मात्ति 14
14
बाप्टिस्मा कापि युहान्ना सियाना
(मारकुस ६:१४-२९; लुका ९:७-९)
1हिट्ना बेला गालिल छेट्राङिना सासान् काचोक् हेरोद एन्टिपासङा#१४:१ गिरिक्ङि हेरोद टेट्राच, हेरोद एन्टिपासम्बाक् हाङ्बा हेरोदङाना उइछा हिट्नुङ् उन्ङा डोक् ना गालिलङि सासान् चोगुए॥ येसुङाना बारेङि खेम्सुए॥ 2हिट्नुङ् उन्ङा ओभारदारचि लोडुचे, “ना याप्मिम्टे सेप्बालाक् बाप्टिस्मा कापि युहान्ना डोक् ए॥ उन् सियानालाम्मा उहिङ्ग्वाट् लिसाइसे॥ हिड्नाड्डेउङ् नाङा नाड्डेगा डोङ् ठोङ्डिगा ठे-ठेगा टोॽवाचि चोगुएट्टु॥”
3पोङ्भोने हेरोद हाङ्बाङा आप्पे उन्झा फिलिपङाना ओपाङ्ढाङ्मा हेरोदियास खुसि चोक्मा लाउङ्सा युहान्ना लाब्मा मेट्टुचिउङ् खाम्बाङ्ङि ठेन्मा मेट्टुचे॥#मात्ति ४:१२; लुका ३:१९-२० 4पोङ्भोने युहान्नाङा हेरोद नाड्डे लोडुएसुना, “आप्पे कान्झाङाना ओपाङ्ढाङ्मा खान्ङा पाङ्ढाङ्मा चोक्माउङ् युङ्मा माङ्हाङ्ङाना नियामङाना बिरुद्दा लियुक्॥”#लेबि १८:१६; २०:२१ 5हिट्डेउङ् हेरोदङा युहान्ना सेप्माना निङ्ग्वा चोगुएसुना, टरो उन् याप्मिचिलोक् किट्टे, पोङ्भोने हिट्नागाँ युहान्ना माङ्काटा नुङ् बिस्वास ओचोगुना डाना॥
6जब हेरोद पोङ्साना लेम्बा टाए, हिट्ना बेला हेरोदियासङाना मेन्झेमा उइछा सोब्बे सोरि लाॽवासाउङ् हेरोद खुसि चोगुए॥ 7हिट्डे लिसानाँ “खान् जे आनाक्चा आङा खान् पिनाँ” पिक्सा उन्ङा बाचा चोगुए॥ 8हिट्नुङ् हिट्ना मेच्छाङा उमाङा हिसिक्टुना ना रिङ् लोडुए, “आङा हाट्ले डोक् बाप्टिस्मा कापिबा युहान्नाङाना ओटेहेक् ठालिङि युङ्सुङ् याङ्पिडा॥” 9ना रिङ् खेम्सुङ् हाङ्बाङाना उनिङ्ग्वा टुगा चा आम्टेप्मा पाहुनाचि सोरि उन्ङा चामारसिङा चोगुनाँ हिट्डे चोक्माना हुकुम चोगुए॥ 10हिट्नुङ् उन्ङा खाम्बाङ्ङि डोक् युहान्नाङाना ओटेहेक् चेप्मा मेट्टुचे॥ 11हिट्नुङ् टेहेक् काखोग्बाङा युहान्नाङाना ओटेहेक् ठालिङि आप्टुङ् हिट्ना हेरोदियासङाना उइछा मेन्झेमा पिडुए॥ हिट्ना मेन्झेमाङा खाट्टुङ् उमा पिडुए॥ 12हिट्नुङ्ना युहान्नाङाना ओचेलाचि ओआबाउङ् ओलास ओखाट्टुङ् उहुमुए॥ हिट्नुङ् हिट्नागा ओखाडाउङ् येसु ना खाबोर ओलोडुए॥
