मारकुस 5
5
टोंडेबा लाहाब् लिसाना याप्मि
(मात्ति ८:२८-३४; लुका ८:२६-३९)
1हिट्नुङ् येसु ओचेलाचिलोक् गालिल तालङाना याहाँपारा गेरासेनास छेट्राङि टासुए॥ 2येसु नाउलाम्मा भारा पाखाङि होन्डानामे उहुम्पाघारिलाम्मा ओचाफेन्ना रिमेट्ङा याङ्सुना ठिबाङ् याप्मिङा उन् टुबुए॥ 3हिट्ना याप्मि उहुम्पाघारिङि युङाना॥ साङा चा हिट्ना ओलाबुङ् साङ्लाङा चा रेक्मा उहिडुवाट्टुन्॥ 4पोङ्भोने हिट्ना याप्माखेप् याप्मिचिङा ओलाङ् उमुक् ढाउङाना साङ्ला हिट्नुङ् काँटिङि ओरेक्टुङ् उयुङ्सुए, टरो चा साङ्ला पुडुङ् काँटि एगुचिउङ् पिन्डाना डाना॥ हिट्ना आड्डिक् बोल्लेउ लिसानाँ साङा चा मुक्ठुङ्ङि युङ्मा उहिडुवाट्टुन्॥ 5हिट्ना लेम्बासेम्बा उहुम्पाघारि हिट्नुङ् झोन्झोबालेङ् राट्सा लुङ्गेॽवाङा आप्पे लोङ्सा लेम्सा वासाना॥
6हिट्नुङ् जब हिट्नाङा लाप्माङ्लाम्मा येसु निसुङ् पिन्सा आबे, हिट्नुङ् ओटोकानाङि गुङ् चोगाउङ् स्या मेट्टुए॥ 7हिट्नाङा ठेना सोरा चोगुङ् राट्सा लोडुए, “माङ्ठेना माङ्हाङ् छा येसु, खान्ङाना आङालोक् पाक्ङाना चा साइनो वाइना? आङा याङ्छामा याङ्चाट्नेन् नुङ् माङ्हाङ् उनिङ्ङि आङा खान् स्या मेट्नाँ॥” 8हिट्ना याप्मिङा ना टोना रिङ् माट्टुए, पोङ्भोने येसुङा पाइले डोक् ओचाफेन्ना रिमेट्लोङ्सा हिट्नालाम्मा होन्डारा लोडुएसुना॥ 9येसुङा हिट्ना “कानिङ् पाइना?” पिक्सा सिलाप्टुए॥
हिट्नुङ् हिट्नाङा माट्टुए, “आनिङ् फौज, पोङ्भोने आन्याँउम्टे जोम् वासेट्टिङा॥” 10हिट्नुङ् हिट्नाँ “आन्याँ ना छेट्रालाम्मा भारा याप्मि होट्नेन्” पिक्सा येसु बाबा चोगुङ् बिन्टि चोगुए॥
11हिट्नि नेट्टाङ्ना झोन्झोन्बा याम्बा-नायाम्बा फाक्चिगा ठिक् ठेना बागाल चाराँ उलिसेट्टागा॥ 12हिट्नुङ् ओचाफेन्ना रिमेट्चिङा “आन्याँ फाक्चि भिट्रा लिग्मा याप्मि पाङ्सा हिट्नुङ् लिगिटिङा” पिक्सा येसु स्या ओमेट्टुए॥ 13हिट्नुङ् उन्ङा खाडानि पिक्सा लोडुचे, हिट्नुङ् हिट्नागा हिट्ना याप्मिलाम्मा ओहोन्डाउङ् फाक्चिङि उलिगे, हिट्नुङ् लागभाग इप्पोक् हाजार फाक्चिगा बागाल याक्ठेरेक्लाम्मा हुरयाँ उलिसाउङ् सामुन्दराङि कोसा ओठाए, हिट्नुङ् चुवाङि उलुमा उसिए॥
14ना घाट्ना उनिसुङ् फाक् कापुबाचि हिट्निलाम्मा पिन्सा ओखाडाउङ् खालाङ्गाङि हिट्नुङ् युक्ताम्-युक्ताम्ङि ना खाबोर ओमाट्टुए॥ हिट्नुङ् पाक् लिसेना पिक्सा पुसिङा जोम् याप्मिचि येसु वासाना डेन्ङि ओटाए॥ 15हिट्नुङ् ओचाफेन्ना रिमेट् लाहाब् लिसाना याप्मि नुमानिङ् लिसाउङ् लोट्लिङ् वाडुङ् युङासाना उनिसुए॥ ना उनिसुङ् हिट्नागा सोब्बे उकिट्टाउङ् डोङ् ओठोङ्डे॥ 16ना लिसाना घाट्ना उनिसुगाँ ओचाफेन्ना रिमेट् लाहाब् लिसाना याप्मि हिट्नुङ् फाक्चि पाक् पाक् उलिसेगा हिट्ना रिङ् हिट्नि ओटायागा याप्मिचि ओलोडुचे॥ 17नाड्डेना रिङ् ओखेम्सुङ् हिट्निगा याप्मिचिङा आन्याँ डेन्लाम्मा खाडालेट्टा पिक्सा येसु स्या ओचोगुए॥
