Marg 14

Ka-cay Jubɨn̰əŋ saɗɨge kɨbɨge pɨna gɨ ni dɨɗe Jesu

(Matɨyo 26:1-5; Lug 22:1-2; Ja̰ 11:47,49,53)

1Wɔlɛ gɨ ni leen̰ kɨdɨrɛ gɨ kan teeyige Pakɨ dan̰ kɨɗɨrɛ gɨ ni leen̰ mapa gɨ kan laage dan̰ subugu naŋ baa mɨnde. Wɔlɛ sɔɔ tumoy wɔlɛ gɨ nee le na, ka-cay ka-bɔgɛ kɨbar dan̰ ka-gɨlɨn̰ kalaŋ gasɨn̰-kɔl gɨ da Moyis, malge gɨyəŋ gɨ ni ƴomɨn̰ Jesu dan̰ jɨba bɨ dɨɗii. 2Kɨya wa kan yen̰ge gusɨge hɨn̰: «Na ƴomiigɨŋ cay wɔlɛ gɨ ni kɨdɨrɛ gɨŋ naŋ, kɨya wa gajanaŋ do̰ gɨ da bɔɔ duroy kalaŋ.»

Tama di pɨna wo̰ bee ɨdɨr cay Jesu

(Matɨyo 26:6-13; Ja̰ 12:1-8; Lug 7:36-38)

3Jesu som a da Simo gɨ naa na ba-mada a cay gulɔŋ gɨ Betani gɨŋ, kɨɗɨn̰ ga kan somge kɨbɨ hɨnga ga ni dɔɔ gaŋ na, tama di pɨna wo̰ andaŋ toyge dan̰ karɨn̰ kumbulu ga kan leege dan̰ garma gɨ teege albatɨr, gɨ ɨdɨr gɨ kɨledi osu tɔgɨ wanɨn̰ nee. Hɨndi ɓol kɨbɨ kumbulu le bɨ, tɨdɨrde ɨdɨr le a cay Jesu. 4Ama kalaŋ ga pɨna ga somge nee kuduroyge homge, lee gɨ yen̰ge gusɨge kɔl duroyge hɨn̰: «Ɗarway na wa ma hɨndi bee ɨdɨr gɨ kɛ le coŋ wo̰ ga?» 5Hɨn̰ gɨ tumɔ kan ni na kɨl ɨdɨr gɨ nee le coŋ na, kan ni kɨya wɔɔ gursu di ɓal cay kobɨ ba-lɔɔ gɨye gɨ ni wɔlɛ aru sɨbɨ gɨ ni bɨn̰ ka-n̰age. Lee gɨ kuduroyge say tɔgɨ caa. 6Ama Jesu yege hɨn̰: «Ɗaagɨŋ. Na kɨya wa ma magɨŋ kɨwaa wo̰ ga? Hɨnga ga hɨndi le ojɨn̰ canɨ le, na hɨnga ga kuɗa. 7Kan ga wɔɔdɨge unɔ le woyge danagɨŋ dan̰ wɔlɛ pɨna pɨna, lee gɨ kɨŋ ɓal lɔɔ ɗarwa danage kɨɗɨn̰ ga kuduroygɨŋ gey, ama ɨŋ-bandi na, ɨŋ kɨya sɔmɛ danagɨŋ dan̰ cɨnɨ naŋ. 8Hɨndi lee na hɨnga ga hɨndi ɓal lɔɔ: Hɨndi tɨdɨrde ɨdɨr gusɨnɨ jugu hɨn̰ wo̰ ɨrɨmɨn̰ na wɔlɛ dɨbenɨ boy umboŋ garma gɨŋ, kardi tɨmaynɨ. 9Aŋ yəgɨŋ daa waŋ na cɨndi: Kɨɗɨn̰ nɔm ga kan kɨya togɨn̰ge bɛrnɛ Kɔl-gɨ-Ɗari nee boy cay gɨsəŋ na, kan kɨya dɔrɛ kol hɨnga ga tama di kɛ le lee bɨ, kɨya hɨnege caa bɨ.»

Judasɨ ay cay Jesu

(Matɨyo 26:14-16; Lug 22:3-6)

10Judasɨ Isikarɨyɔt gɨ na ba-aye-cay-tɨbayi Jesu gɨ pɨna duroy ka-aye-cay-tɨbay Jesu ga mɔjɨ-cayge-sɔɔ le, or gusi ka-cay ka-bɔgɛ kɨbar kɨya aye cay Jesu bɨge. 11Kɨɗɨn̰ ga kan jege kɔl gɨ nee le hɨn̰ wo̰ na, kan leege gusi-mɔwa tɔgɨ koldi bɨ kan say ay kɨbɨge bii gɨ ke na kɨya bii gursu. Ɨni na, Judasɨ mal gɨyəŋ gɨ kɨya bɔɔ ɗarwa bii gɨ ni ayɨn̰ cay Jesu bɨge.

Jesu bɨ dɔɔ gɨ ni kɨdɨrɛ Pakɨ bɨ

(Matɨyo 26:17-19; Lug 22:7-13)

12Wɔlɛ gɨ cay wase gɨ da kɨdɨrɛ gɨ ni leen̰ kɨdɨrɛ gɨ da mapa gɨ laage dan̰ subugu naŋ gɨ kan been̰ge kɨbar gɨ da karɨn̰ dɨmangɨ gɨ ni Pakɨ le, ka-aye-cay-tɨbayi ɨngɨriige yege hɨn̰: «Kɛ na boy kɨɗɨn̰ ga ani gaŋ ma mɨn̰ gey gɨ ni na ɨra ƴɨma cay tɨbay hɨnga ga ni dɔɔ gɨ da kɨdɨrɛ gɨ ni Pakɨ gɨ da Jubɨn̰əŋ le nee ga?» 13Ɨni na, Jesu gɨy kalaŋ sɔɔ duroy ka-aye-cay-tɨbayi tumɔ bɨ yege hɨn̰: «Ɨragɨŋ a cay ƴaa-di-gumu dɨŋ na, kɨŋ kɨya jɨbɨn̰a dan̰ bara gɨ pɨna wo̰ gɨ kojɨ ɓɨri. Kɨbagɨŋ kardi. 14Bɨ duroy ƴaa di ban kɨya andaŋ nee le, ɨragɨŋ danayi bɨ kɨŋ yan̰ ba-gulɔŋ ƴaa le hɨn̰: “Ba gɨlɨn̰ kalaŋ kɔl ye hɨn̰: Kɛ na boy kulu gɨ ani gɨŋ ma, maŋ gɨ doon̰ kɨdɨrɛ gɨ ni Pakɨ dan̰ ka-aye-cay-tɨbanɨ nee ga?” 15Bɨ ban kɨya gɨlgɨŋ kulu gɨ gumu gɨ a cay mɨgay gɨŋ daa, gɨ kan n̰an duroy kaga gɨ hɨnga nɔm woy boy nee ɨni. Na nee ma magɨŋ kɨya ƴɔmɛ cay tɨbay dɔɔ gɨ ni Pakɨ boy nee kol cayna.» 16Ka-aye-cay-tɨbayi le orge bugoŋge a cay ƴaa-di-gumu dɨŋ ɨni na, wayge hɨnga ga nee le a kɨɗɨn̰dɨge gaŋ kɨɗɨn̰dɨge gaŋ hɨn̰ gɨ ban ba yege le. Lee gɨ kan ƴomge cay tɨbay dɔɔ gɨ da kɨdɨrɛ gɨ ni Pakɨ le nee. 17Kɨɗɨn̰ ga tɨwa lee borɨndo ɨni na, Jesu ɨrga dan̰ ka-aye-cay-tɨbayi ga mɔjɨ-cayge-sɔɔ. 18Kɨɗɨn̰ ga kan somge kɨbɨ hɨnga ga ni dɔɔ gaŋ bɨ diige dɔɔ na, Jesu yege hɨn̰: «Aŋ yəgɨŋ daa waŋ na cɨndi: Ungo pɨna duroygɨŋ gɨ dii dɔɔ danaŋ, kɨya aye canɨ bɨge.» 19Ka-aye-cay-tɨbay Jesu nɔm cɨndɨge bɨle kula, lee gɨ kan ɨngɨriige kardi gusɨge gusɨge yen̰ge hɨn̰: «Kɛ na ɨŋ-bandi ga?» 20Jesu dɨbɨge cay nee yege hɨn̰: «Na ungo pɨna duroygɨŋ kɨŋ ga mɔjɨ-caygɨŋ-sɔɔ, na ungo gɨ dobɨ kobi pɨna danaŋ boy hɨnga ga ni dɔɔ gaŋ. 21Na cɨndi, naa wa wa kalɨn̰ ma Kurɨn̰-ungo le, kɨya mare ɔrɛ hɨn̰ gɨ kan ba walge ojɨn̰ cayi duroy Magtubu di da Kumu dɨŋ le. Ama hɨnga ga dɨmbɨre woy gam ungo gɨ ba-aye cayi Kurɨn̰-ungo bɨge le. Ungo gɨ nee le kan ni na wooyge naŋ kalɨn̰ ma golgo.»

