मुलिचेला टोॽवा 12
12
हेरोद हाङ्बालाम्मा याङ्छामा
1हिट्ना बेला हेरोद आग्रिपास#१२:१ आग्रिपास हेरोद एन्टिपासङाना ओनाक्पा हिट्नुङ् हेरोद माहानङाना ओयाङ्मेन् डाना॥ हाङ्ङा माङ्पाङ्ङिगा आम्टेप्मा बिस्वासिचि लाबुचिउङ् आसाक्का याङ्छामा चाट्मा ठालाँ चोगुचे॥ 2हिट्नाँ युहान्नाङा उम्भु याकुब चा चेप्साङा सेप्मा मेट्टुचे॥ 3हिट्नुङ् हिट्नाँ हिड्डे चोगुनाँ याहुदि याप्मिचि हारका उलिसागा निसुए, हिट्डेउङ् पाटरुस चा लाबुए॥ (ना घाट्ना खामिर मिठेन्ने चोक्बालाक् चालेपाङाना चाडा बेला लिसाना॥) 4हेरोदङा पाटरुस लाप्मा मेट्टुचिउङ् खाम्बाङ्ङि छाक्टुए॥ हिट्नुङ् टेम्बोक् ठोङ्ङि टेम्बोक्-टेम्बोक् टिलिङ्गाचि चोगुचिउङ् लेम्बासेम्बा कोमेट्टुचे॥ हिट्नुङ् हेरोदङा याहुदि छुट्कारा चाडा लाट्युङ् पाटरुस याहुदि याप्मिचि टोकानाङि आप्टुङ् न्याए चोक्माना निङ्ग्वा चोगुएसुना॥#पारस्थान १२:१-२७
5टरो पाटरुस खाम्बाङ्ङि ठायाना बेला माङ्पाङ्ङिगाँ उन्लाउङ्सा सोरोक् माङ्हाङ्ङि बिन्टि उठाङ्सुयाक्टुए॥
पाटरुस खाम्बाङ्लाम्मा होन्डाना
6हेरोद हाङ्बाङा याप्मिचिगा टोकानाङि जाँच चोक्मा पाटरुस आप्माना आउसाना युसा इप्पाङ् टिलिङ्गाचिगा माझाङि पाटरुस इम्सेसाना॥ उमुक्चि इप्पोक् धाउङाना साङ्लाङा ओरेक्टुएसुना हिट्नुङ् खाम्बाङ्ङाना ढुवारिक् चा टिलिङ्गाचिङा ओकोडुएट्टुना॥ 7हिट्ना बेला डोक् हिट्नि टाङ्बाङाना ठिबाङ् माङ्हाङ् रिङ् काउग्बा ठेट्टे हिट्नुङ् खाम्बाङ्ङिना कोठा व्हाङ् लिसे॥ हिट्नुङ् माङ्हाङ् रिङ् काउग्बाङा पाटरुस ओफाक्टाङ्ङि खोट्टुङ् वान्सा चेन्डुए, हिट्नुङ् “एला कोबा,” पिक्सा फोगुए॥ हिट्ना बेला डोक् पाटरुसङाना उमुक्ङि रेक्बालाक् धाउङाना साङ्लाचि ओफेन्डाउङ् ओठाए॥
8माङ्हाङ् रिङ् काउग्बाङा पाटरुस लोडुए, “फोॽइ रेक्टु हिट्नुङ् लाङ्सुप् वाडु॥” पाटरुस हिट्डेडोक् चोगे हिट्नुङ् माङ्हाङ् रिङ् काउग्बाङा लोडुए, “टाखुम्बि हुम्सुङ् आएङ् आएङ् आबा॥” 9हिट्डेउङ् पाटरुस चा माङ्हाङ् रिङ् काउग्बा ओएङ्-ओएङ् लाम्टिसा खाम्बाङ्लाम्मा भारा होन्डे॥ ना रिङ् माङ्हाङ् रिङ् काउग्बाङा सेम्माङ्ङि इ याक्ठुङ्ङि चोगुना उन्ङा पाक्चा ठाहा टोक्मा हिडुवाट्टुन्॥ उन्ङाम्टे निमापुमा गोलो निसुएटुङ्ना रैछो पिक्सा मिट्टे॥ 10हिट्डेउङ् हिट्नागाचि टिलिङ्गाचिङा ओकोडुना इप्पोक् डेन्लाम्मा लिसाचिउङ् खालाङ्गाङि लिग्माना धाउङाना ढुवारिक्ङि टासाचुए॥ हिट्ना ढुवारिक् उन्चि लोङ्सा आप्पे ओङ्से हिट्नुङ् इप्पाङ् डोक् भारा होन्डाचे॥ हिट्नागाचि ठिक् छुपारिक्ना लाम्बो लिसा खाडागेट्चिना बेला डोक् माङ्हाङ् रिङ् काउग्बा मासाडे॥
11जब पाटरुसङाना ओचेट् टाए हिट्नुङ् माट्टुए, “हाट्ले आङा ठाहा टोगुङे ना रिङ् छेम्बा डोक् रैछो॥ टाङ्बाङा उरिङ् काउग्बा पाङ्सुङ् हेरोद हाङ्बाङा उमुक्लाम्मा हिट्नुङ् याहुदि ओठेडोङ्चिङा ओचाफेन्ना चोक्मा निङ्ग्वा ओचोगुना ख्वाप्पा टोॽवालाम्मा आङा छुट्कारा याङ्पिडे॥”