18येसु नाउङि ठाङ्मा कोलाना बेला हिट्ना ओचाफेन्ना रिमेट्ङा लाबुङ् नुयाना याप्मि उन् सोरि आबाउङ् “आङा चा खान्लोक् याङ्खाट्टा” पिक्सा बिन्टि चोगुए॥ 19टरो येसुङा हिट्ना याप्मि आङालोक् खाट्नेन् पिक्सा नाड्डे लोडुए, “खान् कापाङ् नोक्टा खाडा, हिट्नुङ् टाङ्बाङा खान्लोङ्सा चोगुना ठेना टोॽवा हिट्नुङ् खान् लुक्मा माटुक्टाना बारेङि कानातेदारचि लोडुचि॥” 20हिट्नुङ् हिट्ना याप्मि खाडालेट्टे, हिट्नुङ् येसुङा उन् लोङ्सा खोड्डेना ठेना टोॽवा चोगुबिडुएना हिट्ना रिङ् ख्वाप्पा डेकापोलिस#५:२० डेकापोलिम्बाक् ठेना छेट्रा लिसाना डेन् डाना हिट्नुङ् ना ठिमेक् खालाङ्गा चा ओलोडुए, पोङ्भोने ना छेट्राङि ठिमेक् ओटा खालाङ्गा ओडागा॥ कोइ-कोइ याहुदि याप्मिचि चा नेहि उयुङागा, टरो याप्माम्बाक् पानिछोङ्बा याप्मिचि उयुङागा डागा॥ नाउम्बाक् गालिल ताल हिट्नुङ् यारदान होङ्ङाना नाम् होम्मालेङ् लिसाना ठेना छेट्रा डाना॥ ओलोडुना छेट्रा टेप् पारचार चोक्मा ठालाँ चोगुए, हिट्नुङ् सोब्बे याप्मिचि डोङ् ओठोङ्डे॥
याइरासङाना मेन्झेमा उइछा हिट्नुङ् ठिबाङ् टुगाना मेन्झेमा
(मात्ति ९:१८-२६; लुका ८:४०-५६)
21येसु फेरि नाउङि ठाङाउङ् तालङाना आरकोलेङ् ओचेलाचिलोक् खाडे, हिट्नि जोम् याप्मिचिगा खिमेयाङ्मे उन्ङाना याम्बा-नायाम्बा उछुमे॥ उन् तालङाना ओफेराङि वासेट्टाना॥ 22हिट्नि याहुदि छुम्मापाङ्ङिना ओठेडोङ्चिङि ठिबाङ् याइरास ओलोडुना याप्मि आबे, हिट्नुङ् येसु निसुनामे ओटेहेक् गुङ् चोगुङ्, 23नाड्डे पिक्सा बिन्टि ठाङ्सुए, “काहिसिक्बा, आङाना खाट्टियुना मेन्झेमा आइछा सिया लाबे, खान् आबाउङ् कामुक् हिट्ना उठुङ्ङि याङ्युङ्साबिडा, हिट्नुङ् हिट्ना नुयुङ् उहिङ्याक्॥”
24येसु हिट्ना याप्मिलोक् लाम्टिए॥ जोम् याप्मिचि ओएङ्-ओएङ् ओलाम्टिए, हिट्नुङ् याप्मिचि उन्ङाना याम्बा-नायाम्बा इन्गा इन् चोक्मा ठालाँ ओचोगे॥ 25हिट्नि जोम् याप्मिचिगा खिमेयाङ्मेङि हेलिक् होन्ना रोगाङा टुगाउङ् बारो बारखा लिसाना ठिबाङ् मेन्झेमा डाना॥ 26हिट्ना मेन्झेमा नुमानिङ् लिमा याप्मा सिडापाङ्डा काचोक्बाचिङि खाडे, टरो नुलोक् लिमा ओसाट्टोङि याङ्छामा एरोक् टोगुए॥ हिट्नाँ उन्लोक् लिसागा सिरिखुरि माक्फेन्सुबेन् सिडापाङ्डा चोक्मा लाट्टुए हिट्नुङ् चा नुलोक् लिनेट्नि, नुलोक् लिमाना ओसाट्टोङि झान् झान् टुक्लोक् लिसा खाडे॥ 27ना मेन्झेमाङा येसुङाना बारेङि खेम्सुएसुना, हिड्डेउङ् याप्मिचिगा खिमेयाङ्मेङि येसुङाना ओएङ्स्वालाम्मा आबाउङ् उन्ङाना ओलोट्लिङ् खोट्टुए॥ 28पोङ्भोने “ओलोट्लिङ् एरोक् खोट्टुङे भोने चा आङा नुङा” नुङ् हिट्ना मेन्झेमाङा उनिङ्ग्वाङि मिट्टुएसुना॥ 29हिट्नुङ् हिट्नाँ येसुङाना ओलोट्लिङ् खोट्टुनामे हेलिक् होम्मा नाडुए, हिट्नुङ् ओयेम् नुमानिङ् लिसाना रिङ् हिट्नाँ ठाहा टोगुए॥ 30हिट्ना बेला डोक् येसुङा उन्लाम्मा साक्ति होन्डाना ठाहा टोगुए, हिट्नुङ् नोक्टाउङ् याप्मिचि सिलाप्टुचे, “साङा आलोट्लिङ् खोट्टुएना?”
