Lug 2

Wɔɔ gɨ da Jesu

1Boy ɨlgedi gɨ nee le, Ogust Sejar kɨlma gɨ gumu gɨ dii cay gɨsəŋ ga Rɔm, ay noyi bɨn̰ kalaŋ nɔm ga somge a cay gɨsəŋ kayi gaŋ, ɗe kan na sii gusondɨge a duroy magtubu di ni ɗongɨsɨn̰ kalaŋ dɨŋ. 2Ɗɔngɨsɛ kalaŋ gɨ nee le, na gɨ cay wase cɨg cɨg duroy ɨlge gɨ Kirinis na ba-kɨbɨ Kɨlma gɨ gumu gɨ dii cay ƴaa di Siri. 3Kalaŋ nɔm orge ɗɔɔ gusondɨge, waŋ waŋ kalɨn̰ ma a cay gulondi gɨŋ. 4Jɨsɛb kalɨn̰ ma sayga a cay karɨn̰ ƴaa ga Najarɛt, ga woy a cay gɨsəŋ ga Galile gaŋ. Kɨya ɔrɛ jɨn̰ Bɛdɨlɛhɛm cay ƴaa di da Dabid di woy a cay gɨsəŋ ga Jude gaŋ, kɨya gɨ ban kalɨn̰ ma na a te wɨn̰je gɨ da Kɨlma Dabid bɨ. 5Jɨsɛb dan̰ ɗe kujoyi orge se gusondɨge bɨ. Hɨndi ƴee kur. 6Kɨɗɨn̰ ga kan baage a Betɨlɛhɛm ƴee na, wɔlɛ gɨ hɨndi kɨya woon̰ kalɨn̰ ma ɓal bɨ. 7Hɨndi wɔɔ kɨyoo gɨ cay wase. Hɨndi nɔngɨri dan̰ kɨbɨ badɨge bɨ, dɨbii duroy bəgɨrə gɨŋ kɨya gɨ kɨɗɨn̰ unɔ a duroy ƴaa gɨ ni bogɨn̰ kɨrge nee gaŋ.

Ka-ƴɔbɛ ga daa nii andaŋge a cay ka-ame gamge

8Ka-ame gamge ga somge a cay ƴaa di nee dɨŋ le, wolge duroy yagegɨŋ amɨn̰ge gamge kage. 9Ɨni na, ba-ƴɔbɛ gɨ daa nii gɨ da Ba-gulɔŋ Kumu andaŋ cayge hɨrɨj bɨ, asɨn̰a gɨ da Ba-gulɔŋ Kumu asɨn̰ cayge wɨlɨn̰ nɔm, gaa ma gusɨge n̰orge rag rag dan̰ hundɔrɔ. 10Ama ba-ƴɔbɛ gɨ daa nii le yege hɨn̰: «Jagɨŋ! Hundɔrɔ gɨŋ naŋ! Ɨŋ ɨrgan̰ na dan̰ kɔl-gɨ-ɗari gɨ kɨya bɨn̰ kalaŋ nɔm gusi-mɔwa di gumu. 11Labɨde kan wɔɔge Ba-pɔɗɛ kalaŋ a cay ƴaa di da Dabid, ban na Kɨris ban gɨ Kumu dorii le bɨ, ban na Ba-gulɔŋ nee bɨ. 12Sɨlagɨŋ hɨnga ga ba kɨya gɨlgɨŋ ba kɛ: Kɨŋ kɨya wɔɔ kɨye gɨ kan nɔngɨriige dan̰ kɨbɨ badɨge bɨ, kan dibiige a boy bəgɨrə gɨŋ bɨ.» 13Kɨɗɨn̰ ga nee le bɨ! Kondɨwadi ka-ƴɔbɛ ga daa nii ga a gɨɗɨgɨ-Kumu gaŋ andɨgaŋge lug lug bugoŋge dan̰ ba-ƴɔbɛ gɨ daa nii gɨ ɨre a kɨɗɨn̰ ga nee gaŋ le, hɨramɨn̰ge Kumu yen̰ge hɨn̰: 14«Gusoŋ-tɔgɛ na gɨ da Kumu gɨ a daa nii gɨɗɨgɨ-Kumu gɨŋ bɨ, gusi-dɔbɛ woy kɨya cay kalaŋ ga Kumu geyge tɔgɨ a cay gɨsəŋ gaŋ kɛ bɨ!»