Hɨnga ga ni dɔɔ ga woy dan̰ cɨndɨge

(Matɨyo 26:26-29; Lug 22:15-20; 1 Korɛ̰t 11:23-26)

22Kan somge kɨbɨ dɔɔ gɨŋ diige dɔɔ ɨni na, Jesu ay mapa tor-kɨbi cay nee pa dɨm ma, boy dugo bɨn̰ ka-aye-cay-tɨbayi bɨ, yege hɨn̰: «Ƴagɨŋ, hɨnga ga kɛ le na kuyoŋdi-gusɨnɨ.» 23Kardi nee ban ay dan̰ kobo ga ni nare leen̰ Kumu ho’o cay nee pa dɨm ma bɨge bɨ, kan sige nɔm. 24Bɨ ban yege hɨn̰: «Hɨnga ga kɛ le na kɨbarnɨ, na kɨbar gɨ da saɗe kɨbɨ pɨna ɓɨse gusu gɨ bugoŋ dugo kol cay kondɨwa gɨ da kalaŋ.» 25Aŋ yəgɨŋ daa waŋ na cɨndi: «Ɨŋ kɨya sɔɔ kaŋdi suru ga kɛ le naŋ yɔd ɨni, bɨrɨŋ gɨsɨn̰ wɔlɛ gɨ ɨŋ kɨya sɔɔ ga hɨrɨwa danagɨŋ pɨna a boy dɔɔ-ƴaa di da Kumu dɨŋ.» 26Kardi nee kɨɗɨn̰ ga kan ayge kɨra gɨ duroy magtubu Kɨbe-Kɨra gɨ ojɨ cay kɨdɨrɛ le coŋ ɨni na, kan andaŋge orge a cay garma gɨ teeyige Olibɨye gɨŋ.

Jesu ye gɨ Pɨyɛr na kɨya man̰e kɨbi

(Matɨyo 26:30-35; Lug 22:33-34; Ja̰ 13:37-38)

27Jesu yen̰ ka-aye-cay-tɨbayi hɨn̰: «Kɨŋ-gandi nɔm hundɔrɔ kɨya bɔɔ toygɨŋ bɨ kɨŋ kɨya ɗɔŋ coŋ, kɨya wa walge duroy Magtubu di da Kumu dɨŋ yege hɨn̰: “Ɨŋ kɨya dɨɗe ba sɔlɛ kardi gamge ɨni na, kondɨwa gɨ da gamge kɨya busdoŋge pɨna pɨna daa.”#14:27 Ayge na duroy: Zacharie 13:7. 28Ama kardi nee kɨɗɨn̰ ga ɨŋ na bɨya lɨbɨ na, ɨŋ kɨya wale tumoygɨŋ a cay gɨsəŋ ga Galile.» 29Pɨyɛr yeyi hɨn̰: «Ko hɨn̰ gɨ te kamnɨ nɔm na hɨndarage bɨ, ɗan̰ge coŋ kalɨn̰ ma ɨŋ-bandi na, ɨŋ kɨya ɗon̰ coŋ naŋ.» 30Ɨni na, Jesu dɨbii cay nee yeyi hɨn̰: «Aŋ yen̰ daa waŋ na cɨndi: Labɨde, a duroy son̰do di kɛ dɨŋ le ji kɨya man̰e kɨbɨn̰ can̰ sɨbɨ yɔɔ gɨ ji na sɨlaŋ naŋ pa dɨm ma kuɗa kɨya ale kokorɨyo ko cayi sɔɔ ƴee.» 31Ama Pɨyɛr ye dan̰ togii jɨn̰ tumɔ hɨn̰: «Ko hɨn̰ gɨ naa gɨ ni mare danan̰ kalɨn̰ ma, ɨŋ kɨya man̰e cay kɨbɨnɨ yɔɔ gɨ ɨŋ na sɨlan̰ naŋ, naŋ bɨrɨŋ!» Bɨ ka-aye-cay-tɨbayi nɔm yege hɨn̰ wo̰ bɨ.

