मुलिचेला टोॽवा 11
11
पाटरुस यरुसलेमङिना माङ्पाङ्ङि
1याहुदियाङि उलिसागा मुलिचेलाचि हिट्नुङ् आरु बिस्वासिचिङा पानिछोङ्बाचिङा चा माङ्हाङ्ङाना रिङ् ओलाडुए नुङ् ओखेम्सुए॥ 2जब पाटरुस यरुसलेम नोक्टा खाडानाँ याहुदि बिस्वासिचिङा फाट्टुर ओलाबुए, 3नाड्डे पिक्सा ओलोडुए “खान् पानिछोङ्बा याप्मिचिलोक् आयुङे हिट्नुङ् हिट्नागालोक् आचोए॥”
4हिड्डेउङ् पाटरुसङा पाक् पाक् घाट्ना लिसेना हिट्नागा सोब्बे रिङ्चि खेम्मेप्मा ठालाँ चोगुचे, 5“आङा योप्पा खालाङ्गाङि बिन्टि चोगेटाङ्ना बेला आठोना डोक् मासे हिट्नुङ् ठिक् निमापुमा निसुङे॥ आङा टाङ्साङ्लाम्मा ठेना टाखुम्बि गाड्डेना टेम्बोक् ओफेरोङि रेक्बालाक् आङा सोरि ठाया उङ्साना निसुङे॥ 6हिट्ना भिट्रा नुलोक् पुयुङ्नाँ हिट्नि पाङ्ङि ओम्डुम्चिम्गा जिवाट्चि, जाङ्गालि जिवाट्चि लोक् माभोक्ङा सोट्सा ओलाम्टिगा जिवाट्चि हिट्नुङ् टाङ्साङ्ङिगा नुवाचि उलिसागा आङा निसुङे॥ 7हिट्नुङ् नाड्डे मुक्टाना आङा खेम्सुङे, ‘हाउ पाटरुस, कोबा हिट्नुङ् हिट्नागा सेडुचिउङ् चोचि॥’
8“टरो आङा लोडुङे, ‘माखाक् टाङ्बा, नाड्डेगाम्टे आङा चानिङ्गा॥ हाट्ले सोम्मा चामा लिनिगा हिट्नुङ् आसुद्दो थोक्चि आङा काइले चा चानिङ्गेट्निङ्गा॥’
9“फेरि टाङ्साङ्लाम्मा नाड्डे मुक्टाना खेम्सुङे, ‘माङ्हाङ्ङा सेङ्सेङ् चोगुगा चामागा थोक्चि खान्ङा आसुद्दो माट्टुन्॥’ 10नाड्डेना घाट्ना सुम्बोक् खेप् सोम्मा लिसे हिट्नुङ् सोब्बे थोक् फेरि टो टाङ्साङ्लेङ् डोक् फोगाडे॥ 11हिट्ना बेला डोक् कैसारियालाम्मा ओपाङ्सुचिगा सुम्बाङ् याप्मिचि आङा युङाङ्ना पाङ्ङि ओटाए॥ 12पानिछोङ्बाचि उलि चा साङ्का मिचोक्ङे हिट्नागालोक् खाडा पिक्सा सेङ्सेङ्ना हाङ्साङा चा याङ्लोडे॥ आङालोक् ओवासेट्टागा ङा टेप्मा बिस्वासिचि चा एक्केउ कारनालियासङा ओपाङ्ङि आङालोक् ओखाडे॥ 13उन्ङा चा ठिबाङ् माङ्हाङ् रिङ् काउग्बा ओपाङ्ङि टायाउङ् उन् नाड्डे लोडुना रिङ् आन्याँ याप्मिलोडे, ‘हाट्ले योप्पा खालाङ्गाङि सिमोन ओलोडुना याप्मि छेम्मा याप्मिचि पाङ्सुचि, उन् पाटरुस चा ओलोडुना॥ 14उन्ङा खान् नुना खाबोर माखेम्मेट्युक्, हिट्नालाम्मा खान् लोक् ख्वाप्पा कापाङ्ङिगा याप्मिचिङा मुक्टि ओटोगुटु॥’
15“जब आङा चेक्मा ठालाँ चोगुङे, टब सेङ्सेङ्ना हाङ्सा पाइले आनि उठुङ्ङि टाया गाड्डे डोक् उन्चि उठुङ्ङि चा ठाए॥ 16हिट्नुङ् आङा येसु डाङ्बाङा माट्टुना रिङ् मिट्टुङे, ‘युहान्ना बाप्टिस्मा कापिबाङा चुवाङा बाप्टिस्मा पिडुचे, टरो खानिम्बाक् सेङ्सेङ्ना हाङ्साङा बाप्टिस्मा आलिसिटि॥’#मुलिचेला टोॽवा १:५ 17आन्याँ टाङ्बा येसु खिरिस्टङि बिस्वास चोगुमे हिट्नुङ् माङ्हाङ्लाम्मा सेङ्सेङ्ना हाङ्सा टोगुमे॥ हिट्डेडोक् पानिछोङ्बाचिङा चा उन्ङि बिस्वास ओचोगुए हिट्नुङ् उन्ङा डोक् सेङ्सेङ्ना हाङ्सा पिडुचे॥ हाट्ले माङ्हाङ्ङा डोक् सेङ्सेङ्ना हाङ्सा हिट्नागा पिडुचिचि भोने, आङा उन् खोड्डेउङ् छाक्मा हिडुङ्टुङ्ना टे?”