Ka-ame gamge orge Bɛdɨlɛhɛm

15Kɨɗɨn̰ ga ka-ƴɔbɛ ga daa nii jogɨge a da Kumu ɨni na, ka-ame gamge le yen̰ge gusɨge hɨn̰: «Na orgɨŋ bɨrɨŋ a Bɛdɨlɛhɛm ana or sɔlɛgɨŋ hɨnga ga ba lee gusɨge bɨ, hɨnga ga Ba-gulɔŋ ba yenagɨŋ koldɨge le.» 16Kan boy gusɨge daa cɛd orge bɨ, wayge Mari dan̰ Jɨsɛb bɨ, dan̰ kɨye gɨ kan dɨbiige boy bəgɨrə gɨŋ le bɨ. 17Kɨɗɨn̰ ga kan soliige ɨni na, kan dorge te kɔl gɨ ka-ƴɔbɛ ga daa nii ba yege ojɨ cay kɨye gɨ n̰əŋ le. 18Kan nɔm ga ba jege kɔl gɨ ka-ame gamge ba yege le, kɔl kayge sɛl sɛl. 19Ama Mari na ƴom kɔl gɨ nee le nɔm a kudurɔ bɨ, ɨrɨm ma jɨga ɨrɨm cay nee ɗaŋ coŋ. 20Bɨ ka-ame gamge le jogɨge dan̰ kɨra kɨbɨge dɨbɨn̰ge gusoŋ-tɔgɛ a cay Kumu bɨ, hɨramige kɨya cay hɨnga nɔm ga kan je koldɨge dan̰ sɨmayige bɨ, ga kan solge dan̰ cɨndɨge bɨ, hɨn̰ gɨ ba-ƴɔbɛ gɨ daa nii ba yege le.

Sige gusondi na Jesu

21Kɨɗɨn̰ ga kɨye le, lee wɔlɛ margɨm ɨni na, kan waliige ban̰a bɨ,#2:21 Sɨlagɨŋ: Lévitique 12:3. kan sige gusondi na Jesu hɨn̰ gɨ ba-ƴɔbɛ gɨ daa nii ba yege kɨɗɨn̰ ga ƴoyi ba baa ƴɔɔ dan̰ kurdi ƴee le.

Ayge Jesu orɨn̰ge danayi duroy ƴaa-di-da-Kumu

22Kardi nee kɨɗɨn̰ ga Jɨsɛb dan̰ Mari orge kɨya dorɨn̰ge gusɨge mɨra hɨn̰ gɨ gasɨn̰-kɔl gɨ da Moyis ba ye le, kan orɨn̰ge dan̰ kɨye le a Jerusalɛm kɨya dorii si dan̰ cɨndi bɨn̰ Ba-gulɔŋ. 23Hɨn̰ gɨ kan ba ɗe a duroy magtubu di ni gasɨn̰-kɔl, gɨ da Ba-gulɔŋ Kumu gɨ ba bɨn̰ Moyis: «Karɨn̰ ban̰aŋ ga cay wase cɨg cɨg nɔm le, kan kɨya ɗoge dan̰ cɨndɨge bɨn̰ Ba-gulɔŋ Kumu.»#2:23 Ayge na duroy: Exode 13:2. 24Kan ɨrgage a Jerusalɛm na kɨya bɔgɛ kɨbar bɨn̰ Kumu hɨn̰ gɨ gasɨn̰-kɔl gɨ da Ba-gulondɨna ba ye hɨn̰: «Karɨn̰ guu ga dḛ won̰ sɔɔ, naŋ le guu ɗe kɨbar won̰ sɔɔ bɨ.»#2:24 Ayge na duroy: Lévitique 12:8.

25Sɨlagɨŋ! Wɔlɛdi gɨ nee le, bara gɨ pɨna wo̰ som a cay ƴaa-di-gumu di Jerusalɛm dɨŋ gusondi na Simin̰o. Ban na ungo gɨ dan̰ durɔ ɗɨngar bɨ, gɨ hɨndar Kumu bɨ. Ban som gam na jɨne hayi, ban gɨ Ba-jale ɗugɔ te wɨn̰je gɨ da Ɨsɨrayɛl. Turnɔ ɗe-kuduroy-bɛrɛ le baa dan̰ Simin̰o. 26Turnɔ ɗe-kuduroy-bɛrɛ le yeyi tumɔ gɨ ban na kɨya sɔlɛ Kɨris, ban gɨ Ba-gulɔŋ Kumu ba dorii le pa dɨm ma, ban na kɨya mare ƴee. 27Turnɔ di da Kumu ɨrgan̰ dan̰ Simin̰o a duroy gulɔŋ ƴaa-di-da-Kumu gɨ da kalaŋ ga ni Jubɨ. Kɨɗɨn̰ ga Jɨsɛb dan̰ Mari ɨrgan̰ge dan̰ kɨyeyge Jesu kɨya lɔɔ gasɨn̰-kɔl gɨ ni doriige sii dan̰ cɨndi bɨn̰ Kumu na, 28Simin̰o ayi duroy kobi gɨŋ bɨ, hɨram Kumu ye hɨn̰:

29«Kumu hɨnge, kɔl gɨ ji ba ye le ɓal kɨrbɨ ɨni.