Jesu ol Kumu a boy yage gɨ Jetɨsemani

(Matɨyo 26:36-46; Lug 22:40-46)

32Jesu dan̰ ka-aye-cay-tɨbayi orge bugoŋge a boy yage gɨ pɨna wo̰ gɨ teeyige Jetɨsemani gɨŋ. Ɨni na, ban yen̰ ka-aye-cay-tɨbayi hɨn̰: «Sɨmagɨŋ dugo kɛ kɨɗɨn̰ ga ɨŋ-bandi ɨŋ kɨya dɔrɛ tonɨ ɔrɛ ɔlɛ Kumu.» 33Ban tee Pɨyɛr bɨ, Jag bɨ, Ja̰ bɨ, orɨn̰ danage danayi. Kɨɗɨn̰ ga nee le hundɔrɔ ay te looyi bɨ, ɗugoyi adɨldii bɨ. 34Ɨni na, ban yege hɨn̰: «Cɨn̰-kula ɗɨn̰ canɨ yɔd bɨrɨŋ hɨn̰ gɨ ɨŋ na mara coŋ wo̰. Sɨmagɨŋ kɛ sɨman̰gɨŋ bɨra dan̰ cɨndɨgɨŋ.» 35Ɨni na, ban dor toy dḛ walaŋ, pon̰ gɨbayi dugo bɨrɨŋ gɨ jɨndi ɨsɨbɨ gɨsəŋ bɨ, olɨn̰ Kumu ɗe hɨn̰ gɨ na uja na, kɨbɨ tɨwa di ni gɨle-cɨn̰ di nee le, na ɨra sɛdɨ walaŋ gusi. 36Ban ye hɨn̰: «Aba#14:36 Aba dan̰ kɨbɨ əbɨro duroy na ba naŋ le, baba.! Banɨ, ji ɓal lɔɔ hɨnga nɔm, aya kobo gɨ ni son̰ hɨnga ga ni n̰age ga kɛ le canɨ coŋ. Ama ɗa ɗe woy na hɨn̰ gɨ ji-bandi ji gey wala, na hɨn̰ gɨ ɨŋ-bandi ɨŋ gey wo̰ naŋ.» 37Ban jɨga gusi ka-aye-cay-tɨbayi ga sɨbɨ le bɨ wayge te wɔyɛ kuŋ gaŋ ɨni na, ban yen̰ Pɨyɛr hɨn̰: «Simo ji woy na kuŋ ga? Tɨwa pɨna kalɨn̰ mɨn̰ ɓala sɔmɛ-bɨra naŋ ga? 38Sɨmagɨŋ bɨra bɨ ulagɨŋ Kumu bɨ, ɗe agɨŋ ban̰ boy hɨnga ga ni gɨybe gaŋ naŋ. Kɨya wa turnoyi ungo gey lɔɔ hɨnga, ama kuyoŋdi-gusi ɨran̰ dan̰ tɔgɨ naŋ.» 39Ban jogɨ dɔrɛ gusi sɛdɨ walaŋ bɨ olɨn̰ Kumu, yen̰ kɔl gɨ nee le hɨn̰ gɨ tumɔ wo̰ coŋ. 40Kardi nee ɗaŋ coŋ ban jɨga gusɨge bɨ wayge te wɔyɛ kuŋ gaŋ. Kɨya wa kuŋ koydɨge. Bɨ kan sɨla kɔl gɨ ni yoyi naŋ. 41Kɨɗɨn̰ ga ban jɨga gɨ ni cay sɨbɨdi gɨŋ na, ban yege hɨn̰: «Haw kɛ na, wɨyagɨŋ kuŋ bɨ dɨragɨŋ gɨlale bɨ! Te kɔl ayaŋ ɨni! Tɨwa ɓal ɨni. Sɨlagɨŋ, kan kɨya dɔbɛ Kurɨn̰-ungo le kobɨ ka-lɔɔ ɨsɨna. 42Sagɨŋ daa ana orgɨŋ. Sɨlagɨŋ, ba-aye canɨ le tɨlga nee.»

