मात्ति 22
22
भ्याङाना भातेरङाना मुन्डुम्
(लुका १४:१५-२४)
1हिट्नुङ् येसुङा हिट्नागा फेरि मुन्डुम्ङि लोडुचे, 2“टोनालोग्ङिना मुलुक् ठिबाङ् हाङ्बालोक् टोङ्मा हिडुम्टुम्, हिट्नाङा आप्पे उइछाङाना भ्याङाना भातेर टेयार चोगुए॥ 3हिट्नुङ् भातेरङि निम्तो ओलोडुचिगा छेम्सिङा ओचाकारचि पाङ्सुचे, टरो हिट्नागा आप्मा ओटेन्नेएट्नि॥ 4फेरि उन्ङा आरु चाकारचि नाड्डे लोडुचिउङ् पाङ्सुचे, ‘खाडानिउङ् हिट्नागा निम्तो ओटोगुगा लोडानुम्चिम्, आङा भ्याङाना भातेर टेयार चोगुएसुङे॥ आङागा बोल्लेउ बोल्लेउ जिवाट्चि सेप्मा मेट्टुएसुङ्चिङे, हिट्नुङ् सोब्बे थोक्चि टेयार लिसाइसे, भ्याङाना भातेर चासिङा आबानि॥’ 5टरो हिट्नागा निम्तो उपिडुचिगाँ यान्दा डोक् मिचोक्ङे ठिबाङ् ओबेङ्सिलेङ्, आरको बेपारलेङ् खाडे॥ 6आरुङाम्बाक् हाङ्बाङाना चाकारचि ओलाबुचिउङ् ओचाफेन्लोक् ओमेट्टुचे हिट्नुङ् हिट्नागा ओसेडुचे॥ 7टब हिट्ना हाङ्बाङाना आड्डिक् उसिरिबा काडाउङ् ओयाक् लेडे, हिट्नुङ् उटिलिङ्गाचि पाङ्सुचिउङ् हिट्नागा याप्मि कासेट्चि फ्याङ् जाखाम् चोगुचे, हिट्नुङ् हिट्नागाँगा खालाङ्गा मिङा उटुनुडिसुए॥
8“हिट्नुङ् हिट्नाङा ओचाकारचि फेरि लोडुचे, ‘भ्याङाना भातेरउम्टे टेयार युङ्ग्वा, टरो आङा निम्तो पिडुङ्चिङ्गाम्बाक् ना भातेरलोङ्सा नुगा उलिनेयाट्नि॥ 9हिट्नाड्डेउङ् खानि लाम्बो-लाम्बोङि खाडानि, हिट्नुङ् खोना खोना आटुबुम्चिम्चिम्, हिट्नागा भ्याङाना भातेरङि छेम्डा टाडानुम्चिम्॥’ 10हिट्नुङ् हिट्नागा चाकारचि लाम्बो-लाम्बोङि ओखाडाउङ् उटुबुचिगा उनुगा हिट्नुङ् ओचाफेन्गा ख्वाप्पा ओछेम्डुचिउङ् ओटाडुचे, हिट्नुङ् भ्या पाङ् याप्मिचिङा इप्टे॥
11“जब हाङ्बाङा भ्याङि ओटायागा पुसिङा नुङ् भिट्रा लिगे, हिट्नि उन्ङा भ्याङि वाप्माना लोट्लिङ् मिवाट्ङे टायाना ठिबाङ् याप्मि निसुए॥ 12हाङ्बाङा हिट्ना सिलाप्टुए, ‘हाउ साइबा, भ्याङि वाप्माना लोट्लिङ् मिवाट्ङे खान् खोड्डेउङ् नाहि भिट्रा आलिगेना?’ टरो हिट्ना याप्मिङा पाक्चा माप्मा हिडुवाट्टुन्॥ 13टब हाङ्बाङा ओचाकारचि लोडुचे, ‘हिट्ना ओलाङ् उमुक्ङि रेक्टानुमुङ् हिट्ना भारा डुम्बारिक् डुम्ङि लेप्टानुम्, हिट्नि याप्मिचि ओहाप्युक् हिट्नुङ् केङ् ओचान्डुटु॥’”#मात्ति ८:१२; २५:३०; लुका १३:२८
14हिट्नुङ् येसुङा फेरि लोडुचे, “पोङ्भोने छेम्बालाक्चि टे जोम् ओवाहेट्, टरो सेग्बालाक्चिउम् खाट्टिप्मा एडोक् ओवाहेट्॥”
तिरो हुङ्माना बारेङि सिलाप्मा
(मारकुस १२:१३-१७; लुका २०:२०-२६)
