मात्ति 13
13
लालिक्ङाना मुन्डुम्
(मारकुस ४:१-१२,२५; लुका ८:४-१०; १०:२३-२४)
1हिट्ना लेम्बा डोक् येसु हिट्ना पाङ्लाम्मा होन्डाउङ् तालङाना ओफेरोङि खाडाउङ् युङे॥ 2हिट्नुङ् आड्डिक् जोम् याप्मिचिगा खिमेयाङ्मे उन् सोरि उछुमे, हिड्डेउङ् उन् ठिक् नाउङि ठाङाउङ् युङे॥ हिट्नुङ् सोब्बे याप्मिचि तालङाना ओफेरोङि ओयेबे॥#लुका ५:१-३ 3हिट्नुङ् येसुङा याप्मिचि याप्मा रिङ् मुन्डुम्लाम्मा हिसिक्टुचे॥
हिट्नुङ् उन्ङा नाड्डेना ठिक् मुन्डुम् लोडुचे, “ठिबाङ् याप्मि लालिक् हिसिङा होन्डे॥ 4हिट्नुङ् लालिक् हिसा खाडानाँ खोट्टेप्मा लालिक् लाम्बोङि ओठाए, हिट्नुङ् नुवाचि ओटायाउङ् ओचोडिसुए॥ 5खोट्टेप्मा लालिक् लुङ्गेॽवा एडोक् लिसाना खाम्ङि ओठाए, हिट्नि याप्मा खाम् वानेट्निनाउङ् लालिक् कोप्माउङ् एला डोक् ओकोबे, 6टरो गाइरो सोम्मा ओजारा ठेम्मा ओटोग्वाट्टुन् हिट्नुङ् नाम् छेडानाँ लालिक् लेमाउङ् ओचोबाडे॥ 7आम्टेप्मा लालिक्उम्बाक् उटिउँबा घारिङि ओठाए, टरो उटिउँबाचि ओपोया ओकाडाउङ् ओकोबागा लालिक्चि पोमा उपिडुवाट्टुन्चिन्॥ 8आरु आम्टेप्मा लालिक्उम्बाक् मोलिलो खाम्ङि ओठाए, हिट्नुङ् हिट्नागा लालिक्ङा कोइङा साए गुना, साठि गुना, तिस गुना उसा ओकेङुए॥ 9खेम्माना नुभेक् लोक्गाङा ना रिङ् नुलोक् खेम्सानुम्॥”
10हिट्नुङ् ओचेलाचि ओआबाउङ् उन् उसिलाप्टुए, “पोङ् खान् याप्मिचिलोक् मुन्डुम्ङि एडोक् आचेक्युक्ना?”
11उन्ङा हिट्नागा लोडुचे, “खानिङाम्टे टोनालोग्ङिना मुलुक्ङाना सोगोप्ना रिङ्चि ठाहा टोग्माना ठोना आटोगुएसुम्मे, टरो हिट्नागा लाउङ्सा भोने पिनिगेट्निना॥ 12पोङ्भोने खोनालोक् युङ्ग्वा, हिट्नाङा आझै झान् याप्मा टोगुटु॥ टरो खोनालोक् वाइना, हिट्नुङ् हिट्नालोक् खाट्टिप्मा लिसाना चा हिट्नालाम्मा नाप्युक्॥#मात्ति २५:२९; मारकुस ४:२५; लुका ८:१८; १९:२६ 13नाड्डेउङ् आङा हिट्नागालोक् मुन्डुम्ङि चेक्ङा॥ पोङ्भोने हिट्नागाँ पुमाउङ् उपुयुगा, टरो उनिसुन्गा, खेम्माउम् ओखेम्सुगा, टरो बुजा ओचोगुन्गा॥
14“यासैया माङ्काटाङा माट्टुना ना रिङ् हिट्नागाङि युडैसे–
‘खानिङा खेम्माउम् आखेम्सुम्गा, टरो काइले चा बुजा आचोक्निम्ना,
पुमाउम् आपुयुम्गा, टरो काइले चा आनिनिम्ना॥
15पोङ्भोने नागा याप्मिचिगा निङ्ग्वा डोम्-डोम् लिसाइसे,
हिट्नुङ् हिट्नागा याङ्ओखेम्निगा उलिसाइसे,
