मात्ति 21
21
यरुसलेमङि येसु स्वागाट् ओचोगुना
(मारकुस ११:१-११; लुका १९:२८-४०; युहान्ना १२:१२-१९)
1जब येसुलोक् ओचेलाचि यरुसलेम नेट्टाङ् जैतुन झोन्झोन्बाङिना बेथफागे ओलोडुना डेन्ङि ओटासुए, टब येसुङा इप्पाङ् ओचेलाचि नाड्डे पिक्सा पाङ्सुचे, 2“खान्चि या याना युक्ताम्ङि खाडाचि॥ हिट्नि आटासाचुनामे खान्चिङा ठिक् गाधा लोक् हिट्ना उइछा ओरेक्टुएसुना आटुब्चुचु॥ हिट्नागाचि फेन्डाचुङ् नाहि आप्टाचु॥ 3हिट्नुङ् कोइङा खान्चि पाक् आचोक्चेट्चिगा पिक्सा मालोडाचे भोने, ‘टाङ्बा लोङ्सा चाहाब् लिसाइसे’ लोडाचु हिट्नुङ् हिट्नाङा हिट्ना बेला एरोक् हिट्नागाचि मापाङ्चिबिचिचि॥”
4माङ्काटाङा माट्टुना ना रिङ् उयुयाक् नुङ् डोक् नाट्डे लिसाना ए–
5“सियोन खालाङ्गाङि याप्मिचिलोङ्सा ना रिङ् लोडानुम्चिम्,
‘पुयानुम्, खानि हाङ्बा खानि सोरि आप्युगेट्,
उन् मेयोक् लिसाउङ् गाधाङि ठाङाउङ्,
ठिक् गाधा उइछाङि ठाङाउङ् आप्युगेट्॥’”#जाकारिया ९:९
6टब चेलाचि खाडा चे, हिट्नुङ् येसुङा लोडुचिगा गाड्डे डोक् चोगाचुए॥ 7हिट्नुङ् हिट्नागाचिङा गाधा लोक् हिट्ना उइछा आप्टाचुए, हिट्नुङ् हिट्नागाँ उन्चि लोट्लिङ् हिट्नागाचि उठुङ्ङि उठिसुए, हिट्नुङ् उन् ठाङे॥ 8जोम् याप्मिचिङा उन्चि लोट्लिङ् लाम्बोङि उठिसुए, हिट्नुङ् आम्टेप्माङा सेउला ओहेगुङ् लाम्बोङि उठिसुङ् स्वागाट् ओचोगुए॥ 9उन्ङाना ओटोकानाङि हिट्नुङ् ओएङ्स्वाङि ओलाम्टियागा याप्मिचि राट्सा नाड्डे ओमाट्टुए,
“दाउद पुङ्लाङिना हाङ्बालाउङ्सा होसान्ना!
टाङ्बा उनिङ्ङि टायाना माङ्हाङ्ङा आसिक् पिडुटु॥
सोब्बे नुङ् टो टोनालोग्ङि युङ्ना माङ्हाङ्लोङ्सा होसान्ना!”#छाम्लोमा छाप्ला ११८:२५-२६; १४८:१
10जब येसु यरुसलेम भिट्रा लिगे, ख्वाप्पा खालाङ्गाङि खालाङ्बालाङ् मुक्टे हिट्नुङ् याप्मिचिङा ओमाट्टुए, “ना साइना हाउ?”