12ना रिङ् पाटरुसङा ठाहा टोगुङ्, उन् मारकुस ओलोडुना युहान्ना उमा मारियाम ओपाङ्ङि खाडे॥ मारियाम ओपाङ्ङि जोम् बिस्वासिचि उछुमाउङ् बिन्टि ओचोगेट्टागा॥ 13पाटरुसङा ढुवारिक् भारालाम्मा निप्टुए हिट्नुङ् रोदा ओलोडुना चाकारनि ढुवारिक् ओङ्सिङा आबे॥ 14हिट्नाँ पाटरुसङाना ओसोरा मिसेन् निसुए हिट्नुङ् ओचाप् टायाउङ् ढुवारिक् मिओङ्ङे भिट्रा पिन्सा खाडे, हिट्नुङ् “पाटरुस भारा आबाउङ् ढुवारिक्ङि येबैसे” पिक्सा लोडुचे॥
15हिट्नागाँ “खान्उम्टे आङाङ्सेना रैछो” पिक्सा ओलोडुए॥ टरो हिट्नाँ ना रिङ् “छेम्बा डोक् ए” पिक्सा लोडुचिगा लोडुचिगा चोगुचे॥ हिट्नुङ् हिट्नागाँ उन् ओलोडुए, “हिट्नाउम्टे पाटरुसङाना माङ्हाङ् रिङ् काउग्बा होला॥”
16टरो पाटरुसङा ढुवारिक् निप्टुना निम्टुना डोक् चोगुए॥ हिट्नुङ् हिट्नागा ओखाडाउङ् ढुवारिक् ओङ्सुए, हिट्नुङ् उन् डोक् उनिसुनाँ उन्चि डोङ् ओठोङ्डे॥ 17पाटरुसङा “स्वाग् युङानि” पिक्सा हिट्नागा उमुक्ङा इसारा चोगुचे, हिट्नुङ् खोड्डे पारिक् माङ्हाङ्ङा उन् खाम्बाङ्लाम्मा भारा होट्टुएना हिट्ना रिङ् लोडुचे॥ हिट्नुङ् ना रिङ् आनि ओठेडोङ् याकुब हिट्नुङ् आरु भुम्भु-झान्झाचि चा लोडानुम्चिम् पिक्सा उन् हिट्नालाम्मा आरको डेन्ङि खाडालेट्टे॥
18हिट्नुङ् हान्डेङ् भ्यानिक् “पाटरुस पाक् गोलो लिसेना” पिक्सा खाम्बाङ् काकोबा टिलिङ्गाचिङि ठेना खालाङ्बालाङ् लिसे॥ 19हेरोदङा पाटरुस कोम्मा मेट्टुचे, टरो पाटरुस उटुबुवाट्टुन्॥ हिट्डेउङ् हेरोदङा खाम्बाङ् काकोबा टिलिङ्गाचि सिलाप्टुचिनाँ हिट्नागाँ पाक्चा लोमा उहिडुवाट्टुन्, हिट्नुङ् हिट्नागा सेप्मा मेट्टुचे॥ हिट्नुङ् हेरोद याहुदिया नाडुङ् कैसारिया खालाङ्गाङि खाडे हिट्नुङ् हिट्नि डोक् युङे॥
हेरोद हाङ्बा सियाना
20हिट्ना बेला हेरोद हाङ्बाङाना टुरोस हिट्नुङ् सिदोन खालाङ्गाङिगा याप्मिचिलोक् आड्डिक् ओरेक् काडैसाना॥ हिड्डेउङ् हिट्ना इप्पोक् खालाङ्गाङिगा याप्मिचि ठिक्ए उलिसाउङ् हेरोद हाङ्बा टुब्सिङा ओखाडे, पोङ्भोने ख्वाप्पा चामा-ठुङ्मागा थोक्चि ओदेसलाम्मा हिट्नागाँ ओखाट्टुगा डागा॥ हिट्नुङ् हिट्नागाँ हेरोद हाङ्बाङाना आप्पे ओटोॽवा काचोक्बा बालास्तास ओलोडुना याप्मि उटुबुङ् हाङ्बालोक् टोङ्माना रिङ्पान् ओचोगे॥
21जब हेरोद हाङ्लोक् टुब्माना बेला लिसे, हिट्नुङ् हिट्ना हेरोदङा हाङ्ङाना लोट्लिङ् वाडुङ् उन् सिङासान्ङि युङाउङ् याप्मिचि साम्बोदान् चोगुचे॥ 22हिट्नुङ् याप्मिचिङा “ना काचेक् साम्माङ् ए, याप्मिम्बाक् माखाक्” पिक्सा हाङ्बाङाना उनिङ् ओचोन्डुबिडुए॥ 23हिट्ना बेला डोक् टाङ्बाङाना माङ्हाङ् रिङ् काउग्बाङा हेरोद हाङ्बा आसाक्का ओयेम् टुग्लोक् चोगुए, पोङ्भोने उन्ङा माङ्हाङ् उनिङ् चोन्डुव्ट्टुन्॥ हिट्नुङ् उन् फेबा ठायाउङ् सिए॥
24टरो माङ्हाङ्ङाना रिङ् सोरोक् छिन्सा हिट्नुङ् पोसा खाडे॥
25बारनाबास हिट्नुङ् सावालङा चोक्माना टोॽवा पुरो चोगाचुङ् यरुसलेमलाम्मा एन्टिओखिया खालाङ्गाङि नोक्टा आबाचे॥ उन्चिलोक् मारकुस ओलोडुना युहान्ना चा नोक्टा आप्टाचुए॥
Currently Selected:
मुलिचेला टोॽवा 12: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
