मारकुस 1
1
बाप्टिस्मा कापिबा युहान्नाङाना पारचार
(मात्ति ३:१-१२; लुका ३:१-१८; युहान्ना १:१९-२८)
1माङ्हाङ् छा येसु खिरिस्टङाना नुना खाबोर नाड्डेउङ् उटुम् लियुक्॥ 2यासैया माङ्काटाङाना छाप्लाङि नाड्डे छेप्टेसे–
“खेम्सानुम्, आङा आङाना खाबोर कालो खान् नुङ् आघि-आघि पाङ्सुङ्टुङ्, उन्ङा डोक् कालाम्बो टेयार माचोक्युबियुक्॥”#मालाकि ३:१
3“खेम्सानुम्, साक्चा उयुङ्निना डेन्ङि ठिबाङ् याप्मि टाराङ्-टाराङ् राट्सा पिग्येट्,
‘टाङ्बाङाना लाम्बो टेयार चोगानुम्, उन् लाम्टिना लाम्बो नुलोक् पेमाडान् चोगानुम्॥’”#यासैया ४०:३
4बाप्टिस्मा कापिबा युहान्नाङा काएल्-काबु लिसानिउङ् पाप चोक्मा नाडानुम् हिट्नुङ् बाप्टिस्मा चोगानि, हिट्नुङ् माङ्हाङ्ङा खानि पाप माफ मापिडिटि पिक्सा पारचार चोक्सा साक्चा उयुङ्निना डेन्ङि ठेट्टे॥ 5याहुदिया छेट्रा हिट्नुङ् यरुसलेम खालाङ्गाङिगा सोब्बे याप्मिचि युहान्ना सोरि ओटाए॥ हिट्नुङ् आ-आप्पे उन्चि पापलाम्मा काएल्-काबु उलिसागा लोङ्सा युहान्नाङा हिट्नागा यारदान होङ्ङि बाप्टिस्मा पिडुचे॥ 6युहान्नाङा उँटा ओयामुङ्लाम्मा फाबालाक् लोट्लिङ् वाडुना डाना, हिट्नुङ् ओकाम्बोरङि ओहोॽवाङाना फोॽइ रेक्टुगा डागा हिट्नुङ् माङ्घिरिॽवा लोक् जाङ्गालि वेसुमाङाना ओवा चोगा डागा॥#२ हाङ् १:८ 7उन्ङा यापमिचि नाड्डे लोसा पारचार चोगुचे, “आङा नुङ् एङ्स्वा ठिबाङ् टायुगेट्, उन् आङा नुङ्ना साक्तिसालि, हिट्डेउङ् आङाउम्टे गुङ् चोक्ङाउङ् उन्ङाना ओलाङ्सुप्ङाना उरिप्मा फेम्माबिमा चा याङ्खान्ना नुना याप्मि माखाक्॥ 8आङा खानि चुवाङा बाप्टिस्मा पिनाने, टरो उन्ङा खानि सेङ्सेङ्ना हाङ्साङा बाप्टिस्मा मापिडिटि॥”
येसुङाना बाप्टिस्मा
(मात्ति ३:१३–४:११; लुका ३:२१-२२; ४:१-१३)
9युहान्नाङा पारचार चोगुएट्टुना बेला येसु गालिलङिना नासारात खालाङ्गालाम्मा टाए, हिट्नुङ् युहान्नालाम्मा उन्ङा यारदान होङ्ङि बाप्टिस्मा लाडुए॥ 10येसु चुवालाम्मा भारा होन्डानामे उन्ङा टोनालोग् ओङ्साना हिट्नुङ् सेङ्सेङ्ना हाङ्सा ढुकुरङाना उरुप्ङि उन् उठुङ्ङि ठाया उङ्साना निसुए॥ 11हिट्नुङ् टोनालोग्लाम्मा नाड्डेना ठिक् सोरा मुक्टे, “खान् आङाना आमायालु छा, खान्लोक् आड्डिक् टुक्लोक् आचाप् टाइसे॥”#उत्पति २२:२; छाम्लोमा छाप्ला २:७; यासैया ४२:१; मात्ति १२:१८; मारकुस ९:७
