Marg 13

Jesu ye kol ƴaa-di-da-Kumu gɨ kɨya mundoŋ

(Matɨyo 24:1-3; Lug 21:5-7)

1Jesu de andaŋ doŋ duroy ƴaa di da Kumu dɨŋ ɨni na, ba-aye-cay-tɨbayi gɨ pɨna wo̰ yeyi hɨn̰: «Ba-gɨlɨn̰ kalaŋ hɨnga, ƴaa-di-da-Kumu lee hundɔrɔ yɔd! Sɨla oru bɨ, ƴaado bɨ.» 2Jesu dɨbii cay nee yeyi hɨn̰: «Ji sol ƴaan̰əŋ ga gɨmdəŋ kɛ le ga? Kan kɨya ɗɔɔ oru pɨna kalɨn̰ ma sɔmɛ cay mɨgay gɨŋ daa naŋ. Kan kɨya jɨdɨrdage kurɔm kurɔm dugo.»

Hɨnga ga kɨya lɔɔ gusɨge tumoyi wɔlɛ gɨ ni bon̰ kɔl

(Matɨyo 10:17-22; 24:4-14; Lug 12:11-12; 21:8-19)

3Jesu or sɔmɛ a cay garma gɨ Olibɨye gɨŋ gɨ bɨle cɨndi bɨn̰ ƴaa-di-da-Kumu. Ɨni na, Pɨyɛr bɨ, Jag bɨ, Ja̰ bɨ, Andɨre bɨ, somge danayi kan̰dɨge hage bɨ ɨngɨriige yege hɨn̰: 4«Yani ƴee bɨ, kɛ na wɔlɛ gɨ ani gɨŋ ma hɨnga ga nee le kɨya lɔɔ gusɨge ga? Bɨ na hɨnga di wa ba kɨya gɨlni gɨ kɔl gɨ nee le nɔm na kɨya ɔrɛ kɨɗɨn̰di gaŋ bɨ ga?» 5Ɨni na, Jesu ay te yoge hɨn̰: «Ɗagɨŋ muɗɔlɛ cay gusɨgɨŋ gɨŋ. Ɗɔɔgɨŋ ungo nargɨŋ bogɨgɨŋ kayaŋ naŋ ɨni. 6Kɨya wa dɨmdɨrdi kalaŋ kɨya ɨrgage dan̰ gusonɨ bɨ yɔɔge hɨn̰: “Kɨris ban gɨ Kumu dorii le na ɨŋ-bandi!” Bɨ kan kɨya kayege kalaŋ gɨɗaŋ. 7Kɨɗɨn̰ ga kɨŋ na ja noy worɨn̰ɛ ga mɨnde bɨ, kol worɨn̰ɛ ga hen̰ bɨ na, ɗɔɔgɨŋ hundɔrɔ loogɨŋ naŋ. Kɨya wa naa wa wa kalɨn̰ ma hɨnga ga nee le kɨya ɨrga, ama na kagadɨge naŋ ƴee. 8Te wɔɔ gɨ da kalaŋ ga pɨna kɨya dɨbe kɨmbɨl dan̰ te kalaŋ ga ɗaŋ bɨ, dɔɔ-ƴaa di pɨna kɨya sɔ dɨbe kɨmbɨl dan̰ dɔɔ-ƴaa di ɗaŋ bɨ. Cay gɨsəŋ kɨya yɨbagde den̰ den̰ dan̰ kɨɗɨn̰ kɨɗɨn̰ bɨ, badɨra gɨ gumu kɨya bɔɔ dan̰ kɨɗɨn̰ kɨɗɨn̰ bɨ. Hɨnga ga nee le nɔm kɨya wɔyɛ na hɨn̰ wɔɔ gɨ ay te lɔɔ tama wo̰. 9Ama kɨŋ-gandi na, ɗagɨŋ muɗɔlɛ a cay gusɨgɨŋ kogɨŋ kɨŋ-gandi gaŋ. Kɨya wa kalaŋ kɨya se kɔl caygɨŋ tumoy ka-bɔyɛ kɔl gaŋ bɨ, kan kɨya togɨgɨŋ duroy ƴaa-daye-di-da-Jubɨn̰əŋ dɨŋ bɨ. Kan kɨya orɨn̰ danagɨŋ tumoy ka-kɨbɨ kɛrɨmbɛlɛŋ ga gɨmdəŋ gaŋ bɨ, tumoy kɛrɨmbɛlɛŋ gaŋ bɨ, kɨya canɨ. Ɗe agɨŋ wan̰ gɨyəŋ gɨ ni leen̰ tɨmon̰ cay kɔl gɨ cɨndi ojɨn̰ canɨ tumoy Jubɨn̰əŋ. 10Naa wa wa kalɨn̰ ma kɨŋ kɨya tɔgɛ bɛrnɛ di da Kɔl-gɨ-Ɗari bɨn̰ te wɔɔ gɨ da kalaŋ nɔm pa dɨm. 11Kɨɗɨn̰ ga kan kɨya orɨn̰ danagɨŋ dobgɨŋge kobɨ ka-bɔyɛ kɔl gaŋ na, kɨŋ ɗɔɔ ba sɔlɛ a cay kɔl gɨ kɨŋ ba kɨya yɔɔ tumɔ naŋ. A boy tɨwadi di nee dɨŋ le yagɨŋ na kɔl gɨ kɨya ɨrga caygɨŋ, kɨya wa na kɨŋ-gandi ba kɨya yɔɔ kɔl naŋ, ama na Turnɔ ɗe-kuduroy-bɛrɛ. 12A boy wɔlɛ gɨ ba kɨya ɨrga gɨŋ le, kalaŋ kɨya ayege cay karmiige bɨn̰ ka-dɔɔ cay ƴaa ɗe kan na dɨɗɨge bɨ, karɨn̰aŋ ban̰ige kalɨn̰ ma kɨya lɔɔge hɨn̰ wo̰ dan̰ karɨndɨge bɨ. Karɨn̰aŋ kɨya bɨləŋ ka-baa ga da ban̰ige dan̰ ƴon̰ige bɨ, ayege cayge bɨn̰ kalaŋ ɗe na dɨɗɨgege coŋ bɨ. 13Kalaŋ nɔm kɨya ƴomgɨŋge dan̰ kuduroyge kɨya cay gusonɨ. Ama ungo gɨ na ƴɨma usa bɨrɨŋ dɨɗɨn̰ kɨbi na, kɨya wɔɔ pɔɗɛ.»