11खिमेयाङ्मेङि उलिसागा याप्मिचिङा ओमाट्टुए, “उन् टे गालिलङिना नासारातलाम्मा टायाना माङ्काटा येसु ए॥”
येसु माङ्ठानाङि खाडाना
(मारकुस ११:१५-१९; लुका १९:४५-४८; युहान्ना २:१३-२२)
12येसु माङ्ठानाङाना टेल्लाङ्ङि लिगे॥ हिट्नुङ् उन्ङा हिट्नि चिजाबिजा ओछोङ्सुएटुगा ख्वाप्पा याप्मिचि रिक्टुचे, हिट्नुङ् ओफाबा कालेक्बाचिगा टेबुल, हिट्नुङ् लाप्टाङ्गेॽवा काछोङ्बाचिगा युङ्माना ठोङ् लेङ्सुबिडुचे॥#२१:१२ हिट्ना बेला कोइ याप्मिङा माङ्हाङ् पाङ्ङि भोक् ठाङ्मा ओआप्गाङा हिट्नि माङ्ठानाङि एरोक् चालान् ओचोगाना उन्चि ओफाबालोक् ओफाबा लेग्मा कोलाना डाना, पोङ्भोने हिट्ना ओफाबाङा एरोक् भोक् ठाङ्मा लाउङ्सा जिवाट्चि इम्मा उहिडुना डाना॥ 13हिट्नुङ् उन्ङा हिट्नागा लोडुचे, “धारमाछाप्लाङि नाड्डे छेप्टेसे, ‘आपाङ्उम्टे बिन्टि चोक्माना पाङ् लिमा कोन्युक्॥’#यासैया ५६:७ टरो खानिङा नाम्टे डाँकाचिगा लुम्भुक् गोलो आचोगुएसुम्मे॥”#यारमिया ७:११
14हिट्नुङ् याङ्कानिनिबा लोक् लाङ्गाडाचि माङ्ठानाङि येसु सोरि ओटाए, हिट्नुङ् उन्ङा हिट्नागा नुमानिङ् चोगुचे॥ 15टरो जब गाडुवाडाङ्बाचि लोक् धारमाबिधि काहिसिक्बाचिङा उन्ङा चोगुना डोङ् ठोङ्डिना टोॽवा उनिसुए, हिट्नुङ् पिच्छाचिङा माङ्ठानाङिना टेल्लाङ्ङि “दाउद पुङ्लाङिना हाङ्बा लाङ्उसा होसान्ना” पिक्सा ओराट्टागा ओखेम्सुनाँ हिट्नागाँगा उन्चि याक्लेडे॥
16हिट्नागाँ येसु ओलोडुए, “नागा पिच्छाचिङा पाक् ओमाट्टुएट्टुगा, खान्ङा आखेम्सुन्नै?”
येसुङा हिट्नागा लोडुचे, “खेम्सुएट्टुङ्, पाक् खानिङा ‘पिच्छाचि लोक् ओओचि यासिलाम्मा चा खान्ङा निङ् चोम्मा आमेट्टुचिचि’#छाम्लोमा छाप्ला ८:२ नुङ् खानिङा पोढाँ आचोक्निम्गेट्निम्गै?” 17हिट्नुङ् हिट्नागा पोक्टुचिउङ् उन् खालाङ्गालाम्मा होन्डाउङ् बेथानिया युक्टाम्ङि खाडे हिट्नुङ् युसा हिट्नि डोक् बास हेन्से॥
उसा मेना वामाखोक्पोङाना उभुङ्मा
(मारकुस ११:१२-१४,२०-२४)
18एका भ्यानिक खालाङ्गालेङ् नोक्टानाँ येसुङाना ओसाक् वासे॥ 19लाम्बो ओछेउङि उन्ङा ठिक् वामाखोक्पोङाना उभुङ्मा निसुए॥ उन् हिट्ना उभुङ्मा नेट्टाङ् खाडे, टरो हिट्ना उभुङ्माङि ओलाभाॽवा माले पाक्चा टुबुव्ट्टुन्॥ हिट्नुङ् हिट्ना उभुङ्मा लोडुए, “हाट्ले नुङ् खान्ङि खोना बेला चा टुल्फुल ओकेङ्नियाक्॥” हिट्नुङ् हिट्ना वामाखोक्पो उभुङ्मा हिट्ना बेला डोक् लेमाडे॥
20ओचेलाचिङा ना उनिसुङ् डोङ् ओठोङ्डाउङ् ओमाट्टुए, “ना वामाखोक्पो उभुङ्मा खोड्डेउङ् आम्टेप्मा एला लेमाड्डेना?”
21येसुङा हिट्नागा लोडुचे, “छेम्बा आङा खानि लोनाँनि, खानिङा बिस्वास आचोगुमुङ् खोट्टेप्मा चा साङ्का आचोक्निम्गा भोने, वामाखोक्पो उभुङ्मा लाउङ्सा आङा चोगुङ्ना गाड्डे चोक्मा आहिडुम्टुम् हिट्नुङ् हिटेप्मा एडोक् माखाक्, खानिङा ना झोन्झोन्बा चा ‘नाहिलाम्मा आङ्साडाउङ् सामुन्दराङि ठाया’ आलोडुम्टुम् भोने चा हिड्डे लियुक्॥#मात्ति १७:२०; १ कोरिन्थि १३:२ 22खानिङा बिस्वासलोक् बिन्टि आचोगुमुङ् जेसुकै आनाक्टि चा खानिङा हिट्ना आटोगुम्टुम्॥”
येसुङाना आधिकार बारेङि रिङ्
(मारकुस ११:२७-३३; लुका २०:१-८)
23येसु माङ्ठानाङि लिगाउङ् हिसिक्टुएट्टुचिगा बेला गाडुवाडाङ्बाचि लोक् याप्मिचिगा धारमाबिधि काहिसिक्बाचि उन् सोरि ओआबे, हिट्नुङ् उसिलाप्टुए, “खान्ङा खोनालाम्मा आधिकार आटोगुङ् नागा टोॽवा आचोगुएट्टुना, हिट्नुङ् ना आधिकार खान् साङा मापिडेना?”
