Gɨye-lɔɔ 5

Ananɨyas dan̰ Sapira

1Ama ungo gɨ pɨna wo̰ gusondi na Ananɨyas bɨ, tamdi gusɔndɔ na Sapira bɨ. Saɗɨge kɨbɨge pɨna dan̰ tamdi bɨ, an̰ge kɨɗɨn̰ kage pɨna kɨl coŋ. 2Kan say bee noyge pɨna dan̰ tamdi corɨn̰ kɨway gursu kɨɗɨn̰ le wosɨ dugo bɨ, ɨrgan̰ge dan̰ to di baa le beege tumoy ka-gɨre-gɨye bɨ, yege gɨ na kɔɗɨdo’a. 3Ɨni na, Pɨyɛr ɨngri yeyi hɨn̰: «Ananɨyas, na kɨya wa ma mɨn̰ lee hɨnga ga Sidan yen̰ le ga? Kɨya wa ma mɨn̰ yen̰ Turnɔ ɗe-kuduroy-bɛrɛ poy bɨ, mɨn̰ dor kɨbɨ gursu da kɨɗɨn̰ le wosɨ kɨwa dugo ga? 4Kɨɗɨn̰ kan̰ le ji ɓala ame dɨle kɨle naŋ ga? Wala kɨɗɨn̰ ga ji ba kɨl le, hɨnga ga ji ba gey loon̰ dan̰ gursudɨge le, ji ɓala loon̰ naŋ ga? Bɨ ji lee na mɨna ma mɨn̰ ojɨ kuduron̰ kɨya lɔɔ hɨnga ga nee le ga? Na kalaŋ ma mɨn̰ yage kɔl poy naŋ, ama na Kumu.»

5Kɨɗɨn̰ ga Ananɨyas je kɔl gɨ nee le ɨni na, ban baa gɨrɨj ma. Bɨ kalaŋ nɔm ga ba jege koldi le, hundɔrɔ gɨ gumu leege. 6Marɨne sayge nongɨriige dan̰ bagɨda bɨ, orɨn̰ge danayi ɨmgiige.

7Karɨn̰ tɨwa ɓal sɨbɨ kardi nee ɨni na, Ananɨyas tamdi ɨrga andaŋ cayge. Hɨndi sɨla hɨnga ga ba pɨde tumɔ le naŋ. 8Pɨyɛr ɨngɨroo hɨn̰: «Yaŋ ƴee bɨ, na koɗɨdi gursu da kɨɗɨn̰ ga kɨŋ kɨl le ba kɛ ga?» Bɨ hɨndi dɨbii cay nee hɨn̰: «Ho’o! Na koɗɨdi gursu le ba kɔ.»

9Pɨyɛr jɨga ɨngɨroo ɗaŋ coŋ hɨn̰: «Kɛ, na kɨya wa ma magɨŋ bee noygɨŋ pɨna dan̰ kudurɛɛ kɨya malɨn̰ kɨbɨ Turnoy Ba-gulɔŋ ga? Sɨla kan ga ba ɨmgɨgɨ kudurɛ le noy tɨbayge ba yaga doŋ kɔ. Kan kɨya aynege orɨn̰ dɛnɛɛ bɨ.»

10Kɔl gɨ kɨbɨna kɛ bɨ, hɨndi ba gɨrɨj ma tumoyi Pɨyɛr. Kɨɗɨn̰ ga karɨn̰ marɨne le andaŋge ƴen̰ na, kan wayge na gundo dugo ɨni. Kan ayooge orɨn̰ ɨmgooge kɨway kudurɔɔ bɨ. 11Hundɔrɔ gɨ gumu lee Ka-Daye bɨ, lee kalaŋ nɔm ga ba jege kɔl gɨ nee le bɨ.

