मात्ति 12
12
युङ्माना लेम्बाङाना टाङ्बा
(मारकुस २:२३-२८; ३:१-६; लुका ६:१-११)
1हिट्ना बेला येसु याहुदिचिगा युङ्माना लेम्बा गाहुँ बारिङाना लाम्बो लिसाउङ् खाडागेट्टाना डाना॥ ओचेलाचिगा उन्चि साॽवासानाँ हिट्नागाँ गाहुँ ओबाला उफिगुङ् चामा ठालाँ ओचोगुए॥#धारमाबिधि २३:२५ #१२:१ कोइ उन्चि साक्वासागा याप्मिचि बेङ्सि आथाबा बारिलाम्मा ओखाट्ना बेला पालोवालो उफिगुङ् ओचोटु भोने, हिट्ना याङ्खुट्मा माखाक्॥ 2टरो फारिसि याप्मिचिङा ना रिङ् उनिसुङ् येसु ओलोडुए, “पुयुबु, युङ्माना लेम्बा चोक्मा नुनिना नुङ् माट्टुना रिङ् काचेलाचिङा ओचोगुएट्टु॥”
3टरो येसुङा हिट्नागा लोडुचे, “दाउद लोक् ओसाइबाचिगा उन्चि साॽवासानाँ दाउदङा पाक् चोगुएना, पाक् खानिङा धारमाछाप्ला पोढाँ आचोग्निम्गेट्निम्गै?#१ सामुएल २१:१-६ 4उन् माङ्हाङ् माङ्ध्यान् चोक्माना ठोङ्ङि लिगाउङ् माङ्हाङ्लोङ्सा ठाङ्बालाक् चालेपा ओसाइबाचिलोक् चोए, हिट्ना चालेपा पुजारिचि माले आरु साङा चा चामा लिनिना डाना॥#लेबि २४:९ 5हिट्नुङ् पाक् खानिङा धारमाबिधि पोढाँ आचोग्निम्गेट्निम्गै, खोड्डे पारिक् पुजारिचि युङ्माना लेम्बा चा माङ्ठानाङि टोॽवा ओचोक्युग्गा॥ नाड्डेउङ् हिट्नागाँ युङ्माना लेम्बा आसुद्दो ओचोगुटु, हिट्नुङ् चा हिट्नागा फाट्टुरङि ओठानिगा टे?#गान्ति २८:९-१० 6आङा खानि लोनाँनि, नेहि माङ्ठाना नुङ्ना चा ठेना ठिबाङ् युङ्ग्वा॥ 7टरो ‘आङा जिवाट्ङाना भोक् माखाक्, आरु लुक्मा टुक्टानुम्चिम् नुङ् आनिङ्ग्वा युङ्ग्वा’#मात्ति ९:१३; होसे ६:६ नाङाना उटुप् पाइना नुङ् खानिङा बुजा आचोगुम्नाबे, खानिङा फाट्टुर मालेगा आचेलाचि फाट्टुर आलाप्नेट्निम्चिम्बे॥ 8पोङ्भोने याप्मि छा युङ्माना लेम्बाङाना चा टाङ्बा डोक्॥”
9हिट्ना डेन् नाडुङ् येसु हिट्नागाँगा छुम्मापाङ्ङि खाडे॥ 10हिट्नि उमुक् चोबाना ठिबाङ् याप्मि डाना॥ हिट्नुङ् येसु फाट्टुर लाप्माना निङ्ग्वा ओचोगुङ् फारिसि याप्मिचिङा उन् उसिलाप्टुए, “पाक् युङ्माना लेम्बा टुगाना याप्मि नुमानिङ् चोक्मा धारमाबिधिङा आपियुक्नि आपिनिनै?”
