लुका 23
23
येसु पिलातास सोरि
(मात्ति २७:१-२,११-१४; मारकुस १५:१-५; युहान्ना १८:२८-३८)
1हिट्नुङ् काचाहारि-कुन्डालङिगा ख्वाप्पा याप्मिचि ओकोबे हिट्नुङ् येसु रोमि हाकिम पिलातासङि ओखाट्टुए॥ 2हिट्नुङ् हिट्नागाँ पिलातास सोरि नाड्डे पिक्सा येसु फाट्टुर लाब्मा ठालाँ ओचोगुए, “ना याप्मिङा ‘आङा खिरिस्ट, ठिबाङ् हाङ्बा पिक्ना’ हिट्नुङ् ‘रोमि सारकारलोङ्सा तिरो हुङ्मा कोन्निना’ पिक्सा आनि देसङिगा याप्मिचि बान्डुएट्टुचिगा आन्याँ टुबुमे॥”
3हिट्नुङ् ना रिङ् खेम्सुङ् रोमि डाङ्बा पिलातासङा येसु सिलाप्टुए, “पाक् खान् याहुदि याप्मिचिगा हाङ्बा इ?”
येसुङा लोडुए, “आए, खान्ङा आमाट्टु गाड्डे, आङा याहुदि याप्मिचिगा हाङ्बा डोक् ए॥”
4पिलातास ठेना हाकिमङा गाडुवाडाङ्बाचि हिट्नुङ् हिट्नि उछुमागा याप्मिचि लोडुचे, “आङा ना याप्मि फाट्टुर लाहाब् चोक्माना ठिक् रिङ् चा टुब्नेट्निङ्॥”
5टरो हिट्नागा नाड्डे पिक्सा टुक्लोक् ओराट्टे, “ना याप्मिङा गालिल छेट्रालाम्मा उटुम् चोगुङ् नेहि यरुसलेम सोम्मा ख्वाप्पा याहुदिया छेट्राङिगा याप्मिचिङि उरिङ् हिसिक्टुचिउङ् याप्मिचि मुसिप्पा चाट्टुएट्टुचि॥”
येसु हेरोद हाङ्बा सोरि ओखाट्टुना
6ना रिङ् पिलातासङा खेम्सुङ्, “पाक् ना गालिलि छेट्राङिना याप्मि गोलो?” पिक्सा सिलाप्टुचे॥
7हिट्नुङ् पिलातासङा येसु गालिल छेट्राङि हेरोद एन्टिपास हाङ्बाङा सासान् चोगुना डेन्ङिना नुङ् ठाहा टोगुङ् हेरोद हाङ्बाङि येसु खाट्टानुम् पिक्सा याप्मिचि लोडुचे॥ हिट्ना बेला हेरोद हाङ्बा यरुसलेम खालाङ्गाङि डोक् वासेट्टाना॥
8हेरोद हाङ्बाङा येसु निसुङ् आड्डिक् ओचाप् टाए, पोङ्भोने ना हाङ्बाङा येसुङाना बारेङि खेम्सुएसुना॥ हिट्नुङ् याप्मा बेलालाम्मा येसु टुब्माना निङ्ग्वा चोगुएसुना हिट्नुङ् येसुङा डोङ् ठोङ्डिना टोॽवा चोगुना पुमा टोगुङ्टुङ्नि नुङ् आसा चोगुङ् युङेसाना॥ 9हेरोद हाङ्बाङा आम्टेप्मा रिङ्चि येसु सिलाप्टुए, टरो येसुङा ठिक् रिङ्ङाना उत्तार चा पिडुवाट्टुन्॥ 10हिट्नि गाडुवाडाङ्बाचि हिट्नुङ् धारमाबिधि काहिसिक्बाचि चा ओवासेट्टागा॥ हिट्नागा ओकोबाउङ् निङ्ग्वाङि टाना टेप्मा सोब्बे रिङ्चि माट्सा येसु फाट्टुर लाहाब् चोक्मा ठालाँ ओचोगुए॥ 11हेरोद हिट्नुङ् उटिलिङ्गाचिङा येसु खिजेक्पा चाट्सा ओचाफेन्मा चाट्ला ओमेट्टुए॥ हिट्नुङ्ना येसुलोङ्सा हाङ्बाङा वाडुना गाड्डेना लोट्निङ् ओमेट्टुङ् पिलातासङि डोक् ओनोक्टुए॥ 12हिट्ना बेलालाम्मा डोक् पिलातास हिट्नुङ् हेरोद हाङ्बा ओसाइबा ओसाइबा लिसाचे॥ पोङ्भोने पाइला नागाचि टोङ्चेट्चिन्गा डागा॥