Ƴomge Jesu

(Matɨyo 26:47-56; Lug 22:47-53; Ja̰ 18:2-11)

43Tumɔ pa dɨm ma gɨ Jesu kɨya dɨɗe kɨbɨ kɔl gɨ ban ye ƴee na, Judasɨ ban gɨ pɨna duroy ka-aye-cay-tɨbay Jesu ga mɔjɨ-cayge-sɔɔ andaŋ cayge dus, dɨmdɨrdi kalaŋ ga beeyige le orɨn̰ge dan̰ hɨnga ga ni wɔrɨn̰ɛ kobɨge, ga pɨna dan̰ pəlɨm bɨ, ga ɗaŋ dan̰ kɨlɛŋ bɨ. Na ka-cay ka-bɔgɛ kɨbar bɨ ka-gɨlɨn̰ kalaŋ gasɨn̰-kɔl gɨ da Moyis bɨ, ga ka-muɗɔlɛ ga da Jubɨn̰əŋ ba gɨygɨge. 44Ban gɨ ba-aye cay Jesu le, yen̰ dɨmdɨrdi kalaŋ le tumɔ jugu gɨyəŋ gɨ kan kɨya solɨn̰ge Jesu. Ban yege hɨn̰: «Ungo gɨ ɨŋ na ƴɨmayi gasɨbɨnɨ na, sɨlagɨŋ gɨ na ban. Ƴɨmayigɨŋ bɨ ɨran̰gɨŋ danayi. Gamayigɨŋ kuɗa» 45Kɨɗɨn̰ ga Judasɨ bugoŋ ƴɔbɨ na, ban ojɨ Jesu or gusi bɨ yeyi hɨn̰: «Ba-gɨlɨn̰ kalaŋ hɨnga!» Bɨ ban ƴomii gasɨbii. 46Kɨɗɨn̰ ga nee le kalaŋ ga Judasɨ ɨrgan̰ danage le, orge gusi Jesu bɨ, sige kobɨge cayi ƴomiige. 47Ama ungo gɨ pɨna wo̰ duroy kan ga ɨrege dan̰ Jesu dobɨ kobi dorɨn̰ dan̰ pəlɨm toyi, colɨn̰ sɨmay marɨna ba-gɨye gɨ da mangɨl gɨ da ka-cay ka-bɔgɛ kɨbar nɛŋ dɨbɨ coŋ. 48Jesu yege hɨn̰: «Kɛ na kɨya wa ma, magɨŋ ɨrgan̰ dan̰ pəlɨmn̰əŋ bɨ, dan̰ kɨlɛŋn̰əŋ kagɨŋ bɨ, kɨya ƴɔmɔŋ hɨn̰ gɨ ɨŋ naa ba-lɔɔ ɨsɨna wo̰ ga? 49Dan̰ wɔlɛ pɨna pɨna ɨŋ ɨre duroygɨŋ duroy ƴaa-di-da-Kumu dɨŋ gɨlɨn̰ kalaŋ hɨnga, magɨŋ ƴɨmaŋ naŋ. Ama hɨnga ga nee le lee gusɨge, ɗe kɔl gɨ ba walge a duroy Magtubu di da Kumu dɨŋ le, na or kɨɗɨn̰di gaŋ.» 50Kɨɗɨn̰ ga nee le, ka-aye-cay-tɨbayi nɔm gɨrege, ɗeyge coŋ. 51Kuroŋ marɨna gɨ pɨna wo̰ kobɨ kardi, gusi na kalɨn̰ ama bee na kɨbɨ badɨge ga kɨledɨge osu ƴɔbɨ tolɨn̰ gusi. Ƴomge kuroŋ marɨna le. 52Ama ban duroŋ kobɨge ɗen̰ kɨbɨ badɨge ga kɨledɨge osu le kobge gɨrɨn̰ toyi kalɨn̰ orɨn̰.

