Popular Bible Verses from EFESA 6

Share

Eite’ do pen leitung mite hi lo a, vantung huihlakah a om ukna, aana a neite, hih leitung khuamial a uk a tuamtuamte ahi hi.

Kha Siangtho tawh kopin a tawntungin Pasian kiangah na kisapna khempeuh uh ngenin na thum unla, tatsat loin Pasian mi khempeuh a dingin thu na ngetsak un.

Dawimangpa’ hong hih nading khempeuh na dalzawh nadingun Pasian’ galvan namkim na zang un.

Tua ahih manin hun haksat hun hong tun ciangin galte’ hong suknateng khempeuh nangzo-in, a tawpna-ah a gualzo na hih theih nadingun Pasian’ galvan namkim na zang un.

Tua banah, dawimangpa’ hong kapna thaltang kuangte na sukmit nadingun lum puak bangin upna na nei tawntung un. Siklukhu khuk bangin hotkhiatna nei unla, Kha Siangtho in a hong piak Pasian’ thu pen namsau zat bangin na zang un.

Tua ahih ciangin kawnggak gak bangin thutak zang unla, awmdal bulh bangin thuman zang unla, kithawi a khedap bulh bangin Lungdamna Thu a hilhkhia dingin kiging un.

Tu a kipanin Topa tawh na kipawlna uh le ama vangliatna hangin na tha uh khauhsak ta un.

Thupiakna a lian khat in, “Na nu le na pa zahtak in,” cihna hi a, khapna thu tawh kizom pahin, “Zahtak lecin nang a dingin thu hong hoihin, leitungah na khan a sau ding hi,” na ci pah hi.

Tate aw, na nu na pate uh thu na man ding uh Khristian ngeina hi a, ahi ding mah ahi hi.