मत्ती 21
21
येशुगी यरुशलेम्दु घङ् जेप्प घयेत् २१:१–२२:४६
येशु भोङ्गुल स्यो़म्बे यङ्ल खोङ्ल तो़प्प पुब १-११
1हुनी खोङ्जोसो यरुशलेम्गी छीगल यो़क्केन् ओलीप्की लदोक्की थप्स्यीगी युगङ् बेथ्फागे सीस्स दील ॱलीच्च्येम झ्यीनी, येशुगी रोरङ्गी ॱलोप्टुक्प ॱङील हीन्दुक् सीन्न तङ बेत्। 2खीत्रङ् ॱङीबु फागी युगङ् फाल ज्युक्। ॱनी फागी युगङ् हुल स्युनी, हुदु भोङ्गु मेज्यम् च्यीक् तान स्यक्प खीत्रङ्ल ठेक्केन् बेत्। ॱनी हुगो खीत्रङ्गी तङ्न हीदु ठीक्लेत्। 3ॱनी हीगी ढीक्ल खीत्रङ्ल मी तम् ढीज्युङ्न ॱनी, हुल हीगो चोव ज्यीन्दक्ल गो़ब झ्युङ्सोङ्। हीगो खोङ्गी ज्योक्पु ॱलोक्न तोङ्गेन् बेत् सीन्न ॱस्यो़च्च्यीत्। 4ॱनी म दी हीगी केच्च्य हीगो कलुङ् ॱस्यो़क्केन् च्यीक्की ॱस्येप्पे केच्च्य हीगो डुप्च्येल झ्युङ बेत्।
5सीयोन्गी मी घयेत्ल हीन्दुक् सीन्न ॱस्यो़त्। खीत्रङ्गी ज्याबु ॱनोम्ज्युङ् झ्यीन भोङ्गी़ टुगु च्यीक्ल स्यो़न्न खीत्रङ् च्याल युङ्गेन् बेत् सीर थो़ङ्गेन् बेत्। (जकरीया ९:९)
6ॱनी ॱलोप्टुक् ॱङीबु दी फीन्न येशुगी घङ् ॱङाब दी झ्यीन 7भोङ्गु मेज्यम् दी ठीक्न युङ बेत्। ॱनी रोरङ्सो़ घो़ घयेत् दी हुगी भोङ्गु दीगी थोक्ल ज्यप्तेल्ल ज्यप्न, हुल येशु स्यो़न्न फीम्ब बेत्। 8उन मी छेत्मीत् यो़प्प बेत्। ॱनी हुब घयेक्की यरीगी रोरङ्सो़ घो़ घयेत् दी पीक्न लम्ल एल्ला तीङ्न फीम्ब बेत्। ॱनी यङ् यरीबे दोङ्बी़ ॱस्यवुल चप्न लङ्गक्ल एल्ला एल्ला तीङ्न फीम्ब बेत्। 9ॱनी खोङ्गी एल्ला डोगेन् धङ् तीङ्ल युङ्गेन् घयेत् दीबे केत् छ्यीम्मु तो़न्न
दाऊद्गी ज्यी़त्ल होसन्ना। इगी चोव ज्यीन्दक्की छेन्नी झ्यो़ङ्गेन् दी ॱमेल्लम् च्येम्म हीनो। इगी थोरी चीदु स्युगेल्ल होसन्ना सीन्न झ्यीब बेत्। (ॱसुङ्रप्की गुल्लु ११८:२६)
10हुन्दुक् सीक्कील्ल येशुसो यरुशलेम् सार्ल स्युनी, ॱनी हुगी सार्की मी घयेत् दी जेङ् हुट्ट लङ्न, हुबे च्यीक्तङ् च्यीक्ल हुगो ॱसु बेक्क? सीन्न ढीब बेत्। 11ॱनी हुगी मी घयेत् दीगी लेल्ल हीगो गालीलागी नासरत् सार्की कलुङ् ॱस्यो़क्केन् येशु बेत् सीन्न ॱस्येप्प बेत्।
छ्यो़गङ्नी छोङ्बा घयेत् दीप्प १२-१७
12हुनी येशु हुगी छ्यो़गङ्गी च्यारीगी नङ्ल स्युन फीन्नी, उन यो़क्केन् नोगेन् धङ् चोङ्गेन् घयेत् दी कुरीक् दीत् तङ बेत्। पयीसक् ज्यीस्से ढज्योक् दीब, पुक्मु ॱरोक्ल चोङ्गेन् दीबे कुर्सी दीब कुरीक् दप् तङ बेत्। 13हुनी खोङ्गी हुब घयेत्ल ॱसुङ्रप्ल हीन्दुक् सीन्न ढीन दुक्।
ङे खीम् हीगो ॱसुव तोप्स बेत् सीन्न को़न्ज्योक्की ॱस्येप्प थो़ङ्गेन् बेत्। (यशैया ५६:७)