Orɨn̰ge dan̰ Jesu tumoy ka-bɔyɛ kɔl ga gɨmdəŋ

(Matɨyo 26:57-68; Lug 22:54-55,63-71; Ja̰ 18:12-18)

53Kan orɨn̰ge dan̰ Jesu a da mangɨl gɨ da ka-cay ka-bɔgɛ kɨbar. Ka-cay ka-bɔgɛ kɨbar bɨ ka-muɗɔlɛ ga da Jubɨn̰əŋ bɨ, ka-gɨlɨn̰ kalaŋ gasɨn̰-kɔl gɨ da Moyis bɨ, dayaŋge nɔm amiige a tayi. 54Pɨyɛr kobɨ kardi Jesu ama ɗe duroyge sɨngɨɗɨ lam. Ban andaŋ a duroy gulɔŋ gɨ da mangɨl gɨ da ka-cay ka-bɔgɛ kɨbar. Bɨ som dan̰ marɨne ka-gɨye kɨbɨ tɨwa dɨŋ ƴobɨ. 55Ka-cay ka-bɔgɛ kɨbar bɨ ka-bɔyɛ kɔl cay Jubɨn̰əŋ ga gɨmdəŋ bɨ, malge gɨyəŋ gɨ ni se kɔl gɨ dɨmri cay Jesu age na dɨɗii, ama waage naŋ. 56Kɨya wa kondɨwa gɨ da kalaŋ leege tɨmon̰ di ni poy cayi, ama kɔl koge ɨra te mɨgay naŋ. 57Ama kalaŋ ga pɨna wo̰ sayge daa leege tɨmon̰ di hɨnde naŋ cayi yen̰ge hɨn̰: 58«Ni-gandi ni je gɨ ban ye hɨn̰: “Ƴaa-di-da-Kumu di kɛ di kalaŋ gaɗɨge le, ɨŋ-bandi ɨŋ kɨya dɔsɛ coŋ bɨ duroy wɔlɛ sɨbɨ na, ɨŋ kɨya gaɗe di ɗaŋ di ungo laa dan̰ kobi naŋ.”» 59Ama naa hɨn̰ wo̰ kalɨn̰ ma tɨmon̰ di kan leege le ɨra te mɨgaa dɨŋ naŋ. 60Ɨni na, mangɨl gɨ da ka-cay ka-bɔgɛ kɨbar le, de say ɨre duroy kalaŋ ga dayaŋge le daa bɨ ɨngɨrɨn̰ Jesu ye hɨn̰: «Kɔl gɨ ka-lɔɔ tɨmon̰ ba yege beege can̰ kɛ le, ji gɨ dɨbɨge nee naŋ ga?» 61Ama Jesu som kɨbi munduŋ bɨ dɨbɨge kɔl nee naŋ. Gumu gɨ da ka-cay ka-bɔgɛ kɨbar ɨngɨrii ɗaŋ coŋ hɨn̰: «Kɛ ji na Kɨris ban gɨ Kumu dorii Kurɨn̰-Kumu, ban gɨ ni kɨya hɨramii le ga?» 62Jesu dɨbii cay nee yeyi hɨn̰: «Əw, ɨŋ na ban, bɨ kɨŋ nɔm kɨŋ kɨya sɔlɛ Kurɨn̰-ungo sɔmɛ a cay kali di ni tɨrɨmbala dɨŋ kɨway Kumu ba dɔnɔ gɨ gumu a cay kobi gɨ bara gɨŋ bɨ, kɨŋ kɨya solii te ɨrga cay gɨrɨmbale gaŋ bɨ#14:62 Sɨlagɨŋ Psaumes 110:1; Daniel 7:13. .» 63Kɨɗɨn̰ ga nee le na, mangɨl gɨ da ka-cay ka-bɔgɛ kɨbar ƴom badɨge ga ni gusi sagɨ kḛḛwɨ coŋ bɨ ye hɨn̰: «Kɛ, na kɨya male na tɨmon̰ di mɨna coŋ ga? 64Kɨŋ je yagɨde gɨ ban yagɨde Kumu le ɨni. Kɛ, ɨrɨmedɨgɨŋ na mɨna cay nee ga? Kan nɔm dɨbɨge kɔl cayi gɨ na ojii na tɨma.» 65Ɨni na, kalaŋ ga pɨna wo̰ duroyge ayge te tɨbiige kale cayi bɨ, saɗɨge cɨndi bɨ, teyige bɨ, yeyige hɨn̰: «Laa gusɨn̰ laan̰ hɨn̰ ba-yɔɔ-kɔl-gɨ-Kumu-ba-yɔɔ wo̰.» Ɨni na, ka-ame kɨɗɨn̰ orɨn̰ge danayi bɨ tege maŋjii bɨ.