11येसुङा हिट्नागा लोडुचे, “खानि माड्डे कोइलोक् ठिक् ठुँबा युङ्ग्वा, हिट्नुङ् युङ्माना लेम्बा हिट्ना खाल्टाङि ठाए भोने, पाक् हिट्नाँ साडुङ् भारा होट्टुन्नै टे?#लुका १४:५ 12हिट्नुङ् याप्मिउम्टे ठुँबा नुङ्ना आड्डिक् बाहुमुल्ये ए॥ हिट्डेउङ् युङ्माना लेम्बा ओचेट्नुना टोॽवा चोक्मा धारमाबिधिङा आपियुक्॥” 13हिट्नुङ् येसुङा हिट्ना याप्मि लोडुए, “कामुक् सोट् चोगु॥” हिट्ना याप्मिङा उमुक् सोट् चोगुए, हिट्नुङ् हिट्नाङाना उमुक् आरको गाड्डे डोक् नुलोक् लिसाडे॥ 14टरो फारिसि याप्मिचि भारा ओखाडे हिट्नुङ् येसु खोड्डे पारिक् सेप्माना पिक्सा रिङ्पान् चोक्मा ठालाँ ओचोगुए॥
माङ्हाङ्ङा सेगुना सेवाक्
(मारकुस ३:७-१२)
15येसुङा उन्ङाना बिरुद्दाङि रिङ्पान् ओचोगुना ठाहा टोगुङ् उन् हिट्निलाम्मा खाडालेट्टे॥ हिट्नुङ् जोम् याप्मिचि उन्ङा ओएङ्-ओएङ् ओखाडे, हिट्नुङ् उन्ङा उटुगागा सोब्बे नुमानिङ् चोगुचे॥ 16टरो उन् साइना नुङ् साक्चा लोनेनुम्चिम् पिक्सा हिट्नागा आग्याँ पिडुचे॥ 17नाड्डेउङ् यासैया माङ्काटाङा माट्टुना रिङ् युमालोङ्सा डोक् ना लिसाना ए–
18“आङा सेगुङ्ना आमायालु सेवाक् उन् डोक् ए,
उन्लोक् आङा आड्डिक् हारका लिसाइसाङे॥
उन् उठुङ्ङि आङाना हाङ्सा ठेन्डुङ्बिडुङ्टुङ्,
हिट्नुङ् उन्ङा सोब्बे छोङ्बाचि साहि न्याएङाना बारेङि पारचार चोगुटु॥
19उन् खेमाबुङ्मा चोक्निना, हिट्नुङ् टाराङ्-टाराङ् राट्निना चा,
हिट्नुङ् लाम्बोङि ठेना साब्दा चोगुङ् राट्सा लाम्टिनिना॥
20हिट्नुङ् पेङ्साना पारयाङ् चा एगुन्ना,
सिया लाबाना कुपि चा सेडुन्ना,
हिट्नुङ् उन्ङा ओभेन्गा मिमेट्ने सोम्मा याप्मिचि उन्ङाना माहामाना लाम्बो निमेट्टुयाक्टुचिचि॥
21हिट्नुङ् सोब्बे छोङ्चिङा उन्चि आसा उनिङ्ङि डोक् उयुङ्सुटु॥”#यासैया ४२:१-४
येसु हिट्नुङ् सैतान
(मारकुस ३:२०-३०; लुका ११:१४-२३)
22याप्मिचिङा टोन्डेबाङा याङ्सुङ् याङ्कानिनिबा हिट्नुङ् ओकेलुबा लिसाना ठिबाङ् याप्मि येसु सोरि ओटाडुए॥ येसुङा हिट्ना याप्मि नुमानिङ् चोगुए, हिट्नुङ् हिट्नाँ याङ्निसुए हिट्नुङ् चेक्मा काहिबा लिसे॥ 23ना उनिसुङ् सोब्बे याप्मिचि डोङ् ओठोङ्डाउङ् नाट्डे पिक्सा ओमाट्टुए, “पाक् ना दाउद पुङ्लाङिना याप्मि डोक् इ टे?”
24टरो फारिसि याप्मिचिङा ना रिङ् ओखेम्सुङ् नाड्डे ओमाट्टुए, “ना याप्मिङा टोन्डेबाङाना हाङ्बा बालजिबुल ओलोडुना ओबोल्लाम्मा एडोक् टोन्डेबाचि रिक्टुचिगा॥”#मात्ति ९:३४; १०:२५
