EFESA 6

Nulepa le Tate Thu

1Tate aw, na nu na pate uh thu na man ding uh Khristian ngeina hi a, ahi ding mah ahi hi.#Kol 3:20. 2-3Thupiakna a lian khat in, “Na nu le na pa zahtak in,” cihna hi a, khapna thu tawh kizom pahin, “Zahtak lecin nang a dingin thu hong hoihin, leitungah na khan a sau ding hi,” na ci pah hi.#Pai 20:12; Thkna 5:16. 4Pate aw, na tate uh a hehtheih nadingin bawl kei unla, Khristiante ngeina tawh kituakin taii-in hilhin pantah un.#Kol 3:21.

Tote le Silate Thu

5Silate aw, launa le linna tawh na leitung tote uh thu mang unla, Khrih’ na na sep uh mah bangin lungsim takpi tawh na na sepsak un. 6A hong pahtak ding uh deihna tawh amaute’ muhsung bekin tuaci gamtat kei unla, Khrih’ sila na hihna hangun Pasian’ hong deih bangin lungsim takpi tawh na sem un. 7Mihingte’ na a sem bang lelin kingaihsun loin Topa’ na a sem bangin kingaihsun unla, thanopna tawh sem un. 8Salte ahi a, sal ahi lote ahi zongin na hoih a sem mi khempeuh, Topa in thaman a piak ding lamtak na thei un.#Kol 3:22-25.

9Tote aw, silate in note hong bawl mah bangin note in zong amaute limbawl unla, tawn’ gawpgawpnate zang nawn kei un. Note le na silate uh vantung panin To khat khutnuai-ah a om na hihna uh le tua Topa in kuamah maitang zahtak tuam nei loin a kibangin mi khempeuh thu a khen ahihna thu na phawk ta un.#Kol 3:25; 4:1; Thkna 10:17.

Pasian’ Galvan Namkim

10Tu a kipanin Topa tawh na kipawlna uh le ama vangliatna hangin na tha uh khauhsak ta un. 11Dawimangpa’ hong hih nading khempeuh na dalzawh nadingun Pasian’ galvan namkim na zang un. 12Eite’ do pen leitung mite hi lo a, vantung huihlakah a om ukna, aana a neite, hih leitung khuamial a uk a tuamtuamte ahi hi. 13Tua ahih manin hun haksat hun hong tun ciangin galte’ hong suknateng khempeuh nangzo-in, a tawpna-ah a gualzo na hih theih nadingun Pasian’ galvan namkim na zang un. 14Tua ahih ciangin kawnggak gak bangin thutak zang unla, awmdal bulh bangin thuman zang unla,#Isa 11:5; 59:17. 15kithawi a khedap bulh bangin Lungdamna Thu a hilhkhia dingin kiging un.#Isa 52:7. 16Tua banah, dawimangpa’ hong kapna thaltang kuangte na sukmit nadingun lum puak bangin upna na nei tawntung un. 17Siklukhu khuk bangin hotkhiatna nei unla, Kha Siangtho in a hong piak Pasian’ thu pen namsau zat bangin na zang un.#Isa 59:17. 18Kha Siangtho tawh kopin a tawntungin Pasian kiangah na kisapna khempeuh uh ngenin na thum unla, tatsat loin Pasian mi khempeuh a dingin thu na ngetsak un. 19Thu ka hilhtheih hun ding ciangin lungdamna thusim hangtakin ka hilhkhiat theih nadingin Pasian in ka thugen ding hong hilh nadingin kei a dingin zong thu na ngetsak ta un. 20Pasian’ thu genin taangmi ka sepna hang mahin sikkhau khihna thuakin thongkia ka hih manin ka hilh dingin a kilawm bangin hangtakin ka gen ngam nadingin thu hong ngetsak ta un.

Vaikhakna

21Ka septe le ka omzia khempeuh na theih nadingun Topa thu sungah i sanggam, thuman takin na a sem Tikhikas in note kiangah thu khempeuh a cingin hong gen ding hi.#Sawl 20:4; 2Tim 4:12. 22Kote’ omzia na theih nading uh le amah in note’ lungsim hong thahatsak theih nadingin amah a hong paisak ka hi hi.#Kol 4:7-8.

23Pa Pasian le Topa Jesuh Khrih in ulenaute khempeuh tungah nopsakna le itna, thu upna tawh hong piakhawm tahen. 24Tatsat loin i Topa Jesuh Khrih a it tawntung mi khempeuh tungah hehpihna thupha hong tung tahen.

Currently Selected:

EFESA 6: TDB

Highlight

Copy