Pɨyɛr man̰ kɨbi gɨ ɗi na sɨla Kɨris naŋ

(Matɨyo 26:69-75; Lug 22:56-62; Ja̰ 18:17,25-27)

66Pɨyɛr som baa a duroy gulɔŋ gɨ dugo gɨŋ ƴee, kɨɗɨn̰ ga ɗe-gɨye di tama da mangɨl gɨ da ka-cay ka-bɔgɛ kɨbar ɨrga. 67Hɨndi sol Pɨyɛr som ƴobɨ tɨwa ɨni na, ɗe cɨndo cayi bɨ yeyi hɨn̰: «Ji-bandi kalɨn̰ ma tumɔ ji or dan̰ Jesu ungo gɨ a cay ƴaa-di-gumu di Najarɛt dɨŋ le bɨ.» 68Ama ban man̰ kɨbi ye hɨn̰: «Kɔl kɛ le ɨŋ sɨla naŋ, ɨŋ sɨla duroy kɔl gɨ me ye le naŋ.» [Ɨni na, kuɗa al.] Bɨ ban andaŋ duroy gulɔŋ gɨŋ coŋ or ɨre a kɨbɨ-ƴaa gɨ doŋ gɨŋ. 69Tama ɗe-gɨye le soli ɗaŋ coŋ bɨ yen̰ kalaŋ ga ɨrege nee hɨn̰: «Gɨlmi gɨ kɛ le kalɨn̰ ma na duroyge bɨ.» 70Bɨ ban man̰ kɨbi ɗaŋ coŋ. Lam wo̰ kardi nee ɨni na, kalaŋ ga ba ɨrege nee le, sɨygɨge gusi Pɨyɛr bɨ yeyige hɨn̰: «Ji na ungo gɨ a duroyge leen̰ cɨndi, kɨya wa ji na ungo gɨ a cay gɨsəŋ ga Galile gaŋ.» 71Ɨni na, Pɨyɛr ay te dɔrɛ gusi ye hɨn̰: «Ɨŋ sɨla ungo gɨ kɨŋ ye koldi gɨ nee le naŋ. Hɨn̰ gɨ ɨŋ na ya naa poy na ɗa ɗe Kumu dɨɗəŋ.» 72Kɨɗɨn̰di ga nee gaŋ le bɨ kuɗa al kokorɨyo ko gɨ ni cay sɔɔdi. Bɨ Pɨyɛr kuduroy hɨn a cay kɔl gɨ tumɔ Jesu ba yeyi hɨn̰: «Ji kɨya man̰e kɨbɨn̰ yɔɔ gɨ ji na sɨlaŋ naŋ can̰ sɨbɨ pa dɨm ma kuɗa kɨya ale cayi sɔɔ kokorɨyo ko ƴee.» Ɨni na, Pɨyɛr say andaŋ pɨla doŋ bɨ ɨle.

Currently Selected:

Marg 14: gab

Highlight

Copy