ॱनी हीन्न अक्, खीत्रङ् घयेक्की हीगो झ्यक्पागी छङ्ल सो़दुक् सीन्न ॱसुङ बेत्। 14ॱनी हुदु खोङ् च्याल मी स्यर्च्योक् धङ् घोङ्रीय गज्येन् ठीक्न युङ बेत्। ॱनी खोङ्गी हुब घयेत् ढक्तु ची़प्प बेत्।
15ॱनी येशुगी हुदु झ्यीबे यीक् छ्यीसीगी ले घयेत् धङ् भीज घयेक्की खोङ्ल दाऊद्गी ज्यी़त्ल होसन्ना सीन्न केत् ज्यक्प हुगी छ्यो़प्पो़न् चो छ्यीया धङ् छ्यो़डीम्गी चयेलम घयेत् दीबे थोङ्नी, हुब हुल सीगुक् लङ बेत्। 16हुनी हुब येशु च्याल युङ्न हुबे खोङ्ल भीज हुबे घन्ड सीगुक्क हुगो खोक्की ॱह घोगुक्क? सीन्न ढीब बेत्। ॱनी हील खोङ्गी ॱह घोगुक्। हीगी ढीक्ल ॱसुङ्रप्ल ढीन यो़क्केन् बेत्। खीक्की हीगो मत् डोब ॱनी?
भीज धङ् भीज च्युङेत्मु नुन्दुङ् च्येम्म घयेक्की खनी को़न्ज्योक् नीज्यरङ्ल तो़प्प पुज्येल हुब घयेत्ल नीज्यरङ्गी ॱलप्न टेप्प बेत् सीर यो़क्केन् बेत् झ्यीब बेत्। (ॱसुङ्रप्की गुल्लु ८:२)
17हुनी येशु हुबदङ् भीन सार्नी छ्यील थो़न्न युङ्नी बेथानी युगङ्ल स्यक्ल स्युदु फीम्ब बेत्।
अप्ले दोङ्बु कम्नर १८-२२
18हुनी नेम्बेत् दी थोर्च्याल येशुसो यरुशलेम्लरङ् फीम्ब बेत्। ॱनी डोये यङ्ल खोङ् ढोप्प तोब बेत्। 19ॱनी लम्गी छीगन अप्ले दोङ्बु च्यीक् थोङ बेत्। ॱनी खोङ् हुगी लोल फीन्न तेनी हुल दप्लोक् मेन्द, डलु घन्ड अक् मीप्प थोङ बेत्। हुनी खोङ्गी हुगी दोङ्बु दील रङ्ल ह हीनी झ्यीब दी नम्ल अक् डलु ॱमत् छ्याज्यीत् सीन्न झ्यीनी, हुगी दोङ्बु दी ॱस्यर्च्यक् कम्नर बेत्।
20हीगो ॱलोप्टुक् दीबे थोङ्नी हुब ॱह लेन व हुगो ज्योसी कम्सोङ् झ्यीब बेत्। 21ॱनी हील येशुगी ङे खीत्रङ्ल गन्दीय ॱस्येत् योङ्। घन्डे युङ्ज्ये ॱनो़ब ॱमत् खुर, खीत्रङ्गी छ्य दी गन्दीक्म यो़त्न ॱनी, हीगी दोङ्बु कम् डोव हीगो डस्सी छ्युवक् मेम्ब, लदोक् हुल रङ् डोप् भीक्ल छ्यु ज्यम्जो छ्यीम्मुल छर्ल ज्युक् सील्लोङ्दे हुगो युङ्गेन् बेत्। 22ॱनी खीत्रङ्गी गन्दीक्म छ्य स्यक्न ॱसुव तप्न ॱनी, हुनी घङ् स्यी़ब दी थोप्केन् बेत् झ्यीब बेत्।
येशुल घन्डे ॱवङ् यो़प्प सीन्न ढीब २३-२७
23हुनी येशु छ्यो़गङ्गी च्यारीगी नङ् दीलरङ् स्युन फीन्न हुदु खोङ्गी ॱलोप्स ज्यप्न टेप्प बेत्। ॱनी हुगी यङ्ल हुदु छ्यो़प्पो़न् चो छ्यीया घयेत् धङ् लुङ्बे गेम्बा चो छ्यीया घयेत् युङ्न हुबे खोङ्ल खो़त्ल घन्डे ॱवङ् यो़त् सीन्न हुन्दुक् झ्यीब झ्यीक्केन्? हुन्दुक् झ्यीन दीच्च्येमे ॱहक् खो़त्ल ॱसी़ बीन्ज्युङ? सीन्न ढीब बेत्। 