Hɨnga ga ni dɔsɛ-ɗugɔ ga gɨmdəŋ ga kɨya ɨrga

(Matɨyo 24:15-25; Lug 21:20-24; 17:23; 21:8)

14Na toy di hɨn̰ wo̰ ma, kɨɗɨn̰ ga kɨŋ na sɨla hɨnga ga ɨsɨni ga kɨya ɨrgan̰ dan̰ mundoŋ#13:14 Sɨlagɨŋ: Daniel 9:27; 11:31; 12:11. na sɨma a kɨɗɨn̰ ga uja cayi gaŋ naŋ na, kuɗa gɨ ungo gɨ ba ɗɔngɨsɛ kɔl gɨ woy a duroy magtubu di kɛ dɨŋ le sɨla duroy kuɗa. Wɔlɛdi gɨ nee le kuɗa gɨ kalaŋ ga somge a cay gɨsəŋ ga Jude gaŋ le, gɨrge ɨrage jɨn̰ cay garman̰əŋ gaŋ. 15Waŋ waŋ gɨ na baa daa a gulɔŋ gɨ cay ƴaa gɨŋ na, ɗɔɔ gɨ ban jɔgɛ duroy ƴaadi dɨŋ kɨya aye hɨnga naŋ bɨ. 16Waŋ waŋ gɨ na ɨr yage gɨŋ kalɨn̰ ma, ɗɔɔ gɨ ban jɔgɛ a duroy ƴaadi dɨŋ aye badɨge kayi ga gumu ga ban dobɨ a cay kamdɨge gaŋ naŋ bɨ. 17Boy wɔlɛdi gɨ nee le, kandɨ ga ka-kuroŋ bɨ, kan ga ka-bɨn̰ karɨn̰aŋ kobɨn̰ bɨ le, cɨn̰-n̰age kɨya bɔɔ cayge. 18Ulagɨŋ Kumu ɗe hɨnga nɔm ga nee le wɔyɛ dan̰ cay kal naŋ. 19Kɨya wa wɔlɛdi gɨ nee le na, hɨnga ga kɨya dɔsɛ-ɗugɔ ga gumu kɨya lɔɔ kalaŋ. Bɨ dɔsɛ-ɗugɔ di hɨn̰ wo̰ le laa guso cay pɨna naŋ, ayɨn̰ toy gɨ Kumu sɨn̰ cay gɨsəŋ bɨrɨŋ gɨsɨn̰ labɨde. Dɔsɛ-ɗugɔ di wo̰ le kɨya lɔɔ guso ɗaŋ naŋ bɨrɨŋ ɨni bɨ. 20Hɨn̰ gɨ Ba-gulɔŋ ni na bɨya kɨbɨ wɔlɛ gɨ nee le daa naŋ na, ungo pɨna ni kɨya dɔgɛ andaŋ naŋ. Ama Ba-gulɔŋ ɨrɨm a cay kalaŋ ga ban torge, na toy di hɨn̰ wo̰ ma ban boy kɨbɨ wɔlɛ gɨ nee le daa kol cayge. 21A boy wɔlɛdi gɨ nee le na, hɨn̰ gɨ ungo na yagɨŋ hɨn̰: «“Sɨlagɨŋ! Kɨris ban gɨ Kumu dorii le woy kɛ” naŋ le: “Sɨlagɨŋ! Ban woy nii kɔ” na, kɨŋ ɗɔɔ ba bɔgɛ kuduroygɨŋ cay kɔl koyi gɨŋ naŋ. 22Kɨya wa kɨrisn̰əŋ ga hɨnde naŋ bɨ, ka-yɔɔ-kɔl-gɨ-Kumu-ba-yɔɔ ga hɨnde naŋ bɨ, kɨya andaŋge. Kan kɨya lɔɔge hɨnga ga ɗɨn̰ cɨn̰-kɨɗɨn̰ bɨ, hɨnga ga ni belin̰əŋ bɨ, age na kayɨn̰ kalaŋ. Hɨn̰ gɨ kan ni na ɓala na, kan gey kayge kan ga Kumu torge bɨ. 23Kuɗa, kɨŋ-gandi na ɗagɨŋ muɗɔlɛ cay gusɨgɨŋ gɨŋ, kɨya wa ɨŋ yəgɨŋ daa jugu ɨni.

Caga gɨ da Kurɨn̰-ungo

(Matɨyo 24:29-31; Lug 21:25-28)

24«Ama boy wɔlɛdi gɨ nee le kardi hɨnga ga ni dɔsɛ-ɗugɔ ga nee le na, tɨwa kɨya dɔbɛ ɨndɨwa tɨlɨm bɨ, kɨdɨrɛ kɨya asɨn̰a naŋ bɨ,#13:24 Sɨlagɨŋ: Esaïe 13:10. 25dɛsɨɗɛŋ ga gɨɗɨgɨ-Kumu gɨŋ kɨya ayege te laydaŋ dugo bɨ,#13:25 Sɨlagɨŋ: Esaïe 34:4. dɔnɔ di da hɨnga nɔm ga woy gɨɗɨgɨ-Kumu gaŋ kɨya yebagdaŋ bɨ. 26Ɨni na, kalaŋ ga cay gɨsəŋ gaŋ kɨya sɔlɛge Kurɨn̰-ungo le dan̰ tɨdɨge te ɨrga cay gɨrɨmbale gaŋ#13:26 Sɨlagɨŋ: Daniel 7:13. dan̰ dɔnɔ di gumu bɨ, dan̰ asɨn̰a di gumu bɨ. 27Kɨɗɨn̰ ga nee le, ban kɨya gɨye ka-ƴɔbɛ ga daa nii ɗe na orge dɔnɛ kan ga ban ba torge le, a tɨbɨn̰ gɨsəŋ ga poɗɨn̰ gaŋ. Kan kɨya aye toy kɨway gɨsəŋ ga pɨna gaŋ bɨrɨŋ andɨn̰ kɨbɨ gɨsəŋ ga ɗaŋ gaŋ.

