मारकुस 4
4
लालिक्ङाना मुन्डुम्
(मात्ति १३:१-२३; लुका ८:४-१५)
1फेरि येसुङा गालिल तालङाना ओफेरोङि याप्मिचि हिसिक्मा ठालाँ चोगुचे॥ हिट्नि उन्ङाना याम्बा-नायाम्बा जोम् याप्मिचिगा खिमेयाङ्मे उछुमे, हिड्डेउङ् उन् सामुन्दराङिना ठिक् नाउङि ठाङाउङ् युङे॥ याप्मिचिम्बाक् सामुन्दरा ओफेरो पाखाङि डोक् उयुङे॥#लुका ५:१-३ 2हिट्नुङ् उन्ङा याप्मिचि मुन्डुम्लाम्मा जोम् रिङ्चि हिसिक्टुचे॥ उन्ङा नाड्डेना ठिक् मुन्डुम् लोडुचे, 3“खेम्सानुम्, ठिबाङ् याप्मि लालिक् हिसिङा होन्डे॥ 4लालिक् हिसा खाडानाँ खोट्टेप्मा लालिक् लाम्बोङि ओठाए, हिट्नुङ् नुवाचि ओटायाउङ् ओचोडिसुए॥ 5-6खोट्टेप्मा लालिक् लुङ्गेॽवा एडोक् लिसाना खाम्ङि ओठाए, हिट्नि लालिक् कोप्माउङ् एला डोक् ओकोबे, टरो हिट्नि याप्मा खाम् वानेट्निनाउङ् गाइरो सोम्मा ओजारा ठेम्मा ओटोग्वाट्टुन् हिट्नुङ् नाम् छेडानाँ लालिक् नाम्ङा उडुङ् लेमाउङ् ओचोबाडे॥ 7आम्टेप्मा लालिक्उम्बाक् उटिउँबा घारिङि ओठाए, हिट्नुङ् उटिउँबाचि ओपोया ओकाडाउङ् ओकोबागा लालिक्चि पोमा उपिडुवाटुन्चिन् हिट्नुङ् टुल्फुल ओकेङ्नेट्नि॥ 8टरो आम्टेप्मा लालिक्उम्बाक् मोलिलो खाम्ङि ओठाए, लालिक्चि ओकोबाउङ् तिस गुना, साठि गुना हिट्नुङ् साए गुना उसा ओकेङुए॥” 9हिट्नुङ् येसुङा लोडुचे, “खेम्माना नुभेक् लोक्गाँ ना रिङ् नुलोक् खेम्सानुम्॥”
10हिट्नुङ् येसु ओएकेले लिसाना बेला बारो जाना ओचेलाचि हिट्नुङ् आरु आम्टेप्मा याप्मिचिङा ना मुन्डुम्ङाना उटुप् पाइना पिक्सा उसिलाप्टुए॥
11हिट्नुङ् येसुङा हिट्नागा लोडुचे, “खानिङाउम्टे माङ्हाङ् उमुलुक्ङाना सोगोप्ना रिङ्चि ठाहा टोग्माना ठोना आटोगुएसुम्मे, टरो आङि बिस्वास ओचोगुन्गेट्टुन्गा आरु याप्मिचि मुन्डुम्ङि एडोक् आङा हिसिक्टुङ्चिङ्चिङ्॥ 12हिड्डेउङ् धारमाछाप्लाङि नाड्डे छेप्टेसे–
‘हिट्नागाँ उपुयु चा उनिसुन्गा, ओखेम्सु चा बुजा ओचोगुन्गा॥
हिट्डे ओचोगुनाँ बे हिट्नागा काएल्-काबु उलिसे बे, हिट्नुङ् माङ्हाङ्ङा उन्चि पाप माफ चोगुबिडुचे बे॥’”#यासैया ६:९-१०
13हिट्नुङ् येसुङा ओचेलाचि लोडुचे, “खानिङा ना मुन्डुम्ङाना उटुप् बुजा चोक्मा आहिनेएट्निम् भोने, खोड्डे पारिक् आरु ख्वाप्पा मुन्डुम्चिगा उटुप् बुजा आचोगुम्टुम्ना टे? 14लालिक् काहिबाङा माङ्हाङ्ङाना रिङ् हिसुटु॥ 15आम्टेप्मा याप्मिचि लाम्बोङि ओठायागा लालिक्चि गाड्डे डोक् उलियुक्॥ हिट्नागाँ माङ्हाङ् रिङ् ओखेम्सुनामे सैतान टायुङ् उन्चि निङ्ग्वालाम्मा माङ्हाङ् रिङ् नाप्टुचिउङ् खाट्टुएट्टुटु॥ 