Hɨnga ga ni beli ga toyge kan̰dɨge kan̰dɨge

12Hɨnga ga ɗɨn̰ cɨn̰-kɨɗɨn̰ bɨ, hɨnga ga ni beli bɨ lee gusɨge tɔgɨ, duroy karɨn̰ Ɨsɨrayɛl dan̰ kobɨ ka-gɨre-gɨye. Kan nɔm beege kuduroyge pɨna dayɨn̰ge kɨɗɨn̰ pɨna te dabaŋ gɨ da Salomo gɨŋ, gɨ kan leege dan̰ garma le. 13Ungo gɨ ɗaŋ gɨ gey dayaŋ danage le unɔ. Ama karɨn̰ Ɨsɨrayɛl nɔm geygege tɔgɨ. 14Kondɨwadi kalaŋ ayge kuduroyge bɨn̰ Ba-gulɔŋ Jesu, ban̰aŋ bɨ, kandɨ bɨ, bugoŋge cay kamdɨge gaŋ jɨn̰ nee nee. 15Kalaŋ ga cay ƴaa-di-gumu dɨŋ lɨbɨgage ka-hɔmɨn̰ɛ cay kuyo koge gɨŋ bɨ, cay gasɨlaŋ jala gaŋ bɨ, ɨrgan̰ge danage siige te gɨyəŋ gɨ woli gɨŋ gɨ Pɨyɛr orɨn̰ nee, ɗe gɨ kɨɗɨn̰ ga Pɨyɛr na pɨdɨ na, turnoyi na ɨsɨbɨ ga pɨna duroyge. 16Kondɨwadi kalaŋ ga boy karɨn̰ ƴaa ga bongi cay ƴaa-di-gumu di Jerusalɛm hurbonge dan̰ gɨre ɨrgage. Kan ɨrgan̰ge dan̰ ka-hɔmɨn̰ɛ bɨ, dan̰ kan ga turnɔ di ɨsɨni gɨlɨn̰-cɨndɨge mɨrɨn̰tɨn̰i bɨ. Kalaŋ nɔm ga nee le poɗɨge.

Gɨlɨn̰ge ka-gɨre-gɨye cɨn̰

17Kɨɗɨn̰ ga cɨn̰-pɨɗɨma say lee ka-cay ka-bɔgɛ kɨbar nɔm, dan̰ kalaŋ nɔm ga ba ɨre danage ga na Sadusɨn̰ɛn̰əŋ le. Kan ojɨge gɨ ni lɔɔ hɨnga. 18Kan donge ka-gɨre-gɨye beegege dangay dɨŋ di woy ojɨ cay kalaŋ nɔm. 19Ama dan̰ duroy son̰dodo dɨŋ na, ba-ƴɔbɛ gɨ daa nii gɨ da Ba-gulɔŋ gɨ pɨna wo̰ ɨrga haŋgɨ kɨbɨ ƴaa dangayn̰əŋ bɨ, dorge orɨn̰ danage doŋ bɨ, yege hɨn̰: 20«Nagɨŋ ɨragɨŋ ɨre duroy gulɔŋ ƴaa-di-da-Kumu dɨŋ bɨ, tɨgagɨŋ bɛrnɛ kol sɔmɛ-bɨra gɨ hɨrɨwa nɔm bɨn̰gɨŋ kalaŋ ga a boy nee.»

21Kan jege kɔl gɨ da ba-ƴɔbɛ gɨ daa nii le, lee gɨ kan andaŋge dan̰ jogɨɗu cururu, orge ɨre duroy gulɔŋ ƴaa-di-da-Kumu dɨŋ, kɨya gɨlɨn̰ kalaŋ hɨnga. Mangɨl gɨ da ka-cay ka-bɔgɛ kɨbar ɨrga bugoŋ ɨni na, ban bɨ, kalaŋ ga danayi bɨ, teege ka-bɔyɛ kɔl ga gɨmdəŋ ga da kalaŋ ga ni Jubɨ bɨ, kan ga muɗoldoŋ ga da te wɨn̰je gɨ da Ɨsɨrayɛln̰əŋ bɨ, dayɨn̰ge cayge pɨna bɨ, gɨyge kardi ka-gɨre-gɨye ga woyge ƴaa dangay dɨŋ le, ɗe kan na ɨrgan̰ danage. 22Ama kɨɗɨn̰ ga asɨgarn̰əŋ ga ka-ame ƴaa dangay le ɨrgage bugoŋ ƴaa dangay dɨŋ na, kan wayagege naŋ bɨ, bɨlgɨge cayge jɨga dorɨn̰ge ka-gɨyge le, yege hɨn̰: 23«Ni way kɨbɨ ƴaa dangay le, kɨɗɨn̰ lugoŋdi gɨŋ kɛgɛgɛ bɨ, ka-ame kɨbɨ ƴaa dangay le, ɨrege kɨbɨ nee bɨ, ama kɨɗɨn̰ ga ni haŋgɨ kɨbɨ ƴaa dangay na, ni waa ungo pɨna boy nee naŋ.»