25टरो येसुङा हिट्नागाँगा नाड्डेना रिङ् ठाहा टोगुङ् हिट्नागा लोडुचे, “खोना चा देसङिगा याप्मिचि आप्पे-आप्पे ओटोङ्नेएट्नि भोने, हिट्ना देस आप्पे जाखाम् लियुक्॥ हिट्नाडेडोक् ठिक्ए पाङ्ङिगा याप्मिचि आथाबा खालाङ्गाङिगा याप्मिचि ओटोङ्नेएट्नि भोने, हिट्ना चा जाखाम् लियुक्॥ 26हिट्नुङ् सैतानङा सैतान डोक् होट्टुटु भोने, हिट्नाङा आप्पे उबिरुद्दाङि टोॽवा चोगुटु, हिट्नुङ् खोड्डेउङ् उमुलुक् लियुयाक्युक्ना टे? 27आङा बालजिबुल ओबोल्लाम्मा टोंडेबाचि होट्टुङ्चिङ्गा भोने, खानि चेलाचिङाम्बाक् खोनाङाना ओबोल्लाम्मा टोंडेबाचि ओहोट्टुएट्टुचिगा टे? हिट्डेउङ् खानि चेलाचिङा डोक् खानि माङ्जोगा नुङ् पारमान् माचोग्याक्॥ 28टरो आङा माङ्हाङ् ओहाङ्सालाम्मा ओचाफेन्ना रिमेट्चि होट्टुङ्चिङ्गा भोने, माङ्हाङ् उमुलुक् खानि सोरि डोक् टाइसे॥ 29फेरि खेम्सानुम्, बोल्लेउ याप्मि पाइले दोरो मिरेक्ङे सोम्मा साङा चा ओपाङ्ठाङ्ङिगा माक्फेन्सुबेन् खाट्मा उहिडुन्ना॥ हिट्ना बोल्लेउ याप्मि ओरेक्टुङ् एडोक् ओपाङ् सुप्मा उहिडुटु॥
30“आङालेङ् ओकेङ्निगा याप्मिचि आङाना बिरुद्दाङि उलियुक्॥ आङा छुम्सिङा घुवार याङ्ओफानिङ्गाँ चेम्बेलेङ् ओचोगुटु॥#मारकुस ९:४० 31नाड्डेउङ् आङा खानि लोनाँनि, याप्मिचिङा ओचोगुना सोब्बे पाप हिट्नुङ् माङ्हाङ् लोमाजामाम्बाक् माफ लियुक्, टरो सेङ्सेङ्ना हाङ्साङाना बिरुद्दाङि लोमाजामाम्बाक् माफ लिनिना॥ 32कोइ याप्मि छाङाना बिरुद्दाङि चेक्युक् भोने हिट्नाङा माफ टोगुटु, टरो कोइ सेङ्सेङ्ना हाङ्साङाना बिरुद्दाङि चेक्टे भोने ना जुगङि हिट्नुङ् टाना जुगङि चा माफ टोगुन्ना॥#लुका १२:१०
उभुङ्मा हिट्नुङ् टुल्फुल
(लुका ६:४३-४५)
33“सिङ् उभुङ्मा साप्राङ् लिसाना भोने उसा चा साप्राङ् लिसाना डोक् केङुटु, हिट्नुङ् सिङ् उभुङ्मा नास् लिसाना भोने उसा चा नास् लिसाना डोक् केङुटु॥ पोङ्भोने उभुङ्मा ओचेट्नुना इ ओचाफेन्ना नुङ् उसालाम्मा डोक् मिसेन् निसुम्टुम्॥#मात्ति ७:२० 34हाउ बिखालु ओप्पुङा ओछालेट्चि! ओभेन्गा आलिसिउङ् चा खानि खोड्डे पारिक् ओचेट्नुना रिङ् चेक्मा आहिडिटिगा? पोङ्भोने याप्मिङाना उनिङ्ग्वाङि पाक् युङ्ग्वाना हिट्ना रिङ् डोक् माट्टुटु॥#मात्ति ३:७; २३:३३; १५:१८; लुका ३:७ 35नुना याप्मिङा उनिङ्ग्वाङि लिसाना नुना रिङ्लाम्मा ओचेट्नुना रिङ् डोक् माट्टुटु, टरो भेन्ना याप्मिङा उनिङ्ग्वाङि लिसाना ओचाफेन्ना रिङ्लाम्मा ओचाफेन्ना रिङ् डोक् माट्टुटु॥ 36आङा खानि लोनाँनि, खेडोक्गा रिङ् ओचेक्गा याप्मिचि न्याएङाना लेम्बा हिट्ना ठिक्-ठिक् रिङ्ङाना हारहिसाब् पिमा कोन्युक्॥ 37पोङ्भोने खानिङा साजाए आटोगुम्टुम्नि आटोक्निम्नै खानिङा आमाट्टुम्गा रिङ्लाम्मा डोक् माङ्हाङ्ङा न्याए माचोगिटि॥”
योनाङाना चिन्ना बारे
(मारकुस ८:११-१२; लुका ११:२९-३२)
38ठिक् लेम्बा आम्टेप्मा धारमाबिधि काहिसिक्बाचि हिट्नुङ् फारिसि याप्मिचिङा येसु ओलोडुए, “काहिसिक्बा, ठिक् चिन्ना याप्मिनिमेट्टा, आन्याँ पुयुम्टुम्मा॥”#मात्ति १६:१; मारकुस ८:११