हिट्नुङ् हिट्नागाँ उन्चि मिक्चिम् ओचोगुएसुए॥
हिड्डे ओचोग्वाट्टुन्ना बे उन्चि मिक्ङा हिट्नागाँ उनिसुए बे,
उन्चि नुभेक्ङा ओखेम्सुए बे, उन्चि निङ्ग्वाङा बुजा ओचोगुए बे॥
हिट्नुङ् हिट्नागाँ उन्चि निङ्ग्वा आङालेङ् ओनोक्टुए बे,
हिट्नुङ् आङा हिट्नागा नुमानिङ् चोगुङ्चिङे बे॥’#यासैया ६:९-१०
16“टरो खानिउम्टे माङ्हाङ्ङा आसिक् मापिडिटि, पोङ्भोने खानि मिक्ङा आनिसुएट्टुम् हिट्नुङ् खानि नुभेक्ङा आखेम्सुएट्टुम्॥ 17छेम्बा आङा खानि लोनाँनि, खानिङा आनिसुम्गा लोक् आखेम्सुम्गा नागा रिङ्चि जोम् माङ्काटाचिङा हिट्नुङ् धारमोति याप्मिचिङा पुमा हिट्नुङ् खेम्मा आड्डिक् निङ्ग्वा ओचोगुए, टरो हिट्नागाँ निमा चा ओटोग्वाट्टुन् हिट्नुङ् खेम्मा चा ओटोग्वाट्टुन्॥#लुका १०:२३-२४
लालिक्ङाना मुन्डुम्ङाना उटुप्
(मारकुस ४:१३-२०; लुका ८:११-१५)
18“हाट्ले लालिक् हिबालाक्ङाना मुन्डुम्ङाना उटुप् खेम्सानुम्॥ 19आम्टेप्मा याप्मिचिङा टोनालोग्ङिना मुलुक् बारेङिना रिङ् खेम्माउम् ओखेम्सुटु, टरो बुजा ओचोगुन्गा हिट्नुङ् सैतान टायुङ् उन्चि निङ्ग्वाङि लिसाना माङ्हाङ् रिङ् नाप्टुचिउङ् खाट्टुएट्टुटु॥ नाम्बाक् लाम्बोङि ओठायागा लालिक्चि गाड्डेगा ए॥ 20हिट्नुङ् घेट्रेक् लिङ्गेॽवा बारिङि ओठायागा लालिक्ङाना उटुप्बाक् माङ्हाङ् रिङ् ओखेम्सुनामे हारका उलियुङ् बिस्वास काचोक् याप्मिचि ए॥ 21टरो गाइरो सोम्मा जारा ओठेन्डुन्गा उभुङ्मा याप्मा बेला सोम्मा टाक्टुन् गाड्डे डोक् हिट्नागाँ होप्मो बेला सोम्मा एडोक् बिस्वास ओचोगुटु, हिट्नुङ् माङ्हाङ् रिङ् बिस्वास ओचोगुनाँ याङ्छामा लोक् निङ्ग्वा छिक्मा टानामे बिस्वास ओनाडुएट्टुटु॥ 22टिउँबा घारिङि ओठायागा लालिक्उम्बाक् नाड्डे गाड्डेगा याप्मिचि उलियुक्॥ हिट्नागाँ माङ्हाङ्ङाना रिङ् ओखेम्सुटु, टरो ना नाराङि लिना जोम् थोक्ङि सुरटा ओचोगुटु हिट्नुङ् खोड्डे पारिक् माक्फेन्सुबेन् कामाँ चोक्माना रिङ्ङि ओबान्युक्, हिट्डेउङ् हिट्नागाँ ओखेम्सुना रिङ् ओमासुडेसुटु हिट्नुङ् पाक्चा टुल्फुल ओकेङुन्ना॥ 23टरो ओचेट्नुना खाम्ङि ओठायागा लालिक्उम्बाक् नाड्डेगा याप्मिचि उलियुक्॥ हिट्नागाँ माङ्हाङ् रिङ् ओखेम्सुङ् बुजा ओचोगुटु, हिट्नुङ् छेम्बा डोक् उसा ओकेङुटु॥ हिट्नागा लेट्बालाक् लालिक्ङा साए गुना, साठि गुना हिट्नुङ् तिस गुना उसा ओकेङुटु॥”