24येसुङा हिट्नागा लोडुचे, “आङा चा खानि ठिक् रिङ् सिलाप्नाँनि, आङा याङ्आलोडिङे भोने, आङा खोना आधिकारलाम्मा नागा टोॽवा चोगुएट्टुङ्ना, हिट्ना खानि लोनाँनि॥ 25लु माट्टानुम्, युहान्नाङा बाप्टिस्मा पिमाना आधिकार खोनालाम्मा टोगुएना, माङ्हाङ्लाम्मा इ याप्मिचिलाम्मा इ?” नाड्डेना रिङ् ओखेम्सुङ् उन्चि उन्चि नाट्डे पिक्सा उमुन्डुप्टे, “हाट्ले आनि ‘माङ्हाङ्लाम्मा’ लोडुम्मे भोने ‘खानिङा उन् पोङ् बिस्वास आचोक्नेट्निम्ना टे?’ पिक्सा आसिलाप्युक्॥ 26टरो ‘याप्मिचिलाम्मा’ लोडुम् भोने, आनि याप्मिचिलोक् किट्टिएसिए, पोङ्भोने सोब्बेङा युहान्ना माङ्काटा नुङ् बिस्वास ओचोगुना॥”
27हिट्नाड्डेउङ् हिट्नागाँ येसु ओलोडुए, “खोलो, आन्याँलोङ्सा ठाहा वाइना॥”
टब उन्ङा हिट्नागा लोडुचे, “हिड्डे भोने आङा खोनालाम्मा आधिकार टोगुङुङ् नागा टोॽवा चोगुएट्टुङ्, हिट्ना आङा खानि लोनेनिन्गा॥”
इप्पाङ् येम्बेछा छाङाना मुन्डुम्
28फेरि येसुङा हिट्नागा लोडुचे, “खानिङा पाक् आमिट्टुम्टुम्ना? ठिबाङ् याप्मिङाना इप्पाङ् येम्बेछा छाचि वासेट्टाचिगा॥ हिट्नाङा टुम्सामि उइछाङि खाडाउङ् लोडुए, ‘आइछा, हाट्ले खान् खाडाउङ् आङ्गुर बारिङि टोॽवा चोगु॥’ 29हिट्नाङा लोडुए, ‘आङा खाट्निङ्ना॥’ टरो हामो उनिङ्ग्वा रिसाउङ् टोॽवाङि खाडे॥ 30हिट्नुङ् आरको उइछाङि खाडाउङ् हिट्ना चा हिट्नाड्डे डोक् लोडुए॥ हिट्नुङ् हिट्नाङा ‘लियुक्, आङा खाट्नाँ’ पिक्सा लोडुए॥ टरो खाट्नेट्नि॥ 31हाट्ले नागाचि इप्पाङ् छाचि माड्डेङि खोनाङा उन्चि पाबाङाना आग्याँ टेन्डेना?”
हिट्नागाँ ओलोडुए, “पाइलेनाम्बाक्॥”
येसुङा हिट्नागा लोडुचे, “छेम्बा आङा खानि लोनाँनि, तिरो काफोक्बाचि लोक् वालाफेडुमाचि खानि नुङ्ना पाइले माङ्हाङ् उमुलुक्ङि उलिक्युक्॥ 32पोङ्भोने बाप्टिस्मा कापिबा युहान्ना छेम्बाना लाम्बो निमेट्मा लोङ्सा खानि सोरि टाए, टरो खानिङा उन् बिस्वास आचोक्नेयाट्निम्॥ टरो तिरो काफोक्बाचि लोक् वालाफेडुमाचिङा उन् बिस्वास ओचोगुए॥ खानिङा नागा रिङ् आनिसुम्चा काएल्-काबु आलिसिएट्टिन्, हिट्नुङ् उन् बिस्वास आचोक्नेयाट्निम्॥”#लुका ३:१२; ७:२९-३०
आङ्गुर बारि लोक् आधियाङाना मुन्डुम्
(मारकुस १२:१-१२; लुका २०:९-१९)