12हिट्नुङ् हिट्ना बेला डोक् सेङ्सेङ्ना हाङ्साङा येसु साक्चा उयुङ्निना डेन्ङि खाट्टुए॥ 13हिट्नि सैतानङा उन् चालिस लेम्बा सोम्मा वारिक्ङि ठेम्मा उनिङ्ग्वा कोलुए॥ हिट्नि उन् जाङ्गालि जिवाट्चिलोक् युङे, हिट्नुङ् माङ्हाङ् रिङ् काउग्बाचि ओटायाउङ् उन्ङाना सेवा ओचोगुए॥
येसुङा टेम्बोक् माझिचि छेम्डुचिगा
(मात्ति ४:१२-२२; लुका ४:१४-१५; ५:१-११)
14बाप्टिस्मा कापि युहान्ना खाम्बाङ्ङि ओठेन्डुना बेला येसु माङ्हाङ्ङाना नुना खाबोर पारचार चोक्सा गालिल छेट्राङि खाडे॥ 15उन्ङा माट्टुए, “हाट्ले बेला लिसाइसे, माङ्हाङ् उमुलुक् नेट्टाङ् टाइसे॥ हाट्ले पापलाम्मा काएल्-काबु लिसानि हिट्नुङ् नुना खाबोरङि बिस्वास चोगानुम्॥”#मात्ति ३:२
16येसु गालिल सामुन्दरा ओफेरो ओफेरो खाडागेट्टाना बेला उन्ङा सिमोन लोक् उन्झा आन्दरियास सामुन्दराङि चेल्ले लेप्टेट्टाचुना निसुचे॥ पोङ्भोने हिट्नागाचि ङासा कालाब्बाचि डाचिगा॥ 17हिट्नुङ् येसुङा हिट्नागाचि लोडुचे, “आङालोक् लाहाब् लिसाचि, हिट्नुङ् खान्चिङा ङासा आलाब्चुङ् आटाच्चु गाड्डे डोक् खोड्डे पारिक् याप्मिचि आङि टाप्माचिगा हिट्ना रिङ् हिसिक्नाँचि॥” 18ना रिङ् खेम्साचुना मे हिट्नागाचिङा उन्चि चेल्ले पोक्टाचुङ् येसु रोक् रिक्टाचुए॥
19हिट्नुङ् चिपा याम्बा ओखाडाउङ् उन्ङा जाब्दियाङाना इप्पाङ् येम्बेछा उइछाचि याकुब लोक् युहान्ना निसुचे॥ हिट्नागाचि नाउङि युङाचिउङ् चेल्ले फुएट्टाचुगा॥
20येसुङा हिट्नागाचि चा हिट्ना बेला डोक् छेम्डुचे, हिट्नुङ् हिट्नागाचिङा उन्चि पाबा जाब्दिया टोॽवा काचोक्बाचिलोक् नाउङि पोक्टाचुङ् येसुङा ओएङ् लाहाब् लिसाचे॥
येसुङा ठिबाङ् टोंडेबा लाहाब् लिसाना याप्मि नुमानिङ् चोगुना
(लुका ४:३१-३७)