18जब याहुदि बिस्वासिचिङा ना रिङ् ओखेम्सुए हिट्नुङ् पाटरुसलोक् बादबिबाद चोक्मा ओनाडुङ् नाड्डे पिक्सा माङ्हाङ्ङाना उनिङ् चोम्मा ठालाँ ओचोगुए, “हाट्लेम्टे माङ्हाङ्ङा पानिछोङ्बाचि चा उन्चि पापलाम्मा काएल्-काबु लिमाना हिट्नुङ् लाट्निना चोला टुब्माना लाम्बो पिडुचेगा रैछौ॥”
एन्टिओखिया खालाङ्गाङिना माङ्पाङ्
19इस्तिफानास ओसेडुङ् बिस्वासिचिङा यरुसलेमङि याङ्छामा ओटोगुङ् हिट्नालाम्मा सोब्बेलेङ् चेम्बेलेङ् उछिन्डे॥ कोइम्बाक् फोनिके छेट्रालेङ् ओटासुए, कोइ साइपारस चोप्चोपोलेङ्, हिट्नुङ् आम्टेप्मा एन्टिओखिया खालाङ्गा सोम्मा चा ओटासुए॥ टरो हिट्नागाँ याहुदिचि एडोक् नुना खाबोर पारचार ओचोगुचे॥#मुलिचेला टोॽवा ८:१-४ 20हिट्नागा माड्डे आम्टेप्मा साइपारस हिट्नुङ् कुरेनि देसलाम्मा ओआबागा बिस्वासिचि ओडागा॥ हिट्नागा एन्टिओखियाङि ओखाडाउङ् पानिछोङ्बाचि चा येसु डाङ्बाङाना बारेङि नुना खाबोर पारचार ओचोगुए॥ 21टाङ्बाङाना बोल् हिट्नागालोक् डाना, हिट्नुङ् जोम् याप्मिचिङा बिस्वास ओचोगुङ् येसु डाङ्बालेङ् ओनोक्टे॥
22ना खाबोर यरुसलेमङिना माङ्पाङ्ङिगा बिस्वासिचिङा चा ओखेम्सुए हिट्नुङ् हिट्नागाँ बारनाबास एन्टिओखियाङि ओपाङ्सुए॥ 23बारनाबास एन्टिओखियाङि टासुनाँ माङ्हाङ्ङा हिट्निगा याप्मिचि दाया चोगुचिगा निसुङ् उन्ङाना आड्डिक् डोक् ओचाप् टाए॥ हिट्नुङ् उन्ङा “खानि निङ्ग्वालाम्मा डोक् टाङ्बाङि बिस्वासि लिसायाक्टानि” पिक्सा हिट्नागा आँट् पिडुचे॥ 24बारनाबास आड्डिक् निङ्ग्वा नुना, सेङ्सेङ्ना हाङ्साङा इप्टुना हिट्नुङ् बिस्वासङि बोल्लेउ याप्मि डाना॥ उन्ङा चोगुना टोॽवा उनिसुङ् जोम् याप्मिचिङा टाङ्बाङि बिस्वास ओचोगुए॥
25टब बारनाबास सावाल कोन्सिङा टारसास खालाङ्गालेङ् खाडे॥ 26उन्ङा सावाल टारसासङि टुबुङ् एन्टिओखिया खालाङ्गाङि आप्टुए॥ हिट्नुङ् इप्पाङ्ङा डोक् ठिक् बारखा टेप् एन्टिओखिया माङ्पाङ्ङिगा यापमिचिलोक् साङ्गातिङि उटुबायाक्टे, हिट्नुङ् जोम् याप्मिचि हिसिक्टाचुए॥ (एन्टिओखियाङि डोक् पाइलेना खेप् बिस्वासिचि खिरिस्टियानचि ओलोडुचे॥)
27हिट्ना बेला आम्टेप्मा माङ्काटाचि यरुसलेमलाम्मा एन्टिओखियाङि ओटाए॥ 28हिट्नागा माड्डे ठिबाङ् आगाबास ओलोडुना याप्मि कोबाउङ् ख्वाप्पा नाराङि ठेना आनिकाल ठाना बारेङि सेङ्सेङ्ना हाङ्साङा लोडुना रिङ् माट्टुए॥ (ना आनिकाल क्लौडियास ओलोडुना हाङ्बाङा सासान् चोगुना बेला लिसे॥)#मुलिचेला टोॽवा २१:१० 29ना रिङ् ओखेम्सुङ् एन्टिओखियाङिगा बिस्वासिचिङा याहुदिया छेट्राङि उलिसागा भुम्भु-झान्झाचिलोङ्सा उन्चि जेथाङा उहिडुलोक् भेटि पाङ्माचिउङ् घुवार फामाचिगा निङ्ग्वा ओचोगुए॥ 30हिट्डेउङ् हिट्नागाँ आम्टेप्मा ओफाबा ओफोगुए, हिट्नुङ् बारनाबास लोक् सावाल उमुक्ङि हिट्ना भेटि यरुसलेमङिना माङ्पाङ्ङिगा ओठेडोङ्चिङि ओहाङ्सुए॥
Currently Selected:
मुलिचेला टोॽवा 11: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