33येसुङा फेरि आरको ठिक् मुन्डुम् खेम्सानुम् पिक्सा लोडुचे॥ “ठिक् बेला ठिबाङ् स्वाँरा डाङ्बा डाना॥ हिट्नाँ ओस्वाँराङि आङ्गुर लेट्टुए, हिट्नुङ् आङ्गुर बारि याम्बा-नायाम्बा सोब्बेलेङ् बारा हाम्डुए॥ हिट्नि आङ्गुर युमाना ठिक् कोल युङ्सुए, हिट्नुङ् आङ्गुर बारि कोमा लोङ्सा ठिक् याक्सा चोगुए॥ टब हिट्ना आङ्गुर बारि आधियाङि पिडुचिउङ् उन्बाक् भारा खाडे॥ 34जब आङ्गुर छुम्मा बेला लिसे, टब आङ्गुर बारि डाङ्बाङा ओभागा लोहोट्सिङा ओचाकारचि आधिया कामाँ काचोक्चिङि पाङ्सुचे॥ 35टरो आधिया कामाँ काचोक्चिङा हिट्नागा चाकारचि ओलाबुचिउङ् हिट्नागाँ ठिबाङ् ओलेम्सुए, आरको ओसेडुए, हिट्नुङ् आरकोम्बाक् लुङ्गेॽवाङा ओलेप्टुए॥ 36हिट्नुङ् फेरि उन्ङा पाइलेगा नुङ्ना जोम् चाकारचि पाङ्सुचे, हिट्नुङ् हिट्नागाँ नागा चा हिट्नाडेडोक् ओमेट्टुचे॥
37“हिट्नुङ् आखेरिङि आङ्गुर बारि डाङ्बाङा ‘आइछाम्टे हिट्नागाँ छेम्बा डोक् नुलोक् ओमेट्टुटु’ मिट्टाउङ् उइछा आधिया कामाँ काचोक्चिङि पाङ्सुए॥ 38टरो हिट्नागा आधिया कामाँ काचोक्चिङा उइछा उनिसुङ् उन्चि उन्चि नाड्डे पिक्सा उमुन्डुब्टे, ‘लु, नाउम्टे स्वाँरा डाङ्बा उइछा डोक्॥ लु आबानि, हिट्ना सेडुम्, हिट्नुङ् हिट्नाङाना माक्फेन्सुबेन् आनिना चोगुम्॥’ 39हिट्नुङ् हिट्नागाँ उन् ओलाबुङ् आङ्गुर बारि भारा ओखाट्टुए, हिट्नुङ् हिट्ना ओसेढुए॥”
40येसुङा हिट्नागा सिलाप्टुचे, “लु माट्टानुम्, जब आङ्गुर बारि डाङ्बा टायुक्, हिट्नुङ् उन्ङा हिट्नागा आधिया कामाँ काचोक्चि पाक् मेट्टुचिचिगा होला?”
41हिट्नागाँ उन् ओलोडुए, “उन्ङा हिट्नागा ओभेन्गा आधिया कामाँ काचोक्चि जाखाम् चोगुचिचि, हिट्नुङ् उन्ङा टोक्माना ओभागा बेलाङि डोक् कापिबा आरु आधिया कामाँ काचोक्चि आङ्गुर बारि कुतङि पिडुचिचि॥” 42येसुङा हिट्नागा सिलाप्टुचे, “पाक् खानिङा धारमाछाप्लाङि छेप्बालाक् ना रिङ् पोढाँ आचोक्निम्गेट्निम्नै?–
‘लुङ् काछेट्बाचिङा ओलेप्टुना लिङ्गेॽवा डोक्
पाङ् ओजाग्ङि छेट्माना उसुरङिना मुलि लिङ्गेॽवा लिसे॥
नाउम्टे टाङ्बा आप्पेङा डोक् चोगुना ए,
हिट्नुङ् ना आनि नाजारङि आड्डिक् डोङ् ठोङ्डिना रिङ् ए॥’#छाम्लोमा छाप्ला ११८:२२-२३
43“हिट्डेउङ् आङा खानि लोनाँनि, माङ्हाङ् उमुलुक् हाट्ले माङ्हाङ्ङा खानिलाम्मा मानाप्टिटि, हिट्नुङ् उन्ङाना निङ्ग्वा गाड्डे काचोक्बा छोङ्बा लोङ्सा पिडुटु॥ 44ना लुङ्गेॽवा उठुङ्ङि ओठागाम्बाक् सोब्बे पिच्चिक् वाच्चिक् उलियुक्, हिट्नुङ् हिट्ना लुङ्गेॽवा खोना उठुङ्ङि ठायुक् हिट्ना चा पिच्चिक् लियुक्॥”
45येसुङा माट्टुना ना मुन्डुम् गाडुवाडाङ्बाचि लोक् फारिसि याप्मिचिङा ओखेम्सुङ् उन्चि बारेङि डोक् माट्टुना नुङ् ठाहा ओटोगुए॥ 46हिड्डेउङ् हिट्नागाँ उन् लाप्माना निङ्ग्वा ओचोगुए, टरो हिट्नागा याप्मिचिगा खिमेयाङ्मेलोक् उकिट्टे, पोङ्भोने याप्मिचिङा उन् माङ्काटा नुङ् उमिट्टुएसुना॥
Currently Selected:
मात्ति 21: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