31ओचेलाचिङा ओलोडुए, “डाङ्बा, नेहि सोब्बे याप्मिचिङा मापुप्टाउङ् माइन्येट्, हिट्नुङ् चा आङा साङा याङ्खोट्टेना पिक्सा पोङ् आपिक्युक्ना?” 32टरो येसुङा आङा साङा याङ्खोट्टेना पिक्सा सोब्बेलेङ् पुयुए॥ 33हिट्ना मेन्झेमाङा उन्ङि पाक् लिसेना हिट्ना रिङ् मिट्टुङ् उकिप्माङा योग्सा येसु ओटोकानाङि आबाउङ् गुङ् चोगाउङ् उन् सोब्बे छेम्बाना रिङ् लोडुए॥ 34हिट्नुङ् येसुङा हिट्ना मेन्झेमा लोडुए, “आनो, काबिस्वासङा खान् आनुयाइसे, हाङ्हाङ् लिसाउङ् खाडा, हाट्ले कारोगा नुमानिङ् उलियाक्॥”
35येसु चेक्टेटाना बेला याहुदि छुम्मापाङ्ङिना ओठेडोङ् याइरासङाना ओपाङ्लाम्मा याप्मिचि ओआबाउङ् उन् ओलोडुए, “काइछाउम् सिए, हाट्ले काहिसिक्बा याप्मा याङ्छामा पिडुन्॥”
36टरो येसुङा हिट्नागा खेम्गेम्चा मिलाप्मे याहुदि छुम्मापाङ्ङिना ओठेडोङ् याइरास लोडुए, “खान् किट्नेन्, बिस्वास एरोक् चोगु॥” 37हिट्नुङ् येसुङा पाटरुस, याकुब हिट्नुङ् उन्झा युहान्ना एरोक् उन्लोक् खाप्मा पिडुचे, आरु साक्चा पिडुवाट्टुन्चिन्॥ 38उन्चि छुम्मापाङ्ङिना ओठेडोङ्ङाना ओपाङ्ङि ओटासुनाँ, हिट्नि याप्मिचि कोक्कोहोलो हिट्नुङ् सानिङ्ग्वा लोसा ओहाबेट्टागा निसुचे॥ 39येसु भिट्रा लिगाउङ् हिट्नागा लोडुचे, “खानि पोङ् कोक्कोहोलो चोक्सा आहाबिटिगा? मेच्छा सिनिगेट्निना, टरो इम्सेसे॥” 40ना रिङ् ओखेम्सुङ् हिट्नागाङा उन् ओरेट्टुजोए, टरो येसुङा हिट्नागा सोब्बे भारा होट्टुचे, हिट्नुङ् खाट्टिउना मेच्छाङाना उप्पा-उमा, हिट्नुङ् उन्लोक् उलिसागा ओचेलाचि खाट्टुचिउङ् मेच्छा लिसाना ठोङ्ङि खाडे॥ 41हिट्नुङ् हिट्ना खाट्टिउना मेच्छा उमुक्ङि लाबुङ् येसुङा लोडुए “तालिता कुमि,” नाङाना उटुप् “हाउ खाट्टियुना मेच्छा, कोबा॥” 42हिट्ना बेला डोक् हिट्ना मेच्छा मुठिलिक् वाठिलिक् कोबे, हिट्नुङ् याम्बा-नायाम्बा लाम्टिमा ठालाँ चोगुए (ना मेच्छाङा बारो बारखा टासुएसुना)॥ ना रिङ् उनिसुनामे हिट्नागा डोङ् ओठोङ्डे॥ 43हिट्नुङ् येसुङा ना लिसाना घाटाना साक्चा लोनेनुम्चिम् पिक्सा हिट्नागा आग्याँ पिडुचे, हिट्नुङ् हिट्ना मेच्छा पालोवालो चामा पिडानुम् नुङ् लोडुचे॥
Currently Selected:
मारकुस 5: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