येसुङा लेम्बोक् हाजार याप्मिचि चेट्टुचे
(मारकुस ६:३०-४४; लुका ९:१०-१७; युहान्ना ६:१-१४)
13ना खाबोर खेम्सुङ् येसु नाउङि ठाङाउङ् हिट्नालाम्मा आल्लागा ठिक् खुसुना डेन्ङि खाडे॥ टरो ना रिङ् याप्मिचिगा खिमेयाङ्मेङा ओखेम्सुङ् हिट्नागाँ खालाङ्गा-खालाङ्गालाम्मा ओलाम्टियाउङ् डोक् उन् रोक् उरिक्टुए॥ 14येसु नाउलाम्मा भारा होन्डानाँ जोम् याप्मिचिगा खिमेयाङ्मे उन्ङा निसुए॥ याप्मिचिगा खिमेयाङ्मे निसुचिउङ् हिट्नागा लुक्मा टुक्टुचे, हिट्नुङ् हिट्नागालोक् उलिसागा उटुगागा याप्मिचि नुमानिङ् चोगुचे॥
15नाम् कुडागेट्टाना बेला ओचेलाचि नाड्डे पिक्सा उन् सोरि ओआबे, “ना खुसुना डेन्ङि पाक्चा वाइना, हिट्नुङ् नाम् कुमैइडे॥ नागा याप्मिचि नाहिलाम्मा खाडानि लोडुचि, हिट्नुङ् योम्बो-टोम्बो युक्टाम्-युक्टाम्ङि ओखाट्युङ् उन्चि लोङ्सा चामा-ठुङ्मागा थोक्चि उइनुजो॥”
16येसुङा हिट्नागा लोडुचे, “हिट्नागा नाहिलाम्मा ओखाट्नि चा॥ खानिङा डोक् नागा याप्मिचि पालोवालो चामा पिडानुम्चिम्॥”
17हिट्नागाँ उन् ओलोडुए, “नेहि आन्याँलोक् लेम्बोक् चालेपा हिट्नुङ् इप्पोक् ङासा एडोक् युङ्ग्वा॥”
18उन्ङा हिट्नागा लोडुचे, “खोलो, हिट्नागा आङा सोरि आप्टानुम्॥”
19हिट्नुङ् येसुङा खिमेयाङ्मे याप्मिचि घाँसा उठुङ्ङि युङानि पिक्सा लोडुचे॥ हिट्नुङ् उन्ङा लेम्बोक् गोटा चालेपा लोक् इप्पोक् ङासा याङुङ् टोनालोग्लेङ् पुयुङ् चामागा थोक् माङ्हाङ्ङि पोए-पोए ठाङ्सुए॥ हिट्नुङ् चालेपा एगुङ् ओचेलाचि पिडुचे, हिट्नुङ् ओचेलाचिङा याप्मिचि ओहान्डुबिडुचे॥ 20सोब्बेङा फोक् इप्लोक् ओचोए, हिट्नुङ् मोन्डागा खोजेमोजे बारो डालिटेप् ओचेलाचिङा उछुम्सुए॥ 21हिट्नि जोम् मेन्झेमाचि हिट्नुङ् पिच्छाचिङा चा ओचोए, हिट्नि ओचोगा येम्बेछा याप्मिचि एरोक् लेम्बोक् हाजार टेप्मा ओवासेट्टागा॥
येसु चुवाङि लाम्टियाना
(मारकुस ६:४५-५६; युहान्ना ६:१५-२१)