24Kɨɗɨn̰ ga ba-cay ba-ame ƴaa-di-da-Kumu bɨ, ka-cay ka-bɔgɛ kɨbar nɔm bɨ, jege kɔl gɨ nee le na, waage cay tɨbayge naŋ kɨya cay ka-gɨre-gɨye bɨ, ɨngɨrɨn̰ge gusɨge kɛ na wa ba lɔɔ hɨnga ga? 25Ama ungo gɨ pɨna wo̰ ɨrga andaŋ cayge yege hɨn̰: «Kalaŋ ga sɔɔ ga kɨŋ ba beege dangay dɨŋ le, ɨrege gɨlɨn̰ge kalaŋ kɔl a duroy gulɔŋ ƴaa-di-da-Kumu dɨŋ nee.» 26Ɨni na, ba-cay ka-ame ƴaa di da Kumu le, orge dan̰ kalaŋ kay or ɨrgan̰ dan̰ ka-gɨre-gɨye jaŋ dɨle lɔɔge hɨnga ga homi. Kɨya wa kan hɨndarge gɨ kalaŋ na kɨya worɨn̰dige dan̰ oru dɨɗɨge. 27Lee gɨ kan ɨrgan̰ge danage bɨ, orɨn̰ siige tumoyi ka-bɔyɛ kɔl ga gɨmdəŋ bɨ. Mangɨl gɨ da ka-cay ka-bɔgɛ kɨbar ɨngɨrge hɨn̰: 28«Ni nargɨŋ gɨlɨn̰ kalaŋ kɔl dan̰ guson̰ ungo gɨ nee le bɨ, ni yəgɨŋ koldi arɨn̰ carara bɨ. Ama ba woy kɛ na, kɨŋ gɨlɨn̰ kalaŋ kɔl ɗe ƴee kɨɗɨn̰ cay ƴaa-di-gumu di Jerusalɛm nɔm bɨ, kɨŋ dar gɨ ɗe kɨbardi ungo gɨ nee le, na jɨge ƴɨma cayni bɨ.» 29Ama Pɨyɛr dan̰ ka-gɨre-gɨye dɨbɨge cay nee yege hɨn̰: «Naa wa wa kalɨn̰ ma jɔɔ kɔl kɨbɨ Kumu ba kuɗa ɗɨn̰ jɔɔ kɔl kɨbɨ kalaŋ. 30Kumu gɨ da mon̰inagɨŋ le boy Jesu gɨ kɨŋ ba gagɨli cay sɨya-gɨ-dagɨli gɨŋ dɨɗii le lɨbii. 31Na ban ma Kumu ayi si a cay kobi gɨ bara gɨŋ hɨn̰ kɨlma wo̰ bɨ, ba-pɔɗɛ kalaŋ bɨ, ɗe gɨ te wɨn̰je gɨ da Ɨsɨrayɛln̰əŋ na wan̰ge gɨyəŋ gɨ ni bɨlin̰ gɨye-lɔɔdɨge, ɗe Kumu na ɗen̰ kuduroyi jal a cay ɨsɨna koge bɨ.» 32Na-gandi bɨ, Turnɔ ɗe-kuduroy-bɛrɛ di Kumu bɨn̰ kan ga ka-jɔɔ kɔl koyi bɨ le, nana tɨmon̰ ga da hɨnga ga lee gusɨge le.

