मारकुस 3
3
उमुक् चोबाना याप्मि नुयाना
(मात्ति १२:९-१४; लुका ६:६-११)
1हिट्नुङ् येसु फेरि आरको लेम्बा याहुदि छुम्मापाङ् भिट्रा खाडानाँ हिट्नि उमुक् चोबाना ठिबाङ् याप्मि डाना॥ 2येसुङा युङ्माना लेम्बा हिट्ना याप्मि नुमानिङ् चोगुए भोने फाट्टुर लाबुम् ए नुङ् आम्टेप्मा याप्मिचिङा हिट्नि उन् उसुक्टुएट्टुना॥ 3येसुङा उमुक् चोबाना याप्मि लोडुए, “नाहि आबा हिट्नुङ् सोब्बेङागा टोकानाङि येबा॥” 4हिट्नुङ् येसुङा हिट्नागा याप्मिचि सिलाप्टुचे, “युङ्माना लेम्बा धारमाबिधि गाड्डे खोना टोॽवा चोक्मा नुयुक्ना? ओचेट्नु चोक्मा इ ओचाफेन्लोक् चोक्मा इ? बाचाँ चोक्मा इ जाखाम् चोक्मा इ?” टरो हिट्नागा याप्मिचि मिचेक्ङे स्वाग् उयुङे॥ 5हिट्नुङ् हिट्नागा याप्मिचिगा ओचाफेन्ना निङ्ग्वा लिसाना ठाहा टोगुङ् उनिङ्ग्वा टुगे, हिट्नुङ् ओयाग्लेडाउङ् हिट्नागा सोब्बे याप्मिचि पुयुचिउङ् हिट्ना याप्मि लोडुए, “कामुक् सोट् चोगु॥” हिट्नाङा उमुक् सोट् चोगुए हिट्नुङ् हिट्ना उमुक् नुलोक् लिसाडे॥
6हिट्नुङ् फारिसि याप्मिचि भारा ओहोन्डाउङ् ओखाडे, हिट्नुङ् हिट्ना बेला डोक् हेरोद हाङ्बाङाना ओयाप्मिचिलोक् येसु खोड्डे पारिक् सेप्माना पिक्सा रिङ्पान् चोक्मा ठालाँ ओचोगुए॥
7हिट्नुङ्ना येसु ओचेलाचिलोक् गालिल ताललेङ् खाडे, हिट्नुङ् गालिल छेट्रालाम्मा याप्मा याप्मिचिगा खिमेयाङ्मेङा उन् रोक् उरिक्टुए॥ 8हिट्नुङ् उन्ङा डोङ् ठोङ्डिगा टोॽवाचि चोगुना रिङ् ओखेम्सुङ् जोम् याप्मिचि याहुदिया, यरुसलेम, इदुमिया, यारदान होङ् याहाँ पारागा छेट्रालाम्मा, हिट्नुङ् टुरोस लोक् सिदोन खालाङ्गाङिगा याम्बा-नायाम्बा छेट्रालाम्मा उन् सोरि ओटाए॥ 9हिट्नुङ् जोम् याप्मिचिगा खिमेयाङ्मेङा उन् उइन्डुन् नुङ् ठिक् नाउ उन् लोङ्सा टेयार चोक्मा ओचेलाचि मेट्टुचे॥ 10उन्ङा जोम् याप्मिचि नुमानिङ् चोगुएसुचिगा, हिड्डेउङ् उटुगागा याप्मिचि उन् खोप्मा लोङ्सा इन्गा इन् ओचोगेट्टागा॥#मारकुस ४:१; लुका ५:१-३ 11ओचाफेन्ना रिमेट् लाहाब् उलिसागा याप्मिचिङा उन् उनिसुनामे ओटोकानाङि टुम्बुट् ओयेप्टुङ् नाड्डे पिक्सा ओराट्टे, “खान्उम्टे माङ्हाङ् छा॥” 12टरो येसुङा ओचाफेन्गा रिमेट्चि आङा साइना नुङ् साक्चा लोनेनुम्चिम् पिक्सा आग्याँ पिडुचे॥
येसुङा बारो जाना मुलिचेलाचि सेगुचे
(मात्ति १०:१-४; लुका ६:१२-१६)
13हिट्नुङ्ना येसु टो झोन्झोबालेङ् ठाङे, हिट्नुङ् उन्लोक् खाप्मा चाहाब् उलिसागा टेप्मा छेम्डुचे॥ हिट्नुङ् हिट्नागा उन् सोरि ओखाडे॥ 14हिट्नुङ् उन्लोक् वामा हिट्नुङ् पारचार चोक्मा पाङ्माचि लोङ्सा उन्ङा बारो जाना चेलाचि सेगुचे, हिट्नुङ् मुलिचेलाचि नुङ् निङ् युङ्सुबिडुचे॥ 15हिट्नुङ् ओचाफेन्गा रिमेट्चि होप्मा हिमाना आधिकार चा हिट्नागा पिडुचे॥ 16येसुङा सेगुचिगा बारो जाना मुलिचेलाचिगा निङ् नागा डोक् ए–
सिमोन (येसुङा नाङाना उनिङ् पाटरुस युङ्सुबिडुए),
17जाब्दियाङाना इप्पाङ् येम्बेछा उइछाचि याकुब लोक् उन्झा युहान्ना॥ (येसुङा नागाचिगा निङ् बोआनागेरस युङुसुबिडुचे, नाङाना उटुप्उम्बाक् घुरुङ्बाङाना छाचि लियुक्॥)