Duroy kɨradi-kɔl gɨ ojɨ cay tuguyoŋ

(Matɨyo 24:32-36; Lug 21:29-33)

28«Kɨradi-kɔl gɨ ojɨ cay tuguyoŋ le, kɨya lɔɔ gɨ kɨŋ kɨya ɨrɨmɨn̰ duroy kɔl gɨ nee le kuɗa. Kɨɗɨn̰ ga kɨŋ sol gɨ kabɨn̰do na aya te jɨbe bɨ, kabɨn̰do ga cay wase na andaŋ bɨ na, kɨŋ sol gɨ marɨm baa mɨnde. 29Na hɨn̰ wo̰ bɨ, kɨɗɨn̰ ga kɨŋ na sɨla hɨnga ga nee le na bugoŋ na, sɨlagɨŋ gɨ Kurɨn̰-ungo le wɨyga mɨnde hɨn̰ a kɨbɨ ƴaa gɨ da cay ƴaa-di-gumu dɨŋ wo̰. 30Aŋ yəgɨŋ daa waŋ na cɨndi: Hɨnga ga nee le kɨya andaŋ tumɔ pa dɨm ma, kalaŋ ga somge cay gɨsəŋ gaŋ nɔm haw kɛ toyge kɨya ayaŋ ƴee. 31Gɨɗɨgɨ-Kumu dan̰ cay gɨsəŋ kɨya pɨdege, ama kɔl hɨnge na kɨya pɨde naŋ bɨrɨŋ.»

Kumu pɨna hayi ba sɔlɛ wɔlɛ gɨ da kagadi kɔl

(Matɨyo 24:42; 25:13-15; Lug 12:36-38; 19:12-13)

32«Ama kɔl gɨ ojɨ cay wɔlɛdi bɨ tɨwadi bɨ le, ungo pɨna nɛŋ sɨla naŋ. Ka-ƴɔbɛ ga daa nii sɨlage naŋ bɨ, Kuroŋ sɨla naŋ bɨ, ama na Kɨye Bayi pɨna hayi ƴɔbɨ ba sɔlɛ. 33Ɗagɨŋ muɗɔlɛ cay gusɨgɨŋ gɨŋ bɨ, sɨmagɨŋ-bɨra bɨ, kɨya wa kɨŋ sɨla cay tɨwa di hɨnga ga nee le kɨya cagan̰ naŋ. 34Kuɗa, kɨya wɔyɛ gɨlɨn̰a na hɨn̰ ungo gɨ pɨna wo̰ gɨ or tɨrga. Ban ɗe ƴaadi bɨ, ay noy bɨn̰ marɨne ka-lɔɔ gɨye kayi, ɗe waŋ waŋ kalɨn̰ ma na cɨbɨ cɨndi kardi gɨye-lɔɔdi lɔɔdi. Kardi nee ban ay noy bɨn̰ ba-game kɨbɨ-ƴaadi gɨ ban na sɨma-bɨra. 35Na toy di hɨn̰ wo̰ ma, kɨŋ-gandi kalɨn̰ ma, kuɗa gɨ kɨŋ sɨma-bɨra kɨya gɨ kɨŋ sɨla tɨwa di ba-gulɔŋ ƴaa kɨya jɨgan̰ nee le naŋ: Na dan̰ borundo wala, na dan̰ duroy son̰do bɔb wala, na dan̰ ale gɨ da kuɗa wala na, dan̰ te kɨɗɨn̰ kalɨn̰ ma, ungo sɨla naŋ. 36Gajanaŋ ban gɨ da andɨgaŋ dus bɨ, gɨ da waygɨŋ te wɔyɛ kuŋ gaŋ. 37Kɔl gɨ ɨŋ ba yəgɨŋ kɛ le, ɨŋ yen̰ na kalaŋ nɔm: Sɨmagɨŋ-bɨra.»

Currently Selected:

Marg 13: gab

Highlight

Copy