21टब येसु ओचेलाचिलोक् काफारनाहुम खालाङ्गाङि खाडे॥ हिट्नुङ् हिट्ना बेला डोक् युङ्माना लेम्बा#१:२१ युङ्माना लेम्बाम्बाक् याहुदिचिगा युङ्माना लेम्बा ए॥ याहुदि छुम्मापाङ्ङि खाडाउङ् याप्मिचि हिसिक्मा ठालाँ चोगुचे॥ 22हिट्नुङ् उन्ङा हिसिक्टुचिगा रिङ् ओखेम्सुङ् याप्मिचि डोङ् ओठोङ्डे॥ पोङ्भोने उन्ङा हिट्नागा धारमाबिधि काहिसिक्बाचि गाड्डे माखाक्, टरो आधिकारलोक् हिसिक्टुचे॥#मात्ति ७:२८-२९ 23हिट्ना बेला डोक् याहुदि छुम्मापाङ्ङि ओचाफेन्ना रिमेट्ङा खोट्टुना ठिबाङ् याप्मि डाना॥ 24हिट्ना नाड्डे पिक्सा टाराङ्-टाराङ् राट्टे, “हाउ नासारातङिना येसु, आन्याँ पोङ् दुखे याप्मि आचाट्युक्ना? पाक् खान् आन्याँ जाखाम् चोक्सिङा आटायाना इ? खान् माङ्हाङ्ङा मापाङ्साना सेङ्सेङ्ना याप्मि नुङ् आङा मिसेन् निनाँ॥”#मात्ति २:२३
25टरो येसुङा हिट्ना नाड्डे लोडुङ् खेमा लाप्टुए, “चेक्नेन्, हिट्नुङ् ना याप्मिलाम्मा होन्डाउङ् खाडालेट्टा॥” 26हिट्नुङ् हिट्ना याप्मि फाङ् चोगुए हिट्नुङ् ठेना सोरा चोगुङ् राट्सा हिट्ना याप्मिलाम्मा होन्डाउङ् खाडे॥ 27हिट्नि उछुमागा सोब्बे याप्मिचि डोङ् ओठोङ्डाउङ् हिट्नागा नाड्डे उपिगे, “ना पाइना हाउ? नाम्टे ओछोङ्ग्वाट् पारिक्ना हिसिक्मा गोलो रैछो॥ ना याप्मिङाम्टे आधिकारलोक् ओचाफेन्गा रिमेट्चि चा आग्याँ पिडुचिगा, हिट्नुङ् हिट्नागा ओटेन्गा रैछो॥” 28हिट्नुङ् एला डोक् येसुङाना बारेङि गालिल छेट्राङाना सोब्बेलेङ् उरिङ् मुक्टे॥
येसुलाम्मा जोम् उटुगागा याप्मिचि नुमानिङ् उलिसागा
(मात्ति ८:१४-१७; लुका ४:३८-४१)
29हिट्ना बेला डोक् उन् याहुदि छुम्मापाङ्लाम्मा होन्डाउङ् खुरुखुरु सिमोन लोक् आन्दरियासङाना पाङ्ङि खाडे॥ हिट्नुङ् उन्चिलोक् याकुब लोक् युहान्ना चा खाडाचे॥ 30हिट्ना बेला सिमोन ओनाम्मा जोरो टायाउङ् ओयेम् टुगाइसाना, हिट्नुङ् येसु होन्डाटायानामे पाङ्ङिगा याप्मिचिङा ना रिङ् ओखेम्मेट्टुए॥ 31येसु सिमोन ओनाम्मा सोरि खाडाउङ् उमुक् लाबुङ् फोगुए हिट्नुङ् जोरोङा हिट्ना लेडुएट्टुए॥ हिट्नुङ् हिट्ना मेन्झेमा कोबाउङ् हिट्नागाँगा सेवा चोगुए॥
32नाम् कुडाउङ् याप्मिचिङा उन्चि येम् टुगागा हिट्नुङ् टोन्डेबाङा खोट्टुचिगा सोब्बे याप्मिचि येसु सोरि ओटाडुचे॥ 33हिट्नुङ् ख्वाप्पा खालाङ्गाङिगा याप्मिचि पाङ्ङाना टेल्लाङ्ङि उछुमे॥ 34येसुङा पारिक् पारिक्ङागा रोगाङा उटुगागा याप्मा याप्मिचि नुमानिङ् चोगुचे, हिट्नुङ् जोम् याप्मिचिलाम्मा ओचाफेन्ना रिमेट्चि होट्टुचे॥ येसुङा हिट्नागा टोंडेबाचि चेग्मा पिडुवाट्टुन्चिन्, पोङ्भोने हिट्नागाँ येसु मिसेन् उनिसुएसुना॥