22हिट्नुङ् हिट्ना बेला डोक् येसुङा ओचेलाचि नाउङि उन् नुङ्ना पाइले तालङाना याहाँपारा पाङ्सुचे, हिट्नुङ् उन्ङाम्बाक् याप्मिचि बिदा पिडुचे॥ 23येसुङा याप्मिचि बिदा चोक्मा हिडुचिउङ् उन् ओएकेले बिन्टि चोक्ङा झोन्झोबालेङ् ठाङाडे॥ नाम् कुडाना पाका उन् ओएकेले झोन्झोबाङि डाना॥ 24हिट्ना बेला सोम्मा नाउम्बाक् तालङाना ओफेरोलाम्मा याप्मा लाप्माङ् टामा हिडुएसुना॥ हिट्नुङ् ठेना हिॽवा नाउङाना ओटोकानालाम्मा फेन्डानाँ हिट्नुङ् चुवाङाना ओभेट्लेॽवाङा नाउ वान्डुनाँ हिट्नागा आगाडि खाप्मा उहिनेट्नि॥ 25भ्यानिक् सुम्बोक् बाजाँ लिसाना फेरा येसु चुवा उठुङ्ङि लाम्टिसा हिट्नागा सोरि आबे॥ 26जब चेलाचिङा उन् चुवा उठुङ्ङि लाम्टियाना उनिसुए, हिट्नुङ् हिट्नागा “एलाह्, टोन्डेबा” पिक्सा उकिट्टाउङ् ओराट्टे॥
27टरो येसुङा हिट्ना बेला डोक् हिट्नागा नाड्डे लोडुचे, “आँटि लिसानि, आङा डोक्, किट्नेनिन्॥”
28ना रिङ् खेम्सुङ् पाटरुसङा लोडुए, “टाङ्बा, खान् डोक् भोने आङा चा चुवा उठुङ्ङि लाम्टिङाउङ् खान् सोरि आप्माना आग्याँ याङ्पिडा॥”
29येसुङा लोडुए, “आबाक्॥” हिट्नुङ् पाटरुस नाउलाम्मा होन्डाउङ् चुवा उठुङ्ङि लाम्टिसा येसुलेङ् खाप्मा ठालाँ चोगुए॥ 30टरो ठेना हिॽवा फेन्डाना निसुङ् पाटरुस किट्टे, हिट्नुङ् चुवाङि लुमा गेट्टानाँ हिट्ना राट्टाउङ् लोडुए, “आडाङ्बा, आङा याङ्हिङा!”
31हिट्ना बेला डोक् येसुङा उमुक्ङा हिट्ना लाबुएट्टुए हिट्नुङ् लोडुए, “हाउ खाट्टिप्मा एरोक् बिस्वासलोक्ना याप्मि, पोङ् साङ्का आचोगुएना?” 32हिट्नुङ्ना येसु पाटरुसलोक् नाउङि ठाङे हिट्नुङ् हिॽवा चा योङाडे॥ 33हिट्नुङ् नाउङि उलिसागा चेलाचि सोब्बेङा उन् स्या ओचोगुए, हिट्नुङ् ओलोडुए, “छेम्बा डोक्, खान् माङ्हाङ् छा ए!”
34येसु ओचेलाचिलोक् ताल ओकाक्टुङ् याहाँपारा गानेसारेत ओलोडुना डेन्ङि ओटासुए॥ 35जब हिट्निगा येम्बेछा याप्मिचिङा येसु मिसेन् उनिसुएट्टुए, हिट्नुङ् हिट्नागाँ हिट्ना योम्बो-टोम्बोगा छेट्राङि खाबोर ओहाङ्सुए, हिट्नुङ् याप्मिचिङा उटुग्गा ख्वाप्पा उन्ङि ओटाडुचे॥ 36हिट्नुङ् हिट्नागाँ उटुगागा याप्मिचिङा उन्ङाना ओलोट्लिङ् ओफेरो एडोक् चा खोप्मा ओटोगुम् नुङ् उन्ङि बिन्टि ओठाङ्सुए, हिट्नुङ् ओलोट्लिङ् ओखोट्टुगा टेप्मा सोब्बे याप्मिचि उनुए॥
Currently Selected:
मात्ति 14: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