39येसुङा हिट्नागा लोडुचे, “ओभेन्गा लोक् आबिस्वासि याप्मिचिङा डोङ् ठोङ्डिना चिन्ना पुमा ओकोन्गा॥ टरो ना टालाङिगा याप्मिचिङा माङ्काटा योनाङाना चिन्ना नुङ् आरु खोना चिन्ना चा निमा ओटोगुन्ना॥#मात्ति १६:४; मारकुस ८:१२ 40पोङ्भोने खोड्डे पारिक् योना ठेना ङासाङाना ओमाभोक् भिट्रा सुम्बोक् लेम्बा हिट्नुङ् सुम्बोक् युसा सोम्मा युङे, हिड्डे डोक् याप्मि छा चा उहुम्पा भिट्रा सुम्बोक् लेम्बा हिट्नुङ् युसा लियुक्॥#योना १:१७ 41न्याए चोक्माना लेम्बा निनाबे खालाङ्गाङिगा याप्मिचि ना टालाङिगा याप्मिचि बिरुद्दाङि छोक्सिङा ओकोब्युक्, पोङ्भोने योनाङा पारचार चोगुना ओखेम्सुङ् हिट्निगा याप्मिचिङा उन्चि पापलाम्मा काएल्-काबु उलिसे॥ टरो पुयानुम्, योना नुङ्ना चा ठेना नाहि ठिबाङ् वाहेट्॥#योना ३:५ 42न्याए चोक्माना लेम्बा पारघान्ङिना सेबा देसङिना हाङ्माङा ना टालाङिगा याप्मिचिगा बिरुद्दाङि फाट्टुर लाबुचिचि, पोङ्भोने ना मेन्झेमा लाप्माङ् देसलाम्मा जोम् ठोना लिसाना सोलोमान हाङ्बाङाना रिङ् खेम्सिङा टाइसाना॥ टरो पुयानुम्, नाहि सोलोमान नुङ्ना चा ठेना ठिबाङ् वाहेट्॥#१ हाङ् १०:१-१०; २ इतिहास ९:१-१२
ओचाफेन्ना रिमेट् बारे
(लुका ११:२४-२६)
43“जब कोइ याप्मिलाम्मा ओचाफेन्ना रिमेट् होन्युखाट्युङ् हिट्ना युङ्मा लोङ्सा खेरेङ्ना डेन् कोन्सिङा खाॽयुक्, टरो हिट्नाङा खोनाइ चा टुबुन्ना॥ 44हिट्नुङ् हिट्नाङा माट्टुटु, ‘पाइले नाडुङ्ढाङ्ना पाङ्ङि डोक् नोक्ङा खाट्नाँ॥’ जब हिट्ना नोक्युखाट्नाँ हिट्नाँ हिट्ना पाङ् खालि, ओफेगुङ् वाहिलेङ् ओचोगुङ् साजाँ ओचोगुना टुबुटु॥ 45नाड्डेना निसुङ् हिट्ना खाट्युङ् आरु सि टेप्मा उन् नुङ्ना चा जोम् ओचाफेन्गा रिमेट्चि छेम्डुचिउङ् टाडुचिचि हिट्नुङ् हिट्नागा सोब्बे हिट्ना याप्मिङि उलिक्युङ् उयुङ्युक्॥ हिट्नुङ् हिट्ना याप्मिङाना याङ्छामा आसेन्ना नुङ्ना चा आड्डिक् जोम् ओचाफेन्ना लियुक्॥ ना ओभेन्गा टालाङिगा याप्मिचिगा याङ्छामा चा हिड्डेना डोक् लियुक्॥”
येसु उमा लोक् उन्झाचि
(मारकुस ३:३१-३५; लुका ८:१९-२१)
46येसु याप्मिचिगा खिमेयाङ्मेलोक् चेक्टेट्टाना बेला, उमा लोक् उन्झाचि उन् टुब्सिङा ओटाए, हिट्नुङ् उन्लोक् मुन्डुब्माउङ्सा भारा ओहाङ्सुङ् उयुङे॥ 47हिट्नुङ् ठिबाङ्ङा येसु लोडुए, “काहिसिक्बा, कामा लोक् कान्झाचि खान् टुब्सिङा ओटाइसे, हिट्नुङ् खान्लोक् मुन्डुब्मालोङ्सा भारा माहाङ्येट्॥”
48टरो येसुङा हिट्ना खाबोर कालोबा याप्मि लोडुए, “आङागा आमा लोक् आन्झाचि साइगा?” 49हिट्नुङ् चेलाचि छोक्टुचिउङ् लोडुचे, “आङागा आमा लोक् आन्झाचि नागा डोक्, 50पोङ्भोने टोनालोक्ङि युङ्ना पाबाङाना उनिङ्ग्वा गाड्डे काचोक्बाचि डोक् आङागा आम्भु-आन्झाचि, आनो-आन्झाचि लोक् मामा उलियुक्॥”
Currently Selected:
मात्ति 12: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