येसु सेप्माना रिङ्
(मात्ति २७:१५-२६; मारकुस १५:६-१५; युहान्ना १८:३९–१९:१६)
13हिट्नुङ् पिलातासङा गाडुवाडाङ्बाचि, याहुदिचिगा ओठेडोङ्चि हिट्नुङ् आरु याहुदि याप्मिचि छेम्मा पाङ्सुचे, 14हिट्नुङ् हिट्नागा ओटायाउङ् पिलातासङा लोडुचे, “खानिङा ना याप्मिङा याप्मिचि बान्डुचे पिक्सा फाट्टुर आलाबुमुङ् आङि आप्टुम्ना डाना॥ आङा खानि सोब्बे सोरि डोक् ना याप्मि सिलाप्टुङे, टरो खानिङा आमाट्टुम् गाड्डे फाट्टुर लाब्माना रिङ् उन्ङि आङा पाक्चा टुब्नेट्निङ्॥ 15हिट्नुङ् हेरोद हाङ्बाङा चा पाक्चा ओचाफेन्लोक् टुबुवाट्टुन् नुङ् उन्ङा आनिलेङ् डोक् पाङ्सुडेसुए॥ नाहि खेम्सानुम्, ना याप्मिङा सेप्मा कोन्ना ओचाफेन्मा टोॽवा पाक्चा चोगुन्गेट्टुन्ना॥ 16हिड्डेउङ् आङा ना याप्मि साजाए एडोक् पिडुङ्टुङ् हिट्नुङ् लेडुङ्डिसुङ्टुङ्॥” 17[याहुदिचिगा छुट्कारा चाडा बेला ठिबाङ् खाम्बाङ्ङि ठायाना याप्मि सारकारङा लेप्माना चालान् डाना॥]#२३:१७जोम् सोरोत बाइबलङि ना पोद वाइना॥
18टरो सोब्बे याप्मिचि ठिक्ए उलिसाउङ् ओराट्टे, “ना याप्मिम्बाक् सेप्मा डोक् कोन्युक्, हिट्नुङ् आन्याँ लोङ्सा बारब्बा याप्मिलेडाबिडा॥” 19बाराब्बाम्बाक् यरुसलेम खालाङ्गाङिना सारकार बिरुद्दाङि कोबाना हिट्नुङ् याप्मिचि सेडुचिगा रिङ्ङि खाम्बाङ्ङि ओछाक्टुएसुना॥
20पिलातासङा येसु लेप्माना निङ्ग्वा चोगुना रिङ् फेरि हिट्नागा सोरि माट्टुए॥ 21टरो हिट्नागा सोब्बे नाड्डे पिक्सा टुक्लोक् ओराट्टे, “ना याप्मि खाप्चेङि छुमा कोन्युक्, छुमा कोन्युक्॥”
22सुम्बोक् खेप् फेरि पिलातासङा हिट्नागा लोडुचे, “पोङ्? ना याप्मिङा पाक्चा ओचाफेन्ना टोॽवा चोगुन्गेट्टुन्ना॥ आङाउम्टे ना याप्मि सेप्मा डोक् कोन्ना रिङ् पाक्चा टुब्नेट्निङ्॥ आङा लेम्मामेट्टुङ्चिउङ् हिट्ना लेडुङ्डिसुङ्टुङ्॥”