15टब फारिसि याप्मिचि ओखाडाउङ् खोड्डेउङ् उन्ङाना उरिङ्ङि उन् वारिक्ङि ठेम्माना पिक्सा योजाना ओचोगुए॥ 16हिट्नागाँ आप्पे उन्चि चेलाचि हेरोद छुम्माङिगा याप्मिचिलोक् उन् सोरि ओपाङ्सुचे॥ हिट्नागाँ ओलोडुए, “काहिसिक्बा, खान्उम् सात्ते नुङ् आन्याँ ठाहा टोगुएसुम्मे, हिट्नुङ् खान्ङा माङ्हाङ्ङाना लाम्बो माहामा डोक् आहिसिक्टुचिगा॥ याप्मिचिङा पाक् ओमाट्टुटुगा खान्ङा यान्दा आचोगुन्गा, पोङ्भोने खान्ङा याप्मिचिगा नाभाक् आपुयुङ् चाट्ला आमेट्टुन्चिन्गा॥ 17हाट्ले आन्याँ याप्मिलोडा, खान् पाक् आपिक्युक्ना? माङ्हाङ्ङाना धारमाबिधिङि रोमि सारकार कैसारलोङ्सा तिरो हुङ्मा आपियुक्नि आपिग्निनै?” 18टरो येसुङा हिट्नागाँगा ओचाफेन्ना निङ्ग्वा ठाहा टोगुङ् हिट्नागा लोडुचे, “हाउ निङ्ग्वा ओमाक्पाचि, पोङ् खानिङा आङा वारिक्ङि ठेम्मा आकोलेट्टिङागा? 19खोलो तिरो हुङ्माना रुपाक् राङ् याङ्निमेट्टानि॥” हिट्नागाँ ठिक् रुपाक् राङ् ओआप्टुए॥ 20हिट्नुङ् उन्ङा हिट्नागा सिलाप्टुचे, “नाहि साङाना छाप् लोक् निङ् केङ्ग्वाना?”
21हिट्नागाँ “कैसारङाना” ओलोडुए॥
हिट्नुङ् येसुङा हिट्नागा लोडुचे, “हिट्डे भोने रोमि सारकार कैसारङाना टेप्मा कैसार डोक् पिडानुम्, हिट्नुङ् माङ्हाङ्ङाना थोक्चि माङ्हाङ् पिडानुम्॥” 22ना रिङ् ओखेम्सुङ् हिट्नागा आड्डिक् डोङ् ओठोङ्डे, हिट्नुङ् उन् ओनाडुढोङ् ओखाडालेट्टे॥
उसियागा उहिङ्ग्वाट् उलिना बारेङि सिलाप्मा
(मारकुस १२:१८-२७; लुका २०:२७-४०)
23उसियागा याप्मिचि फेरि उहिङ्ग्वाट् उलियुङ् ओकोब्निगा नुङ् उपिग्गा सादुकि याप्मिचि हिट्ना लेम्बा डोक् येसु सोरि ओटाए, हिट्नुङ् हिट्नागाँ नाड्डे पिक्सा उसिलाप्टुए, 24“हाउ काहिसिक्बा, मोसाङा छेप्टुना धारमाबिधिङि नाड्डे छेप्टेसे, ‘कोइ याप्मिङाना उम्भुङाना उइछा मिलिए सिए भोने, उन्झाङा ओमोटेङ्मा भ्या चोगुङ् उम्भुलोङ्सा छालेट् पोङ्माबिमा कोन्युक्॥’#धारमाबिधि २५:५-६ 25ठिक् बेला आन्याँ माझाङि सि टेप्मा भुम्भु-झान्झाचि ओवासेट्टागा॥ टुम्सामि भ्या लिसे, हिट्नुङ् उन्ङाना उइछाचि मिलिए उन् सिए॥ हिड्डे लिसाउङ् माइला उन्झाङा ओमोटेङ्मा भ्या चोगुए॥ 26टरो उन् चा ओछालेट्चि मिलिङे सिए॥ हिट्नुङ् छालुम्बा झान्झा चा हिट्डेडोक् लिसे, हिट्डेडोक् सि टेप्मा भुम्भु-झान्झाचिङा भ्या ओचोगुए, हिट्नुङ् छाचि मिलिए उसिए॥ 27हिट्नुङ् हिट्नागा सोब्बे उसियाउङ् हिट्ना मेन्झेमा चा सिए॥ 28हिट्डेउङ् उसियागा उहिङ्ग्वाट् उलिनाँ हिट्नागा सि जाना माड्डे हिट्ना मेन्झेमा साङाना ओटालिमाङ् लियुक्ना? पोङ्भोने हिट्ना मेन्झेमा सोब्बेङा भ्या ओचोगुए॥”