Ɗa guyɔŋ kon̰ ɗe ma dan̰ gusi-dɔbɛ.

30Kɨya wa ɨŋ sol Pɔɗɛ kon̰ də̰ də̰ dan̰ cɨnɨ ɨni,

31Na pɔɗɛ gɨ ji ba yan cay tɨbay

Tumoy kalaŋ nɔm nɔm ga cay gɨsəŋ gaŋ le.

32Ban na asɨn̰a gɨ kɨya gɨlɨn̰ te wɔɔ

Gɨ da kalaŋ nɔm nɔm ga cay gɨsəŋ gaŋ gɨ ji na waŋ ga.

Bɨ, kɨya dɨbe gusoŋ-tɔgɛ a cay kalaŋ kan̰

Ga a te wɨn̰je gɨ da Ɨsɨrayɛl gɨŋ bɨ.»

Simin̰o ye kɔl dan̰ guson̰ Kumu

33Kɨɗɨn̰ ga Jesu bayi dan̰ ƴoyi jege kɔl gɨ Simin̰o ba ye ojɨn̰ cay kɨye le, kɔl kayge sɛl sɛl. 34Simin̰o tor-kɨbi cayge bɨ, yen̰ Mari Jesu ƴoyi yo hɨn̰: «Na cɨndi! Kɨye gɨ kɛ le, kɨya bɨle te gabaŋ gɨ da kondɨwadi kalaŋ gɨ da te wɨn̰je gɨ da Ɨsɨrayɛl bɨ, kɨya bɨle te pɔɗɛ gɨ da kondɨwadɨge a duroyge bɨ. Bɨ ban na hɨnga ga kɨya gɨle Kumu bɨ, kalaŋ kɨya sayɨn̰ danayi dan̰ kɔl bɨ. 35Na Ban ba kɨya dɔrɛ te ɨrɨme gɨ da kondɨwadi kalaŋ ga woy kɨɗɨn̰ wɔsɛdɨge gaŋ daa. Bɨ me-hɨndi di ni Mari kalɨn̰ ma, me kɨya sɔlɛ cɨn̰-n̰age hɨn̰ ungo gɨ kan jibiige a bamandaŋdi gɨŋ, gayge car dan̰ sɛw wo̰.»

Ana ye kɔl dan̰ guson̰ Kumu

36A duroy ƴaa di da Kumu gɨ da Jubɨ gɨ nee le kalɨn̰ ma, tama ɗe-yɔɔ-kɔl-gɨ-Kumu-ba-yɔɔ di esi di kan toge Ana ɨre nee. Hɨndi na Panowɛl turmoy a te wɨn̰je gɨ da Ajɛr gɨŋ. Kɨɗɨn̰ ga tama di nee le ƴee bara na, hɨndi gor ƴaa danayi ɨlge jurgum: 37Ɨni na, kudurɔɔ le ma. Ayɨn̰ toy a wɔlɛdi gɨ nee gɨŋ le, hɨndi som ban̰di-gulɔŋ gɨŋ ɨlge toy-margɨm-cay-poɗɨn̰. Hɨndi aya tɨbaa dɨbɨ doŋ ɗa ƴaa-di-da-Kumu coŋ naŋ. Hɨndi lee gɨye gɨ da Kumu duroy son̰do dan̰ tɨwa di ɨni bɨ. Dan̰ haye kɨbɨ bɨ, dan̰ ɔlɛ Kumu bɨ. 38Kɨɗɨn̰ ga nee gaŋ le bɨ, hɨndi bugoŋ dɛj nee, hɨndi hɨram Kumu gɨɗaŋ nee bɨ. Hɨndi ye Kol kɨye le, bɨn̰ kalaŋ nɔm ga ba amge wɔlɛ gɨ Kumu kɨya dɔrɛ cɨn̰-n̰age a cay kalaŋ ga Jerusalɛm le. 39Kɨɗɨn̰ ga Jɨsɛb dan̰ Mari dɨɗɨge kɨbɨ gasɨn̰-kɔl gɨ da Ba-gulondɨge gɨ ay bɨge le, kan jogɨn̰ge dan̰ Jesu a cay gulɔŋ koge gɨ Najarɛt a cay gɨsəŋ ga Galile. 40Kɨye le malgɨ jɨn̰ tumɔ tumɔ bɨ, gusi osɨ kəŋ kəŋ nee bɨ. Cɨn̰-muɗɔlɛ koyi say cay mɨgayi gɨŋ jɨn̰ tumɔ tumɔ bɨrɨŋ gɨsɨn̰ gɨ ƴen̰ cɨn̰ Kumu.

