HEBRU 10
10
1Jew Thukham pen mailam hunah a taktak a hong tung ding lim lahkholhna hi bek ahih manin tua Thukham tawh kizui-in a kum a kumin a kipia biakpiakna in Pasian kiang a zuan mite mi cingtaak suahzo ngei lo hi. 2Thukham zui-in Pasian a bia mite in mawhna panin siansuahna ngahzo uh hileh a lungsim uhah kisuanna lungsim om nawn lo ding ahih manin biakpiakna piak kikkik kul nawn lo ding hi. 3Tua ahih manin biakpiakna a kipiak simin a kum kumin mite a mawhna uh a kiphawksak kikkik ahi hi. 4Tua hi a, bawngtal sisan le keel sisan in mawhna siangsakzo ngei lo hi.
5Tua ahih manin leitungah Khrih hong pai ciangin Pasian kiangah,
“Ganhing le
khawhsa tawh biakna na deih kei a,
nang kong biak nadingin
pumpi khat nong vaihawmsak hi.
6Meihal biakna le
mawh maisak nadingin
biaknate tawh
nang na lungkim kei hi.
7Tua ahih manin,
‘Thukham laibu sungah
keima thu
a kigelh bang teekteek mahin
keima hih ding
nong deih bang teekteek mah
ahih dingin ka hong pai hi,
Pasian aw,’ ka ci hi,”
a ci hi.#La 40:6-8. 8“Ganhing le khawhsa tawh biakna na deih kei a, meihal tawh biakna le mawhmaisak nadingin biaknate tawh na lungkim kei hi,” a cih ciangin hih biakpiaknate khempeuh Thukham tawh kizui-in hih bangin kam na pau veve lai a, 9tua banah, “Nangma deih bang ahih dingin ka hong pai hi,” na ci thuah lai hi. Tua ahih manin Pasian in Khrih tawh biakna a kipsak theih nadingin ganhing le khawhsa tawh biakna luite na beisak phot hi. 10Pasian’ deihna bangin Jesuh Khrih gamta a, a tawntungin a kimang paisuak dingin ama pumpi biakna-in khatvei a kipiakna hangin eite khempeuh i mawhna panin a siang ihi hi.
11Jew siampite nisimin a nasepna uh munah dingin a kibang biakpiakna mah pia niloh uh a, ahi zongin tua a piak uh biakpiaknate in mawhna maisak thei lo hi.#Pai 29:38. 12Ahi zongin Khrih in mawhna hangin khatvei a piakkhit ciangin a tawntung a dingin kimang ahih manin Pasian’ taklam ah tu hithiat a, 13Pasian in ama khenuai-ah a galte khempeuh a koihsak nading hun ngakin a om hi.#La 110:1. 14Mawhna panin a sianthosak mite, khatvei bek biakpiakna a bawlna tawh siangtho paisuaksak hi. 15Kha Siangtho in zong hih thu hong theihpih ahih manin,
16“Topa in hih bangin ci hi:
Mailam hunah amaute tawh
thuciamna khat ka bawl ding a,
amaute sungah ka thukhamte guanin,
amaute lungtang tungah
ka gelh ding hi,”
a cih khit ciangin,#Jer 31:33. 17“Amaute’ mawhna le a gitloh gamtatnate uh ka ciamteh nawn kei ding hi,” ci hi, ci-in a na gen hi.#Jer 31:34. 18Tua hi a, mawhna a kimaisak khit ciangin mawh maisak nadingin biakna piak ding kisam nawn lo hi.
Pasian Kiang Zuanin Kiptakin Om Ni
19Tua ahih ciangin sanggamte aw, Jesuh hong sihna hangin Siangtho Pen Munah ut utin luttheih nading thu i neita hi. 20Ama pumpi mahmah ahi dalna puan tawnin nuntakna lampi-ah i pai theih nadingin amah in lampi thak hong honsak hi. 21Pasian’ innsung a uk siampi lianpen zong i nei hi. 22Tua ahih manin mawhna thu-ah kisuanna lungsim om nawn loin, tui siangtho tawh i pumpi a kisawpsa-in muanna le lungsim takpi tawh Pasian kiang zuan ni.#Siam 8:30; Ezk 36:25. 23Pasian in piak dingin a hong ciam thu muangngam ihih manin i lametna thu kiptakin len ni. 24Khatlekhat ki-itin a hoih nate i sep nadingin kihanthawn ciat ni. 25Mi pawlkhatte in kikhop a pelh bang hi loin, eite in kikhop khawmnate pelh loin om ni. Topa’ hong pai ding Ni hong naina thu thei ihih manin khatlekhat kihanthawn semsemzaw ni.
26Thuman thutak i theih khit ciangin mawhna i bawl hamtang lai leh i mawhna a kimaisak nadingin biakpiakna dang om nawn lo a, 27a kihtakhuai thukhenna le Pasian’ thu a nial mite a kangtum ding meikuangpi bek omlai hi.#Isa 26:11. 28Moses Thukham a zui lote pen mi nih le thum in mawh mah hi, ci-in teci a pan’ khit nakleh kihehpih hetloin sihna kithuaksak hi.#Thkna 17:6; 19:15. 29Tua bang ahihleh Pasian’ Tapa a simmawh, mawhna a hong maisak Pasian’ thuciamna sisan a thudon lo, Pasian’ hehpihna a hong puak Kha Siangtho a hehsakte’ thuak ding bangzah takin lianzaw kan ding ahi hiam?#Pai 24:8. 30Bang hang hiam cih leh, “Phulakna keima a’ hi a, ka thukkik ding hi,” a ci pa le, “Topa in ama mite thu a khen ding,” a ci pa i theih ahi hi.#Thkna 32:35-36. 31A nungta Pasian’ khut sungah thumang loin i tunkhak ding a lauhuai mahmah ahi hi.
32A beisa hun a note tungah thupiangte phawkkik un. Pasian’ khuavak sungah na om khit uh ciangin haksatna tampi thuak napi-in tuate na lel kei uh hi. 33Mipi’ mai-ah hong kisimmawhin hong kibawlsia a, tua bang a thuakte na pawlpih ngam uh hi. 34Note in a hoihzaw, a kipzaw nate a nei na hihlam uh kithei na hih manun thongkia mite thuakpih ngamin, na neihsa uh hong kilaksak hangin zong lungdam takin na om thei veve lai uh hi. 35Tua ahih manin thaman lianpi a hong ngahsak thei na lungsim hanna uh na khahsuah kei un. 36Pasian’ deihna bangin gamta-in, ama thuciam na ngahtheih nadingun lungduai-in thuakzawhna na kisam uh hi. 37Bang hang hiam cih leh Lai Siangtho sungah,
“A sawt loin,
a hong pai ding pa hong tung ding a,
hong zekai nawn lo ding hi.
38Ahi zongin keima mi a thuman mite in
ka thu umin nungta ding uh a,
a nungkik a om uhleh tua mite tungah
ka lungkim kei ding hi,”
na ci hi.#Hab 2:3-4. 39Eite pen nungkikin a maimang mite ihi kei a, upna nei-in hotkhiatna a ngah mite ihi hi.
Currently Selected:
HEBRU 10: TDB
Highlight
Share
Copy
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.