23टरो हिट्नागा “ना याप्मि खाप्चेङि छुमा कोन्युक्” पिक्सा ओराट्टागा ओराट्टागा डोक् ओचोगे, 24हिड्डेउङ् पिलातासङा येसुम्बाक् हिट्नागाँ ओमाट्टु गाड्डे चोक्मा लोङ्सा लोडुचे॥ 25पिलातासङा याप्मि कासेट् हिट्नुङ् सारकार बिरुद्दाङि चेक्टाउङ् खाम्बाङ्ङि ठायाना बारब्बा ओलोडुना याप्मिम्बाक् लेडानुम् पिक्सा लोडुचे, हिट्नुङ् येसुम्बाक् उन्चि निङ्ग्वा गाड्डे डोक् ओचोग्वाक् नुङ् हिट्नागा उन्चि मुक्ङि पिडुचे॥
येसु खाप्चेङि उछुडुना
(मात्ति २७:३२-४४; मारकुस १५:२१-३२; युहान्ना १९:१७-२७)
26टिलिङ्गाचिङा येसु हिट्नालाम्मा ओखाट्टुगेट्टुना बेला लाम्बोङि कुरेनि ओलोडुना डेन्ङिना सिमोन ओलोडुना याप्मि उटुबुए॥ हिट्ना उन् युङाना युक्ताम्लाम्मा यरुसलेम खालाङ्गालेङ् आबागेट्टाना उटुबुए॥ हिट्नुङ् टिलिङ्गाचिङा ओलाबुङ् येसुङाना खाप्चे खुमा ओमेट्टुङ् येसु ओएङ्-ओएङ् लाम्टिमा ओमेट्टुए॥
27याप्मिचिगा ठेना खिमेयाङ्मे येसुङाना ओएङ् लाहाब् उलिसे, हिट्नि जोम् मेन्झेमाचि चा हाब्सा हिट्नुङ् टुखुमाङ् लोसा येसुङाना ओएङ्-ओएङ् ओखाडागेट्टागा डागा॥ 28येसु हिट्नागा मेन्झेमाचिलेङ् नोक्टाउङ् लोडुचे, “हाउ यरुसलेम खालाङ्गाङिगा मेन्झेमाचि, खानि आङालोङ्सा हाब्नेनिन्, टरो खानि आप्पे लोङ्सा हिट्नुङ् खानि छाचि लोङ्सा हाबानि॥ 29नाहि खेम्सानुम्, याप्मिचिङा ‘छाचि उलिनिगा मेन्झेमाचि लोङ्सा हिट्नुङ् ओओचि नुनु पिप्मामेट्मा ओकोन्निगा मेन्झेमाचिलोङ्सा आड्डिक् ओचेट्नुना लियुक्’ पिक्सा माप्माना बेला टायुक्॥ 30हिट्ना बेला याप्मिचिङा झोन्झोबा हिट्नुङ् चोट्चोट्गा ‘आन्याँ उठुङ्ङि ठाया’ हिट्नुङ् ‘याप्मि फुक्टा’ पिक्सा ओमाट्टुटु॥#होसे १०:८; पारकास ६:१६
31“पोङ्भोने सिङ् उभुङ्मा छेबोक् छेबोक्ना लिचा नागाँ नाड्डे ओचोगुना भोनेम्टे झान् चोबाना सिङ् उभुङ्मा खोड्डे ओचोगुटुना होला?”#२३:३१ छेबोक् छेबोक् सिङ् उभुङ्माम्बाक् फाट्टुर मेना याप्मि हिट्नुङ् चोबाडाना सिङ् उभुङ्माम्बाक् ओचाफेन्मा याप्मि ए॥ ना पोदङाना उटुप्बाक् फाट्टुर मेना याप्मिचिउङ् नाट्डे ओमेट्टुचिगा भोने, फाट्टुरङि ठायाना याप्मि लोङ्सा झेन् खोड्डे ओमेट्टुटुना होला लियुक्॥