24ॱनी हीगी लेल्ल येशुगी ङ अक् खीत्रङ्ल केच्च्य च्यीक् ढीगेन्। हुल लेम्बु ॱलोक्न ॱनी, हुनी ङे एक् घन्डे ॱहक्की हीन्दुक् झ्यीब झ्यीगुक्क हुगी लेन् दी ङे खीत्रङ्ल ॱस्येत् योङ्। 25युहन्ना बप्तीस्की बप्तीस्ल ॱलुक्केङ्गी लेमु हुगो घनी झ्युङ बेक्क? तेङ् यी़नी मल्ल न, न कोलीमी ङो़नी झ्युङ बेक्क? सीन्न ढीब बेत्। हुनी हुब रोरङ्सो नङ्दु हज्यरङ्गी तेङ् यी़नी सीन्न ॱनी, हुगी यङ् हज्यरङ्ल हुगो हीन्न, खीक्की घन्डल युहन्नाल छ्य मत् स्यक्प? सीन्न सीच्च्ये बेत्। 26ॱनी यङ् कोलीमी ङो़नी सीन्न ॱनी, मी घयेक्की युहन्ना कलुङ् ॱस्यो़क्केन् बेत् सीन्न ॱसम्गेन् बेत्। हुल ॱनी हज्यरङ् घयेत् ज्यीगेन् सीन्न लप्री चीय बेत्। 27हुनी हुबे लेन् दील ङीत्ल हुगो ॱस्यो़च्च्ये मीत् झ्यीब बेत्। ॱनी येशुगी लेल्ल हुगो हीन्न, ङे एक् घन्डे ॱहक्की ले झ्यीगुक्क ङ ॱमीत् ॱस्यो़त् झ्यीब बेत्।
भु ॱङीगी ढीक्ल ॱस्येप्पे पीदम् २८-३२
28हीनी हरुङ्द येशुगी हुबल खीक्की हील घन्ड सीगो़प्प? मी च्यीक्ल भु ॱङी यो़प्प बेत्। ॱनी हुगी भु च्यीक्ल हरीङ् रङ् गोङ्गोङ्गी स्यीङ्गल लेल ज्युक् सीन्न ॱङक्केन् बेत्। 29ॱनी हील भु दीगी ङ मीत् डो सीक्केन् बेत्। ॱनी सीन्न अक्, तीङ्ला यङ् हुगी ॱसीम् दी ज्युर्नी, डोगेन् बेत्। 30ॱनी पब दीगी यङ् भु च्यीक्पु दील अक् भु ॱएम्मागी दी डस्सीरङ् ॱङक्केन् बेत्। ॱनी हुगी लेल्ल पब ङ डोगेन् हीन् सीक्केन् बेत्। ॱनी सीन्न अक्, हुगो मीत् डोगेन् बेत्। 31हीगो झ्यीनी, पबे थुल यो़प्प दी भीज घङ्गो दीगी झ्यीब बेक्क? सीन्न ढीब बेत्। ॱनी हुबे लेल्ल भु ॱएम्मा दीगी झ्यीब बेत्। ॱनी येशुगी ङे खीत्रङ्ल गन्दीय ॱस्येत् योङ्। गोलदर् धङ् छ्येमु घयेत् खीत्रङ्ले त एल्ला को़न्ज्योक्की ज्यागक्ल स्युक्केन् बेत्। 32घन्ड हीन् सीन्न युहन्ना खीत्रङ् घयेत्ल लम् ढङ्बु तो़न्दु युङ बेत्। ॱनी खीत्रङ् घयेक्की हुगोल छ्य मत् स्यक्प बेत्। बोर रोसो गोलदर् धङ् छ्येमु घयेक्की छ्य स्यक्न यो़क्केन् बेत्। हीगो थोङ्न आक्, खीत्रङ् घयेक्की ॱसीम् ज्युर्न छ्य स्यक्न मत् युङ बेत् झ्यीब बेत्।
गोङ्गोङ्गी स्यीङ्ग सगेन् घयेक्की ॱलीङ्दम् ३३-४६
33ॱनी फीच्च्य येशुगी हुबल खीत्रङ् हरुङ् ॱलीङ्दम् ॱयोङ् च्यीक्ल नेन्। मी च्यीक्की रोरङ्गी स्यीङ्ग दील गोङ्गोङ् चुन हुल च्यारी तीक् खीरी ज्यप्न स्योक्केन् बेत्। हुनी गोङ्गोङ् चीर्च्येम च्यीक् ढी़न स्योक्केन् बेत्। ॱनी झ्यागीम् थोन्दीक्म च्यीक् इक् सो़न स्योक्केन् बेत्। ॱनी गोङ्गोङ्गी स्यीङ्ग दी मी ॱयोङ्म घयेत्ल फीस्सोल टेत्न रोरङ् लुङ्ब स्येल्ल डोगेन् बेत्।