सामाङाना मुन्डुम्
24येसुङा फेरि हिट्नागा आरको मुन्डुम् लोडुचे, “टोनालोग्ङिना मुलुक् ठिबाङ् याप्मि गाड्डेना ए, जुन्ङा ओस्वाँराङि ओचेट्नुना लालिक् हिसुए॥ 25टरो याप्मिचि उइम्साना बेला ओसाट्टुर आबे, हिट्नुङ् गाहुँङाना माझा माझाङि सामा लेट्टुढोङ् खाडे॥ 26हाट्ले गाहुँ पोया काडाउङ् उसा केङुए, टब सामा चा पोया काडे॥
27“हिट्नुङ् स्वाँरा डाङ्बाङाना चाकारचि ओआबाउङ् ओलोडुए, ‘डाङ्बा, पाक् खान्ङा स्वाँराङि ओचेट्नुना लालिक् आहिसुना माखाइ टे? हिट्नुङ् हिट्नि खोनालाम्मा सामा टाएना?’ 28पाङ् ओडाङ्बाङा हिट्नागा लोडुचे, ‘ना खोनाम्बाक् साट्टुरङा नाड्डे चोगुएना॥’ चाकारचिङा उन् ओलोडुए, ‘पाक् आन्याँ खाडिङाउङ् हिट्नागा सामा आङ्सुम्मानि टे?’
29“टरो स्वाँरा डाङ्बाङा हिट्नागा लोडुचे, ‘हिड्नाड्डे चोक्नेनिन्, हिट्डे आचोगिए भोने खानिङा सामा आआङ्सुम्नाँ गाहुँ चा आआङ्सुम्डिसुम्टुम्॥ 30चालिङ् छुम्माना बेला मिलिए सोम्मा इप्पोक् डोक् एक्केउ पोमा पिडानुम्चिम्, हिट्नुङ् चालिङ् छुम्मा बेला आङा चासोङ् काहेग्बाचि लोडुङ्चिङ्चिङ्, पाइलेम्बाक् सामा आङ्सानुमुङ् मिङि टुम्माउङ्सा मुठा रेक्टानुम्, टरो गाहुँम्बाक् छुम्सानुमुङ् आङाना ढुङ्गुरिङि युङ्सानुम्॥’”
पाट्छेयो सागाङाना लालिक् हिट्नुङ् खामिरङाना मुन्डुम्
(मारकुस ४:३०-३४; लुका १३:१८-२१)
31येसुङा हिट्नागा आरको मुन्डुम् लोडुचे, “टोनालोग्ङिना मुलुक् पाट्छेयो सागा ओगेडा गाड्डेना ए॥ ठिबाङ् याप्मिङा पाट्छेयो सागाङाना लालिक् खाट्टुङ् ओस्वाँराङि लेट्टुए॥ 32ना लालिक् सोब्बे लालिक्ङि खाट्टियुना लिना, टरो जब ना कोब्युङ् पोयुक् हिट्नुङ् हिट्ना सोब्बे सागापाटा नुङ्ना ठेना लियुक्॥ हिट्नुङ् नुवाचि ओटायुङ् ना उभुङ्माङाना ओहागेप्पाङि उन्चि हाप् ओचोगुटु॥”
33येसुङा फेरि हिट्नागा आरको मुन्डुम् लोडुचे, “टोनालोग्ङिना मुलुक् खामिर गाड्डेना ए॥ ठिबाङ् मेन्झेमाङा खाट्टिप्मा खामिर सुम्बोक् पाटि डालो टेप्मा पिठोङि फोडुए, हिट्नुङ् हिट्ना ख्वाप्पा पिठो खामिरङा भुक्भुक् मिलिए सोम्मा एक्के ठोङ्ङि युङ्सुए॥”
34येसुङा नागा सोब्बे रिङ् मुन्डुम्लाम्मा डोक् याप्मिचि लोडुचे॥ उन्ङा याप्मिचि मुन्डुम् माले पाक्चा लोडुवाट्टुन्चिन्॥ 35नाड्डेउङ् माङ्काटाङा माट्टुना ना रिङ् नाड्डेउङ् युडे–