32हिट्नागाँ इप्पाङ् कासुप्पाचि चा येसुलोक् सेप्मा लोङ्सा ओखाट्टुचे॥ 33हिट्नुङ् हिट्नागा नाम्जिङ् ओलोडुना डेन्ङि ओटासुए॥ हिट्नि येसु खाप्चेङि उछुडुए हिट्नुङ् हिट्नागाचि इप्पाङ् याङ्काखुट्चि ठिबाङ् येसुङा उछुप्टाङ्लेङ् हिट्नुङ् आरकोम्बाक् ओफेङ्साङ्लेङ् खाप्चेङि उछुडुचे॥ 34हिट्ना बेला येसु नाड्डे पिगे, “हाउ आप्पो, नागा माफ पिडुचि, पोङ्भोने नागा पाक् ओचोक्येट्गा हिट्ना ठाहा ओटोगुन्ना॥”#२३:३४ कोइ-कोइ सोरोत बाइबलङि ना पोद वाइना॥ हिट्नुङ् उपिङ्बाचिङा येसु ओलोट्लिङ् हाम्मा लोङ्सा चिट्ठा ओठेन्डुए॥#छाम्लोमा छाप्ला २२:१८ 35याप्मिचिङा येसु उपुयुएट्टुना॥ याहुदिचिगा ओठेडोङ्चिङा येसु नाड्डे पिक्सा खिजेक्पा ओचाट्टुए, “नाङा आरु याप्मिउम् हिङुचे, छेम्बा डोक् ना माङ्हाङ्ङा सेगुना खिरिस्ट भोने आप्पे लोङ्सा चा उहिङुवाक्॥”#छाम्लोमा छाप्ला २२:७
36हिट्नुङ् उपिङ्बाचि चा ओआबाउङ् सुडाना आङ्गुरङाना इङा उठुङ्मेट्टुङ् नाड्डे पिक्सा खिजेक्पा ओचाट्टुए,#छाम्लोमा छाप्ला ६९:२१ 37“खान् याहुदिचिगा हाङ्बा भोने, आप्पे लोङ्सा हिङुजो॥”
38हिट्नुङ् “ना याहुदिचिना हाङ्बा ए” नुङ् सिङ् ओफाक्लेटाङि ओछेप्टुना येसु ओटेहेक् उठुइ खाप्चेङि ओखेङ्सुएसुना॥ 39येसुलोक् खाप्चेङि उछुडुना ठिबाङ् याङ्काखुट्ङा येसु खिजेक्पा चाट्सा नाड्डे लोडुए, “पाक् खान् माङ्हाङ्ङा मासेगाना खिरिस्ट माहि? हिड्डे भोने खान् आप्पेलोङ्सा हिट्नुङ् आन्च्याँ चा याप्मिहिङाउङ् पारमान् चोगुवाक्॥”
40टरो आरकोङा हिट्ना खेमा लाप्सा लोडुए, “आनि सुम्बाङ् डोक् ठिए साजाएङि ठाइसे, हिट्नुङ्चा पाक् खान् माङ्हाङ्लोक् आकिट्निनै? 41आन्चिम् टे ओचाफेन्ना टोॽवा चोगाचुङ् हिट्ना लोङ्सा टोक्ना साजाए आङ्चुएच्चु, टरो ना याप्मिङाउम् हिड्डेना ओचाफेन्ना टोॽवा पाक्चा चोगुन्गेट्टुन्ना॥”
42हिट्नुङ् हिट्नाङा येसु लोडुए, “हाउ येसु, खान् हाङ्बा आलियुङ् सासान् आचोगुना बेला आङा याङ्मिट्टा ए॥”
43येसुङा हिट्ना लोडुए, “छेम्बा डोक् खान् लोनाँ, हाट्ले डोक् खान् आङालोक् टोनालोग्ङि आलियुक्॥”
येसुङा ओसोक्मा खाडाना
(मात्ति २७:४५-५६; मारकुस १५:३३-४१; युहान्ना १९:२८-३०)
44लेन्ना बारो बाजेलेङ् लिसेसाना॥ हिट्ना बेलाउङ्ना सुम्बोक् बेला सोम्मा देस टेप् डुम्बारिक् डुम् लिसे॥ 45नाम् ओनेट्नि हिट्नुङ् माङ्ठानाङि ओखेङ्सुएसुना पारदा इप्पोक् ओफारा लिसाउङ् उठुङ्लाम्मा उछिक् सोम्मा सेङ्से॥ 46येसुङा आड्डिक् ठेना ओसोरा चोगुङ् राट्टाउङ् पिगे, “हाउ आप्पो माङ्हाङ्, आसोक्मा कामुक्ङि पिनाँ॥” हिट्नुङ् हिड्डे माट्टुङ् येसुङाना ओसोक्मा खाडे॥#छाम्लोमा छाप्ला ३१:५