33Kɨɗɨn̰ ga kan jege kɔl gɨ nee le ɨni na, kuduroyge homge gɨɗaŋ, lee gɨ kan gey dɨɗe ka-gɨre-gɨye le coŋ. 34Ama ungo gɨ pɨna wo̰ say daa duroy ka-bɔyɛ kɔl cay Jubɨn̰əŋ. Ungo gɨ nee le na Parɨsɨn̰a, gusondi na Gamalɨyɛl. Ban na ba-gɨlɨn̰ kalaŋ gasɨn̰-kɔl gɨ karɨn̰ Ɨsɨrayɛl nɔm yege koldi kuɗa. Ban say daa ɨngɨr gɨ kan na andan̰ dan̰ ka-gɨre-gɨye doŋ dḛ dɨm. 35Kardi nee na, ban ar kɔl dan̰ ka-bɔyɛ kɔl cay kalaŋ ga ni Jubɨn̰əŋ yege hɨn̰: «Kɨŋ kalaŋ ga Ɨsɨrayɛl, ɗagɨŋ muɗɔlɛ cay gusɨgɨŋ gɨŋ. Ɨrɨmgɨŋ kuɗa tumɔ pa dɨm ma magɨŋ leen̰ ka-gɨre-gɨye hɨnga ga ɨsɨni ƴee. 36Hɨngɨŋ kɨya cay Tedas, kɨya wa wɔlɛ gɨ pɨde gɨŋ le, ban say dan̰ cay gusi koyi lee gusi leen̰ ungo gɨ gumu. Na toy di hɨn̰ wo̰ ma, ban̰aŋ ɓal hɨn̰ aru poɗɨn̰ wo̰ bugoŋge kardi. Ama kɨɗɨn̰ ga kan dɨɗii coŋ ɨni na, kalaŋ ga bugoŋge kardi le, busdoŋge pɨna pɨna coŋ, lee gɨ hɨnga ga ban ba si toyge le, bɨle na hɨnga ga kalɨn̰ wo̰. 37Kardi Tedas na, ungo gɨ pɨna wo̰ gɨ a cay gɨsəŋ ga Galile gaŋ, gusondi na Judasɨ jɨbɨ say bɨ dor dɨmdɨrdi kalaŋ bee toyi. Na dan̰ wɔlɛ gɨ kan sɨn̰ guson̰ kalaŋ duroy magtubu di ni ɗoŋsɨn̰ kalaŋ dɨŋ. Judasɨ dor kalaŋ bee kardi. Ama kɨɗɨn̰ ga kan dɨɗii vbiŋ coŋ na, kalaŋ ga bugoŋge kardi le, busdoŋge pɨna pɨna nɔm coŋ. 38Haw kɛ na aŋ yəgɨŋ, ayagɨŋ gusɨgɨŋ sɛdɨ coŋ, ɗagegɨŋ ɗe orge. Kɨya wa kɔl koge na saa na gusi kalaŋ na, kɨya ɨre dugo kan̰di hayi. 39Ama hɨnga lɔɔdɨge na saa na gusi Kumu na, kɨŋ kɨya ɓale mɔndɛ naŋ bɨrɨŋ. Kɨŋ ɗa baa bɨle ka-dɨbe kɨmbɨl dan̰ Kumu.» 40Ɨni na, kan jɨgage te ka-gɨre-gɨye ɗaŋ coŋ bɨ, kan somdɨge dan̰ suroy bɨ, narge yɔɔ kɔl dan̰ guson̰ Jesu pa dɨm ma kan ɗege daa ƴee. 41Ka-gɨre-gɨye andaŋge ɗege kɨɗɨn̰ bɔyɛ kɔl ga da kalaŋ ga ni Jubɨ dan̰ gusi-mɔwa. Kɨya wa Kumu solge gɨ kan na ɓal kɔjɛ hɨnga ga ni gɨle-cɨn̰ ga andaŋ cayge kɨya cay guson̰ Jesu. 42Kan gɨlɨn̰ kalaŋ kɔl bɨ, teen̰ge bɛrnɛ Kɔl-gɨ-Ɗari gɨ da Jesu-Kɨris bɨ, dan̰ wɔlɛ pɨna pɨna a duroy gulɔŋ ƴaa-di-da-Kumu dɨŋ bɨ, a duroy ƴaadɨge dɨŋ bɨ.

Currently Selected:

Gɨye-lɔɔ 5: gab

Highlight

Copy