Jesu or duroy ƴaa di da Kumu gɨ da Jubɨ

41Ɨlge, dan̰ ɨlge, Jɨsɛb dan̰ Mari godɨrdege a Jerusalɛm kɨya loon̰ kɨdɨrɛ gɨ ni Pakɨ gɨ da Jubɨn̰əŋ. 42Kɨɗɨn̰ ga Jesu ɨlgedi ɓal mɔjɨ-cay-sɔɔ ɨni na, Ban or dan̰ kandi hɨn̰ gɨ kan ba leedege ɨlge dan̰ ɨlge le. 43Ɨni na, kɨɗɨn̰ ga kɨdɨrɛ le toyi ayaŋ bɨ, kan sayge kɨya jɔgɛge na, Jesu gɨ ni kurondɨge le baa kardɨge a Jerusalɛm, lee gɨ kandi sɨlage gɨ ban na baa karu naŋ. 44Kan na, kan ɨrɨmge kuduroyge yege gɨ ban na or naa dan̰ kamdɨge ka-ɔrɛ tɨrga ga ɗaŋ. Kan or gɨyəŋ lee wɔlɛ pɨna pa dɨm ma maliige duroy kandɨge bɨ, duroy kan ga ka-ɔrɛ tɨrga danage bɨ ƴee. 45Ama kɨɗɨn̰ ga kan wayayige naŋ na, kan bɨlege pɨla cay tɨbayge dɨŋ jogɨge Jerusalɛm. Kan malige gon̰ kɨɗɨn̰ nɔm. 46Wɔlɛ sɨbɨdi gɨŋ na, kan wayige na a duroy gulɔŋ ƴaa-di-da-Kumu dɨŋ, Jesu som a duroy ka-gɨlɨn̰ kalaŋ gasɨn̰-kɔl gɨ da Moyis, je kɔl koge bɨ, ɨngɨrge kɔl cay nee bɨ. 47Kalaŋ nɔm ga ba jege kɔl gɨ Jesu ba ye le, kɔl kayge sɛl sɛl kɨya cɨn̰-muɗɔlɛ toy bɨ, kɨya jɨba di Ban orɨn̰ kɨya dɨbɨn̰ dan̰ kɔl cay nee bɨ. 48Kɨɗɨn̰ ga Jesu kandi solige na, kɔl kayge sɛl sɛl. Ƴoyi ɨngɨrii ye hɨn̰: «Haj! Kuronɨ, na kɨya wa ma mɨn̰ leeni hɨn̰ wo̰ ga? Sɨla! Ni-gandi dan̰ ban̰ sɔɗɨmɔŋ kuduroyni baa dugo naŋ, ni darin̰ gorɨn̰ cay kɨɗɨn̰ gaŋ nɔm nɔm.» 49Jesu dɨbɨge cay nee yege hɨn̰: «Kɨŋ daraŋ na kɨya wa ga? Kɨŋ sɨla hɨn̰ gɨ ɨŋ kɨya sɔmɛ na duroy ƴaa di da Banɨ dɨŋ naŋ ga?» 50Ama kɔl gɨ Jesu ba ye le, kandi sɨlage kɨradi pɨna naŋ.

51Ban been̰ kandi ga ka-woyi le kɔl nee cɔb cɔb, hɨn̰ gɨ ban ba leede tumɔ le. Bɨ ban jogɨ danage ɨndi toge di Najarɛt. Ƴoyi di ni Mari le, ɨrɨm cay kɔl gɨ cay wase bɨ, cay kɔl gɨ karu bɨ, cay hɨnga nɔm ga ba lee gusɨge bɨ, ɗa kudurɔ hala gɨybəŋ cay nee naŋ. 52Jesu malgɨ jɨn̰ tumɔ tumɔ bɨ, cɨn̰-muɗɔlɛ koyi say cay mɨgayi gɨŋ jɨn̰ tumɔ tumɔ bɨ. Ban ƴee cɨn̰ Kumu bɨ, ƴee cɨn̰ kalaŋ nee bɨ.

Currently Selected:

Lug 2: gab

Highlight

Copy