. 28Mi That Vantungmi in Israel mite ta upa pen khempeuh a thahkhak loh nadingin Paisan Pawi kipiangsakin, inntual kongtungzawl khempeuh sisan a kizutna zong upna hang mah ahi hi.#Pai 12:21-30.
29Lei keu tunga pai bang keekin Israel mite in San Tuipi a kantan theihna uh zong a upna hang mah uh ahi hi. Amaute’ pai bangin Egypt mite in pai ding a sawm uh ciangin tui in a tuumcip hi.#Pai 14:21-31.
30Israel mite in Jerikho khuapi ni sagih sung a kimvel khit uh ciangin a kulhpi a cipna zong a upna uh hang mah ahi hi.#Josh 6:12-21. 31Numei paktat Rahab in thukante limtakin na zindo a, Pasian’ thu a mang lo mite tawh a sihkhawm lohna zong a upna hang mah ahi hi.#Josh 6:22-25; 2:1-21.
32Tu-a bangin gengen lai ding ihi hiam? Gideon, Barak, Samson, Jefthah, David, Samuel, le kamsangte’ thu i gen nading hun om lo hi.#Thu 6:11-8:32; 4:6-5:31; 13:2-16:31; 11:1-12:7; 1Sam 16:1-1Kum 2:11; 1Sam 1:1-25:1. 33Hih mite khempeuh in zong a upna uh hang mah tawh kumpi gam tuamtuamte zo-in, thumanin a gamtat manun Pasian’ thuciam a ngah uh hi. Upna hang mah tawh humpinelkai kamte hucip uh a,#Dan 6:1-27. 34meikuangpi mitsak thei-in, sih nading panin suakta uh a, ginalo napi-in thahat uh a, gal sungah thahatin gamdang galkapte a zogawp uh hi.#Dan 3:1-30. 35Numeite in a sihsuah mite uh, thawhkikna tawh a ngahna uh zong a upna uh hang mah ahi hi. Mi pawlkhatte in a hoihzaw nuntakna-ah a thawhkik theih nadingun leitungah suahtak ding ut tuan loin bawlsiatna thuakin a si uh hi.#1Kum 17:17-24; 2Kum 4:25-37. 36Mi pawlkhat in simmawhna, satna, sikkol bulhna le thongkiatna zong a thuak uh hi.#1Kum 22:26-27; 2Khang 18:25-26; Jer 20:2; 37:15; 38:6. 37Suang tawh a kidenglum, sing-at tawh a kiphelkham, namsau tawh a kisatlum a om hi. Tuuvun peuh, keelvun peuh silhzo bekin, cimawhin zawng uh a, gimna le bawlsiatna a thuak uh hi.#2Khang 24:21. 38Amaute a dingin leitung mite kilawm zo lo uh ahih manin galtai bangin gamlak le mualtung khawngah vak kawikawi-in, leihawm suanghawm sung peuhah a om uh hi.
39Hih mite’ upna lian mahmah hi, ci-in a kitheih hangin piak dingin Pasian in a ciamsa thute a ngah nai kei uh hi. 40Bang hang hiam cih leh Pasian in eite a dingin a hoihzaw-in thu hong vaihawmsak a, amaute tawh eite i kikop ciangin amaute a cingtaak ahih theih phing nading uh Pasian’ geelna ahi hi.
Currently Selected:
HEBRU 11: TDB
Highlight
Share
Copy
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.