18हिट्नुङ् आन्दरियास, फिलिप, बारथोलोमाइ, मात्ति, थोमा, आल्फायासङाना उइछा याकुब, थेदियास, हिट्नुङ् देस भाक्ता सिमोन,
19हिट्नुङ् याहुदा इस्कारियोत (नाङा डोक् येसु धोका पिडुए)॥
येसु हिट्नुङ् बालजिबुल
(मात्ति १२:२२-३२; लुका ११:१४-२३; १२:१०)
20हिट्नुङ्ना येसु फेरि पाङ्लेङ् खाडाउङ् उन् भिट्रा लिगे, हिट्नुङ् फेरि हिट्नि जोम् याप्मिचिगा खिमेयाङ्मे लिसाउङ् येसु हिट्नुङ् ओचेलाचिङा चामा चामाधारि चा भ्याप् ओचोग्वाट्टुन्॥ 21जब येसु ओपाङ्ङिगा याप्मिचिङा ना रिङ् ओखेम्सुए, हिट्नुङ् उन् लोहोट्सिङा हिट्नागा ओटाए, पोङ्भोने ओपाङ्ङिगा याप्मिचिङा उन् ङाङ्से नुङ् उमिट्टुए॥
22यरुसलेमलाम्मा उङ्सागा आम्टेप्मा याहुदि धारमाबिधि काहिसिक्बाचिङा नाड्डे ओलोडुए, “बालजिबुल ओलोडुना टोन्डेबाचिगा हाङ्बाङा ना लिन्डुएसुए, हिट्नुङ् हिट्नाङाना ओबोल्ङा डोक् नाङा टोंडेबाचि होट्टुचिगा॥”#मात्ति ९:३४; १०:२५; लुका ११:१५
23हिड्डेउङ् येसुङा हिट्नागा उन् सोरि छेम्डुचिउङ् ना रिङ्ङाना बारेङि दिरस्टान्ता गाड्डे मुन्डुम्ङि लोडुचे, “सैतानङा सैतान डोक् खोड्डे पारिक् रिक्मा हिडुटुना? 24हिट्नुङ् खोना चा देसङिगा याप्मिचि उन्चि उन्चि ओखेयायाक्टे भोने, हिट्ना देस डोक् जाखाम् लियुक्॥ 25हिट्नुङ् ठिक्ए पाङ्ङिगा याप्मिचि चा उन्चि उन्चि ओखेयायाक्टे भोने, हिट्नागा चा जाखाम् उलियुक्॥ 26हिड्डे डोक् सैतान सैतान आप्पे-आप्पे खेयायाक्टे भोने, खोड्डेउङ् ओसासान् लियुयाक्युक्ना टे? हिट्ना चा जाखाम् लियुक्॥ 27कोइ याप्मिङा ठिबाङ् बोल्लेउ याप्मि ओपाङ् हेडुङ् मालमाट्टा चोर खुप्मा कोलुटु भोने, पाइले हिट्ना याप्मि दोरो रेक्मा कोन्युक् हिट्नुङ् एडोक् हिट्ना याप्मिङाना ओपाङ्लाम्मा मालमाटा याङ्खुप्मा हिडुटु॥ 28छेम्बा आङा खानि लोनाँनि, याप्मिचिङा ओचोगुना सोब्बे पाप हिट्नुङ् माङ्हाङ् लोमाजामाम्बाक् माफ लियुक्॥ 29टरो सेङ्सेङ्ना हाङ्साङाना बिरुद्दाङि लोमाजामाम्बाक् खोना बेला चा माफ लिनिना, पोङ्भोने हिट्ना याप्मि खोना बेला चा खाट्निना पापङाना दोसि लियुक्॥”#लुका १२:१० 30येसुङा ना रिङ् माट्टुए, पोङ्भोने “उन्ङि ओचाफेन्ना रिमेट् युङ्ग्वा” नुङ् हिट्नागाँ ओलोडुएसुना॥
येसुङाना उमा लोक् उन्झाचि
(मात्ति १२:४६-५०; लुका ८:१९-२१)
31हिट्नुङ् येसुङा उमा लोक् उन्झाचि उन् युङाना पाङ्ङि होन्डा ओटाए, हिट्नुङ् भारा डोक् ओहाङ्सुङ् उन् छेम्सिङा याप्मिचि ओपाङ्सुचे॥
32हिट्नि येसुङाना याम्बा-नायाम्बा याप्मा याप्मिचिगा खिमेयाङ्मे डाना, हिट्नुङ् हिट्नागाँ उन् ओलोडुए, “काहिसिक्बा, कामा लोक् कान्झाचिङा खान् भारा माकोन्येट्॥”
33हिट्नुङ् येसुङा हिट्नागा लोडुचे, “आमा लोक् आन्झाचि साइगा?” 34हिट्नुङ् उन् सोरि याम्बा-नायाम्बा उयुङ्गा याप्मिचि पुयुचिउङ् लोडुचे, “खेम्सानुम्, आङाना आमा लोक् आन्झाचि नागा डोक्॥ 35पोङ्भोने माङ्हाङ्ङाना निङ्ग्वा गाड्डे काचोक्बाचि डोक् आङागा आम्भु-आन्झाचि, आनो-आन्झाचि हिट्नुङ् मामा उलियुक्॥”
Currently Selected:
मारकुस 3: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
