मारकुस 2
2
लोङ्लेन् याप्मि नुयाना
(मात्ति ९:१-८; लुका ५:१७-२६)
1इम्टेप्मा लेम्बा एङ्स्वा येसु काफारनाहुम खालाङ्गाङि नोक्टे॥ हिट्नुङ् याप्मिचिङा उन् पाङ्ङि वाहेट् नुङ् ओखेम्सुए॥ 2हिट्नुङ् आड्डिक् याप्मा याप्मिचि उन्ङि ओटाए हिट्नि याप्मिचिगा खिमेयाङ्मेङा चोगुनाँ भिट्रा भारा खोनि चा युङ्माना डेन् वानेट्निना॥ हिट्नुङ् उन्ङा हिट्नागा लोङ्सा माङ्हाङ्ङाना रिङ् पारचार चोगुएट्टुना॥
3हिट्नि टेम्बोक् जाना याप्मिचिङा लोङ्लेन् याप्मि उखुयुङ् ओटाडुए हिट्नुङ् आम्टेप्मा याप्मिचि चा हिट्नागालोक् ओआबे॥ 4याप्मिचिगा खिमेयाङ्मे लिसानाँ हिट्नागाँ टुगाना याप्मि भिट्रा येसुङि खाप्मा उहिडुवाट्टुन्॥ हिड्डे लिसाउङ् हिट्नागाँ येसु युङाना डेन्ङिना उठुङ्ङिना पाङ्ढुङ्मा ओफाडुङ् ओङ्सुए हिट्नुङ् हिट्नालाम्मा लोङ्लेन् याप्मि ओडोलेन्चालोक् योक्-योक् यो ओठेन्डुए॥ 5येसुङा हिट्नागा याप्मिचिगा बिस्वास निसुङ् हिट्ना लोङ्लेन् याप्मि लोडुए, “हाउ साइबा, कापापचि छेमा उलिसे॥”
6हिट्नि आम्टेप्मा धारमाबिधि काहिसिक्बाचि उयुङासागा, हिट्नागाँ उन्चि निङ्ग्वाङि नाड्डे उमिट्टुएट्टुगा, 7“पोङ् ना याप्मि नाड्डे पारा चेक्येट्ना? ना याप्मिङाम्टे माङ्हाङ् गोलो लोडुजोएट्टु॥ माङ्हाङ् माले आरु साङा गो याप्मिचिगा पाप छेमा चोक्मा हिडुटुना टे?”
8हिट्ना बेला डोक् येसुङा हिट्नागा याप्मिचिङा उन्चि निङ्ग्वाङि उमिट्टुना रिङ् ठाहा टोगुङ् हिट्नागा लोडुचे, “पोङ् खानि निङ्ग्वाङि नाड्डेगा रिङ् आमिट्टुम्टुम्ना? 9ना लोङ्लेन् याप्मि लोङ्सा ‘कापाप छेमा लिसे’ आथाबा ‘कोबा, हिट्नुङ् काडोलेन्चा खुयुङ् लाम्टिया’ लोमा खोनाम्बाक् साजिलो लियुक्ना, लु माट्टानुम् टे? 10टरो ना नाराङि याप्मि छा लोङ्सा याप्मिचिगा पाप छेमा चोग्माना आधिकार युङ्ग्वा नुङ् पारमान् खानि पिनाँनि॥” हिट्नुङ् येसुङा हिट्ना लोङ्लेन् याप्मि लोडुए, 11“आङा खान् लोनाँ, हाट्ले कोबा हिट्नुङ् काडोलेन्चा खुयुङ् कापाङ्ङि खाडा॥”
12हिट्नुङ् हिट्ना याप्मि कोबे, हिट्नुङ् हिट्ना बेला डोक् ओडोलेन्चा खुयुङ् सोब्बे याप्मिचिगा टोकानालाम्मा खाडालेट्टे॥ हिट्निगा सोब्बे याप्मिचि डोङ् ओठोङ्डे हिट्नुङ् “नाड्डेना टोॽवाउम् आन्याँ खोना बेला चा निनेएट्निम्मा” पिक्सा माङ्हाङ्ङाना उनिङ् ओचोन्डुए॥
येसुङा तिरो काफोक्बा लेबि याप्मि छेम्डुना
(मात्ति ९:९-१३; लुका ५:२७-३२)
13येसु फेरि गालिल तालङिना ओफेरोङि खाडे॥ जोम् याप्मिचि उन् सोरि ओटाए, हिट्नुङ् उन्ङा हिट्नागा माङ्हाङ्ङाना रिङ् हिसिक्टुचे॥ 14हिट्नुङ् हिट्निलाम्मा खाडागेट्टाना बेला उन्ङा ठिबाङ् तिरो काफोक्बा लेबि याप्मि तिरो हुङ्माना आड्डाङि युङेसाना निसुए॥ हिट्ना आल्फायासङाना उइछा डाना॥ हिट्नुङ् येसुङा हिट्ना याप्मि लोडुए, “आङा रोक् याङ्रिक्टा हिट्नुङ् आचेला लिसा॥” हिट्नुङ् हिट्ना लेबि याप्मि कोबे हिट्नुङ् येसु ओएङ्-ओएङ् खाडे॥
15हिट्नुङ् लेबि याप्मिङाना ओपाङ्ङि चामा चासिङा येसु खाडे॥ हिट्नि याप्मा तिरो काफोक्बाचि हिट्नुङ् आरु कायाङ्छाबाचि चा उन् हिट्नुङ् ओचेलाचिलोक् चामा चासिङा उयुङासागा, पोङ्भोने हिट्नागा येसु रोक् कारिग्बा याप्मिचि ओडागा॥ 16हिट्नि धारमाबिधि काहिसिक्बा फारिसि छुम्माङिगा याप्मिचिङा येसुङा तिरो काफोग्बाचि हिट्नुङ् आरु पापिचिलोक् युङाउङ् चामा चोयेट्टुना उनिसुङ् हिट्नागाँ ओचेलाचि ओलोडुचे, “पोङ् नाङा तिरो काफोक्बाचि हिट्नुङ् कायाङ्छाबा याप्मिचिलोक् एक्केउ युङ्युङ् चोटुगा?”