34गोङ्गोङ्गी डलु दी़प्पे छो़त्ल ॱसप्तक्प दीगी रोरङ्गी फक् दी लीन्दु सीन्न ॱयोक्पु घयेत् तोङ्गेन् बेत्। 35ॱनी हुगी ॱस सगेन् दीबे ॱसप्तक्पे तङे हुगी ॱयोक्पु दीब सुङ बेत्। ॱनी च्यीक्ल दुङ बेत्। च्यीक् ॱसेत् तङ बेत्। च्यीक्ल दोर्तुङ् बेन्न ॱसेप्प बेत्। 36ॱनी ॱसप्तक्प दीगी यङ् रोरङ्गी ॱयोक्पु ॱयोङ्म ॱएम्माले मङा तङ बेत्। ॱनी हुबल अक् हुन्दुक् दीरङ् झ्यीब बेत्। 37हुनी स्युक्ला ॱसप्तक्प दीगी ङरङ्गी भुल त हुबे घन्ड अक् मीत् झ्यीप्प, थोङ् झ्यीक्को़ट्टो ॱनो़न भु दी तङ बेत्। 38ॱस सगेन् दीबे ॱसप्तक्पे भु दी युङ थोङ्नी, हुबे रोरङ्सो नङ्दु हन्देन् त ॱसप्तक्पे भु दीरङ् ॱलीच्च्युङ्। ह डो। हुगो ॱसेत्तोङ्। ॱनी हुगी फस्स्यी मस्स्यी घयेत् दी हज्यरङ् झ्यीदोङ् सीन्न ढो़ झ्यीब बेत्। 39हुनी ॱसप्तक्पे भु दी हुबे सुङ्न स्यीङ्गे नङ् दीनी ढी़त्न तो़न्न ॱसेत् तङ बेत्।
40हुनी गोङ्गोङ्गी स्यीङ्गे दक्पु दी युङ्नी ॱस सगेन् दीबल हुगी घन्ड झ्यीक्केन् बेक्क ॱनी? सीन्न येशुगी हुबल ढीब बेत्। 41ॱनी हीगी लेल्ल हुबे हुन्दुक् झ्यीबे मी अयेक्प घयेत् खोङ्गी ॱसेत् तोङ्गो़ट्टो। हुनी गोङ्गोङ्गी डलु दी़प्पे छो़त्ल रोरङ्ल फक् टो़क्केन् मी ॱयोङ्म घयेत्ल हुगी स्यीङ्ग दी फीस्सोल टो़क्को़ट्टो झ्यीब बेत्।
42ॱनी येशुगी हुबल ॱसुङ्रप्ल थो़ङ्गेङ्गी केच्च्य हीगो खीक्की नम्ल अक् मत् डोब ॱनी?
सोबो़न् घयेक्की घो ॱमीत् छ्यो़त्ल ॱसम्न पुर् तङे दो दी यङ् सुर्की दो घो छ्यो़स्स्योल झ्युङ्न युङ बेत्। हीगो चोव ज्यीन्दक्की जेप्पे ले बेत्। हील ङीत् ॱह लेसी छोर्कुक् सीर दुक् न ॱनी। (ॱसुङ्रप्की गुल्लु ११८:२२-२३)
43हीगो झ्यीनी ॱनी, ङे खीत्रङ्ल ॱस्येत् योङ्। को़न्ज्योक्की ज्यागक् खीत्रङ् घयेक्की लक्नी ठोनी डेबु छ्यागेन् ज्यी़त् ॱयोङ्ल टो़क्केन् बेत्। 44[ॱनी हुगी दो हुल मी ॱसु ॱनत्त दुगुक्क हुल च्यो़न् छ्यीम्मु युङ्गेन् बेत्। ॱनी हुगी दो हुगो मी ॱसी़ गोल फोक्कुक्क हुगी मी दी चम्रुक्ल डोगेन् बेत् सीन्न ॱसुङ बेत्।]
45ॱनी येशुगी ॱस्येप्पे ॱलीङ्दम्गी केच्च्य घयेत् हीगो उन यो़क्केन् छ्यो़प्पो़न् चो छ्यीया धङ् फरीसी घयेक्की रोरङ्सो़ ढीक्ल ॱस्येच्च्युङ् ॱनो़ब ॱह घोव बेत्। 46ॱनी हुबे येशु सुङ्ज्ये ॱनो़ब झ्यीब बेत्। ॱनी हीन्न अक्, मी घयेत्ल हुब ज्यीब बेत्। घन्ड हीन् सीन्न मी घयेक्की येशु कलुङ् ॱस्यो़क्केन् बेत् सीन्न ॱसम्गो़प्प बेत्।
Currently Selected:
मत्ती 21: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