“आङा हिट्नागालोक् मुन्डुम्ङि चेक्ङा,
हिट्नुङ् नारा उटुम् लिसाना बेला नुङ् ठोप्बालाक् रिङ्चि आङा लोडुङ्चिङ्चिङ्॥”#छाम्लोमा छाप्ला ७८:२
सामाङाना मुन्डुम्ङाना उटुप्
36हिट्नुङ्ना येसु याप्मिचिगा खिमेयाङ्मे पोक्टुचिउङ् पाङ् भिट्रा लिगे, हिट्नुङ् ओचेलाचिङा उन् सोरि ओआबाउङ् ओलोडुए, “बेङ्सिङिना सामाङाना मुन्डुम्ङाना उटुप् आन्याँ याप्मिलोडा॥”
37उन्ङा हिट्नागा लोडुचे, “ओचेट्नुना लालिक् काहिबा याप्मिम्बाक् याप्मि छा ए॥ 38स्वाँराम्बाक् नारा ए, हिट्नुङ् ओचेट्नुना लालिक्उम्बाक् टोनालोग्ङिना मुलुक्ङिगा छालेट्चि ए, हिट्नुङ् सामाम्बाक् सैतानङाना ओछालेट्चि ए॥ 39सामाङाना लालिक् काहिबा साट्टुरम्बाक् सैतान ए, हिट्नुङ् चालिङ् छुम्माम्बाक् नाराङाना आन्तेङाना बेला ए॥ हिट्नुङ् चालिङ् काहेग्बाचिम्बाक् माङ्हाङ् रिङ् काउग्बाचि ए॥
40“सामा मिङि उमा छुम्सि गाड्डे डोक् नाराङाना आन्तेङि चा हिड्नाड्डे डोक् लियुक्॥ 41हिट्ना बेला याप्मि छाङा उन्ङाना माङ्हाङ् रिङ् काउग्बाचि पाङ्सुचिचि, हिट्नुङ् पाप चोक्मा कामेप्बाचि हिट्नुङ् ओभेन्गा टोॽवा काचोक् सोब्बेलोङ्सा उन्ङाना मुलुक्लाम्मा हिट्नागाँ उछुम्सुचिचि, 42हिट्नुङ् मि भुङ्रोङि हिट्नागा ओठेन्डुचिचि॥ हिट्नि हिट्नागाँ केङ् ओचान्डुङ् ओहाप्युक्॥ 43हिट्ना बेला धारमोति याप्मिचिम्बाक् उन्चि माङ्हाङ् पाबाङाना उमुलुक्ङि नाम् गाड्डे डोक् ओम्सा उयुङ्युक्॥ खेम्माना नुभेक् लोक्गाङा ना रिङ् नुलोक् खेम्सानुम्॥
गारधान हिट्नुङ् मोतिङाना मुन्डुम्
44“टोनालोग्ङिना मुलुक् स्वाँराङि हुम्बालाक् गारधान गाड्डेना डोक् ए॥ हिट्ना ठिबाङ् याप्मिङा टुबुङ् ठोबुढोटु, हिट्नुङ् हिट्ना याप्मि हारका लियुङ् खाड्युक्, हिट्नुङ् उन्लोक् लिसागा सोब्बे थोक् छोङ्सुङ् हिट्ना स्वाँरा इनुएट्टुटु॥
45“फेरि टोनालोग्ङिना मुलुक् ओचेट्नुना मोतिचि काकोन्बा ठिबाङ् बेपारि गाड्डेना डोक् ए॥ 46हिट्नाङा ठिक् माहाङ्गो मोति टुबुए, हिट्नुङ् हिट्ना याप्मि खाट्युङ् उन्लोक् लिसागा सिरिखुरि सोब्बे छोङ्सुङ् हिट्ना मोति इनुए॥
ङासा लाप्माना चेल्लेङाना मुन्डुम्