16आरु याप्मिचिम्बाक् घेट्रेक् लिङ्गेॽवा बारिङि ओठायागा लालिक् गाड्डेगा उलियुक्॥ हिट्नागाँ माङ्हाङ् रिङ् ओखेम्सुनामे हारका उलियुङ् ओलाडुटु, 17टरो गाइरो सोम्मा जारा ओठेन्डुन्गा उभुङ्मा याप्मा बेला सोम्मा टाक्टुन्ना, हिट्डेडोक् हिट्नागाँ चा होप्मो बेला सोम्मा एडोक् बिस्वास ओचोगुटु॥ जब माङ्हाङ् रिङ्ङि बिस्वास ओचोगुनाँ याङ्छामा हिट्नुङ् निङ्ग्वा छिक्मा टायुक् हिट्ना बेला डोक् बिस्वास ओनाडुएट्टुटु॥
18“माङ्हाङ् रिङ् काखेम्बा आरु याप्मिचिम्बाक् टिउँबा बारिङि ओठायागा लालिक्चि गाड्डेगा उलियुक्॥ 19हिट्नागाँ माङ्हाङ् रिङ् खेम्माउम् ओखेम्सुटु, टरो ना चोलाङि पाक् चामाना ठुङ्माना, खोड्डे पारिक् वागाठागा लिमाना हिट्नुङ् आरु रिङ्ङि चा निङ्ग्वा उपिडुङ् बिस्वासङि पोमा उहिनिगा, हिट्नुङ् पाक्चा टुल्फुल ओकेङुन्गा॥ 20हिट्नुङ् ओचेट्नुना खाम्ङि ओठायागा लालिक्उम्बाक् नाड्डेगा याप्मिचि उलियुक्, हिट्नागाँ माङ्हाङ् रिङ् ओखेम्सुङ् निङ्ग्वाङि ओलाडुटु, हिट्नुङ् तिस गुना, साठि गुना हिट्नुङ् साए गुना टुल्फुल ओकेङुटु॥”
कुपिङाना ओव्हाङ्
(लुका ८:१६-१८)
21येसुङा हिट्नागा ना मुन्डुम् चा लोडुचे, “साङा चा कुपि ओहाट्टुङ् पाटि डालिङा ओटेप्टुन्गा हिट्नुङ् खाटा उछिक्ङि चा उयुङ्सुन्गा, टरो पाङ् भिट्रा ओआप्गालोङ्सा व्हाङ् उलियाक् नुङ् चोट्चोट्नाङि उयुङ्सुटु॥#मात्ति ५:१५; लुका ११:३३ 22हिड्डेउङ् निनिम्गेट्निम्गा थोक्चि चा सोब्बे ठेट्युक् हिट्नुङ् ठोप्बालाक् रिङ् चा सोब्बे ठाहा टोक्युक्॥#मात्ति १०:२६; लुका १२:२ 23खेम्माना नुभेक् लोक्गाँ ना रिङ् नुलोक् खेम्सानुम्॥”
24हिट्नुङ् येसुङा हिट्नागा फेरि नाड्डे लोडुचे, “आखेम्सुम्गा रिङ्चि खानि निङ्ग्वाङि नुलोक् युङ्सानुम्, पोङ्भोने खानिङा खोना छिक्माङा आछिक्टुमुङ् आपिडुम्चिम्चिम्गा, हिट्ना छिक्मानालाम्मा डोक् खानिङा चा आटोगुम्टुम्॥ हिट्नुङ् ना नुङ्ना चा जोम् खानिङा आटोगुम्टुम्॥#मात्ति ७:२; लुका ६:३८ 25खोनालोक् युङ्ग्वा, हिट्नाङा जोम् टोगुटु॥ टरो खोनालोक् वाइना, हिट्नुङ् हिट्नालोक् लिसाना चा हिट्नालाम्मा नाप्युक्॥”#मात्ति १३:१२; २५:२९; लुका १९:२६
26हिट्नुङ् येसुङा हिट्नागा लोडुचे, “माङ्हाङ् उमुलुक् नाड्डेना: ठिबाङ् याप्मिङा लालिक् स्वाँराङि हिसुटु, 27हिट्नुङ् हिट्ना लालिक् काहिबा याप्मि इम्चा इम्नि चा लेम्बासेम्बा हिट्ना लालिक् कोब्युक् हिट्नुङ् पोयुक्, टरो ना खोड्डे पारिक् लिसेना नुङ् उन्ङा ठाहा टोगुन्ना॥ 28स्वाँराङा आप्पे कोप्मा मेट्टुटु हिट्नुङ् नाड्डे पारा टुल्फुल केङ्ना चोगुटु– पाइले उलिङ् होट्टुटु, पोयुक् हिट्नुङ् टुल्फुल केङुटु॥ 29जब चालिङ् सोङ्युक् हिट्ना याप्मिङा काच्चेङा हेग्मा ठालाँ चोगुटु, पोङ्भोने चालिङ् छुम्मा बेला लिसाइसे॥”#योएल ३:१३