गालिलङि येसुङाना हिसिक्मा
(लुका ४:४२-४४)
35हान्डेङ्लेङ् भ्यानिक् व्हाङ् मिलिए डोक् येसु कोबाउङ् खुसुना डेन्ङि खाडे, हिट्नुङ् हिट्नि बिन्टि चोगे॥ 36हिट्नुङ् सिमोन हिट्नुङ् उन्लोक् ओवासागा ओटोङाउङ् येसु कोन्सा ओखाडे॥ 37उन् उटुबुङ् हिट्नागाँ ओलोडुए, “सोब्बेङा खान् माकोन्येट्॥”
38ना रिङ् खेम्सुङ् येसुङा हिट्नागा लोडुचे, “आबानि, नेट्टाङ् लिसागा आरु युक्टाम्ङि आनि खाडि, हिट्नुङ् हिट्नि चा आङा नुना खाबोर याप्मिचि खेम्मेप्माचि कोन्युक्, पोङ्भोने आङा ना टोॽवा चोग्मा लोङ्सा डोक् टायाङ्ना॥” 39हिट्नुङ् येसु ख्वाप्पा गालिल छेट्राङिगा याहुदि छुम्मापाङ्ङि खाडाउङ् पारचार चोक्सा हिट्नुङ् टोन्डेबाङा ओलाबुचिगा याप्मिचि नुमानिङ् चोक्सा लाम्टिए॥#मात्ति ४:२३; ९:३५
कोर रोगि नुयाना
(मात्ति ८:१-४; लुका ५:१२-१६)
40ठिबाङ् कोर#१:४० कोर लाहाब् लिमाम्बाक् आसुद्दो लिमा ए, लेबिङाना छाप्ला पुयानुम्॥ लाहाब् लिसाना याप्मि येसु सोरि आबे हिट्नुङ् ओटोकानाङि खाडाउङ् उटुम्बुट् येप्टुङ् नाड्डे पारिक् लोडुए, “आडाङ्बा, खान्ङा निङ्ग्वा आचोगुए भोने नुमानिङ् चोक्मा आहिङा॥”
41ना रिङ् खेम्सुङ् येसुङा लुक्मा टुक्टुङ् हिट्ना याप्मि उठुङ्ङि उमुक् युङ्सुङ् लोडुए, “आङा निङ्ग्वा चोगुङ्टुङ्, खान् फाकाट् लिसाडा॥” 42हिट्ना बेला डोक् कोर रोग हिट्नालाम्मा मासाडाउङ् नुयाडे॥ 43हिट्नुङ् येसुङा हिट्ना याप्मि ओछेक्छेक् चोक्सा नाड्डे लोडुङ् पाङ्सुएट्टुए, 44“खेम्सु, ना रिङ् साक्चा लोडुन्चिन्, टरो खाडाउङ् पुजारि निमेट्टु॥ हिट्नुङ् मोसाङा आग्याँ मापिडि गाड्डे खान् फाकाट् आलिसाना रिङ् याप्मिचि पारमान् पिमा भोक् ठाङ्सु॥”#लेबि १४:१-३२
45टरो हिट्ना याप्मि खाडाउङ् उन् नुयाना रिङ् ख्वाप्पालेङ् पारचार चोक्मा ठालाँ चोगुए, हिट्डेउङ् येसु फेरि खालाङ्गाङि सोब्बेङा उनिसुलोक् लिग्मा हिनेट्नि, हिट्नुङ् उन् खुसुना डेन्ङि युङ्सिङा खाडे॥ टरो हिट्नि चा याप्मिचि सोब्बेलाम्मा उन्ङि ओटाए॥
Currently Selected:
मारकुस 1: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