29येसुङा हिट्नागा लोडुचे, “खानि आबान्डिसिए, पोङ्भोने खानिङा धारमाछाप्लाङिना रिङ् हिट्नुङ् माङ्हाङ् ओबोल् बारे बुजा डोक् आचोक्निम्गेट्निम्॥ 30याप्मिचि उसियुङ् उहिङ्ग्वाट् उलि ओकोब्नाँ हिट्नागा भ्या उलिनिगा हिट्नुङ् भ्या चा ओचोगुन्बिडुन्चिन्गा, टरो हिट्नागा टोनालोग्ङिना माङ्हाङ् रिङ् काउग्बाचि गाड्डे डोक् उलियुक्॥ 31हिट्नुङ् उसियागा उहिङ्ग्वाट् उलियुङ् ओकोब्ना रिङ् बारेङि माङ्हाङ्ङा खानि पाक् मालोडेसेगा, हिट्ना पोढाँ आचोक्निम्गेट्निम्गि? माङ्हाङ्ङा माट्टुए, 32‘आङा आब्राहाम, इसाहाक हिट्नुङ् याकुबङाना माङ्हाङ्॥’#पारस्थान ३:६ माङ्हाङ् उसियागा याप्मिचिगा माङ्हाङ् माखाक्, टरो उहिङ्ग्वाट् याप्मिचिगा माङ्हाङ् ए, पोङ्भोने उन्ङि सोब्बे याप्मिचि उहिङ्ग्वाट् उलियुक्॥” 33हिट्डेउङ् उन्ङा हिसिक्टुचिगा रिङ् ओखेम्सुङ् याप्मिचि डोङ् ओठोङ्डे॥
सोब्बे नुङ्ना ठेना आग्याँ
(मारकुस १२:२८-३४; लुका १०:२५-२८)
34येसुङा माट्टुना रिङ्ङि सादुकि याप्मिचिङा पाक्चा माप्मा उहिडुवाट्टुन्ना रिङ् ओखेम्सुङ् फारिसि याप्मिचि उछुमाउङ् येसु सोरि ओटाए॥ 35हिट्नागा माड्डे ठिबाङ् धारमाबिधि काहिसिक्बाङा येसु वारिक्ङि ठेम्माना निङ्ग्वा चोगुङ् सिलाप्टुए, 36“काहिसिक्बा, धारमाबिधिङि सोब्बे नुङ्ना ठेना आग्याँ खोनाम्बाक्?”
37येसुङा हिट्ना लोडुए, “‘खान्ङा कामाङ्हाङ् डाङ्बा लोङ्सा ख्वाप्पा कानिङ्ग्वालाम्मा, ख्वाप्पा कासोक्मालाम्मा, हिट्नुङ् ख्वाप्पा काठोनालाम्मा माया चोगु॥’#धारमाबिधि ६:५ 38सोब्बे नुङ्ना मुलि हिट्नुङ् ठेना आग्याँम्बाक् ना डोक् ए॥ 39हिट्नुङ् आरको आग्याँ चा हिट्नाडेना डोक्, ‘खान्ङा आप्पे गाड्डे डोक् काटाक्लुङ्चि चा माया चोगुचि॥’#लेबि १९:१८ 40ख्वाप्पा धारमाबिधि लोक् माङ्काटाचिगा हिसिक्माङाना मुलि रिङ् डोक् ना इप्पोक् आग्याँ ए॥”
खिरिस्टङाना बारेङि सिलाप्मा
(मारकुस १२:३५-३७; लुका २०:४१-४४)
41जब फारिसि याप्मिचि उछुमे, टब येसुङा हिट्नागा सिलाप्टुचे, 42“खिरिस्टङाना बारेङि खानि पाक् आपिगिटिगा? उन् साङाना उइछा?”
हिट्नागाँ उन् ओलोडुए, “उन् टे दाउद हाङ्बाङाना उइछा ए॥”
43येसुङा हिट्नागा सिलाप्टुचे, “हिड्डे भोने दाउद हाङ्बा सेङ्सेङ्ना हाङ्साङाना ओबोल्ङा आगुवाइ चोगुङ् उन् लाउङ्सा पोङ् ‘टाङ्बा’ नुङ् लोमा मेट्टुएना? पोङ्भोने उन्ङा नाट्डे माट्टुएसुए–
44‘माङ्हाङ् डाङ्बाङा आटाङ्बा लोडुए,
आङा कासाट्टुरचि कालाङ्घेप्पा उछिक्ङि मिचोक्ए सोम्मा
खान् आछुप्टाङ्लेङ् युङा॥’”#छाम्लोमा छाप्ला ११०:१
45“नाड्डेउङ् दाउद आप्पेङा उन् ‘टाङ्बा’ लोडुना भोने, उन् खोड्डेउङ् दाउदङाना उइछा लियुक्ना टे?” 46हिट्नुङ् साङा चा उन् पाक्चा लोमा उहिडुवाट्टुन्॥ हिट्नुङ् हिट्ना लेम्बालाम्मा साङा चा उन् आरु रिङ् सिलाप्माना निङ्ग्वा चोक्मा उहिडुवाट्टुन्॥
Currently Selected:
मात्ति 22: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