17ना रिङ् खेम्सुङ् येसुङा हिट्नागा नाड्डे लोडुचे, “सिडापाङ्डा काचोक्बा टे नुमानिङ् याप्मिचि लोङ्सा माखाक्, उटुग्गा याप्मिचि लोङ्सा गोलो चाहाब् लियुक्॥ हिट्नाडेडोक् आङा निङ्ग्वा नुगा याप्मिचि लोङ्सा माखाक्, टरो पापि याप्मिचि गोलो छेम्सिङा टायाङ्ना॥”
उपासा बारेङि रिङ्पान्
(मात्ति ९:१४-१७; लुका ५:३३-३९)
18ठिक् खेप् बाप्टिस्मा कापिबा युहान्नाङाना ओचेलाचि हिट्नुङ् फारिसि याप्मिचिगा उन्चि चेलाचि उपासा उयुङासागा बेला, इम्टेप्मा याप्मिचि येसुङि ओआबाउङ् उसिलाप्टुए, “बाप्टिस्मा कापिबा युहान्नाङा ओचेलाचि हिट्नुङ् फारिसि याप्मिचिगा उन्चि चेलाचिम्बाक् उपासा उयुङ्गा, टरो पोङ् काचेलाचिम्बाक् उपासा उयुङ्निगा?”
19येसुङा हिट्नागा लोडुचे, “पाक् बेउला खानिलोक् वाना बेला भ्या भातेरङि ओटायागा जान्तिचि लोङ्सा उपासा युङ्मा आमेट्टुम्चिम्गै टे? बेउला युङ्लोक् सोम्मा खोना चा उपासा उयुङ्निगा॥ 20टरो हिड्डेना बेला चा टायुक्, हिट्ना बेला बेउला हिट्नागालाम्मा ओलाबुङ् ओखाट्टुटु, हिट्नुङ् हिट्नागा उपासा उयुङ्युक्॥”
21“साङा चा ओछोङ्ग्वाट् लोट्लिङ्ङाना झुम्रोङा यामाना लोट्लिङ्ङि ओलेम्डुन्ना, टरो ओलेम्डुए भोने ओछोङ्ग्वाट् लोट्लिङ् छुट्युङ् यामाना लोट्लिङ् झेन् ठेलोक् पोलेहोङ् लिलोक् सेङ्सुडिसुटु॥
22“हिट्नुङ् खोनाङा चा आङ्गुरङाना ओफोगे इङा यामाना ओहोॽवाङाना जाप्रामाङि उयुङ्सुन्गा॥ हिट्नाडे ओचोगुए भोने जाप्रामा चा हेट्युक् हिट्नुङ् ख्वाप्पा इङा चा वेयुक्॥ आङ्गुर ओवाङाना ओफोगे इङा ओछोङ्ग्वाट् ओहोॽवाङाना जाप्रामाङि डोक् युङ्मा कोन्युक्॥”
याहुदिचिगा युङ्माना लेम्बा बारेङि सिलाप्मा
(मात्ति १२:१-८; लुका ६:१-५)
23ठिक् खेप् युङ्माना लेम्बा येसु गाहुँ बारिङाना लाम्बो लिसाउङ् खाडागेट्टाना डाना, हिट्नुङ् ओचेलाचिङा लाम्टिसा गाहुँ ओबाला चामा लोङ्सा फिग्मा ठालाँ ओचोगुए॥#धारमाबिधि २३:२५ 24ना उनिसुङ् फारिसि छुम्माङिगा याप्मिचिङा येसु ओलोडुए, “पुयुटे, युङ्माना लेम्बा धारमाबिधिङा चोक्मा नुनिना नुङ् माट्टुना टोॽवा पोङ् काचेलाचिङा आचोगुएट्टुना?”
25येसुङा हिट्नागा लोडुचे, “दाउद हिट्नुङ् ओसाइबाचिलोक् पाक्चा वानेट्निना बेला हिट्नुङ् उन्चि साॽवासानाँ दाउदङा पाक् चोगुएना? पाक् खानिङा धारमाछाप्ला पोढाँ आचोग्निम्गेट्निम्गै? 26आबियाथार सानिङ्डाङ्बा लिसाना बेला उन् माङ्हाङ् माङ्ध्यान् चोक्माना ठोङ्ङि लिगाउङ् माङ्हाङ्लोङ्सा ठाङ्बालाक् चालेपा चोए हिट्नुङ् ओसाइबाचि चा पिडुचे॥ हिट्ना चालेपा धारमाबिधि आन्सार पुजारि माले आरु साङा चा चामा लिनिना डाना॥”#१ सामुएल २१:१-६; लेबि २४:९
27उन्ङा हिट्नागा लोडुचे, “याप्मि युङ्माना लेम्बा लोङ्सा चोक्बालाक् माखाक्, याप्मि लोङ्सा गोलो युङ्माना लेम्बा चोक्बालाक् टे॥ 28याप्मि छा युङ्माना लेम्बाङाना चा टाङ्बा डोक्॥”
Currently Selected:
मारकुस 2: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