पाट्छेयो सागा लालिक्ङाना मुन्डुम्
(मात्ति १३:३१-३२,३४; लुका १३:१८-१९)
30येसुङा हिट्नागा फेरि लोडुचे, “माङ्हाङ् उमुलुक् खोड्डेना नुङ् आङा पाक्लोक् टोङ्सुङ्ना? खोना मुन्डुम् माट्टुङुङ् पारचिन्दा चोगुङ्ना? 31ना पाट्छेयो सागाङाना लालिक् खाम्ङि हिबालाक् गाड्डेना, ना लालिक् नाराङि सोब्बे नुङ्ना खाट्टियुना लिना॥ ठिबाङ् याप्मिङा हिट्ना लालिक् स्वाँराङि खाट्टुङ् लेट्टुटु, 32हिट्नुङ् कोब्युङ् पोयुक्, हिट्नुङ् हिट्ना सागापाटाङा उभुङ्माङि सोब्बे नुङ्ना ठेना उभुङ्मा लियुक्, हिट्नुङ् हिट्नाँ ओहागेप्पाचि खेङ्सुचिचि, हिट्नुङ् हिट्ना ओहागेप्पाचिङि टाङ्साङ्ङिगा नुवाचिङा उन्चि हाप् ओचोगुटु॥”
33याप्मिचिङा माङ्हाङ् रिङ् बुजा चोक्मा उहिडुलोक् सोम्मा येसुङा नाड्डेगा जोम् मुन्डुम्चि माट्टुङ् हिसिक्टुचे॥ 34उन् याप्मिचिलोक् चेक्टानाँ मुन्डुम्ङि एडोक् चेक्टे, टरो ओचेलाचि एडोक् उलिसागा बेला सोब्बे मुन्डुम्चिगा उटुप् उन्ङा माट्टुबिडुचिगा डागा॥
येसुङा हिॽवा हुन्डारि सिप्टुना
(मात्ति ८:२३-२७; लुका ८:२२-२५)
35हिट्ना लेम्बा युसाना पाका येसुङा ओचेलाचि लोडुचे, “लु आनि तालङाना याहाँपारा खाडि॥” 36हिट्नुङ् चेलाचि याप्मिचिगा खिमेयाङ्मेलाम्मा ओसेन्डाउङ् येसु ठाङाना नाउङि ओठाङे हिट्नुङ् याहाँपारा ओलाम्टिए॥ हिट्नुङ् आरु नाउचि चा उन्लोक् ओखाडे॥ 37इक्किनाँ हिट्नि ठेना हिॽवा फेन्डे, हिट्नुङ् चुवा उपुच्चुवाङा नाउ लेम्मा ठालाँ चोगुङ् नाउङि चुवा लिग्मा ठालाँ चोगुए॥ 38येसुम्बाक् नाउङाना एङ्स्वाङिना ठोङ्ङि टाङ्घोङ् कोक्टुङ् इम्साइसाना॥ ओचेलाचि उन् सोरि ओखाडाउङ् नाड्डे पिक्सा ओफोगुङ् ओलोडुए, “काहिसिक्बा, आनि चुवाङि लुमिउङ् सियि लाबिए, पोङ् खान्उम्बाक् ढुक्कालोक् आइम्युक्ना?” 39येसु कोबाउङ् हुन्डारि खेमा लाप्टुए हिट्नुङ् चुवा ओभेट्लेॽवा “स्वाग्, सिप्टाडा” पिक्सा लोडुए, हिट्नुङ् हिट्ना बेला डोक् हुन्डारि लोक् चुवा ओभोट्लेॽवा सिप्टाडे॥
40हिट्नुङ् येसुङा ओचेलाचि लोडुचे, “पोङ् खानि आकिट्टिटिगा? पाक् खानिङि बिस्वास वाइना इ?”
41हिट्नुङ् हिट्नागा डोङ् ओठोङ्डाउङ् किट्सा उन्चि उन्चि नाड्डे उपिगे, “ना साइना हाउ? हुन्डारि लोक् चुवा ओभेट्लेॽवाङा चा उन्ङाना उरिङ् ओखेम्सुङ् ओटेन्गा॥”
Currently Selected:
मारकुस 4: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