47“फेरि चा टोनालोग्ङिना मुलुक् टे पोखारिङि लेप्बालाक् ठिक् चेल्ले गाड्डेना चा ए॥ हिट्नि सोब्बे पारिक्गा ङासाचि ओठायुक्॥ 48हिट्नुङ् ङासाङा चेल्ले इप्टुङ् ङासा कालाप्बाचिङा हिट्ना ओसाडुङ् ओफेरोङि ओहोट्टुटु, हिट्नुङ् हिट्नागा उयुङाउङ् नुगा नुगा ङासाचिउम्बाक् उन्चि याङ्ढाङ्ङि उयुङ्सुचिचि हिट्नुङ् ओचाफेन्गा ङासाचिम्बाक् भारा ओलेप्टुचिचि॥#१३:४८ याहुदिचि लोङ्सा ओचाफेन्गा ङासाचिम्बाक् उन्चि धारमाबिधिङा चामा उलिनिगा नुङ् माट्टुना ङासाचि ए॥ 49जुगङाना आन्तेङि चा हिड्नाड्डे डोक् लियुक्॥ हिट्नुङ् माङ्हाङ् रिङ् काउग्बाचि ओटायुङ् धारमोति याप्मिचि ओभेन्गाचिलाम्मा ओसाम्डुचिचि, 50हिट्नुङ् मि भुङ्रोङि हिट्नागा ओठेन्डुचिचि॥ हिट्नि हिट्नागाँ केङ् ओचान्डुङ् ओहाप्युक्॥”
51येसुङा हिट्नागा सिलाप्टुचे, “पाक् खानिङा नागा सोब्बे रिङ् बुजा आचोगुम्मेगि?”
हिट्नागाँ उन् ओलोडुए, “बुजा चोगुम्मे॥”
52हिट्नुङ् येसुङा हिट्नागा लोडुचे, “हिट्डेउङ् टोनालोग्ङिना मुलुक् बारे सिक्छे ठाहा काटोक्बा ख्वाप्पा धारमाबिधि काहिसिक्बाचि पाङ्ङिना ठिबाङ् डाङ्बा गाड्डेना डोक् लियुक्॥ पाङ् ओडाङ्बाङा उन्ङाना ढुङ्गुरिक्लाम्मा ओछोङ्ग्वाट् रिङ्चि चा होट्टुटु, हिट्नुङ् पुरानो रिङ्चि चा होट्टुटु॥”
नासारातङि येसु इन्कार ओचोगुना
(मारकुस ६:१-६; लुका ४:१६-३०)
53नागा मुन्डुम् माप्मा हिडुङ् येसु हिट्नालाम्मा खाडे॥ 54हिट्नुङ् उन् पोयाना युक्टाम्ङि खाडाउङ् याहुदि छुम्मापाङ्ङि हिसिक्मा ठालाँ चोगुचे॥ उरिङ् काखेम्बाचि डोङ् ओठोङ्डाउङ् हिट्नागा उपिगे, “नाड्डेना ठोना हिट्नुङ् डोङ् ठोङ्डिना टोॽवाचि चोक्माना बोल् नाङा खोनालाम्मा टोगुएना? 55पाक् ना सिङ्ङाना टोॽवा काचोक्बा याप्मिङाना उइछा माखाइ टे? नाङाना उमाङाना उनिङ् मारियाम माखाइ टे? पाक् याकुब, योसेफ, सिमोन हिट्नुङ् याहुदा नाङाना आप्पे उन्झाचि माखाइ टे? 56नाङाना मेन्झेमा उन्झाचि सोब्बे आनिलोक् डोक् ओवाहेट् टे? हिट्नुङ् नाङा नाड्डेना ठोना हिट्नुङ् बारगाट् खोनालाम्मा टोगुएना?” 57हिट्नुङ् हिट्नागाँ उरिङ् खेम्मा निङ्ग्वा ओटास्वाट्टुन्॥
टरो येसुङा हिट्नागा लोडुचे, “माङ्काटा सोब्बेलेङ् याप्मिचिङा मान् ओचोगुना, टरो आप्पे उयुक्ताम्ङि हिट्नुङ् ओपाङ्ठाङ्ङिगा याप्मिचिङा मान् ओचोगुन्ना॥”#युहान्ना ४:४४
58हिट्नुङ् हिट्नागाँ बिस्वास ओचोग्वाट्टुन् नुङ् येसुङा हिट्नि जोम् डोङ् ठोङ्डिगा टोॽवा चोग्वाट्टुन्॥
Currently Selected:
मात्ति 13: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