47हिट्नुङ् रोमि उपिङ्बाचिगा काप्तानङा नाड्डे लिसाना रिङ् निसुङ् नाड्डे पिक्सा माङ्हाङ्ङाना उनिङ् चोन्डुए, “छेम्बा डोक्, नाउम् धारमोति याप्मि रैछो॥”
48हिट्नुङ् हिट्नि पुसिङा उछुमागा याप्मिचिङा नाड्डेना घाट्ना लिसाना उनिसुङ् हिट्नागा हाब्सा हिट्नुङ् सानिङ्ग्वा लोसा उन्चि पाङ्लेङ् ओनोक्टे॥ 49येसुङा उमिसेन् ओटाक्चि हिट्नुङ् गालिल छेट्रालाम्मा येसु ओएङ्-ओएङ् ओआबागा मेन्झेमाचिङा लाप्माङ् ओयेबाउङ् नागा लिसागा रिङ्चि उपुयुयाक्टुए॥#लुका ८:२-३
येसु ओहुम्पाङि उयुङ्सुना
(मात्ति २७:५७-६१; मारकुस १५:४२-४७; युहान्ना १९:३८-४२)
50-51हिट्नि याहुदिया छेट्राङिना आरिमाथिया खालाङ्गालाम्मा आबाना ठिबाङ् योसेफ ओलोडुना याप्मि डाना॥ ना याप्मि धारमोति हिट्नुङ् नुना याप्मि डाना हिट्नुङ् माङ्हाङ् उमुलुक् हाङ्सा युङासाना॥ ना योसेफ याहुदिचिगा काचाहारि-कुन्डालङिना सदस्य चा डाना॥ काचाहारि-कुन्डालङिगा याप्मिचिङा येसु सेप्मा लोङ्सा निङ्ग्वा ओचोगुनाँ ना याप्मि टेन्नेट्नि॥ 52हिट्नुङ् हिट्ना पिलातासङि खाडाउङ् येसुङाना ओयेम् हुम्मा लोङ्सा नाक्टुए॥ 53योसेफङा येसुङाना मोरो खाप्चेलाम्मा होट्टुङ् हिट्ना मोरो लोट्निङ्ङा रिगुए, हिट्नुङ् लुङ्गेॽवा ओफाडुङ् लुम्भुक् गाड्डे चोक्बालाक् ओहुम्पाङि हिट्ना मोरो युङ्सुए॥ हिट्ना उहुम्पाङि खोना मोरो चा हिट्ना नुङ्ना पाइले उयुङ्सुन्गेट्टुन्ना डाना॥ 54हिट्ना बेलाम्बाक् सुकुबार लेम्बा डाना, हिट्नुङ् युङ्माना लेम्बा उटुम् लिसालाबाना डाना॥
55हिट्नुङ् गालिल छेट्रालाम्मा येसु ओएङ्-ओएङ् रोक् ओआबागा मेन्झेमाचि चा योसेफलोक् ओखाडे, हिट्नुङ् हिट्नागाँ ओहुम्पाङि मोरो उयुङ्सुना उपुयुए॥ 56हिट्नुङ्ना हिट्नागा उन्चि उयुङागा डेन्लेङ् ओनोक्टाउङ् येसुङाना ओयेम्ङि नेक्मा लोङ्सा बुङ्बुङ् नाम्ना धुपा हिट्नुङ् क्या टेयार ओचोगुए॥ टरो हान्डेङ् गाड्डे युङ्माना लेम्बा लिसानाँ हिट्नागा याहुदिचिगा धारमाबिधिङा माट्टु गाड्डे आराम ओचोगे॥#पारस्थान २०:१०; धारमाबिधि ५:१४
Currently Selected:
लुका 23: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
